Lk. 12
12
Likaambila khu babacha
(Mat. 10.26-27)
1 #
Mat. 16.6; Mk. 8.15 Siise esio babaandu chielefu chingali baba bebuusiisie alala niio Yesu aaba sikila bukali bwabwe, baswalanangakho. Yesu arakikha khuboolela babeeka bewe ali, “Mwelinde khukhwama khu limela lie Bafarisayo, yaani buubacha bwabwe. 2#Mk. 4.22; Lk. 8.17 Se siliio sisiakisibwa sililekha khubonekha tawe, namwe sisiakukhuulilwa sikhalimanyikha tawe. 3Khwako siosi siosi nisio mwaloma mu siilima sikhaulilikhile mu buwaanga ne nisio mwemoonyela mu lusiro sililomekhela khunju khungaaki.
Niye okhoyela khuria
(Mat. 10.28-31)
4“Ese muboolela enywe basaale base, mukharia abo babeera kumubili ne enyuma wako se banyala khukhola sisiindu situumao tawe. 5Ne kakhali ndamuboolela niye mukhoyela khuria. Khemurie Wele onyala khwira kumubili mala enyuma wako akumwaate mumulilo. Ng'ali muboolela enywe ndi, ria omwenoyo!
6“Opiicho biraano se bikulikhanga chisilingi chibili tawe ku? Mala Wele se ebililanga akhaba khalala khu nibio tawe. 7Ng'ali, akhaba lichuune lienywe liosi liabalwa. Mukharia tawe; enywe muli be bukhala bukali khukhila opiicho bikali!
Khukhweyama Kristo ne khumuloba
(Mat. 10.32-33; 12.32; 10.19-20)
8“Ne muboolela enywe ndi, buli mulala ounjiyama ebweeni we babaandu akhaba Omwana wo Mundu yesi akhamweyame ebweeni we bamalaika ba Wele. 9Ne oyo ounjekaana ese ebweeni we babaandu, sesi khamwekaane ebweeni we bamalaika ba Wele.
10 #
Mat. 12.32; Mk. 3.29 “Ne buli mulala oloma likhuwa liibi khu Mwana wo Mundu alibeelwa. Ne oyo okholela Roho Omutakatifu embelekeu se alibeelwa tawe.
11 #
Mat. 10.19-20; Mk. 13.11; Lk. 21.14-15 “Ne balimuyila enywe khuyaalwa ebweeni we babaami nende be bunyali mu chi Sinakooki, mukheembeelela niko mucha khuloma tawe. 12Sikila Roho Omutakatifu alimwekisia niko mukhoyeele khuloma siise esio.”
Lukano lwo muyiinda omusilu
13Omundu mulala mu baandu bakali amuboolela ali, “Omwekisia, boolela wandaayase khukabane kimiaandu nikio paapa akhulekhela.” 14Yesu amukobosia ali, “Ewe munduwe, naanu owakhola ese khuba omukhalaki namwe omukabania enywe kimiaandu?” 15Mala ababoolela ali, “Ba meso mala mweliinde khu bulianga bwe chingano choosi sikila bulamu bwo mundu se bukholwa khukhwama mu bukali bwe kimiaandu nikio ali nakio tawe.”
16Nio Yesu ababoolela lukano ali, “Abao omuiinda mulala owaba ne kumukuunda kukwamuelesia likesa likali po, 17mala ebaasia ali, ‘Khole siina, sikila se ndi ne niio mbunga likesa liase tawe?’ 18Mala aloma ali, ‘Ndasambula bibiaki biase mala khupe bibiindi bibalaayi nio mbungemo likesa ne bibiindu biase bioosi. 19Mala mboolele kumwoyo kwase ndi, luno oli ne libiikhilo lie bibiindu bikali khulwe kimiiko kimikali, yesangaasia, lia, onywe wekhoye!’ 20Ne kakhali Wele amuboolela ali, ‘Musilu ewe! Siilo sino kumwoyo kwowo kulabukulwa, ne bibiindu nibio wabiikha mwibiikhilo bilaba bia naanu?’ 21Khwako yuno ali nga omundu wibikhilanga libiikhilo omwene, ne se ali omuiinda mu moni cha Wele tawe.”
Suubila mu Wele
(Mat. 6.25-34)
22Nio aboolela babeeka bewe ali, “Khwako muboolela enywe ndi mukheendekhelela mu limenya lienywe nisio mulalia ne khufwara tawe. 23Bulamu bukhila siakhulia, ne kumubili kukhila chingubo. 24Yibaasia nga khooro kili, se kimiichanga namwe se kikesaanga tawe, se kili ne bibiaki nibio kibungamo tawe, ne kakhali Wele akiliisianga. Ne enywe muli be bukhala bukali khukhila chinyuni! 25Ne naanu khwinywe oonyala aleeyiakho bulamu bwewe? 26Waaba nono nokhanyala khukhola sisiindu sitiiti nga esio tawe, siina sikila ne weendekhelela ke bibiindu bibiindi? 27#1 Bab. 10.4-7; 2 Ke Ch. 9.3-6 Yibaasia bimuli bie mundaa nga bichoanga, se bikholanga kimilimo namwe se bienabilanga chingubo tawe. Ne kakhali muboolela enywe ndi, akhaba omwami Solomoni mu buiinda bwewe bwoosi, se efwara chingubo lukoondo lulayi nga simuli silala khu bino tawe. 28Baandu be lisuubila litiiti enywe, kaaba bali Wele afwaraanga bimuli bie mundaa ario, bibao luno ne muchulu bimwaatwa mu mulilo, aba se anyala amuliinda enywe lukali khukhila bimuli tawe ku?
29“Khwako mukhayiima nisio mulalia nende nisio mulanywa tawe, namwe mukhaayaaya tawe. 30(Sikila Chikholo choosi che khu sibala sino chiyiimanga bibiindu bino;) ne Raraawenywe amanyile ali mwenyekhana mube nabio. 31Ne kakhali, yiima Bubwami bwewe, ne bibiindu bino bioosi bilaba bibienywe.
Buyiinda bwe mwikulu
(Mat. 6.19-21)
32“Enywe muuli batiiti, mukharia tawe, sikila buli busangaafu bwa Raraawenywe khu muelesia enywe Bubwami. 33Khemukusie bibiindu nibio muli nabio, mala muelesie bataambi chirupia. Khemube ne chilolooti chikhakofula tawe, ne libiikhilo mwikulu likhawa tawe, niio omwifwi akhoola namwe kamasilili kaalia tawe. 34Sikila niio libiikhilo liowo lili, abwenao niio kumwoyo kwowo kuli.
Bakholi baali meso
35 #
Mat. 25.1-13
“Mwiboe kimisiipi kienywe, mwirekekhe khu siosi siosi ne chitaa chenywe chikhosie, 36#Mk. 13.34-36 khemube nga bakholi baliindiliile omukhongo owabaandika ne echa engo khukhwama mu naikara eye siselelo, nio nga eecha akhong'oonde bamwikulileo khangu. 37Bali ne khabi bakholi nibo omukhongo nga alikobola, anyoole ne bali meso! Ng'ali ese muboolela enywe ndi, alieboa kumusiipi abekhasie khusialwa mala abaelesie siakhulia. 38Ne aliicha mu silo akari namwe mu makhelebeende, mala abanyoole ne bali meeso bario aba bakholi abo bali ne khabi! 39#Mat. 24.43-44 Ne kakhali manya muli, omwene nju ne amanya esaa niyo omwifwi eechelakho, andi se aalekha enju yewe yafunakwa tawe. 40Khukhwola enywe mwesi mwirekekhe, sikila Omwana owo Mundu alikho eecha esaa niyo mukhamwirekekhele tawe.”
Omukholi omweyikinwa ne okundi okhali omweyikinwa tawe
(Mat. 24.45-51)
41Petero aloma ali, “Omwami olakhuboolelanga efwe lukano luno namwe khu baandu boosi?”
42Ne Omwami akobosia ali, “Nono naanu oli omukholi omusuubilwa lundi omukesi, niye omukhongo wewe alira khu bwimeelesi bwenju yewe khukabila bakholi basie sikelo sie siakhulia khu siise sisienyibwa? 43Ali ne khabi omukholi niye omukhongo wewe alikobola anyoole nakholanga ario. 44Ng'ali ese muboolela enywe ndi alimura mu bwimeelesi bwe kimiaandu kiewe kioosi. 45Ne omukholi oyo aaba ne ebaasia ali, ‘Omukhongo wase se alakobola khangu tawe,’ mala arakikhe khukhupa bakholi be siseecha nende be siikhasi, ne khulia ne khunywa ne ameela. 46Omukhongo owo mukholi oyo alikobola khu ndaalo niyo akhamwirekekhele tawe, ne esaa niyo akhamanyile tawe. Alimurusia enje amuelesia siiukuumo ne khumura alala nende bakhali basuubilwa tawe.
47“Ne omukholi owamanya lilienya lio mukhoongo wewe mala khwirekekha namwe khukhola nga lilienya lio mukhoongo ne lili tawe, alinyoola bukhupe bukali. 48Ne kakhali omukholi okhamanyile lilienya lio mukhoongo wewe, ne akhola kakholaana tawe, alinyoola bukhupe butiiti. Buli mulala owaebwa bikali alienyekha khurusia bikali, ne niye babaandu baelesia bikali, balimwenyakho bikali.
Babaandu baukhana sikila Yesu
(Mat. 10.34-36)
49“Necha khubwana kumulilo khu sibala mala andi kwaburuukhe khale! 50#Mk. 10.38 Ndi ne libatiisia nilio khoyeele nyoole mala ndi ne liliendekhelela likali khukhwola nga likholekha. 51Enywe mwibaasia muli necha khureera kumuleembe khu sibala? Ese muboolela enywe ndi, se kali kario tawe, ne kakhali necha khureera bubwaukhani mu baandu. 52Khukhwama luno enju ndala elimo babaandu baraano balaukhana, bataru balabiila babili ne babili balibiila bataru. 53#Mik. 7.6 Paapa akhabiile omwana wewe omusoleeli, ne omwana omusoleeli akhabiile raraawe, maayi akhabiile omwana wewe omukhaana, ne omukhaana akhabiile maawe, ne masalaawe owe siikhasi akhabiile mukho musaani, ne mukho musaani akhabiile masalaawe.”
Khumanyilisia siise
(Mat. 16.2-3)
54Yesu aboolela babaandu ali, “Ne mubona lifuumbi lisiuukha mumbo, muloma muli efula eli siimbi mala kakholekhanga kario. 55Ne mubona ekhuungu eye bunafubo ne ucha muboola muli, ‘Kumuumu kumurafu kulabao,’ mala kakholekhanga kario. 56Babacha enywe! Siina ne mu manya lifwaana lie sibala ne likulu, ne se mumanyile nga mumanyilisia siise sia luno sino tawe?
Uliilisiana nende niye mulomana naye
(Mat. 5.25-26)
57“Ne siina sikila mwabeene ne mukhekhalakila niko mukhoya mukhole? 58Ne olikho ocha nende niye mulomana naye ebweeni wo mukhalaki, khola kamaani ouliilisiane naye ne mu siili khu ngila, akhakhola ario akhwosia khu mukhalaki mala omukhalaki naye akhura mu makhono ko mukhulu owe siboe ne omukhulu owe siboe oyo naye akhumwaate mu siboe tawe. 59Khuboolela ndi se olirura mu siboe omwo tawe, nabwila nga noruunga esilingi emaliilisi.”
©Bible Society of Kenya, 2019
