Yoana 14
14
Yesu ngesi erot lo elosi nika Apa
1Tolimok Yesu kesi tama, “Kiapakisi ngitai kus, nyialolong, tonupa ngakiro a Akuj, tonupa nakang dang. 2Eyakasi ngakais nakaalak nawi ka Apakang, arai tamam, pekalimokinit ayong esi atamar alosi ayong inaa atosubak ngawiyei kus. 3Ani kalot ayong asubakin ni ilomete esi, abonguni nabo katoriko esi ni amini ayong, sodi ni ayei ayong, pena esi dang. 4Iyenete esi erot lo idiri ni ateni ayong.”
5Tolim Tomas tama, “Ekapolon, nyikiyeni sua ni ilosi iyong, kikokini sua kiyeni erot lokinangea inaa ai?”
6Tatachak Yesu tama, “Ayong ngesi arai erot, ayong ngesi arai akiyar, nabo ngakiro kang kesi eraakasi ngaka iteni, nyelosi itwaan nika Apa mati kitoru nikang.” 7Tolimok kesi tama, “Kona tokona kiyeneta esi ayong, iyena esi tani Apakang. Napei tokona jik, iyena esi ngesi nabo ingolikis dang.”
8Tolimok Pilip Yesu tama, “Ekapolon, kidodikinae sua Apa, nguna make kitemunete sua.”
9Tolimok Yesu ngesi tama, “Pilip, ikwa ngirwa lukirukitor ayong ka esi daang, eringa iyong nyeyena ayong a? Itwaan cha daang ni kengolik ayong, engolik tani Apakang, nyo bo tokona ibalar iyong, ‘Kidodikinae Apa?’ 10Ikwa nyinupit iyong Pilip atamar ayei ayong nika Apa, nabo eyei Apa nikang a?” Tolimok Yesu ngirukitos keng tama, “Meere ngakiro nakalimok ayong esi ngakang a ilope, Apakang lo ibooyi alotooma kang ngesi esubi etich keng. 11Tonupa ngakiro kang nakalimokinea atamar ayei ayong tooma Apa, nabo eyei Apa tooma kang, ani pekinupa kotere nguna, tonupa ngakiro kang kotere ngitichisio luasubi ayong.
12“Kalimokinit esi ngakiro na iteni dir atamar, itwaan cha daang ni enupi ngakiro kang, esubi ngitichisio luasubi ayong, esubi tani luapolok noi lu idwangito lukang, kainyo alosi ayong nika Apa. 13Ianyunete esi ibore daang ni ilipasi a ekiro kang, sodi tatakanuunea apolou ka Apa ani a Lokookeng. 14Ibore cha daang ni ilipasi esi ilimito ekiro kang, kainakini ayong esi.
Akichikakinet a Etau a Akuj
15“Ani kiminasi esi ayong, irichakinete ngitalio kang. 16Elipi ayong Apa, kiinak esi Ekengarakinan lo ibooyete ka esi jiik. 17Erai ngesi Etau a Akuj lo idodiuni ngakiro na iteni na a Akuj. Nyechamunete ngitunga a akwap kainyo nyingolikinete kori nyeyenete, nakaneni iyenete esi ngesi kainyo irukito ka esi nabo emini ngesi tooma kus.
18“Nyakaisikini ayong esi ikokianito, abonguni nikus. 19Eringa cha mono wadiochichi ani erumor nyekengolikinete ayong ngitunga a akwap, nakaneni kingolikinete esi ayong, nabo kotere ni ayarea ayong, iyarete esi dang. 20Na enangea akolongit ngina, iyenunete esi atamar ayei ayong nika Apakang, nabo iyakasi esi nikang loger lo ayakar ayong nikus.
21“Itwaan cha daang ni achamu ngitalio kang nabo kiwapite, ngesi kamina ayong. Eminakini Apakang itwaan cha daang nikamina ayong, aminakini ayong dang ngesi nabo edodiun anikeng.”
22Tolim Yuda (meere Isikariote) tama, “Ekapolon, ikokini iyong idodiun anikosi, meere alotunga a akwap ai?”
23Tatachak Yesu tama, “Itwaan cha daang nikamina ayong, irichakini ngakitatamet kang. Eminakini Apakang ngesi, nabo kiponi ayong ka Apakang eboikinos nikeng. 24Itwaan cha daang ninyakamina ayong, nyirichakinit ngakitatamet kang. Nakaneni meere ngakitatamet na iirasi esi nugu ngakang, eponito anika Apakang alo kameuni ayong.
25“Kalimokinit ayong esi nguna eringa kirukit ka esi. 26Kitatami esi Ekengarakinan, lo erai Etau a Akuj ngakiro daang, emeuni Apa ngesi alokiro kang. Kisitamuni tani ngesi esi daang nakalimok ayong esi.
27“Kemiekinea ayong esi ekisil, erai ekisil ngolo ekang, nyikoni ekisil lo a ngitunga a akwap. Kiapakisi ngitai kus nyialolongo, kori nyieam. 28Iirasi esi kalimokini ayong esi abala, ‘Alosi ayong nakaneni abonguni nikus.’ Arai kitominas esi ayong, kilakarosi kainyo alosi ayong nika Apa alo epolot kedwangit ayong. 29Kalimok tokona ayong esi nguna eringa nyesubakina, sodi ani naesubakinotor, tonupa. 30Nyikiruoro ayong ka esi nikooyen, kainyo ebunit ekapolon a akwap kana. Nakaneni emam ngesi agogongu anikang, 31nakaneni ejoikinit ngitunga a akwap eyenete atamar amina ayong Apa, ngakiro nguna ngesi asubea ayong ngakiro daang loger lo kadungokinitor ngesi ayong atamar atosub. Tonyoutu atoloto kane.
BIBLE SOCIETY OF KENYA (c) 1999
