Mariko 9
9
1Sodi torubak Yesu iruoro ebala, “Kalimokinit esi atamar eya ngiche nege lu nyetoakete jik eringa nyeanyungara Apolou a Akuj ebuni a agogongu.”
Akibelo a Yesu
(Matayo 17:1-13; Luka 9:28-36)
2Adaunet a ngirwa a ngikan-kapei, toriko Yesu Petero ka Yakobo ta Yoana todokasi kesi make kidiama emoru lokooyen. Kibelei Yesu iteete kesi, 3sodi tokwangeta ngiworui keng kea, emam itwaan anakwap ni epedori akilotar ngiworui keng tokwangeta kongina. 4Sodi kingolikis ngirukitos luuni ngulu Elija ka Musa iruorosi ka Yesu. 5Tolimok Petero Yesu tama, “Eketataman, ejok noi ani kiyakar ngoni nege! Kidukokini sua ngakais ngauni nege, apei akon, apei aka Musa, apei aka Elija.” 6#2 Pet 1:17-18 Kona abulitor Petero ka ngirukitos luche noi, tongopikis ngesi ngakiro elimuni. #Mat 3:17; Mar 1:11; Luk 3:22
7Sodi totiyaun edou tarap kesi a etorube keng, kiirasi kesi etoil alodou kangolo ebala, “Lokookang lominat ngesi lo, topupokisi ngesi!” 8Nipei bore ngini tongolengolekis kesi, nakaneni nyingolikina itwaan iche pearai Yesu bon lo arukito ka kesi.
9Ani etiyaate kesi alomoru todungok Yesu tama, “Nyiilimokis itwaan tani ipei nguna ingolikis esi tanang akolongit na eyarunea Lokookeng a Itwaan.”
10Kiwapa kesi ngakiro na adungokini ngesi, nakaneni tolomakis akingitanar make ebalasi, “Nyo, mono erai ‘ayarun’?” 11#Mal 4:5; Mat 11:14 Sodi kingita kesi Yesu tamasi, “Nyo ebalatar ngiketatamak a etal ejoikinit Elija ebuni ekingaren?”
12Tatachu ngesi na abala, “Iteni ebuni Elija ekingaren sodi tosubak ngakiro daang kitiriyan. Ani nyo bo elimunitere anagiran atamar eboliare Lokookeng a Itwaan noi sodi tongeroi? 13Nakaneni kalimokinit esi atamar abu kolong Elija sodi tosubeta ngitunga ngesi ngakiro daang na asakete asubea loger lo elimunitere ngakiro keng anagiran.”
Etangalekini Yesu edia lo ebapit Ekipe
(Matayo 17:14-21; Luka 9:37-43)
14Na abongoreta nia ngirukitos aluche, kingolikis asepich a ngitunga iriamit kesi toya ngiketatamak a etal ngiche lu apegasi ka kesi. 15Na engolikineta ngitunga Yesu, apot toriangakinos noi, sodi tamataros ni ayei ngesi kimalata. 16Kingit Yesu ngirukitos keng tama, “Nyo ipegasi esi ka kesi?”
17Tatachu itwaan ipei anasepich a ngitunga tama, “Eketataman, ayaunit ayong lokookang nikon kainyo etingit ngesi Ekipe lopenyisuruori. 18Na ekopunio ngesi Ekipe tadakakin nalup, nabo tokuut ngikurudoi anakituk, tokirich ngikel, nabo tokuta akwaan daang. Alimokinit tani ngirukitos kon atamar kitwarakisi Ekipe, nakaneni tokuruwo kesi akitwarakin.”
19Tolimok Yesu kesi tama, “Iraakasi esi ngitunga lu nyinupito Akuj! Ejoikinit ayong kiruki ka esi tanang ori? Anaikini ayong ngakiro kus tanang ori? Yautu idia nege!” 20Yaut kesi idia nia Yesu.
Ani napei engolikinea Ekipe Yesu, abu tadakak idia nalup kirakar, kibelobelokin elakakinit ngikurudoi anakituk. 21Kingit Yesu apakeng a idia tama, “Ngirwa ngiai ekonea edia logo nege?”
Tatachak tama, “Napei kolong a ekiditeu keng. 22Ngirwa ngikaalak echakanakini Ekipe ngolo ngesi nakim ka nakipi esaki akiar. Kisienoi kare sua kingarakinae, erai kipedori!”
23Tolim Yesu tama, “Aawa, erai kipedori! Epedorosi ngakiro daang anitwaan ani enupit.”
24Atipei kirema apakeng a edia tama, “Anupit cha nakaneni kitunupae noi!”
25Na engolikinea Yesu atamar achunun asepich a ngitunga daang nikech, abu todungok Ekipe ngolo tama, “Iyong Ekipe lokinim lo nyiruoro, kadungokinit iyong atamar tolom alodia kalo, wara nyiiloma nabo nikeng jik!”
26Kibap Ekipe edia ngolo tadakakin kwap kirakar sodi kirema, topudo. Kikok edia ngolo ekatoan, sodi tamasi ngitunga daang, “Atoana ngesi!” 27Nakaneni toting Yesu akan keng sodi kitonyou towo.
28Na alomarea Yesu tooma, kingita ngesi ngirukitos keng anikeng bon tamasi, “Nyo pekitwarakinea sua Ekipe?”
29Tatachak Yesu kesi tama, “Akilip bon itwarakini Ekipe lo ikoni lo, emam nabo ibore iche itwarakini.”
Alimuni Yesu nabo akiroit a akitu keng
(Matayo 17:22-23; Luka 9:43-45)
30Torotokis Yesu ka ngirukitos keng kaneni kitoro Galilaya, peasaki Yesu ngitunga toyena atamar ayei ngesi neni. 31Ekonea neni, etatami ngesi ngirukitos keng ebala, “Erikokinio Lokookeng a Itwaan ngitunga lu earete nakaneni akolongit na a ngauni eyaruni.”
32Nyeyenuna kesi ngakitatamet nguna, nakaneni toema kesi akingit ngesi.
Ngae epolot noi?
(Matayo 18:1-5; Luka 9:46-48)
33 #
Luk 22:24 Tanangut kesi Kaperinaum, ani elomarete tooma kai, kingit Yesu ngirukitos keng tama, “Anukiro takae ipegasi esi alorot?” #Mat 20:26,27; 23:11; Mar 10:43-44; Luk 22:26
34Kililinga kesi chek kainyo apegasi sek kesi alorot asakete akiyen itwaan ni epolot noi. 35Kiboikin Yesu tanyarau ngirukitos lutomon ka ngiarei tolimok tama, “Itwaan cha daang ni esaki akingaren, ejoikinit isidiyor toliwor ekasuban etich aluche kadaang.” 36Toriku ikoku niichi kitowo alongaren kech, kilogak ikoku ngakan tolimok kesi tama, 37#Mat 10:40; Luk 10:16; Yoa 13:20 “Itwaan cha daang ni itepeyoni ipei a ngide a luuchik kalu a ekiro kang, ketepeyon ayong, ani ngini ketepeyoni ayong, etepeyon tani lokolong kameuni ayong.”
Erai ni nyikitepegi ngoni iyok
(Luka 9:49-50)
38Tolimok Yoana ngesi tama, “Eketataman, kingolikini sua itwaan itwarakini ngipean a agogongu a ekiro kon etengero sua kainyo meere ngesi iyok.”
39Tolimok Yesu kesi tama, “Nyiitengero kainyo emam itwaan esubi ngakitoodikinet nakailiilok a agogongu a ekiro kang ani nabo ekisidi keruoror ayong naaronok. 40Kainyo itwaan cha daang ni nyikitepegi ngoni erai iyok. 41#Mat 12:30; Luk 11:23 Kalimokinit ngakiro na iteni atamar, itwaan cha daang ni kitamasi esi ngakipi ani iraakatar ngikang, eriamuni ngesi ebachit keng. #Mat 10:42
Akiningit a akisub akisech
(Matayo 18:6-9; Luka 17:1-2)
42“Itwaan daang ni itosechi ipei a luuchik kanupito ayong kalu, ejoikinit eenikinio akiries lomosiring tachakakinae nanam. 43Nakaneni ani kitosech iyong akan kon totubo! Ejoikinit ilomari nakiyar ingwalit akan idwangit achakakino nanam na akim ana nyedunge eyakasi ngakan daang. [ 44Ngikuru lu enyamete kesi kaneni nyetoakete, nabo akim na enomi kesi kaneni, nyedunge.] 45Ani kitosech iyong akeju kon, totubo! Ejoikinit ilomari nakiyar ingwalit akeju idwangit achakakino nanam a akim eyakasi ngakejen daang. [ 46Ngikuru lu enyamete kesi kaneni, nyetoakete, nabo akim na enomi kesi kaneni, nyedunge.] 47Ani kitosech iyong akongu kon, touto! Ejoikinit ilomari napolou a Akuj idoony, idwangit achakakino nanam na a akim eyakasi ngakonyen daang. 48#Mat 5:30 Ngikuru lu enyamete kesi kaneni, nyetoakete, nabo akim na enomi kesi kaneni, nyedunge. #Mat 5:29 #Isa 66:24
49 #
Mat 5:13 “Itojokio itwaan daang a akim loger lo itojokere ngakipeyos a amakat.”
50“Ejok amakat, nakaneni ani kepener amakat, emam kona itababaruunio nabo.”
“Min amakat nikus, sodi kiruko esi isilito.”
BIBLE SOCIETY OF KENYA (c) 1999
