ZABUR 9
9
Do'e syukur lantaran keadilan ALLAH
1Umaq pemimpin kor. Menurut lagu Mut-Laben. Zabur Daud.
2Siq sepenoq angen kaji mélé besyukur léq Deside, ALLAH,
dait beriteang karye Deside saq ajaip.
3Kaji mélé begembire dait besukecite lantaran Deside
dait memuji peséngan Deside, TUHAN Saq Maheagung.
4Léq arepan Deside musuh kaji bebalik dait pelai;
ie pade kedampes geriq dait maté.
5Séngaq Deside mréntah sebagé hakim saq adil;
Deside sampun béle pelekare kaji.
6Deside sampun ngukum bangse-bangse
dait binaseang dengan-dengan jahat;
ie pade telupaqang selaéq-laéqne.
7Musuh kaji pade sampun bis tepunahang,
kote-kote ie pade Deside remukang;
nénten araq saq nginget ie malik.
8 ALLAH mréntah selaéq-laéqne;
Ie miaq tahte-Ne jari hakimin dunie.
9Ie mréntah bangse-bangse secare adil
dait hakimin ie pade secare jujur.
10 ALLAH nike taoqne berlindung dengan saq tetindes,
taoq perlindungan waktu kebucuq.
11Dengan saq kenal kance Deside beharep léq Deside, ya ALLAH,
dengan saq nyembah Deside nénten Deside bilin.
12Pade puji ALLAH saq mréntah léq Sion!
Ceriteang karye-Ne tipaq bangse-bangse!
13Séngaq Ie iling léq dengan saq menderite
dait nénten ngelupaqang kuihan ie pade;
dengan saq gawéq kekerasan Ie hukum.
14Cingakin, musuh nyengsareang kaji;
periakang kaji, ya ALLAH,
selametang kaji léman maut,
15adéq kaji memuji Deside
léq julun penduduk Yerusalem.
Kaji gen besurak gembire
séngaq Deside nyelametang kaji.
16Bangse-bangse saq nénten kenal kance Deside
geriq ojok dalem longkak saq ie pade keduk mésaq;
ie pade tejeret léq dalem jaring saq ie pade pasang mésaq.
17 ALLAH sampun nyatayang diriq-Ne
séngaq keputusan-Ne saq adil.
Dengan jahat tejeret siq pegawéanne mésaq.
18Maut nike jari penutuq dengan-dengan jahat,
bangse-bangse saq nénten merhatiang Allah.
19Ndéq selaéq-laéqne dengan miskin telupaqang;
ndéq selaéq-laéqne dengan sengsare ndéq bedowé harepan.
20Silaq bangkit ya ALLAH, hakimin bangse-bangse,
sampunang menengang manusie nyombongang diriqne.
21Menengang ie pade jari takut, ya ALLAH,
dait sadar bahwe ie pade cume manusie.
LAI 2007