Yohana 10
10
1D'uguma, waan anini isaniini jed'u, Nami moona hooliye karraani inseenne, ammo d'aatuuni koru, hattufi algala. 2Ammo ka karraani seenu tissitu hooliyeeti. 3Nami karra eegu isa duraa bana; hooliyeeni qonqo isaa d'ageeti, inni hooliye ufi maqa isitiini yaamate bobbaasa. 4Eegi ta ufi ch'ufa bobbaase, isi dura deeme, hooliyeeni isa gula yaati, waan isiini qonqo isaa beetuufi. 5Keessuma gula iyaatu, ammo ind'eeti, waan isiini qonqo keessuma imbeenneefi.
6Fakeenna kana Yesoni worrati hime, ammo worri waan inni jed'e imid'aafanne.
Yesoni tissitu dansa
7Tanaafi Yesoni ammalle waan worraani jed'e, D'uguma, waan anini isaniini jed'u, anini karra hooliyeeti. 8Nami na dura d'ufe ch'ufti hattufi algala; ammo hooliyeeni worra ind'ageenne. 9Anini karra. Yo nami naani olseene imbaafama; ammalle seene, gabahe d'eeda argata. 10Hattuuni ind'uftu, yo hatte, qalatte yakite male. Anini aka nami jireenna argatuufi d'ufe, aka guddisani argatani.
11Anini tissitu dansa. Tissituuni dansaani jireenna ufi maro hooliyetiifi baafti. 12Nami hujii qorani, ka hooliyeeni ta isaa intahiini, yo yaiini d'uftu lakise baqata; yaiini hooliye qabde basiti. 13Inni waan hujii qoraniifi baqata, maro hooliye injaalanneefi. 14Anini tissitu dansa. Anini hooliye tiyya beekha, isiileeni na beeti, 15#Mat 11.27; Luk 10.22 akuma Abbaani na beekhe, anileeni Abba beekhu. Anini jireenna kiyya maro hooliyetiifi baasa. 16Anini hooliye d'ibi qaba, ta moona tana intahiini; isiile d'ufuuni male; isiini qonqo tiyya ch'aqafte ch'iisa toko taati, tissituleeni toko.
17Maro waan kanatifi Abbaani na jaalata, maro anini jireenna kiyya baasuufi aka deebie fud'ad'u. 18Nami tokoleeni nara imfud'atu, ammo ani ufumaani baasa. Anini jabeenna baasuuni qaba, ammalle ka deebie fud'ad'uuni qaba. D'aamsa kana anini gara Abba kiyyati argad'e jed'e.
19Ammalle maro dubbi tanaatiifi Yahudiini gargari baate. 20Worra keesa nami hedduuni, Inni jinni qaba ammalle ya maraate; maafi isa ch'aqaftani? jed'e. 21Ammo nami gari waan jed'e, Dubbini tuni ta nama jinni qabutiiniti. Jinniini dandeete nama balla ilaa banti?
Yahudiini Yeso diddi
22Bara d'aamochaa suni guyya jila qaabacha gaafa Mana Waaqa Yerusalemu keesati banani eebisani, 23Yesoni Mana Waaqa keesa fulla ch'icha Solomoni deemu jira. 24Yahudiini isa marsite waan jetteeni, Atini guyya hagami nuti tantameesita? Yo atini Kristo taate, diideesi nuti himi. 25Yesoni waan jed'eeni, Anini ya isaniti hime, ammo isani d'ugefachu diddani. Hujiini anini maqa Abba kiyyatiini tolchu tunini naa d'ugeesiti. 26Ammo isani d'ugefachu diddani, waan hooliye tiyya intahiiniifi. 27Hooliyeeni tiyya qonqo tiyya d'ageeti, anileeni isi beekha, isileeni na gula yaati. 28Anini jireenna hegeri kennaafi, isiini haga jirtu indootu; nami tokoleeni harka kiyya keesaa imfud'atu. 29Abbaani kiyya ka isi naa kenne ch'ufa ira jira. Nami tokoleeni harka Abba dandae keesaa imfud'atu. 30Anaafi Abbaani kiyya nama taka.
31Jennaani Yahudiini ammalle d'akhaye guuratte isa had'u feete. 32Yesoni waan jed'eeni, Anini yayu huji dansa heddu, ta gara Abba kiyyati baate isani agarsiise; huji tana keesa tamiifi d'akhaani na haatani? 33#Law 24.16 Yahudiini waan jetteeni, Maro huji dansaatiifi si inhaanu, ammo maro atini Waaqa arabsiteefi si haana! Ammalle waan atini, ato namaatu, aka Waaqa ufi tolchiteefi. 34#Far 82.6 Yesoni waan worraani jed'e, Seera keesani keesati waan t'aafani Waaqi waan jed'e, Isaniini ch'uftinu Waaqoota. 35Nu imbeenna aka dubbini t'aafiini jettu ch'ufti hojja ch'ufa d'uga ammalle Waaqi worra inni d'aamsa ufii iti ergeeni Waaqoota jed'e. 36Na ammo Abba kiyyati na fohate lafati na erge, isani duuba maafi waan anini Ilma Waaqa ufiini jed'eefi, inni Waaqa arabsa naani jettani re? 37Yo anini huji Abba kiyya intolchine na ind'ugefatiina. 38Ammo yo anini tolche, yo na d'ugefachu baatanile, huji suni d'ugefad'a; aka isani aka dansa hubatani baratani, aka abbaani na keesa jiru, ka anileeni abba keesa jiru.
39Maro lameeso isa qabu fed'ani, ammo harka worraa duraa bahe. 40#Yoh 1.28 Ammalle Yesoni fulla Yohanani qara iti nama batise, ta galaana Yordanitiini gama d'aqe, achi tae. 41Nami hedduuni gara isaa d'aqe waan jed'e, D'uguma Yohanani akheekha intolchine, ammo wonti Yohanani waan nama kana dubbate ch'ufti d'uga. 42Nami hedduuni achiti isa d'ugefate.
Duisa Lazaro
Borana Bible © Bible Society of Kenya, 2019.
