Yohana 18

UYeesu iikhatwa

(Mataayo 26:47-56; Maluko 14:43-50; Luuka 22:47-53)

1UYeesu pina wáamala kifuunya, wáwuukha na vamanyisiwa vaakwe, wálowokha mu lukwawo lwa Kiduloni, pina gukhandi gukwali umugunda gwa miseyituni. Vayinjila umo. 2Lino uYuuda yuna wámudolelaga uYeesu, akhandi agumeenye umugunda ugo, kwa kiiva uYeesu akhandi amanyeene kiluta mula wiila wiila lumo na vamanyisiwa vaakwe. 3Ino wáshilongosa ishipuga sha vasulukhali, lumo na vavanda avanji kihuma kwa vatambule avakhome na kwa Vafalisaayo, vaaluta mu mugunda gula, vakheete itaala, imuli ni malala.

4UYeesu wámanyaga goona gina gakhandi gisakulwa kisenjekha kunyaakwe. Lino wáwuukha paakhati ya vamanyisiwa vaakwe, wávaposa avaanu vina vakhandi vayinsile wáaja, “Wuli, mukimusakula yu naani?” 5Aveene vamugomosesa vaajova, “Tikimusakula uYeesu yuna ahumile ku Nasaleti.” UYeesu wávagomosesa wáaja, “Yuune yuna mukimusakula.” UYuuda yuna wámudolelaga uYeesu akhandi ayiimile lumo nawo. 6Lino uYeesu pina wávajovela kiija, “Yuune yuna mukimusakula,” avasulukhali vala vaatina kunyuma, vaagwa pansi. 7UYeesu wávaposa khanji wáaja, “Wuli, mukimusakula yu naani?” Aveene vamugomosesa vaajova, “Tikimusakula uYeesu yuna ahumile ku Nasaleti.” 8UYeesu wávajovela wáaja, “Navajovela kiija, yuune yuna mukimusakula. Nda mukinisakula one, lino valeshi avaanu ava vayilutilaje.” 9UYeesu wájovile ndeeno, baheene gakwilane gina wájovaga ulwamwandi kiija, “Nikhandi nikivadiima wunofu, baheene nisikhamuyasaaga hata yumo mu vala vina wanipeelaga.”#18:9 Yimba mu litaafili lya Yohana 17:12.

10USimoni Petulo akhandi ni panga, lino wáhomola, wámudumula ilikutu ilya kundiilo, umuvanda wa mutambule umukhome. Umuvanda uyo ilitaawa lyakwe akhandi yu Maliko. 11Leelo uYeesu wámujova uPetulo wáaja, “Petulo, tinia ipanga yaakho mu haala yaakwe. Wuli, usiimanya kiija, nisakulwa kilafisiwa ngaja uDaada shina agulumiile kiija nilafisiwe?”#18:11 Wuli, usiimanya kiija, nisakulwa kilafisiwa ngaja uDaada shina agulumiile kiija nilafisiwe? Kwa Shiyunaani yiyandiikhwe, Wuli, ikhoomasi yina uDaada anipeelile one nisikhayingʼwelelaga?

UYeesu itwalwa kwa Anasi

(Mataayo 26:57-58; Maluko 14:53-54; Luuka 22:54)

12Lino umukhome wa vayimililaaji va vasulukhali, lumo ni shipuga shaakwe, na vavanda va vakhome va Vayahuudi, vamukhata uYeesu, vamupinya. 13Lino vamutwala tangusiina kwa Anasi, yuna akhandi mukweye wa Kayafa, yuna akhandi mutambule mukhome uluhaavi ulo. 14Mu nsiku isa kunyuma, uKayafa wávasimilaga avakhome va Vayahuudi kiija, shiba umuunu yumo afwe kwa kiiva ya vaanu woona.#18:14 Yimba mu litaafili lya Yohana 11:50.

UPetulo ikimukhaana uYeesu

(Mataayo 26:69-70; Maluko 14:66-68; Luuka 22:55-57)

15USimoni Petulo nu mumanyisiwa uyunji yumonga, vamufwataga kwa kunyuma. Umumanyisiwa yula, umutambule umukhome akhandi amumeenye, yumwene wáhuluta nu Yeesu mu lukeeke lwa nanda ya mutambule umukhome. 16Leelo uPetulo wáyiima panja pa mulyango. Baheene umumanyisiwa uyunji yula, yuna umutambule umukhome akhandi amumeenye, wáahuma panja. Wálogola nu muhinja yumonga yuna akhandi muyangalilaaji pa mulyango, wámutawula uPetulo kiyinjila mu lukeeke. 17Lino umuhinja umuyangalilaaji yula, wámuposa uPetulo wáaja, “Wuli, na yuuwe usili munyaayumo mu vamanyisiwa va muunu uyo?” UPetulo wámugomosesa wáaja, “Ndaali, nisili yuune.” 18Kwa kiiva ya mepo, avavanda na vasenga nsengo vala vakhandi vayiimile pina gukwali umooto gwa mukhala, viyoota. Woope uPetulo akhandi ayiimile lumo nawo, akhandi iyoota umooto.

Umutambule umukhome ikimuposa uYeesu

(Mataayo 26:59-66; Maluko 14:55-64; Luuka 22:66-71)

19Lino umutambule umukhome yula, ilitaawa lyakwe Anasi, wámuposa uYeesu imola isa vamanyisiwa vaakwe na mamanyiso gaakwe. 20UYeesu wámugomosesa wáaja, “Uluhaavi loona nikhandi niijova kwa vaanu woona bahawuvalafu, nikhandi nimanyisa avaanu mu nanda seenyu isa kifuunyila na mu lukeeke lwa nanda imbaagule iya kifuunyila, muna aVayahuudi vinshi vikungaana. One nisilogwele shoshoona kwa wufiho. 21Lino kwashi mukiniposa one? Lino kwashi musikivaposa avaanu vina vakhandi vikinipuliisa uluhaavi pina nimanyisa? Aveene vagameenye gina nikhandi niijova na kimanyisa.”

22UYeesu pina wálogola ago, umusulukhali yumonga yuna akhandi ayiimile nkholeela nawo, wámubamula ikhofi, wámuposa wáaja, “Wuli, ukimugomosesa ndeeno umutambule umukhome?” 23UYeesu wámugomosesa wáaja, “Nda nalogola fivi, logola uwuvi wangu. Leelo nda nalogola ga shiyooli, lino kwashi ukinibamula?” 24Lino uYeesu pina ashaanali apinyiilwe, uAnasi wálajisa kiija, vamutoole na kiluta nawo kwa mutambule umukhome, uKayafa.

UPetulo ikimukhaana uYeesu khanji

(Mataayo 26:71-75; Maluko 14:69-72; Luuka 22:58-62)

25Lino uSimoni Petulo pina ashaanali iyoota umooto, avaanu vamonga vamuposa vaajova, “Wuli, na yuuwe usili yuyuumo mu vamanyisiwa va muunu yula?” UPetulo wákhaana wáaja, “Ndaali, nisili yuune.” 26Leelo yumonga mu vavanda va mutambule umukhome, yuna akhandi maame wa muunu yula yuna uPetulo wámutemaga ilikutu, wámuposa wáaja, “Wuli, usili yuuwe nakwagaga uluhaavi uli lumo nu Yeesu mu mugunda?” 27UPetulo wákhaana khanji wáaja, “Ndaali nisili yuune.” Baaho injogolo yaavikha.

UYeesu itwalwa kwa Pilaato

(Mataayo 27:1-2, 11-14; Maluko 15:1-5; Luuka 23:1-5)

28Ino ulwamilaawu pina kwasha, avakhome va Vayahuudi vamutoola uYeesu kihuma kwa Kayafa. Vaaluta nawo mu mbalino ya mukhome wa Valuumi. Leelo aveene vasikhayinjiile mu mbalino yaakwe,#18:28 Vasikhayinjiile mu mbalino yaakwe: Kilingana ni ngʼoma isa Vayahuudi, uMuyahuudi nda ayinjile mu nanda ya muunu yuna asili Muyahuudi, iwaafukha. Ndeeno asiyiitikhwa kiilya ishakiilya sha Pasaakha. kiija vasikhayishafulaga kwa kiiva visakula kiilya ishakiilya sha Pasaakha. 29Lino uPilaato, umunjaajila wa Shiluumi, wáahuma panja na kiluta pina vakhandi vakwali, wávaposa wáaja, “Wuli, umuunu uyu agahile wunansi wushi wuna mukimusitaakha?” 30Aveene vamugomosesa vaajova, “Nda umuunu uyu asikhandi munansi, ndi tisayinsa nawo kunyaakho.” 31UPilaato wávajovela wáaja, “Lino omwe mutooli mumuhije kilingana ni ndaji seenyu.” Leelo aveene vamugomosesa vaajova, “Tisiina uwutawulilwa uwa kimuhiga umuunu yoyoona kiija afwe.” 32Gasenjekhaga ndeeno, baheene gakwilane amaswi gina wálogolaga uYeesu, kiwonensa akhafwa mfwa nshi.

UPilaato ikimuposa uYeesu

33Lino uPilaato wáhuluta khanji mu mbalino, wálajisa kiija vamutwale uYeesu kunyaakwe, wámuposa wáaja, “Wuli, owe yuuwe Mutwa wa Vayahuudi?” 34Leelo uYeesu wámugomosesa wáaja, “Wuli, gina ukiniposa, giihuma mu mahiiva gaakho awu vaanu vanji vakujovela imola sangu?” 35UPilaato wámugomosesa wáaja, “Eena, shiyooli ago gasili mahiiva gangu, one nisili Muyahuudi! Avaanu va shimyanja shaakho lumo na vatambule avakhome, vaveene vina vakuleeta kunyangu, kiija nikuhije. Wuli, waagaha shishi?” 36UYeesu wámugomosesa wáaja, “UWutwa wangu wusili wa mu nyi iyi. Nda waali wuve wa mu nyi iyi, lino avamanyisiwa vangu vaava vakwiliile kinilwilanila, baheene nisikhakhatwagwa na Vayahuudi. Leelo uWutwa wangu wusili wa mu nyi iyi.” 37Lino uPilaato wámuposa wáaja, “Wuli, lino shiyooli kiija, owe uli mutwa?” UYeesu wámugomosesa wáaja, “Owe walogola kiija, one nili mutwa. One nikhasaviilwe mu nyi iyi, khanji nayinsaga baheene nivamanyise avaanu ishiyooli. Umuunu yoyoona yuna ikishifwata ishiyooli, ikigapulikha amaswi gangu.” 38UPilaato wámuposa wáaja, “Ishiyooli uluganulo lwakwe shi?”

UPilaato pina wálogola ago, wáahuma panja khanji, wávajovela avakhome va Vayahuudi wáaja, “One nisilyajile liswi lyolyona lina ananjile umuunu uyu. 39Leelo muna ngʼoma ya kinilomba kivadindulila umudindilwa yumo, mu luhaavi lwa shiwungo sha Pasaakha. Wuli, mwisakula nivadindulile uMutwa wa Vayahuudi?” 40Leelo avaanu woona valyova ilyowo vaajova, “Ndaali! Usikhatudindulilaga umuunu uyo, leelo utudindulile uBalaaba.” UBalaaba akhandi adindiilwe mu shifungo, kwa kiiva ya kiyikhaana iselekhaali ya Valuumi yisikhavatemaga.

선택된 구절:

Yohana 18: Shisangu

하이라이트

복사