YOHANES 7
7
I Yesus dingang u manga ana u simbau-E
1Bou e'e I Yesus nakoa sarang apang tampa su Galilea. I Sie mandiri makoa sarang Yudea watu u manga mangangawasangu tau Yahudi pai se'e pia pandung mamate si Sie.
2 #
Im. 23:34; Ul. 16:13 Su tempo e'e seng masandighi l᷊ou l᷊abo putatinaungang L᷊ou ngu Selo Raung. 3Kute manga ana u simbau I Yesus nangul᷊i si Sie, “Tintangte tampa i'i dang dakoe tamai sarang Yudea, tadeau manga tumatuhu-U l᷊ai makawua hal᷊i-U. 4Takoae taumata ko mamuni ngu barang ko koatenge, boko i sie mo makoa ko tumeleng. Boko Kau mo mukoa hal᷊i ko kere e, mambeng katitonang u kaul᷊iu dunia!” 5(Watu u manga ana u simbau-E sisane l᷊ai ta mangimang si Sie.)
6I Yesus nududato si sire, “Borong wal᷊inge temponge si Sia, arawe si kumu, sintinia tempo kaul᷊ie botonge. 7Dunia i'i tamariadi mubunsing i kumu. Arawe Ia mang seng nubunsing u dunia, watu u sintinia Ia mangul᷊i su dunia kakakoae ko ral᷊ai. 8Dakoe i kumu ha tamai sarang Sal᷊iwang e'e. Ia ta matamai#7:8: Ia ta natamai: pirambau wohe horo: Ia tangkeng natamai. watu'u mborong tangkeng temponge si Sia.” 9Kere'e didato-Ngi Yesus su manga ana u simbau e, dang I Sie mang nutingkatintang su Galilea.
I Yesus su sal᷊iwang u selo raung
10Suapang manga ana u simbau-E nakoa tamai sarang sal᷊iwang e'e, I Yesus maruma-rumasi su wughangu taumata natamai si sane. 11Sukanandu u sal᷊iwang e'e, manga mangangawasangu tau Yahudi mundea si Sie dang nukakina, “Ko suapa I Sie?”
12Maul᷊i taumata nanita kapuwawurunge hal᷊i I Sie. Pia ko nangul᷊i: “I Sie taumata mapia.” Pia ko l᷊ai nangul᷊i: “Ta I Sie mupakapal᷊iru taumata maul᷊i.” 13Kateho takoae sarang manga singkatau ko wahani mudidato mal᷊ahe hal᷊i I Sie watu'u i sire mataku su manga mangangawasa ngu tau Yahudi.
14Su tal᷊oara u sal᷊iwang, Yesus nusumu su wal᷊e ngu Mawu, wuhue nanita nanintiro. 15Apang mangangawasa ngu tau Yahudi mangkate naherang dang nangul᷊i, “Kirapa taumata i'i matitong u kaul᷊iu e'e, sumbal᷊i I Sie ta nusikol᷊a?”
16I Yesus nusumimbahi, “Ko Daku itintiro i'i wal᷊ingewe tintiro-Ku, kateho tintiro-Ngi Sie ko nundoi u Ia. 17Taumata ko mo tumuhu kao Mawu Ruata, sarung matitong minsang tintiro-Ku i'i ko bou Mawu Ruata arako bou Watangeng-Ku sisane. 18Taumata ko manintirongu titonge si sane i sie mundea arenge si sane. Arawe taumata ko mundea areng guna-Ngi Sie ko nundoi I Sie, taumata e'e matul᷊iri, takoae l᷊eo si sie. 19Wal᷊ingewe i Musa seng mbuae nangonggo u manga parenta ngu Mawu Ruata si kumu? Kateho sutal᷊oara i kumu takoae ko nutumuhu apang parenta e'e. Nakurawe i kumu mo mamate si Sia?”
20Taumata maul᷊i e'e nusumimbahi, “I kau mang ko dong i sai mo mamate si Kau?”
21I Yesus nusumimbahi, “Kitang simbau hal᷊i ko daku nikoa su l᷊ou Sabati, dang i kumu seng naherang. 22#Kej. 17:10; Im. 12:3I Musa nungonggo atorang u sunati – maneng tumuhu hinonge asal᷊u sunati e'e wal᷊inge bou i Musa, kateho bou manga iupung ko borong suhuro i Musa. Ual᷊ingu e'e su l᷊ou Sabati i kumu l᷊ai manunati taumata. 23#Yoh. 5:9Boko i kumu mukoa tamai e'e tadeau kumbahang l᷊umawang atorang i Musa hal᷊i u sunati, nakurawe i kumu muwawal᷊uang si Sia ual᷊ingu Ia nupakaul᷊engu taumata su l᷊ou Sabati? 24Kumbahang muhukung u taumata ual᷊ingu hal᷊i ko i kawua, kateho ko kitang ual᷊ingu kal᷊aadili.”
Ko tingari I Yesus Ratu Mananal᷊amati?
25Bou e'e pia i sire tau Yerusalem pirangkatau nangul᷊i, “Wal᷊ingewe i'i taumata ko kate purariakeng pateng? 26Tuhungete kere kawahaninge I Sie nudidato su tingo ngu hape, dang takoae ko nakapudidato ngu manga apa si Sie! Apa mangangawasangi kite arako i sire seng nakatitong ko I Sie i'i Ratu ngu Mananal᷊amati? 27Kateho boko Ratu ngu Mananal᷊amati e'e nusumongo, takoae sarang manga singkatau matitong ko bou apa asal-E! Sumbal᷊i i kite matitong bou apa asal᷊u taumata i'i.”
28Bou e'e, sutempo-Ngi Yesus borong kapanintironge su wal᷊e ngu Mawu, I Sie nudidato mauha, “Inau i kumu matitong ko isai Ia i'i, dang bou apa asal᷊i-Ku? Ia ta nusumongo bou kao-Ku sisane. Ia niroi I Sie ko pia haki mundoi u Ia, dang I Sie kapangimaneng. Kateho i kumu wugha-Ngi Sie. 29Ia natitong I Sie, watu'u asal᷊i-Ku bou I Sie, dang I Sie nundoi u Ia.”
30Sutempo e'e i sire mo maname si Yesus, kateho takoae ko wahani muhinggo si Sie, watu'u borong ta nurating temponge. 31Maul᷊i taumata sutal᷊oara i sire nanita mangimang si Sie dang nangul᷊i, “Boko Ratung Mananal᷊amati e'e masongo apa I Sie makakoa lebe maul᷊i ko makal᷊aherang bou taumata i'i?”
Mundea dal᷊eng maname si Yesus
32I sire tau Farisi nakaringihi kirapa taumata maul᷊i e'e kapuwawurungu hal᷊i I Yesus. Ual᷊ingu e'e, i sire nusingkanaung dingang u manga tumbonang u imam, i sire nuparenta manga pirangkatau mundadiaga wal᷊e ngu Mawu natamai paname si Yesus. 33I Yesus nangul᷊i su taumata maul᷊i su l᷊al᷊ungu wal᷊e ngu Mawu, “Kate singkodo l᷊ai temponge Ia borong dingang i kumu. Bou e'e Ia sarung musul᷊e sarang ko nundoi u Ia. 34I kumu sarung mundea si Sia, kateho i kumu ta makarea si Sia, watu'u i kumu ta makaratingu tampa ko Ia ene su se'e.”
35Bou e'e i sire manga mangangawasangu tau Yahudi nangul᷊i singkatau dingang u kowal᷊inge, “Taumata i'i mo makoa sarang apa hakiu i kite ta makarea si Sie? Apa I Sie mo matamai sarang manga taumata ngu Yahudi ko suraral᷊engang ko su tal᷊oara u tau Yunani, dang manintiro si sire tau Yunani? 36Apa pandung-E I Sie nangul᷊i uare i kite sarung mundea si Sie kateho ta makarea si Sie dang i kite ta makaratingu tampa ko Sie ene su se'e?”
Ake ko mangonggo Puwawiahi
37 #
Im. 23:36
Su l᷊ou panginsuenge bou sal᷊iwang e'e, su l᷊ou ko kal᷊abokange, I Yesus nurumarisi su Ral᷊u ngu wal᷊e ngu Mawu wuhue nudidato mauha, “Taumata ko narou maite songo panginung su koa-Ku. 38#Yeh. 47:1; Za. 14:8Bou hal᷊i u taumata ko mangimang si Sia, seng mawawohe su l᷊al᷊ung u Buki Susi: ‘Bou l᷊al᷊ung u naunge sumuwang manga ansehu ake ko mangonggo puwawiahi.’ ”#7:38: Manga didato-Ngi Yesus su l᷊al᷊ung u manga ayeti 37-38 botonge isaleng: “taumata ko narou kenang songo si Sia, dang taumata ko mangimang si Sia kenangte panginung. Musul᷊ung ko niuli u buki Susi: Bou l᷊al᷊ung u naunge nasehi manga ansehu ake mangonggo wiahi.” 39(I Yesus kapudidatongu hal᷊i u Roh u Mawu Ruata, ko sarung i tarima u apang taumata ko mangimang si Sie. Watu'u su tempo e'e Roh u Mawu Ruata borong ta nionggo; watu'u I Yesus borong ta nipakawantughi su l᷊al᷊ung u kapapate-Nge).
40Maul᷊i taumata nakaringihi apang ko i niul᷊i I Yesus, dang sutal᷊oara i sire pia ko nangul᷊i, “Taumata i'i nal᷊ahe ko nabi e'e!”#7:40: Nabi e'e: putuhung 1:21
41Singga nangul᷊i, “I'i e'e Ratu Mananal᷊amati”!
Kateho pia ko l᷊ai nangul᷊i, “Ha, ko l᷊eo u apa Ratu Mananal᷊amati sumongo bou Galilea? 42#2Sam. 7:12; Mi. 5:1Su l᷊al᷊ung u Buki Susi mawawohe himoneu Ratu Mananal᷊amati ko hintou ngi Daud dang sarung sumongo bou Betlehem, bou soa ngi Daud.” 43Panginsuenge manga taumata nanita numpurarendehi bou hal᷊i I Yesus. 44Pia ko mo maname si Yesus, kateho takoae sarang manga singkatau muhinggo si Sie.
Manga mangangawasa ngu tau Yahudi ta mangimang
45Su tempo ngu manga mundadiaga Wal᷊e-Ngu Mawu ko niroi tamai maname si Yesus seng sau nusul᷊e, manga tumbonang u imam dingang u manga taumata Farisi e'e nukina si Sie, “Nakurawe i kumu ta numbawa si Sie simai sarang i'i?”
46Manga mundadiaga e'e nusumimbahi, “Ha, borong takoae taumata nudidato kere I Sie!”
47“Apa i kumu l᷊ai seng nipakapal᷊ir-E?” angkungi sire tau Farisi e'e. 48“Apa seng pia bou mangangawasa ngi kite arako taumata Farisi ko mangimang si Sie? 49Arawe taumata maul᷊i i'i, sire wughangu atorang i Musa, dang maning kirapa l᷊ai i sire seng nianeng.”
50 #
Yoh. 3:1-2
Singkatau bou tal᷊oara i sire tau Farisi e'e ko i Nokodemus ko l᷊ina u mbua nusumongo si Yesus. I Nikodemus nangul᷊i su manga tau Farisi ko wal᷊inge. 51“Tumuhu atorang, singkatau ta botonge i hukung suhoro u parkara e'e raringihang dang kakanoae ipariksang.”
52Sasimbahi sire, “Apa i kau l᷊ai asal᷊i bou Galilea? Mangkate riake su l᷊al᷊ung u Buki Susi! I kau sarung makabasa himoneu ko takoae nabi asal᷊e#7:52: takoae nabi asal᷊e: simbau wohe horo: nabi e'e ta sarung pia asal᷊e. bou Galilea!”
Tau kowawine ko nikatangka nawuang
53[Bou e'e, apang taumata kaul᷊ie napul᷊e sarang wal᷊e ngi sire.
2014 Indonesian Bible Society (Lembaga Alkitab Indonesia)
