Yohana 17
17
UYeesu ifuunya kwa Nguluvi
1UYeesu wáganaga kimala kilogola ago goona na vamanyisiwa vaakwe, wáloleela kushaanya, wáfuunya wáaja, “Wee Daada, uluhaavi lwangu lwafikha. Vawonensa avaanu uwutupikho wangu one Lusawo lwakho, baheene na yuune nivawonense uwutupikho waakho shina wushwali. 2Wanipeela uwutawulilwa uwa kivalongosa avaanu woona, baheene nivapeele avaanu vina vikinihuviilila uwuumi wa shiluta. 3Uwuumi wa shiluta uwo, umuunu ikiwupata kwa nsila ya kimanya kiija, owe Nguluvi uli yuuwe duguli, khanji vanimanye one kiija yuune Yeesu Kilisito, yuna unifiliishe kuveene. 4One nakutupikha kwa vaanu woona, kwa kiyimala insengo yina wanifilikhaga kiyisenga. 5Wee Daada, nilomba unitupishe, kwa wutupikho wuna nikhandi nawo uluhaavi tili lumo, pina inyi yisinawumbwe.
UYeesu ikivafuunyila avamanyisiwa vaakwe
6“Wee Daada, nakukhoona shina ushwali, kwa vaanu vina wanipeelaga mu nyi iyi. Vakhandi vaanu vaakho, owe wanipeelaga. Khanji vagahile goona gina ukhandi uvalajiise. 7Lino vaamanya kiija, ifiinu fyona fina wanipeelaga, fiihuma kunyaakho, 8kwa kiiva navajovela goona gina wanijovelaga. Woope vagaposheela, vameenye kiija, shiyooli naahuma kunyaakho, khanji vahuviilila kiija, owe wanifilikhaga. 9Nikivafuunyila awo kwa kiiva vaanu vaakho. Nisikivafuunyila avaanu woona, leelo nikivafuunyila avaanu vina wanipeelaga. 10Avaanu woona vina vangu one, na yuuwe vaakho, khanji avaanu woona vina vaakho, na yuune vangu. Uwutupikho wangu shina wushwali, wukhoniilwe kwa vaanu kishilila avamanyisiwa vangu. 11One niyinsile kunyaakho, lino nisiiva nikwali khanji mu nyi iyi. Leelo aveene vasiyiteneshe kiiva mu nyi iyi. Wee Daada, wee Munofu, nikikulomba uvayangalile kwa litaawa lyakho lina wanipeela, baheene vave shiinu shimo ngaja shina one noowe shina tili shiinu shimo. 12Uluhaavi nili lumo nawo nikhandi nikivayangalila kwa litaawa lyakho lina wanipeela. Nikhandi nikivadiima wunofu baheene nisikhamuyasaaga hata yumo mu vala, leelo mwene duguli yuna isakulwa kiija afwe, baheene gawoneshe gina gayandiikhwe mu Mayandikhwa aManofu.#17:12 Yimba mu litaafili lya Sabuli 41:9.
13“Wee Daada, lino nili mu nsila niyinsa kunyaakho. One nikivajovela goona ago avamanyisiwa vangu, pina nishaanali nili mu nyi iyi, baheene vave nu wushendeefu mandu mu numbula saanave, ngaja shina one nina wushendeefu. 14Navajovela avamanyisiwa vangu imola sina wanipeela. Leelo avaanu va mu nyi iyi vikivakhalalila, kwa kiiva aveene vasili va mu nyi iyi, ngaja shina na yuune nisili wa mu nyi iyi.
15“Wee Daada, nisifuunya kiija uvawuuse mu nyi iyi, leelo kiija uvakuluse kwa Munansi yula uShetaani. 16Aveene vasili va mu nyi iyi ngaja shina one nisili wa mu nyi iyi. 17Wee Daada, nikikulomba uvavalase kwa shiyooli shaakho, kwa kiiva iliswi lyakho lilyene lya shiyooli. 18Ngaja shina wanifilikhaga one mu nyi, shiisho ndeeno na yuune navafilikha aveene mu nyi. 19Nikiyihumya kikusenjela owe kwa kiiva yaanave, baheene woope vayihumye kunyaakho kwa shiyooli.
UYeesu ikivafuunyila vina vikimuhuviilila
20“Nisikivafuunyila awo hela, ila nikivafuunyila vala woona vina vakhayinsa kinihuviilila kwa kiiva ya gina vimanyisa avamanyisiwa vangu. 21Nilomba avaanu woona vave shiinu shimo. Daada! Nilomba vave mukhati yeesu, ngaja shina owe uli mukhati yangu, na yuune shina nili mukhati yaakho. Nilomba kiija vave shiinu shimo, baheene vahuvililaje kiija, yuuwe yuna wanifilikhaga. 22Na yuune uwutupikho wula wuna wanipeelaga, na yuune navapeela avamanyisiwa vangu, baheene vave shiinu shimo, ngaja one noowe shina tili shiinu shimo. 23One nili mukhati yaanave, na yuuwe uli mukhati yangu. Nilomba kiija, vave shiinu shimo khabisa, baheene kwa nsila iyi, avaanu woona va mu nyi vamanye kiija, owe wanifilikhaga, khanji vamanye kiija, uvageene ngaja shina unigeene one.
24“Wee Daada, nidobokha kiija avaanu vina wanipeela vave lumo noone pina nikwali, baheene vawaaje uwutupikho wangu wuna wanipeelaga, kwa kiiva waniganaga kihuma pina inyi yisinawumbwe. 25Wee Daada, Munya Shiyooli, avaanu va mu nyi iyi vasikumeenye. Leelo one nikumeenye, khanji avamanyisiwa vangu vameenye kiija, owe wanifilikhaga. 26One nivamanyiise shina ushwali owe, khanji nisiyiteneshe kisenga ngaja ndeeno, baheene vaganane ngaja shina unigeene one, khanji baheene nive mukhati yaanave.”
© 2020, Wycliffe Bible Translators, Inc. All rights reserved.
