Mariko 8
8
Esumuji Yesu ngitunga ngabunge ngoomwon
(Matayo 15:32-39)
1Ngirwa ngulu, tochunakin asepich a ngitunga ache nakaalan wapei. Ani engopokini ngitunga ibore ni enyamete, tanyarau Yesu ngirukitos keng ni ayei ngesi tolimok tama, 2“Kesienito ayong ngitunga lu kainyo kiruk ayong ka kesi ngirwa nguuni, nakaneni emam tokona kesi akimuj enyamete. 3Ani kemiek ayong kesi toloto nawiyei eringa nyimuja, irakanarosi alorot kainyo eponito ngiche anikalonan noi.”
4Kingita ngirukitos keng ngesi tamasi, “Nyai nikilemunea ngoni akimuj anariet kana na itemokin asepich naga daang?”
5Kingit Yesu tama, “Ngai ngamugati itingito esi?”
Tatachakis tamasi, “Eraakasi ngamugati ngakan-kaarei.”
6Tolimok Yesu asepich a ngitunga atamar kiboikinos kwap. Sodi tolem ngamugati nakan-kaarei tobuak Akuj alakara. Ani erumor tonyilinyili nak ngirukitos keng dio atamar tokorakis ngitunga. Tosuba ngirukitos keng loger ngolo. 7Atingito kesi ngikolia luuchik ngidikidio. Kilip Yesu kotere ngulu dang dio alimokin ngirukitos keng atamar tokorakis ngitunga. 8-9Kimuja ngitunga daang kimwoko, araakasi ngitunga ngulu daang ngabunge ngoomwon. Sodi tolemut ngirukitos a Yesu ngategerin ngakan-kaarei na eleleba akimuj na apiyanun. Tolimok Yesu ngitunga atamar toloto 10ani erumor todokasi ka ngirukitos keng natubwa atipei totena nakwap a Dalimanusa.
Asakete Ngiparisayo aanyungar akitoodikinet nakailiilon
(Matayo 16:1-4)
11Pot Ngiparisayo ngiche nia Yesu tolomakis apega ka ngesi. Kona asaketa akining ngesi, apot tolimokis atamar, tosubak ngakiro nakailiilok na idodiunito atamar ebunit ngesi ani a Akuj. 12#Mat 12:38; Luk 11:16 Nakaneni topodok Yesu noi tama, “Nyo esaketa ngitunga a ngirwa kalu aanyungar ngakitoodikinet nakailiilok? Kalimokinit ngakiro na iteni atamar emam ngakitoodikinet ngache nakailiilok na idodikinio kesi!” #Mat 12:39; Luk 11:29
13Kimiek ngesi kesi, torotok todoka natubwa kiwaar ekwakaye anam.
Arikit naaronon a Ngiparisayo ka Erode
(Matayo 16:5-12)
14Kimuriakinito ngirukitos a Yesu akiting ngamugati na itemokino. Atingito kesi amugati apei bon anatubwa. 15#Luk 12:1 Kichikichik Yesu kesi tama, “Tochoikinos anakiro anaaronok a Ngiparisayo ka Erode ana ikote ekitoe lo itubui ngamugati.”
16Tolomakis kesi ekiruor make ebalasi: “Elimunit ngesi nugu kainyo emam ngamugati kitingit ngoni.”
17Ayeni Yesu ngakiro na eruorosi kesi sodi kingit kesi tama, “Nyo iruorotor esi make ibaatar emam ngamugati itingito? Eringa esi nyeyena kitamut a? Ikwa nyichwaaka esi a? 18Eya esi ngakonyen nyiteete esi a? Eya esi ngaki nyipupete esi a? Nyitamunito esi 19#Yer 5:21; Ese 12:2; Mar 4:12 nakolong anyilinyilea ayong ngamugati ngakan kotere ngitunga ngabunge ngakan a? Ngai kolong ngategerin ilemunete esi na eleleba akimuj na apiyanun?”
Tatachut tamasi, “Ngatomon ka ngaarei.”
20Kingit Yesu tama, “Ani bo nakolong anyilinyilea ayong ngamugati ngakan-kaarei kotere ngitunga ngabunge ngoomwon. Ngai kolong ngategerin elelebun ngamugati na achakanarosi kidepunae?”
Tatachut kesi tamasi, “Ngakan-kaarei.”
21Kingit Yesu kesi tama, “Eringa esi nyeyena a?”
Etangalekini Yesu emuduk alo Betisaida
22Tanangut kesi Betisaida. Yaut ngitunga ngiche emuduk nia Yesu kimaima ngesi tamasi tatap. 23Toriko Yesu emuduk ngolo akan kipudo anadakar. Kimaak ngesi ekile ngolo nakonyen dio kidokok ngesi akan kingit tama, “Eyei ibore idio itee iyong a?”
24Tokienyia ekile ngolo kidiama tolim tama, “Etee ayong ngitunga nakaneni ikwaan kesi ka ngikito eloose.”
25Tatap Yesu nabo ngakonyen a ekile kangolo. Esaa ngolo topochu ekile ngolo ngakonyen. Tojoketa ngakonyen keng kingolik ibore daang lokojokon. 26Sodi tolimok Yesu ngesi atamar tolot edungokinit ebala, “Nyiibongo nadakar.”
Alimuni Petero atamar Yesu ngesi ngae
(Matayo 16:13-20; Luka 9:18-21)
27Sodi torotokis Yesu ka ngirukitos keng toloto nadakarin na ayakasi diyete Kaisaria Pilipi. Kingit ngesi kesi alorot tama, “Ebaasi mono ngitunga ayong ngesi ngae?”
28 #
Mar 6:14-15; Luk 9:7-8 Tatachakis tamasi, “Ebaasi ngiche irai iyong Yoana Ekebatisan. Tabaas ngiche irai iyong Elija. Tabaas nabo ngiche irai iyong epei a ngikadwarak a Akuj.” #Yoa 6:68-69
29Kingit kesi tama, “Ani bo esi. Ibaasi esi ayong ngesi ngae?”
Tatachak Petero tama, “Irai iyong Kiristo.”
30Tolimok Yesu kesi tama, “Nyiilimokis itwaan tani ipei atamar ayong ngesi ngae.”
Eruoro Yesu eger lo eboliare ngesi taarae
(Matayo 16:21-28; Luka 9:22-27)
31Tolomak Yesu akitatam ngirukitos keng tama: “Eboliare Lokookeng a Itwaan lokojokon noi. Engerete ngesi Ngikasukou a Atuk ka Ngimurok Luapolok a akai a Akuj ta ngiketatamak a etal. Eario ngesi, ani akolongit na a ngauni eyaruni.” 32Tolimok ngesi kesi ngakiro nguna ileerete toyena. Nakaneni tachada Petero ngesi kikilak. 33#Mat 10:38; Luk 14:27 Nakaneni torei Yesu kingolik ngirukitos keng sodi kikilak Petero tama, “Esiitan, koto kane. Meere nia Akuj eponitotor ngitamen lukon lugu, eponito alotunga!” #Mat 10:39; Luk 17:33; Yoa 12:25
34Sodi tanyarau Yesu asepich a ngitunga ka ngirukitos keng neni tama, “Itwaan daang ni esaki akiwapakin ayong, ejoikinit ejalun bon sodi kiwok apir keng sodi kewapak ayong. 35Kainyo itwaan cha daang ni esaki akirichun akiyar keng, ebukor, nakaneni ni ejali akiyar keng kotere ayong ka ngakiro naajokak a Akuj, eyari. 36Nyoni eanyuni itwaan erai kitiliwo ngesi ibore daang a akwap ikeng, nakaneni tobukor anakiyar? Emam ibore eanyuni ngesi! 37Emam ibore ni ipotori ngesi kilokonyuunio akiyar keng. 38Itwaan ni irumito ngileech kotere ayong ka akiroit kang alorwa aluaronok engeritotor ngitunga Akuj kalu, irumete tani Lokookeng a Itwaan ngileech kotere ngesi ngirwa lu ebunio a Apolou anaketimon ka Apakeng erukito ka ngimalaikae lu italeunitoe.”
BIBLE SOCIETY OF KENYA (c) 1999
