Luka 24
24
1Ammo boriyya guyya qara ka torbaani suni, afaani bari, nad'eeni taani gara awaala d'at'e, waan urgooftu ta mid'aasani geesite. 2D'akha awaala ira gangalchani argite, 3keesa duunnaani reefa Aabbo Yeso d'abde. 4Ato isiini waan kana mamtu, nami lama, ka woya bibilit'u qabu, worra bira ejaanje. 5Sodaatani, lafa ilaalani jennaani worri kaani waan jed'eeni, Maafi nama jiru awaala keesa barbaaddani? 6#Mat 16.21; 17.22-23; 20.18-19; Mar 8.31; 9.31; 10.33-34; Luk 9.22; 18.31-33 Inni arma injiru, ammo la kae. Waan inni isaniini jed'e qaabad'a, gaafa inni Galilaya jiru: 7Ilma Nama harka nama dabati kennani fannisani, gaafa sadeeso kau male jed'e. 8Worri dubbi isaa qaabate, 9awaala biraa yae, waan kana ch'ufu jara kud'ani tokotiifi jara d'ibileti hime. 10Nad'eeni ergattuti himte Mariamu Magdalenefi Yoanafi Mariamu haad'a Yakobotifi nad'eeni d'ibi ta worra woliini jirtu. 11Ammo jechi kunini odu d'araa worraati fakaate d'ugefachu didani. 12Taatule Petroni kae gara awaala utaale, d'aqe gajed'e awaala keesa millate, boofta taani ta koba jirtu arge, kae gale, waan tahe kana maadefate.
Yesoni karaati mullata
(Mariko 16.12-13)
13Guyyuma suni worra keesa nami lama gara olla toko ka Emmao jed'ani, ka haga maili torba Yerusalemu iraa fago, d'aqe. 14Duuba waan tahe kana ch'ufa woliini hasaani. 15Ato wolgaafatani hasaanu, Yesoni worrati d'iaate woliini deeme. 16Ilti worra sapupoofte, fuula isa wollaalaani. 17Inni waan worraani jed'e, Dubbini isani ato kara yaatani hasooftanu tuni maani? Miila d'aabatani oodani.
18Jara keesa namichi toko, ka Kleopa jed'ani, waan jed'eeni, Nami Yerusalemu keesa jiru, ka waan achiti d'io tana tahe ind'agayiini sii ch'alla? 19Inni, Waan akami? jed'eeni.
Worri waan jed'eeni, Waan Yeso Nazareti, ka waan tolchanifi waan dubbatanileeni raaga gudda tahe Waaqafi nama ch'ufa duraleti. 20Qaalole gugurdofi jari gugurdaani keenna, qorsumati geese, duisa itimurani mukha irati fannisani. 21Ammo nu qara aka inni Israeli baasu abdanne. Tana male, arriti guyya sadeeso haga wonti kunini taate. 22Ammalle, nad'eeni gari ta gumi teenna diirama kana gara awaala d'at'e guddo nu mamsiifte. 23Reefa isaa d'amnaani dachaate waan jette, Malaikaani nuti mullatte, Inni injira nuuni jette, jette. 24Jari gari ka nu woliini jiru gara awaala d'aqe, akuma nad'eeni jette arge, ammo isa d'abani.
25Jennaani Yesoni waan worraani jed'e, Isani ka waan raagi jed'e hurriftani ind'ugefanne guddo daalle! 26Kristoni akana gaargale duuba eege guddinna ufi seenu himmalle? 27Haga Musafi raagi ch'ufati iti keyate, waan isaa ka t'aafi keesati t'aafani ch'ufa worraa diige.
28Olla iti yaaniti d'iaannaani, inni aka waan dabru fed'u tahe; 29ammo worri isa sobate waan jed'ani, Fulla teenna buli, aduuni la d'iu geete, guyyaani amma alati inhamne. Duuba inni worra woliini bulisa tahe. 30Worra woliini sagale nyaatani tataani, jennaani qit'a fuud'e eebise, ch'ach'abse qoode. 31Ilti worraa banamte isa beekhani, ammo isa akanumati ufi duraa d'abani. 32Worri waan woliini jed'e, Hojja kara keesati nuuni hasae waan t'aafani nu diige, garaani nu bobaeyu?
33Hojuma suni kaani Yerusalemuti dachaani, jara kud'ani tokofi jara worra woliini jiru ka wolti woldae 34d'uguma Aabbooni yayu kae, Simoniti mullate jed'u argani. 35Jennaani worri waan kara keesati tahe odeese, aka inni qit'a ch'abse jennaani worri isa beekhe.
Yesoni jara ufiti mullata
(Matayo 28.16-20; Mariko 16.14-18; Yohana 20.19-23; Huji Ergattu 1.6-8)
36Ato worri waan kana hasau, Yesoni jiddu worraa ejate waan jed'eeni, Galchuumi isani nagaya? 37Guddo sodaatani nahani, waan ekhera argani sehani. 38Ammo inni waan worraani jed'e, Maafi naatani? Maafi garaa keesani keesati birefattani? 39Harkafi miila kiyya ilaala, aka nami naa. Naa qabad'a ilaala, imbeetani ekheraani aka kiyya kana nafafi lafele inqabdu. 40Akasi jennaani harkafi miila agarsiise. 41Duuba mamani gammadani akanaani d'ugefachu dad'abani, tanaafi inni waan jed'eeni, waan nyaatani arma qabdu. 42Qurt'umi diqo ta wodani iti kennani, 43inni fuud'e worra durati nyaate.
44Duuba inni waan worraani jed'e, Tunini dubbi tiyya ta anini isaniini jed'e, ato isani woliini jiru; wonti ti kiyya ta kitaaba Seera Musatifi ka raagootatiifi ka Faaru keesati t'aafani ch'ufti guutamu malte. 45Jennaani inni qalbi worraa bane, aka waan t'aafani hubatani, 46waan jed'eeni, wonti t'aafani, tana; Kristoni gaargale guyya sadeeso kau male, 47aka haga Yerusalemu iti keyatani iraa deebitifi araarama daba maqa isatiini gosa ch'ufati odeesu malani. 48Isaniti d'uga waan kanati. 49#Huji 1.4 Ilaala, waan Abbaani kiyya isaniti kakhate anati isanii erga, ammo dira keesati eega, haga jabeenni gubba isanii gad'ufuti.
Yesoni gubbati oldeebia
(Mariko 16.19-20; Huji Ergattu 1.9-11)
50 #
Huji 1.9-11
Jennaani haga Bethania worra geese, harka olfud'ate eebiseefi. 51Ato inni worra eebisu, biraa deeme gubbati oldeebie. 52Worri isa guddise, Yerusalemuti gammadaani dachaani, 53hojja ch'ufa Mana Waaqa keesati Waaqa faarsani.
Borana Bible © Bible Society of Kenya, 2019.
