YOHANES 10
10
Papinintu hal᷊i u domba dingang u mul᷊al᷊ukare
1“Mang tingari didato-Ku i'i: Taumata ko nusumu su kuhungu domba l᷊umempang pagari, dang ta nul᷊umiu tukari, kateho nusumengkang bou tampa kowal᷊inge, taumata e'e ko mananako dang tahapuhampasi. 2Arawe taumata ko sumu bou tukari, i sie ko mul᷊al᷊ukaru domba. 3Mundadiaga kuhung mamuka tukari guna ngi sie, dang apang domba e'e mundaringihi tingihie su tempo i sie mukui su areng i sire pusimbau-simbau dingang mangaha i sire pasuwang sarang l᷊ikure. 4Suapangu manga domba e'e niwawa sarang l᷊ikure, gembala e'e l᷊umal᷊eng su horoe, dang apang domba e'e tuhu-tuhu si sie watu u i sire makakiral᷊a tingihe. 5I sire mandiri tumuhu taumata ko wal᷊inge, katewe i sire tumal᷊ang bou taumata e'e, watu u i sire ta nakakiral᷊a tingihie!”
6I Yesus nuwuke ngu papinintu e'e, kateho i sire ta nakahingang pandung-E.
I Yesus, Gembala ko mapia
7Kuteu I Yesus sau l᷊ai nangul᷊i paghisa, “Mang tingari kahingang didato-Ku i'i. Ia ko tukari guna ngu domba. 8Kaul᷊iu ko sumongo suhoro u Ia e'e ko mananako dang mul᷊ahampasi, katewe apang domba takaoae ko mundaringihi tingihi i sire. 9Ko Ia tukari. I sai ko sumu bou Ia sarung masal᷊amati; i sie sumuwang sumu dang makarea kang. 10Mananako kitang sumongo manako, mamate dang tadeau mundusa. Arawe Ia sumongo tadeau taumata makahombang puwawiahi – puwawiahi ko napene-pene.
11Ia i'i gembala ko mapia. Gembala ko mapia manarakangu watangeng-E guna ngu manga dombange. 12Taumata paparentang ko wal᷊inge gembala dang l᷊ai wal᷊inge tataghuang u manga domba e'e, sarung tumal᷊ang manintang u manga domba boko i sie makawua sarigala sumongo. Kuteu manga domba e'e sarung tumboungu sarigala dang i pukaesi. 13Taumata paparentang e'e nutumal᷊ang, watu u i sie muhal᷊i guna ngu waehang. I sie tamusumpi manga domba e'e. 14-15#Mat. 11:27; Luk. 10:22Ia i'i Gembala ko mapia. Musul᷊ung kere I Yamang matitong u Ia dang Ia matitong I Yamang, kere e l᷊ai Ia matitong u apang domba-Ku dang i sire l᷊ai matitong u Ia. Ia manarakang u watangeng-Ku guna ngi sire. 16Borong pia l᷊ai manga domba ko wal᷊inge ko mang l᷊ai Ia Tataghuange, kateho ta nataho su ghapang u domba i'i. I sire e'e l᷊ai mambeng Daku wawaneng dang i sire sarung mundaringihi tingihi-Ku. I sire kaul᷊ie sarung mariadi#10:16: I sire kaul᷊ie sarung mariadi: pirambau wohe horo: Kute sarung pia. ghapang simbau dingang u simbau gembala.
17Yamang nukumindaghi u Ia watu u Ia manarakang u watangeng-Ku, tadeau sau makatarima u e'e. 18Takoa sarang manga singkatau ko makapangal᷊a bou Ia. Ia manarakang u e'e bou kao-Ku sisane. Ia pia kawasa manarakang u e'e dang pia l᷊ai kawasa sau mangal᷊a e'e. E'e hal᷊i ko Daku nitarima bou Yamang-Ku.”
19Ual᷊ingu I Yesus nangul᷊i kere'e, kute manga tau Yahudi nanita nurarendehi. 20Maul᷊i ko nangul᷊i, “I Sie nikasukang u setang! I Sie ko dong! Apa gunange i kumu mundaringihi si Sie?”
21Kateho pia ko l᷊ai nangul᷊i, “Taumata nikasukang u setang ta nangul᷊i kere e! Apa setang makakoa taumata ko wuta makawua?”
Tau Yahudi mandiri manarima I Yesus
22Su Yerusalem manga taumata kapusal᷊iwang u L᷊ou putatinaungang pananabisi Wal᷊e-Ngu Mawu. Su tempo e'e tempo matinou. 23I Yesus karal᷊eng su Poresi Salomo su l᷊al᷊ungu Wal᷊e-Ngu Mawu. 24Su tempo ngu manga tau Yahudi nusumongo nukomol᷊i su sindihang I Yesus. I sire nangul᷊i, “Sarang kangereng I Kau mamala i kami pupikiri? Habari ko pakal᷊ahe, boko tinga-tingari I Kau Ratungu Mananal᷊amati.”
25I Yesus nusumimbahi, “Seng mbuae Daku nihabari si kumu, kateho i kumu ta mangimang. Kaul᷊iu hal᷊i ko Daku koateng su l᷊al᷊ung u areng I Yamang-Ku e'e mangonggo kal᷊al᷊ahe u hal᷊i u Ia. 26I kumu ta mangimang watu u i kumu ta narekeng kere manga domba-Ku. 27Apang domba-Ku mundaringihi tingihi-Ku. Ia makakiral᷊a si sire, dang i sire kaul᷊ie tumuhu, si Sia. 28Ia nangonggo puwawiahi kahingang dingang u kakal si sire, dang i sire ta sarung mawinasa sarang kal᷊iwuenge. Takoae sarang manga singkatau ko makapangaho si sire bou l᷊ima-Ku. 29Yamang-Ku, ko seng nanarakang i sire si Sia, nangilembo#10:29 I Yamang-Ku, ko seng nanarakang i sire si Sia, nangilembo: pirambau wohe horo: Apang nionggo I Yamang-Ku si Sia nangilembo. Dang takoae sarang manga singkatau ko makapamal᷊aho si sire bou l᷊ima-Ngi Yamang. 30Ia dingang Yamang e'e ko simbau.”
31Bou e'e manga tau Yahudi nusau nangemong watu pamal᷊o si Yesus. 32Kateho I Yesus nangul᷊i si sire, “I kumu seng nakawua si Sia seng nukoa maul᷊i hal᷊i ko mapia, ko niparentang I Yamang si Sia. Bou kaul᷊i hal᷊i e'e, sude e ko nakakoa sabapie hakiu i kumu sau mamal᷊o si Sia?”
33 #
Im. 24:16
Kaul᷊iu taumata ngu Yahudi e'e nusumimbahi, “Wal᷊inge ual᷊ingu manga hal᷊i u ko mapia e'e i kami makapamal᷊o u watu si Kau, kateho ual᷊ingu i Kau ko muhinakang Mawu Ruata. I Kau singkatau taumata, mo mitingkakoa u watangeng u Mawu Ruata.”
34 #
Mzm. 82:6
Bou e'e I Yesus nusumimbahi, “Wal᷊ingewe su l᷊al᷊ungu Buki u Torati pia kawawohe, Mawu Ruata nangul᷊i, ‘I kumu e'e ko mahang ruata’? 35I kite matitong himoneu apang ko mawawohe su l᷊al᷊ung u Buki Susi e'e mapake sarang kal᷊iwuenge. Inau, boko Mawu Ruata nunggile u areng mahang ‘ruata’ su manga taumata ko manarima u didatong-E, 36apawe sabapie i kumu nudidato si Sia nuhinakang Mawu Ruata ual᷊ingu nangul᷊i Ia Ahusu u Mawu Ruata? Sumbal᷊i Ia nipele-Ngi Yamang dang niroi sarang dunia. 37Boko Ia ta nukoa hal᷊i ko niparentang I Yamang, kumbahang mangimang si Sia. 38Kateho ual᷊ingu Ia mukoa hal᷊ie'e, kuteu pangimangte su hal᷊i ko Daku nikoa e'e, maneng i kumu mandiri mangimang si Sia. Dingang u kere i kumu matitong dang makahingang himoneu Yamang tatapi masimbau dingang-Ku, dang Ia tatapi nasimbau dingang I Yamang.”
39I sire sau mukakal᷊ika mundea maname si Yesus, kateho I Sie nal᷊iwiri bou i sire.
40 #
Yoh. 1:28
I Yesus nusul᷊e sarang simbuka ngu sal᷊uhu Yordan, su tampa pia Yohanes kangereng nanahani, wuhue natana pai se'e. 41Napene taumata nusumongo sarang ko-E. I sire nangul᷊i, “Yohanes tanukoa ko makal᷊aherang, kateho kaul᷊ie ko nihabari e bou hal᷊i u taumata i'i mang tingari.” 42Bou e'e apang taumata maul᷊i ko ene se'e nangimang si Yesus.
2014 Indonesian Bible Society (Lembaga Alkitab Indonesia)
