MARKUS 14
14
Owe Yesus batatii akukuramtiies atakam
(Mat. 26:1-5; Luk. 22:1-2; Yoh. 11:45-53)
1Emesare. Paskah Bare anama Eek Apok Roti Pakambwi bare joon aren. Allah Tame bomon pak baem owe daytuam, Musa Basakamtam Atakam baememtam oweam, Yesus tiruu bajipirtaer atakam akukuramtiiesen. Armat Ipit batatii atakam akukuramtiiesen. 2Are, “Dare era Ipit pakambwi damon bajipirtaer bas. Bambi owe owentakam dara baem ombar.” Emes atakam aesimesen.
Taot taka, pinim akot minyak, Yesus kuus akukumdaeme atakam
(Mat. 26:6-13; Yoh. 12:1-8)
3Emesare, Yesus Simon tame aemapen. Bonak ere, era ipit owe ombare bamarem damo pitini potanak ipitin. Era tame kota Betani aemansen. Yesusam amos banda aemaperawa, taot taka aemape tame ajiiemen. Are eka burfi atoomjiien. Era eka juas “pualam”. Era burfi, pinim akot minyak aptamen. Era minyak ere, harga daytun. Era taot era burfi iim apakamen. 4Wan owe aememes jak ambap aememesen. Are atakam armamon ajamkoramesen. “Era minyak aokomosomar, ere wama tamenem? 5Are era minyak bauumamtaer emes aemto ere, are uang perak 300 otaet apeno. Era uang arawa era pak apok owe batetam aemto, ere akot.” Emes atakam aesimesen. Emesare, are era taot asiiresen.
6Yesus arawa, “Tare ara taot bajurusum bas. Ara aemtamman pak, ere akotnak. 7Pak apok owe tadamo setep aememaartemas. Juiin afaafeaarto, tare pak era owe batetam, ere asan akot. Dere ere, tadamo setep baememaar apok. 8Ara taot aemommar akot pak takes, Dera aemtamkoromman. Are minyak damo aokokomtiiman. Era pak Dere dambir aemtey asep bare dambir asan bomon aputaitiitanis pak arare. 9Atakamnak, owe Allah Akot Atakam, samaniin samaniin atirminomemtas, owe ara taot aemtamman pak takes atakam jane ajitemas.
Yudas, Yesus, jokoman owe baotasimemomtam atakam”
(Mat. 26:14-16; Luk. 22:3-6)
10Emesare. Yudas Iskariot Yesus bajamkai owe 12 wan ipit taka arare. Are Allah Tame pak baem owe daytu ambaromen. Are Yesus era owe baotasimemomtam aememen. 11Era owe, Yudas atakam jane ajies, are jak akot aememesen. “Emesare, dare uang wora batetam.” Emes atakam aesimesen. Yudas arawa, Yesus era owe baotasimemomtam asan akot, aoorporen.
Yesus Paskah Bare Pakambwi pak abajamkai owe takan andes
(Mat. 26:17-25; Luk. 22:7-14, 21-33; Yoh. 13:21-30)
12Emesare. Eek Apok Roti Pakambwi bonaknak bare aemapesen. Paskah Bare Pakambwi domba jii, Allah batatiitam bare araren. Yesus bajamkai oweam, Armat Ipit ajateporesen. “Ara Paskah Bare Pakambwi ete asana detam? Dare pakambwi pak bakenem.” Emes atakam aesimesen. 13Yesus arawa, atakam abajamkai ipit amnuk aesimtamen. “Tare era kota aesosami. Era asan bwi pak bwiptam atoomemto ipit awotejamtaertemankum. Tare era ipit ajamkaiemami. 14Era ipitam tame ajiitem. Tararawa, era tame armat ipit atakam bakoromporami. ‘Guruam, “Dere debajamkai oweam, ara Paskah Pakambwi banda, ete kamar arom?” Emes atakam aesimami.’ 15Era tame armat ipit arawa, oup kamar daytu tara aporomtamteman. Pakambwi pak takesam era kamar aemanses. Tararawa Paskah Bare Pakambwi dao banda pak afaafetiiami.” Yesus emes atakam aesimen.
16Erarawa, Yesus bajamkai ipit amnuk era kota aesosemisen. Era asan, era pak takes Yesus akore atakam jipu taka aporemisen. Ararawa, Paskah Bare Pakambwi pak akenememisen.
17Poronak arawa, Yesusam, abajamkai owe 12am, era tame ajiiesen. 18Are bap andaepakiapes, wanam amos ambetomdomesen. Amos ambetomdomes arawa, Yesus atakam era owe akoromen. “Atakamnak, tare wan ipit taka Dere jokoman owe aotasimemomtamteman.” Emes atakam aesimen.
19Yesus bajamkai owe emes atakam jane ajies, are jak pota aemapteteresen. Ararawa, Armat Ipit ajateporteteresen. “Ara atakam akoremmarem ipit, der apok apeno?” Emes ajateporteteresen. 20Yesus arawa, “Era ipit, tare 12 wan ipit taka are. Era ipit, ara amos, bwi, piring takan ara demamum are. 21Asamot Anakot Ajaoreme Ipit dambir atemtem. Are Alkitab atakam jipu. Me, Armat Ipit jokoman owe aotasimemomtamto ipit, asan potanak aememtem. Era ipit bajisames apok ere, are asan akot.” Yesus emes atakam aesimen.
Tuhan perjamuan atakam
(Mat. 26:26-30; Luk. 22:15-20; 1 Kor. 11:23-25)
22Emesare. Era owe amos andes, Yesus wan amos ataeren. Are terima kasih atakam Allah akoromen. Terima kasih atakam Allah akoromerawa, Are era amos akookome, wanam abajamkai owe sai asaietamen. “Ara amos bataeray wanam banday. Are dedamo dasa.” Emes atakam aesimen. 23Armat Ipit arawa, mbok anggur bwi aptam ataeren. Are terima kasih atakam Allah akoromen. Wanam Are era mbok bwi era owe sai asaietamen. Era aemapes owe takes era bwi andateteresen. 24Armat Ipitam atakam era owe akoromen. “Ara bwi deesee. Deesee, owe tanane bajortaer, ajirindaetem. Deesee, Allah ataaji aee, atakamnak aporomtamum. 25Atakamnak, waaam, Dere anggur bwi bonda apok— Dere ai anggur bwi Allah Ai Tapirmi tara ajamdetey bare taka are.” Yesus emes atakam aesimen.
26Erarawa era owe Allah tere baeom so aeesen. So aees arawa, fami juas Saitun aesosesen.
Petrus Yesus apatimto atakam
(Mat. 26:31-35; Luk. 22:31-34; Yoh. 13:36-38)
27Yesus atakam era owe akoromen. “Allah, Alkitab bomon, atakam akore. ‘Dere era domba banamek batai ipit atatiitemin. Era dombarawa apatakuostemas.’ Emes atakam aesime. Emesare, tare Dera bajamkai ambompimtemankum. Ere Alkitab atakam jipu. 28Me, Allah Dera ajaoromwasumtumtan, Dere Galilea tapirmi bonak ambaremtemin. Tare ere, asep ajapendaetemakam.” Emes atakam aesimen.
29Petrus arawa, “Wan owe takes Wora bajamkai bamompim apaye, dere, ere apok.” Emes atakam aesimen.
30Yesus arawa, “Atakamnak, waa eam, wore atakam bare bamintep bonak akorestemarem, ‘Dere Yesus demsam apok,’ emes atakam akorestemarem. Ajomo ipit arawa, bare jamnuk atakam asep akorestem.” Emes atakam aesimen.
31Petrus ere, atakam fiak akoromen. “Owe Woratin takan atatiitaroas apaye, ‘Dere ere Yesus demsam apok,’ emes atakam bakore apoknak.” Emes atakam aesimen. Wan owe takesam emes atakam taka akoresen.
Yesus atakam Allah Getsemani ajanime atakam
(Mat. 26:36-46; Luk. 22:39-46)
32Emesare. Era owe, asan juas Getsemani ambaremesen. Yesus arawa, atakam abajamkai owe akoromen. “Tare ara asan aemapay. Dere ere, atakam Allah ajanimtemin.” Emes atakam aesimen.
33Armat Ipit, Petrusam, Yakobusam, Yohanesam, takan atomasen. Ararawa, jak potanak aememen. Are jak apoknak aememen. 34Are atakam era owe bamintep aokoromen. “Dere jak pota taka ememmin, Dere dambir batem setep baemtamen awar. Tare ere, ara asan aemapay, wanam banamek fiaka.” Emes atakam aesimen.
35Yesus arawa, wan asan setep apokpee bonak ambaremen. Erarawa Are tapirmi andaebuansen. Are ajirisemto pak bajinao bas, emes atakam Allah ajanimen. 36“Dot! Deritipit akotnak! Wore fiak pak takes aemommarem. Akot aportem, Dere bajirisem bas. Me, ara akot apormin pak jipu baem bas. Era akot apormarem pak jipu taka aemey.” Emes atakam aesimen.
37Yesus arawa, era owepu aofasiendaemen. Are era owe ise aemanses aporen. Are atakam Petrus akoromen. “Simon! Wore ise? Wore jam takakope banamek baemetai asan apoke? 38Tare banamek ataiaporaaray. Atakamam Allah ajanimaaray. Bii Kapar Ipit tare dosa baem batatapimtaapor-ombar. Tare Allah atakam ji bae, jak aseseromepmakam. Me, tare damo kumiti.” Emes atakam aesimen.
39Yesusam, aombareme, wanam atakam Allah aojanimen. Are bonak atakam ajanime taka aojanimen. 40Ararawa, era owepu aofasiendaen. Are era owe ise aoemanses aporen. Era owe ise manamesnak aemansesen. Are Yesus wama tamen atakam pakoromtasaye, emes bimak binip apoken.
41Yesus arawa, era owepu aofasiendaen. Are atakam era owe aokoromen. “Tare ise emansakame? Tare kais etedakame? Emesare. Dere waa are. Jipit taka, Asamot Anakot Ajaoreme Ipit, ara dosa owe aotasimemomtamtem. 42Tare bawasitay! Baesosamo! Baporay! Dera aotasimemomtan ipit andaemare.” Emes atakam aesimen.
Owe Yesus ajipirtaeres atakam
(Mat. 26:47-56; Luk. 22:47-53; Yoh. 18:3-12)
43Yesus atakam taomekoremape, Yudas aeresien. Are Yesus bajamkai ipit 12 wan ipit taka araren. Owe tananeam takan ajamdaesen. Are jirao warim anama wusup pak atoomdaesen. Allah Tame pak baem owe daytuam, Musa Basakamtam Atakam baememtam oweam, Yahudi duturu oweam, emes atakam asakamtamesen. 44Bonak ere, Yesus aotasimemomtamto ipit, atakam era owe tanane akoromen. “Era ake afapitey Ipit, era Ipit are. Era Ipit ajipirtaeray. Tare era Ipit ban fiak aosomomasay.” Emes atakam aesimen.
45Emesare, Yudas, Yesuspu akan aeresien. “Guru!” Emes atakam aesimen. Ararawa, Yesus ake afapien. 46Era owerawa, Yesus ajipirtaeresen. Are Armat Ipit ban fiaknak aosomomesen. 47Wan aememe ipit, jirao warim asumtaeren. Ararawa, Allah Tame pak baem ipit daytu akarai baetam ipit janemak asakamdaemen. 48Yesus arawa, atakam era andaes owe akoromen. “Tare jirao warim anama wusup pak Dera bajipirtaer atoomdaemakam, ere wama tamenem? Tare ere, Dere pak tasa baetaa ipit emes aree? 49Juiin afaafeajie, Dere Allah Tame takan aemapa ajaiom, wanam atakam aememtama ajaio. Tare ere, Dera bajipirtaer apoknak aemenkum. Me, owe Alkitab atakam jipu aemtemanis.” Yesus emes atakam aesimen. 50Erarawa, Yesus bajamkai owe takes Armat Ipit beken ajiosesen. Are ombare ja atosesen.
51Ai ipit takaam Yesus fe asaramomen. Are kain taka jiimomen. Era aememes owe, era ipit bajipirtaer aempores apoken. 52Era ipit kain beken ajiosen. Are damo baso, ombare aesosen.
Yesus Yahudi Agama Atakam Basakamtii Owe bipu aememe atakam
(Mat. 26:57-68; Luk. 22:54-55, 63-71; Yoh. 18:13-14, 19-24)
53Emesare. Era owe, Yesus, Allah Tame pak baem ipit daytu atamepu atomasesen. Wan Allah Tame pak baem owe daytu takesam, Yahudi duturu oweam, Allah atakam baememtam oweam era asan ajarisiapesen. 54Petrusam Allah Tame pak baem ipit daytu atamepu, Yesus fe setep apok aesaramomen. Are Allah Tame banamek batai owe jisnam takan bajie ajamemapen. 55Allah Tame pak baem owe daytuam, Yahudi Agama Atakam Basakamtii Owe takesam Yesus batatii, emes atakam basakamtii akoten. Erarawa Yesus pota pak baem apaye, emes ateman batam owe atakam ajanimesen. Me, emes owe bataer apoken. 56Owe tanane Yesus aeme pak, pota ateman atamtamesen. Me, era ateman atakam, era awar apok. 57Wan owe awasites, wanam emes pota ateman atamesen: 58“Yesus emes atakam akore. ‘Asamot owe ara aemansa Allah Tame aeapomes. Dere ere, ara tame atiosomtemin. Atiosomteyrawa, bare bamintep Dere wan tame aoeapomtemin. Ara aoeapomtey tame, asamot owe aeapomes tamen apok.’ Yesus emes atakam aesime. Dare era akore atakam jane damba ajiom.” Emes pote ateman atamesen. 59Era ateman atakam akores owe, jipit taka, jipit taka, ere atakam awar apoknaken.
60Allah Tame pak baem ipit dayturawa, ara owe waut ataramen. Are Yesus ajateporen. “Ara aememares owe, Wore potanak atakam akoremas. Wore era owe atep ajitpem?” Emes atakam aesimen.
61Yesus arawa, atakam bapake apoken. Are atep bajit apoken. Allah Tame pak baem ipit dayturawa, “Wore Allah Aeremtaere Ipit ape? Dare Allah tere aeommarom. Wore, Armat Ipit Andep ape?” Emes atakam aesimen.
62Yesus arawa, “Dere era Ipit aememo. Tanom, Asamot Anakot Ajaoreme Ipit, Allah bo poman baemap aportemakam. Tare era Ipit wonamo bomon oup andaeto aportemakam.” Emes atakam aesimen.
63Emesare, Allah Tame pak baem ipit daytu emes atakam jane ajie, jak ambapnak aememen. Erarawa, apakaian akamosomen. “Dare wan ateman batam owe atakam bajanim bas. 64Ara Ipit Allah awaren. Are pota atakam daytu akorem. Tare emes atakam jane ajimakam. Tare wama tamen atakam sakamtiimakam?” Emes atakam aesimen.
Erarawa, era owe takes, “Yesus jaos Ipit. Owe ara Ipit batatiitas,” emes atakam ajamsakamamtiiesen. 65Wan owerawa, besa Yesus damo ajiepirimesen. Abiam kain apwirimapomes, wanam ban fon Armat Ipit atesen. “Ban fon tao paeman ajie? Atakam baesimey.” Emes atakam aesimesen. Banamek batai oweam Yesus atoomesen. Are Armat Ipit ake apakamesen.
Petrus, Yesus apatime atakam
(Mat. 26:69-75; Luk. 22:56-62; Yoh. 18:15-18, 25-27)
66Emesare. Petrus era tamsan aememe, Allah Tame pak baem ipit daytu akarai baetam taot andaemen. 67Era taot Petrus jisnam ajie aporen. Ararawa, banamek taka armat ipit ajieporen. “Wonom Nasaret Ipit juas Yesus takan aememaarukum.” Emes atakam aesimen.
68Petrus arawa, apatimemen. “Dere ara akoremarem atakam demsam apok.” Emes atakam aesimen. Ararawa, tamsan tiri asiapomes jimsappu ajisemen. [Ajisemerawa, ajomo ipit atakam akoren.]
69Ara karai baetam taotam Petrus era asan aememe aporen. Ararawa, atakam wan era asan aememes owe aokoromen. “Ara aememar ipit Yesus takan ajamememaarir ipit taka arare.” Emes atakam aesimen. 70Petrus arawa, aopatimemen.
Bojate emem apoken, era aememes owe, atakam Petrus aokoromesen. “Wore Galilea tapirmi ipit. Erarawa wonom era owe ajoo ipit.” Emes atakam aesimesen.
71Petrus arawa, atakam fiaknak aokoromen. “Pote apoknak! Allah banamek tair. Dere era atakam akoremakam Ipit demsam apok!” Emes atakam aesimen.
72Are emes atakam akorerawa, ajomo ipit atakam aokoren. Bonak ere, Yesus atakam Petrus akorome, “Wore atakam bare bamintep akorestemarem, ‘Dere Yesus demsam apok,’ emes atakam akorestemarem. Ajomo ipit arawa, bare jamnuk atakam asep akorestem.” Emes atakam aesimen. Petrusam era atakam bimak binip ajanimtaeren. Ararawa, bate ambaten.
@LAI 1994
