Luke 19

Jesus na Zakeɔs

1Na ɔkɛhɛɛn Jeriko dɛ orutwa mu wɔ hɔ. 2Na hwɛ, ɔbarimba bi wɔ hɔ a wɔfrɛ no Zakeɔs a ɔyɛ towgyenyi panyin, na ɔyɛ ɔhonyanyi. 3Na ɔpɛɛ dɛ ohu Jesus ne nyimpa ban; naaso nyimpadodow no ntsi nna onntum, osiandɛ ɔyɛ akɔtsia. 4Na otutuu mbirika dzii kan kɔfoow ankye dua dɛ ɔrokɔhwɛ no, osiandɛ hɔ na ɔrebɛfa. 5Na Jesus dur hɔ no, ɔhwɛɛ sor, na ɔsee no dɛ, Zakeɔs, yɛ ntsɛm si famu, na ndɛ ɔsɛ dɛ metsena wo fie. 6Na ɔyɛɛ ntsɛm sii famu, na ɔdze dɛw bɛgyee no. 7Na dɔm no hunii no, hɔn nyina hwinhwiin dɛ, Ɔakɔ akɔsoɛ nyimpa a ɔyɛ dzebɔnyɛnyi. 8Na Zakeɔs gyinae, na ɔkaa kyerɛɛ Ewuradze dɛ, Ao Ewuradze, medze m’ahodze fa mekyɛ ehiafo; na sɛ menam ndabraba do magye obi ne biribi a, mobɔ ho mpɛn anan mutua kaw. 9Na Jesus see no dɛ, Nokwasɛm nye yi, ndɛ na nkwagye aba fie yi mu, osiandɛ no so yɛ Abraham ba bi no. 10#Mat 18.11 Na nyimpa Ba no baa dɛ ɔrobɔhwehwɛ na ɔabɛgye dza ɔayew no.

Sika Mpireguan ho Bɛ

(Matthew 25.14-30)

11 # Mat 25.14-30 Na woritsie no no, ɔtoaa do buu bɛ yi, osiandɛ nna ɔabɛn Jerusalɛm na dɔm no susuu dɛ amonmu hɔ ara na Nyankopɔn n’ahenman no ribeyi noho edzi. 12Dɛm ntsi ɔsee dɛ, Ɔdehye bi kɔr asaase bi do ekyirekyir dɛ ɔrekɛgye ahendzi, na ɔasan aba. 13Na ɔfrɛɛ no nkowaa du, na ɔdze mpireguan #19.13 MPIREGUAN: Iyi yɛ dɛm ber no ɔpaanyi no bosoom ebiasa akatua. du maa hɔn, na ɔsee hɔn dɛ, Hom mfa ndzi gua nkodu dɛ mebɛba. 14Na ne mamfoo no kyiir no, na wotuu abɔfo kaa no do kɛsee dɛ, Yɛmmpɛ dɛ oyi dzi hɛn do hen. 15Na ɔbaa dɛ ne nsa kaa ahendzi no na ɔsanee bae no, ɔhyɛɛ dɛ wɔmfrɛ nkowaa a ɔdze sika no maa hɔn no mbrɛ no, na onhu dza woedzi gua enyinya. 16Na dza odzi kan no bae bɛsee dɛ, Mo wura, wo pireguan no enya mpireguan du aka ho. 17Na ɔsee no dɛ, Mbo, akowaa pa: osiandɛ edzi ketseaba yi mu nokwar ntsi, dzi nkurow du do tum. 18Na dza otsia ebien no bae bɛsee dɛ, Mo wura, wo pireguan no enya mpireguan enum aka ho. 19Na ɔsee no so dɛ, Wo so dzi nkurow enum do. 20Na ɔbaako no bae bɛsee dɛ, Mo wura, hwɛ, wo pireguan a medze hyɛɛ duukuu mu siei no nye yi: 21na musuroo wo, osiandɛ eyɛ nyimpa a eyɛ dzen: efa dza emmfae nntoo hɔ, na itwa dza innduae. 22Ɔsee no dɛ, Wankasa w’anomu asɛm na menam do bobu wo atsɛn, akowaa bɔn. Inyim dɛ meyɛ nyimpa a meyɛ dzen a mefa dza memmfae nntoo hɔ na mutwa dza munnduae: 23na ɔyɛ dɛn ntsi na ammfa me sika annkɔto sikasesafo adaka mu, na meba a maabɛgye m’adze nye no ho nsiho? 24Na ɔsee hɔn a wogyina hɔ no dɛ, Hom ngye ne nsamu pireguan no, na hom mfa mma nyia ɔwɔ du no. 25(Na wɔsee no dɛ, Owura, ɔwɔ mpireguan du.) 26#Mat 13.12; Mar 4.25; Luk 8.18 Mese hom dɛ, obiara a ɔwɔ no, wɔbɛma no; na nyia onnyi no, dza ɔwɔ no mpo wɔbɛgye ne nsamu. 27Na m’atamfo a wɔammpɛ dɛ midzi hɔn do hen no, hom mfa hɔn mbra ha, na hom mboku hɔn wɔ m’enyim.

Jesus Kɔ Jerusalɛm Konyimdzi mu

(Matthew 21.1-11; Mark 11.1-11; John 12.12-19)

28Na owiee dɛm ka no, osii mu dzii kan dɛ ɔrokɔ Jerusalɛm.

29Na ɔbɛɛn Bɛtfage nye Bɛtani wɔ bepɔw a wɔfrɛ no Ngo Bepɔw ho no, ɔsomaa n’esuafo beenu 30dɛ, Hom nkɔ ekuroba a ɔda hom enyim no mu, na hom du mu a, hom bohu asoasopɔnkɔba a wɔamontan no a nyimpa bi nntsenaa do da: hom nsan no mfa no mbra. 31Na sɛ obi bisa hom dɛ, Ɔyɛ dɛn na hom resan no a, hom nse no dɛ, Ewuradze wɔ no ho hia. 32Na hɔn a wɔsomaa hɔn no kɔree kohun dɛ mbrɛ ɔkaa kyerɛɛ hɔn no ara. 33Na wɔresan asoasopɔnkɔba no, no wuranom see hɔn dɛ, Ɔyɛ dɛn ntsi na hom resan asoasopɔnkɔba no? 34Na wobuaa dɛ, Ewuradze wɔ no ho hia. 35Na wɔdze asoasopɔnkɔba no brɛɛ Jesus, na wɔtoow hɔn ntar guu no do, na wɔdze Jesus tsenaa do. 36Na ɔrokɔ no, wɔdze hɔn ntar sesɛɛw kwan mu. 37Na ɔrebɛn mbrɛ woribesian Ngo Bepɔw no, n’esuafo kuw no nyina hyɛɛ ase dzii dɛw, na wɔdze ndze kɛse yii Nyankopɔn ayɛw wɔ tum ndwuma a woehu nyina ntsi, 38dɛ,

Nhyira nye Ɔhen a

ɔnam Ewuradze dzin mu reba no!

Asomdwee wɔ sor,

na enyimnyam wɔ sorsor no ho!

39Na Farisiifo no binom a wɔwɔ nyimpadodow no mu no see no dɛ, Kyerɛkyerɛfo, twuw w’esuafo yi enyim. 40Na obuae see dɛ, Mese hom dɛ, sɛ woyinom mua hɔn ano mpo a, nkyɛ abo bɛtsea mu.

Jesus Su Gu Jerusalɛm Do

41Na ɔbɛnee no, ɔhwɛɛ kurow no sui wɔ do, 42dɛ, Sɛ ɔwo, ɔwoara so mpo, sɛ ndɛ inyim ndzɛmba a ɔfa asomdwee ho a nkyɛ oye! Naaso afei wɔdze esuma efi w’enyi do. 43Na nda bi bɛba wo do a w’atamfo bɔto pempe abɔ wo ho aprɔw, na wɔabɔ wo ho kɔntɔnkrɔn, na wɔaka wo ahyɛ mu wɔ mbea nyina, 44na woedwuruw wo egu famu, ɔnye wo mba a wɔwɔ wo mu, na worinngyaa wo mu ɔbo a ɔda bo do; osiandɛ ennhu wo ber a adom ntsi wɔbɔhwɛɛ wo no.

Jesus Kɔ Asɔrfi no Mu

(Matthew 21.12-17; Mark 11.15-19; John 2.13-22)

45Na Jesus kɔr asɔrfi no mu no, ɔhyɛɛ ase paam hɔn a wɔtɔn, 46#Isa 56.7; Jer 7.11 see hɔn dɛ, Wɔakyerɛw dɛ,

Me fie bɛyɛ asɔryɛbea,

na hom dze, hom ayɛ no edwotwafo tu.

47 # Luk 21.37 Nna ɔrekyerɛkyerɛ daa wɔ asɔrfi no mu. Na asɔfompanyin nye kyerɛwfo nye ɔman mu etsitsir hwehwɛɛ dɛ woboku no, 48naaso woennhu mbrɛ wɔbɛyɛ; osiandɛ ɔman no nyina dze hɔnho takyeer no ho tsiee no.

선택된 구절:

Luke 19: MFANBRPC

하이라이트

복사