Luke 18
18
Okunafo nye Ɔtsɛmbuafo bi ho Bɛ
1Na obuu hɔn bɛ bi dze kyerɛɛ dɛ otwar dɛ nyimpa bɔ mpaa daa, na ɔnntɔ bahaw: 2Ɔtsɛmbuafo bi wɔ kurow bi mu a onnsuro Nyankopɔn, eso ɔmmfɛr nyimpa. 3Nna okunafo bi wɔ kurow no mu; na ɔdze ne nkyɛn mbae ara bɛsee dɛ, Dzi m’asɛm na gye me wɔ me tamfo nsamu. 4Na ɔammpen ma ɔkyɛr kakra; na n’ekyir no ɔkae wɔ no mu dɛ, Munnsuro Nyankopɔn eso memmfɛr nyimpa, 5naaso osiandɛ okunafo yi rehaw me ntsi, mibedzi n’asɛm ama no, amma ɔaammfa ne ba a ɔba daa no ammbɛtseetsee me. 6Na Ewuradze see dɛ, Hom ntsie dza ɔtsɛmbuafo a ɔnntsen yi mpo reka. 7Ana Nyankopɔn nnkedzi ama ne mpamufo a wosu frɛ no adzekyee nye adzesaa? Aso ɔbɛkyɛr hɔn asɛm ho pii ana ɔaboa hɔn? 8Mese hom dɛ, obedzi asɛm agye hɔn ntsɛm. Naaso sɛ nyimpa Ba no ba a, ana obohu gyedzi wɔ asaase do anaa?
Farisiinyi nye Towgyenyi ho Bɛ
9Na obuu binom a wɔdze hɔnho twer hɔnho dɛ wɔtsen na wommbu nkaa no bi bɛ yi dɛ, 10Nyimpa beenu kɔr asɔrfi mu dɛ wɔrokɔsɔr; ɔbaako yɛ Farisiinyi, na ɔbaako so yɛ towgyenyi. 11Farisiinyi no gyinae sɔree wɔ no mu dɛ, Nyankopɔn, meda wo ase dɛ menntse dɛ mbrɛ nyimpa nkaa no tse, apempensifo, nkontompɔfo, nyefafo, anaa dɛ towgyenyi yi mpo. 12Midzi mbuada mpɛn ebien wɔ dapɛn mu; miyi dza mowɔ nyina do ebupɛndu du mema. 13Na towgyenyi no gyinaa ekyirekyir, ɔammpɛ dɛ ɔma n’enyiwa do kyerɛ sor mpo, na ɔdze ne nsa hwee koko do see dɛ, Nyankopɔn, hu emi dzebɔnyɛnyi mbɔbɔr. 14#Mat 23.12; Luk 14.11 Mese hom dɛ, Oyi dze bem saan ne fie mbom, kyɛɛn ɔbaako no: na obiara a ɔbɛma noho do no, wɔbɛbrɛ no adze; na obiara a ɔbɛbrɛ noho adze no, wɔbɛma no do.
Jesus Hyira Mbofraba
(Matthew 19.13-15; Mark 10.13-16)
15Na wɔdze hɔn mbɔdomaba so brɛɛ no dɛ ɔmfa ne nsa nka hɔn; na esuafo no hunii no, wotwuuw hɔn enyim. 16Na Jesus frɛɛ hɔn baa ne nkyɛn, na ɔsee dɛ, Hom mma mbofraba no kwan ma wɔmbra me nkyɛn, na mma hom nnsiw hɔn kwan, na woyi dɛm na Nyankopɔn ahenman no yɛ hɔndze. 17Meka no nokwar mu kyerɛ hom dɛ, Obiara a ɔnnkɛgye Nyankopɔn ahenman no dɛ abofraba no, ɔnnkɔkɔ mu da.
Ɔhonyanyi no
(Matthew 19.16-30; Mark 10.17-31)
18Na ɔpanyin bi bisaa no dɛ, Kyerɛkyerɛfo pa, ebɛnadze na menyɛ ma meenya onnyiewiei nkwa ayɛ medze? 19Na Jesus see no dɛ, Ɔyɛ dɛn na efrɛ me papa? Obiara nnyɛ papa gyedɛ ɔbaako: ɔno nye Nyankopɔn. 20#Eks 20.14; Deut 5.18; Eks 20.13; Deut 5.17; Eks 20.15; Deut 5.19; Eks 20.16; Deut 5.20; Eks 20.12; Deut 5.16 Inyim mbransɛm no, Mma nndzi ewu, Mma nnto awar, Mma nnwia adze, Mma nngye dasewia, Dzi w’egya nye wo na nyi. 21Na ɔsee dɛ, Yinom nyinara mifitsi me mbofraber mu na medzi do. 22Na Jesus tsee dɛm no, ɔsee no dɛ, Ɔda ho ka wo adze kor: kɔtɔn dza ewɔ nyinara, na kyɛ ma ehiafo, na ibenya akoradze wɔ sor, na bra bɛka mo do. 23Na ɔtsee yi no ɔyɛɛ no awerɛhow dɛ, osiandɛ ɔyɛ ɔhonyanyi mapa. 24Na Jesus hun no no, ɔsee dɛ, Ebɛn dzen na ɔyɛ ma hɔn a wɔwɔ ahonya dɛ wɔbɔkɔ Nyankopɔn n’ahenman mu! 25Na ɔyɛ mberɛw ma efupɔnkɔ dɛ obodua doroba enyiwa mu kyɛn dɛ ɔhonyanyi bɔkɔ Nyankopɔn n’ahenman mu.
26Na hɔn a wɔtsee no kaa dɛ, Dɛm a nna woana na wobotum agye no nkwa? 27Na ɔsee dɛ, Dza nyimpa nntum nnyɛ no, ɔnnso Nyankopɔn yɛ. 28Na Peter see dɛ, Hwɛ, yeegyaa hɛn ndzɛmba nyina na yɛabɛka wo do. 29Na ɔsee hɔn dɛ, Nokwar mese hom dɛ, Obi nnyi hɔ a oegyaa fie anaa yer anaa enuanom anaa awofo anaa mba wɔ Nyankopɔn n’ahenman ntsi, 30na onnkenya ho mbɔho pii wɔ ber yi mu, na wiadze a ɔreba no mu onnyiewiei nkwa.
Mprɛnsa a Jesus Reka no Wu Asɛm
(Matthew 20.17-19; Mark 10.32-34)
31Na ɔfaa duebien no na ɔsee hɔn dɛ, Hwɛ, yɛrokɔ Jerusalɛm, na ndzɛmba a nkɔnhyɛfo no akyerɛw no nyimpa Ba no ho nyina bɛba mu. 32Na wobeyi no ama amanamamfo, na wobesi no atwetwe, na wɔabɔ no adapaa, na wɔatoto ntafi egu no do; 33na wɔaka no mpire, na woeku no; na da a otsia ebiasa no ɔbɔsoɛr bio. 34Na hɔn dze wɔanntse iyinom mu biara ase, na asɛm yi sumaa hɔn, na woennhu dza ɔreka no.
Jesus Bue Onyifurafo Ohuafo bi Enyi
(Matthew 20.29-34; Mark 10.46-52)
35Na ɔbaa dɛ ɔbɛɛn Jeriko no, onyifurafo bi tse kwan nkyɛn reserɛserɛ adze; 36na ɔtsee dɛ nyimpadodow rutwa mu no, obisaa dɛ ebɛn asɛm rokɔ do? 37Na wɔkaa kyerɛɛ no dɛ Jesus Nazarɛtnyi no na ɔresen. 38Na ɔkaa mu see dɛ, Jesus, David ba, hu me mbɔbɔr! 39Na hɔn a wodzi kan no braa no dɛ ɔnka n’ano nto mu; na ɔnodze, mbom ɔtseaa mu dzendzen dɛ, David ba, hu me mbɔbɔr. 40Na Jesus gyinae, na ɔkaa dɛ wɔmfa no mbra ne nkyɛn; na ɔbɛnee no, obisaa no dɛ, 41Ebɛnadze na epɛ dɛ meyɛ mema wo? Na ɔsee dɛ, Ewuradze, nkyɛ meehu adze. 42Na Jesus see no dɛ, Hu adze: wo gyedzi agye wo. 43Na amonmu hɔ ara ohun adze, na ɔkaa no do, dze enyimnyam maa Nyankopɔn; na nkorɔfo no nyina hunii no, wɔdze ayɛyi maa Nyankopɔn.
Mfantse Bible © Bible Society of Ghana, 2011.
