ZABUR 10
10
Do'e nunas keadilan
1Kembéq Deside jaoq,
ya ALLAH dait nyeboq sewaktu kaji pade kebucuq?
2Siq sombongne dengan jahat nindes dengan miskin;
menengang ie pade tejeret siq setne mésaq.
3Dengan jahat luwéqan raos mengenai keméléqne saq jahat,
dengan serakah ngutuk dait nolaq ALLAH.
4Dengan bedose nénten peduli léq ALLAH,
lantaran sombongne, ie bepikir Allah nénten araq.
5Dengan jahat berhasil léq dalem selapuq usahene;
ie nénten kenal atao ngerti hukum ALLAH
dait ngeréméhang selapuq musuhne.
6Ie bebase léq dalem angenne, “Tiang ndéq gen gagal,
dait turun temurun ndéq gen tetimpe siq bahle.”
7 #
Rm. 3:14
Biwih ie pade penoq siq kutukan, dait sumpah senaq,
ucapan-ucapanne penoq siq meriq dait kejahatan.
8-9Ie nyeboq léq dése-dése
gen nyematéq dengan saq nénten salaq.
Maraq singe ie ngantih léq tengaq bebenes
nginté dengan saq lemah.
Ie ngadang dengan miskin léq taoq saq sepi,
baune dait orosne lalo.
10Ie nunduk, siep nyakrah;
ie geriqang dengan siq kekerasan.
11Ie bebase léq dalem angenne, “Allah sampun lupaq dait nénten merhatiang;
jangke seterusne Ie nénten cingakin tiang!”
12Silaq bangkit, ya ALLAH, hukum dengan jahat!
Iling léq dengan saq tetindes!
13Kembéq dengan jahat terus menghine Allah
dait bebase léq dalem angenne Allah nénten gen ngukum ie?
14Laguq Deside cingakin ie;
Deside perhatiang kesusahan dait sengsarene,
dait tetep siep gen nulung.
Dengan saq lemah nyerahang diriq tipaq Deside,
Deside tetep nulung dengan saq miskin.
15Polakang kekuasean dengan jahat dait durhake;
hukum ie pade lantaran perbuatanne
jangke ie pade jerih.
16 ALLAH mréntah selaéq-laéqne;
bangse-bangse saq nénten kenal kance Ie
gen musnah léman gumi-Ne.
17Ya ALLAH, Deside mirengang do'e dengan hine
dait neguqang até ie pade.
18Anak yatim dait dengan saq tetindes Deside béle pelekarene,
adéq nénten araq dengan saq petakut ie pade.
LAI 2007