Lk. 11
11
Yesu ekisia babeeka bewe khusaba
(Mat. 6.9-13; 7.7-11)
1Endaalo ndala Yesu aaba abuundu asaba. Ne nga amala, mulala khu beeka bewe amuboolela ali, “Omwami khwikisie khusaba nga Yoana ne ekisia babeeka bewe.” 2Yesu ababoolela ali, “Ne musaba saba muli:
‘Paapa, Lisina liowo lifumisibwe,
Bubwami bwowo bwiche.
3Khuelesie busiele siakhulia siefwe sia buli ndaalo.
4Khubeele bubwoni bwefwe,
sikila efwe khubeelanga boosi bakhukholela efwe kamabi,
ne okhakhuyila mu makhako tawe!’ ”
5Nio lundi Yesu ababoolela ali, “Naanu khwinywe onyala aacha wo musaale wewe mu silo akari mala amusabe ali musaale, njekopiekho kimikaati kitaru 6sikila omusaale wase ali khu lukeendo mala andundubiikhe, ne ese se ndi ne siakhulia nisio muelesia tawe! 7Nio we munju amukobosia ali, ‘Okhanaania tawe, nekaaleyo kumuliango, ne ese ne babaana base khwakonile. Se nyala nenyokha nakhuelesia sisiindu siosi siosi tawe.’ 8Muboolela ndi, akhaba omusaale wewe ne alalekha khwinyokha sikila busaale, alenyokha amuelesie nisio enya sikila alikho abelelela khusaba.
9“Nio muboolela enywe ndi, saba ne mulaebwa, yiima ne mulanyoola, khong'oonda mulekulilwa. 10Sikila buli osaba aebwa, ne oyo oyiima anyoola, ne oyo okhong'oonda alekulilwa. 11Paapa siina mwinywe niye omwana wewe asaba eng'eeni, ne naye mu bweyaangu bwe ng'eeni amuelesia endemu? 12Namwe namusaba liki amuelesia walute? 13Nono enywe muuli babi muri, mumanyile khuelesia babaana benywe biianwa bilayi, aba Paapa owe mwikulu salaana Roho Omutakatifu khwaabo bamusaba!”
Yesu ne Beelisebuli
(Mat. 12.22-30; Mk. 3.20-27)
14Yesu aba alikho arusia mu mundu sisieeno sisiamuandia lulimi, nga ne siarura, arakikha khulomaloma, mala babaandu bauka lukali. 15#Mat. 9.34; 10.25 Ne kakhali balala baloma bali, “Arusia bisieeno mu bunyali bwa Beelisebuli omukhulu owe bisieeno.” 16#Mat. 12.38; 16.1; Mk. 8.11 Ne babaandu babaandi benya khureka Yesu, khwako bamureeba akhole simanyisio sisiekesia sili Wele ali naye. 17Yesu amanya kamebaasio kaabwe, mala ababoolela ali, “Buli bubwami bukabukhanamo bubwene khu bwene bukwa, ne nju eyakabukhanamo se yimaanga tawe. 18Khwako bubwami bwa Sietani ne bukabukhanamo bipupu mala biapana bibieene khu bieene, bubwami bwewe obwo bunyala bwayiindila ku? Enywe muloma muli ese ndusia bisieeno sikila Beelisebuli amba bunyali khukhola ndio. 19Ne ese naaba nendusia bisieeno mu bunyali bwa Beelisebuli aba babaandu benywe barusibwanga bisieeno mu bunyali bwa naanu? Khwako babaandu benywe bekesia bali se muli ng'ali tawe. 20Ne naaba nendusia bisieeno mu bunyali bwa Wele, aba Bubwami bwa Wele bwechile khale mwinywe.
21“Omundu owe kamaani ne aliinda lukoba lwewe, kimiaandu kiewe kiba bulayi busa; 22Omundu we kamaani khu mukhila namwibwaakala mala amunuula bulwaani bwewe bwoosi nibwo eyikina, amuula mala akabana ne babaandi nibio anuulile mu lukoba olwo. 23#Mk. 9.40 Yesi yesi okhali lubeka lwase tawe, aba anjenyela kamabi ne yesi yesi okhabuusia nase tawe aba akhasalanisia.
Khukobola khwe sisieeno
(Mat. 12.43-45)
24“Sisieeno ne sirura mu mundu, siyiiyayiiya mu siangalaamwe ne siyiima niio siolela; ne sikhanyoola abuundu osi osi tawe, siloma sili, ‘Ndakobola munju yase niyo namamo.’ 25Nga siolamo sinyoola enju chana yeyilwe ne khung'oonwa bulayi. 26Nio sisieeno chana sicha mala sireera bisieeno bibiindi saba biibi lukali khusikhila nisio, mala singila ne khumenya mu mundu oyo. Khwako omundu oyo aba bubi lukali khukhilakho nga aba mataayi.”
Busangaafu bwa ng'ali
27Nga Yesu ne aboola kano, omukhasi mulala mu baandu aloma ali, “Omukhasi wakhusaala ne khu khukhusia ewe ali ne khabi.” 28Ne kakhali Yesu aakobosia ali, “Bali ne khabi abo baulila elomo eya Wele ne khukitiila!”
Khukhwenya khubona kamayia
(Mat. 12.38-42)
29 #
Mat. 16.4; Mk. 8.12 Nga babaandu bakucha Yesu arakikha khuboola ali, “Eselukho yino eli emayaanu. Yenya kamayia ne se kaliio niko elaelesibwa tawe ne kakhali ka Yona kong'ene. 30#Yon. 3.4 Bulayi bwene nga omung'oosi Yona aaba simanyisio khu baandu ba Ninefe akhaba Omwana wo Mundu aliba ario khu selukho yino. 31#1 Bab. 10.1-10; 2 Ke Ch. 9.1-12 Endaalo eye likhalaka Kwini owa Sheba akheeche akhalakile babaandu be selukho yino, sikila ama aleeyi khukhwicha khuulila liliekisia lilayi lia Solomoni, ne lola sisiindu siboofu khukhila Solomoni sili ano. 32#Yon. 3.5 Khu Ndaalo eye Likhalaka babaandu ba Ninefe bakheeme alala ne selukho yino mala bakikhalakile sikila nibo nga baulila kamelwacho ka Yona bekanila, ne ese mu suubisia enywe ndi, sisiindu siboofu khukhila Yona nisiesi ano!
Etaa eye kumubili
(Mat. 5.15; 6.22-23)
33 #
Mat. 5.15; Mk. 4.21; Lk. 8.16 “Se aliio omundu oambianga etaa mala akikisa namwe akifumalikhila mu sikono tawe; ne kakhali akira khu siteetwe, nio abo babengila munju babone buwaanga. 34Emoni yowo eli etaa eye kumubili kwowo, emoni yowo neli enamu, kumubili kwowo kwoosi kuba buwaanga, ne emoni yowo yaaba ne bofuule, kumubili kwowo kwoosi kuba mu siilima. 35Khwako ba meso, buwaanga bukhulimo bukhaba sisiilima tawe. 36Kumubili kwowo kwaaba ne kuli mu buwaanga, ne se kuli ne lubeka luuli mu siilima tawe, kwoosi kulakhosia nga etaa ne mukhoselianga enywe buwaanga bwayo.”
Yesu ekiicha Bafarisayo ne baandiki
(Mat. 23.1-36; Mk. 12.38-40)
37Nga Yesu amala khulomaloma kano, Omufarisayo mulala amuboolela bache banyoole siakhulia munju mwewe, nio acha mala aalia naye. 38Omufarisayo auka nga abona Yesu nalia nakhasaaba tawe. 39Ne Omwami amuboolela ali, “Enywe Bafarisayo mu siinganga sikoombe ne saani yenywe khu ngaaki, ne mukari mwenywe mwechulamo bunuuli ne bubi. 40Basilu enywe! Wele owang'oona enje se ali niye owang'oona ne mukari tawe ku? 41Ne kakhali yeeta bataambi bibiindu bie mu sikoombe ne chisaani chenywe nio buli sisiindu sibe sikwalaafu khwinywe.
42 #
Bal. 27.30
“Sili silaamo khwinywe Bafarisayo! Sikila muananga sitonyi silala khwikhumi sia pinsari, esuufwa ne buli nyenyi mala mulekelesia buluungi ne busiime bwa Wele. Mwenyekha mukhole kano ne mukhalekelesia kakaandi tawe.
43“Sili silaamo khwinywe Bafarisayo! Sikila mwasiima chindebe che bweeni mu sinakooki ne khukhesibwa ne liria khu soko. 44Sili silaamo khwinywe! Sikila muli nga biliindwa bikhabonekha tawe, nibio baandu bakeendakho ne se bamanya bali biliindwa nibio tawe.”
45Mulala khu baandiki amuboolela ali, “Omwekisia nga noloma ori aba olikho khubiiya akhaba efwe fwesi!”
46Ne kakhali Yesu amukobosia ali, “Sili silaamo akhaba khwinywe baandiki! Sikila mutiuukha babaandu bisutwa bisiro bikhasutikha tawe, ne enywe mwabene se mubitiilakho akhaba ne lulwala lulala tawe. 47Sili silaamo khwinywe! Sikila mung'oona biliindwa bie bang'oosi nibo bakuuka benywe beera. 48Nono, enywe mwabene muli baloli mala mufukiilila niko bakuuka benywe bakhola, sikila nibo beera bang'oosi abo ne enywe nanywe mung'oona biliindwa biabwe. 49Sikila kano, Limanya lia Wele lialoma lili, ‘Ndi barumira bang'oosi ne barumwa, baliira balala khu nibo ne khukhupia siibi babaandi.’ 50Khwako eselukho yino elireebwa kamafuki ke bang'oosi boosi baberwa khukhwama sibala ne sirakikha 51#Lir. 4.8; 2 Ke Ch. 24.20-21 khukhwamila khu mafuki ka Abili khukhwola khu mafuki ka Sakaria niye bereera akari wa alutare ne Abuundu Atakatifu. Yee, ese muboolela enywe ndi eselukho yino elibaanjwa sifuki esio sioosi.
52“Sili silaamo khwinywe baandiki! Sikila enywe mubukula lufunguo lwenju eye bukesi ne enywe mwabene se mwingilamo tawe, lundi mukhiingilila abo bakhaka khukhwingilamo!”
53Nga Yesu ne aama abuundu ao baandiki ne Bafarisayo bakhaka khumueakasiakho ne khumureeba kamareeba kamakali, 54bakhaka khumwekhakasia bamunyoolekho kamabi khukhwama mu niko aloma.
©Bible Society of Kenya, 2019
