YOHANES 9
9
I Yesus nukoa tau ko wuta nakawua
1Su tempo I Yesus kal᷊al᷊enge, I Sie nakawua tau ko wuta ko borong bou gandongang. 2Manga tumatuhu I Yesus nukina si Yesus, “Tuang Guru, nakurawe taumata i'i nipahinding wuta? Apa ual᷊ingu dosange si sane arako dosa ngi ma yamange?”
3I Yesus nusumimbahi, “I sie nawuta wal᷊inge ual᷊ingu dosange arako dosa ngu ghaghurange, kateho tadeau taumata makawua kawasa ngu Mawu Ruata nuhal᷊i su l᷊al᷊ung u watangenge. 4Pariwe borong l᷊ou i kite mambeng mukoa hal᷊i I Sie ko nundoi u Ia. Sarung mahuwi dang takoae ko sarung manga singkatau makapuhal᷊i. 5#Mat. 5:14; Yoh. 8:12Tintal᷊a Ia ene su dunia i'i, ko Ia kasasuangu dunia.”
6Suapangu bou nangul᷊i kere I Yesus nanguru su tana, dang nul᷊au ru-Nge e'e dingang u tana. Wuhue I Sie namuhangu tana e'e su mata ngu tau e'e. 7Wuhue nangul᷊i si sie, “Tamaite panguhau pahesu su kolam Siloam.” (Siloam mangal᷊enge ‘Niroi’) kuteu tau e'e natamai nanguhau u pahese. Su tempo e'e i sie nusul᷊e, i sie seng nakawua.
8Manga l᷊ampunge dingang u manga apang taumata ko l᷊inau horo nakawua si sie mundando kakindaghi, kaul᷊ie nangul᷊i, “I sie i'i wal᷊ingewe taumata ko hambake mangkate kakangiang kitang mundo kakindaghi?”
9Pia ko nangul᷊i, “Ore ko mang i sie.” Kateho pia l᷊ai ko nangul᷊i, “Wal᷊inge, i sie kitang masandighi musul᷊ung u tau e'e.”
Kateho tau e'e sisane nangul᷊i, “Ko ia i sie.”
10I sire nangul᷊ si sie, “Kirapa sarang i kau nakawua?”
11I sie nusumimbahi, “Taumata ko arenge I Yesus e'e nukua l᷊ota singkodo, bou e'e namuhangu e'e su mataku dang nangul᷊i, ‘Tamaiko panguhau pahesu su Kolam Siloam.’ Bou e'e ia natamai. Dang suapangu ia mbuae nanguhau, ia dingang seng nakawua.”
12I sire nukina, suapawe tau e'e?
I sie nusumimbahi, “Ia wugha.”
Tau Farisi nunundea l᷊aheu karaul᷊e e'e
13-14Silou e'e ko l᷊ou ngu Sabati su tempong I Yesus nul᷊au ru-Nge dingang u tana nipukoa tau ko wuta e'e nakawua. Kuteu tau l᷊inau ko wuta e'e niwawa sarang manga tau Farisi 15I sire mang l᷊ai nukina si sie minsang kirapa sarang i sie nakawua. I sie nusumimbahi, “I Sie namuhangu l᷊ota su mataku, wuhue ia nanguhau dang bou e'e ia dingang turusi nakawua.”
16I sire pirangkatau bou tal᷊oara u tau Farisi e'e nangul᷊i, “Ta mariadi taumata ko nukoa i'i asal᷊e bou Mawu Ruata, watu'u I Sie ta nangindakangu l᷊ou ngu Sabati.”
Kateho taumata ko wal᷊inge nangul᷊i, “Mumananie we taumata ko bardosa mukoa ko makal᷊aherang kiri i?” Bou e'e nariadi purarendehi su tal᷊oara i sire.
17Kuteu manga tau Farisi e'e sau nukina su tau e'e, “Kirapa tumuhu titongu su hal᷊i I Sie ko nukoa si kau nakawua?”
Tau e'e nusumimbahi, “I Sie nabi.”
18Kateho manga pangaha u tau Yahudi e'e ta mangimang himoneu taumata e'e ko mang tingari l᷊inau ko wuta dang su orasi i'i seng nakawua. Ual᷊ingu e'e i sire nukui ghaghurange, 19dingang nukina, “Tingari i'i ana u ko angkungu nipahinding ko wuta? Kirapa sarang i sie nakawua orasi i'i?”
20Ghaghurangu tau e'e nusumimbahi, “Tingari i'i ana i kami, dang tingari i sie ko wuta borong bou gandongang. 21Kateho i kami wugha minsang kirapa sarang i sie nakawua orasi i'i. Dang i sai nakakoa si sie nakawua, e'e i kami mang l᷊ai wugha. Pakinate si sie, i sie seng matilang; i sie sisanenge matitong sumimbahi.” 22I ma yamangu tau e'e nangul᷊i kere e watu'u i sire mataku su manga pangaha u tau Yahudi; watu'u i sire e'e seng singgighili, tadeau taumata ko mangaku-Ngi Yesus kere Ratung Mananal᷊amati, ta botonge l᷊ai sumu su wal᷊e pukakal᷊iomanengang. 23E'e sabapie i ma yamangu tau e'e nangul᷊i, “I sie seng matilang, pukinate si sie.”
24Bou e'e i sire sau nukui taumata l᷊inau ko wuta e'e, dingang nangul᷊i si sie, “Putewate ual᷊ingu i kau seng nangul᷊i ko nuhino. I kami matitong taumata e'e taumata bardosa.”
25Tau e'e nusumimbahi, “Apa I Sie bardosa arako ta,” Ia wugha. “Kateho titongku kitang simbau; ndahuwite ia wuta, orasi i'i ia seng nakawua.”
26Bou e'e i sire sau nangul᷊i si sie, “Apa nikoa-E si kau? Kirapa I Sie nukoa sikau sarang nakawua?”
27Tau e'e nusumimbahi, “Seng mbuae daku niwuke sikumu, kateho i kumu mandiri mundaringihi. Nakurawe i kumu sau mo mundaringihi? Arako i kumu mo l᷊ai makoa tumatuhu-E?”
28Bou e'e i sire mundohang si sie dingang nangul᷊i, “Ko i kau tumatuhu-E; i kami walinge! I kami tumatuhu si Musa. 29I kami matitong u Mawu Ruata seng mbua nudidato ngi Musa. Arawe dingang u taumata e'e, i kami wugha minsang bau apa asal-E.”
30Tau e'e nusimimbahi, “Mang tingari makaherang humoneu i kumu wugha minsang bo apa asal-E, sumbal᷊i i sie seng nakakoa si sia sarang nakawua. 31I kite matitong u Mawu Ruata ta mundaringihi taumata ko bardosa, kateho kitang su taumata mo mangadati Mawu Ruata, dang ko mukoa kao-E. 32Borong bou tita u dunia borong takoae ko nikaringihi pia manga taumata ko nakakoa taumata wuta borong bou gandongang nakawua. 33Boko taumata e'e wal᷊inge bou Mawu Ruata, i sie ta makakoa apa.”
34“Apa? Nisimbahi i sire. I kau ko napene u dosa borong bou nipahinding, i kau manintiro si kami?” Kute nanita bou e'e i sie nil᷊arang sumu su wal᷊e pukal᷊iomanengang.
Wuta su pangangimang
35I Yesus nakaringihi himoneu i sire seng nundiaga taumata e'e kumbahang sumu su wal᷊e pukakal᷊iomanengang. I sie nundea tau e'e mbuhue nangul᷊i si sie, “Apa i kau mangimang su Ahusu Taumata?”
36Tau e'e nusimimbahi, “Ko i sai I Sie, Tuan? Tul᷊ung ko habari tadeau ia mangimang si Sie.”
37“I kau seng nakawua si Sie,” nisimbahi I Yesus. “Ko I Sie su orasi i'i kapudidatonge dingang u.”
38Angkungu tau e'e, “Mawu, ia mangimang,” bou e'e i sie nusuba su saruang I Yesus.
39I Yesus nangul᷊i, “Ia nusumongo su dunia i'i tadeau muparal᷊eng u kaadil᷊ang; tadeau taumata ko wuta makawua, dang taumata ko makawua mawuta.”
40Pirang katau i sire tau Farisi ko ene su se'e nakaringihi si Yesus nangul᷊i kere e, bou e'e i saire nukina si sie, “Apa pandung-U i kami l᷊ai ko wuta?”
41I Yesus nusumimbahi, “Boko i kumu wuta, i kumu ta nubardosa. Kateho ual᷊ingu i kumu nangul᷊i, ‘I kami makawua’, e'e mangal᷊enge i kumu borong pia dosa.”
2014 Indonesian Bible Society (Lembaga Alkitab Indonesia)
