Luka 10
10
1Inyima ya yaga, Mwami ya tovola avandi amakumi gatanu na gaviri, na a va tuma se vaviri imbiri wewe, mu madala gosi na hosi ha yenya kutsia mwene. 2Kandi ya va volera, Ligesa li veye linene, navutswa avayinziri va gehi: kigira yaga mwinye mu saale Mwami weli gesa a lete avayinziri va tsie mu ligesa lilye. 3Mu tsie; henza, mmu tuma kuli avana vamagondi mu visalang'ongo. 4Mu ta vugula musigo, kinga imuya, kinga vilatu; kandi mu ta chelidza mundu kali mulala ku inzira. 5Kandi ku tsi nyumba tsyosi ya mu lingira mu, mu tange kuvola, Mirembe gyi ve mu inyumba yiyi. 6Mwana wemirembe na a va mu, mirembe gyenyu gyi la va kuye: navutswa na a ta ve mu, gyi lirana ku mwinye. 7Kandi mu menye mu inyumba zana, ni mu lia ni mu nwa vya va mu ha: kigira muyinziri u dukani namadanyi gege. Mu ta voyavoya. 8Ku madala gosi ga mu lingira mu, ni va mwingiridza, mu lie vyokulia vya va mmegera: 9kandi mu honnye avalwaye ava veye mu, kandi mu va volere, Ubwami bwa Nyasaye bwisundi himbi ku mwinye. 10Navutswa ku madala gosi lya mu lingira mu ni va ta mwingiridza, mu twub mu tsie ku tsinzira tsyago, mu vole, 11Kali lugukyi lwelidala lyenyu lu handi ku virenge vyetu ku mweyera: navutswa mu manye yaga, Ubwami bwa Nyasaye bwisundi himbi. 12Mmu volera, Bulahi bwa Sodoma ku lidiku yilyo bu la vita bwelidala yilyo. 13U la lola ubudamano, ive Korazin U la, lola ubudamano, ive Betsaida kigira miyinzi gyetsingulu gya kolwa mu mwinye, gyi va gya kolwa mu Turo na Sidone nkano veganira kale, ni vivika magunia ni vikala mu ligoke. 14Navutswa bu la va bulahi ku Turo na Sidone mu likalaga kuvita ubwenyu. 15Nive, Kapernaume, u lidzominywa ku duka mu ligulu? U likidzwa kuduka mu kihadisi. 16U hulira mwinye, a hulira inze; kandi u sula mwinye, a sula inze; kandi u sula inze, a sula wa ntuma.
17Ava li amakumi gatanu na gaviri virana nobuyanzi, ni va vola, Mwami, kali amademone ga li ku kwegehidzira ku lieta lilyo. 18Naye ya va volera, Nda lola Setani na a gwa kutwula migulu kuli uluheni. 19Henza, mmali kumuha tsingulu kuduvaga tsinzoka neng'e, kandi ku tsingulu tsyosi tsyomusigu: kandi si ha li nekindu ki li mwononnya kali hakuzu. 20Navutswa mu ta yanza kigira roho gyegehidza ku mwinye, navutswa mu yanze kigira ameta genyu ga ng'odeywi migulu.
21Inyinga zana ya yanza ligala mu Roho Mutakatifu, na a vola, Nkwidzominya ligali, Dada, Mwami weligulu nelirova, kigira wa visa ivindu yivi ku vageeri navahuliri, navutswa u vuuliye avana vadoto: yee, Dada; kigira u yanza ndiyo. 22Dada wange ya mba vindu vyosi: kandi si ha li nomundu u manya Mwana ni bwaha, navutswa Dada; kandi Dada ni bwaha, navutswa Mwana, naye wo Mwana u yanza kumuvuulira. 23Kandi ya girunkana ku vegidzwi, na a vola makiriri, Tsi veye nobugasu tsimoni tsi lolanga vindu vya mu lola: 24kigira mmu volera, Avaprofeti vanyingi navami venya kulola vindu vya mu lola, si va vi lola; kandi kuhulira vindu vya mu hulira, si va vi hulira.
25Kandi henza mwegidzi weliIaga mulala ya singira na a mu geridza, na a vola, Mwegidzi, nda kola ki kunyola liva mwoyo li ta hera mba? 26Naye ya mu volera, Ga ng'odwa ndi mu lilaga? U soma ndi? 27Naye ya tivula na a vola, U yanze Mwami Nyasaye wowo nomwoyo gugwo gwosi, na roho gugwo gwosi, netsingulu tsitsyo tsyosi nobugeeri bubwo bwosi; kandi u yanze mutende wowo kuli wiyanza. 28Naye ya mu volera, U tivuye bulahi: u kole ndiyo u la va mwoyo. 29Navutswa uyu yenya kweha ubulungi ya volera Yesu, Kandi mutende wange ni bwaha? 30Yesu ya tivula na a vola, Mundu mulala ya twula Yerusalemi kusulunguta Yeriko; kandi ya gwa hagati ha vanuuli; va mu twulidza tsingubo ni va mu kindukidza, ni va tsia, ni va mu leka, ni yenya kukudza. 31Musalisi mulala ya manya ya sulunguta ku inzira yeyo: lwa ya mu lola ya vitira ha luvega. 32Kandi ndiyo Mulevi yadza, lwa ya duka ha zana, ya mu lola na a vitira ha luvega. 33Navutswa Musamaria mulala, mu lugendo lwilwe, ya duka ha ya li: kandi lwa ya mu lola, ya mu vera tsimbabasi. 34Yisunda himbi na a tsia kuboha ubukinduki bwibwe, na a tsuka ku maguta newaini; kandi ya mu nyinnya ku isukiri yeye, na a mu hila mu inyumba yavageni, na a mu lwalidza. 35Mugamba ya twulidza tsishilling tsiviri na a ha mwene inyumba, na a vola, U mu lwalidze; kandi tsya u meda tsi sira, inze lwa ndirana nda ka ku tunge. 36Ku yava vavaka u li ha wa u lola kuva mutende wa uyu wa gwa hagati ha vanuuli? 37Naye ya vola, Uyu wa mu vera tsimbabasi. Yesu ya mu volera, Ive u tsie kukola ndiyo.
38Lwa va genda ku inzira yavo, yingira mu kadala kalala: kandi mukali mulala wa langwa Marita ya mwingiridza mu inyumba yeye. 39Kandi ya li namwavo wa langwa Maria ya li ni yikaye ha virenge vyo Mwami, na a hulira likuva lilye. 40Navutswa Marita ya nyankana mu butumiki bwibwe bunene; kandi yadza kuye na a vola, Mwami, si u verera kigira amwavo wange u ndeki kutumika tsyeng'ine? U mu volere a nkonye. 41Navutswa Mwami ya tivula na a mu volera, Marita, Marita, u nyankana nokudidikana ku vindu vinyingi: 42navutswa kindu kilala kyeng'ine ki duki: kigira Maria u mali kutovola kindu kilahi, kya a li vula kunyagwa.
©Bible Society of Kenya, 1967
