Ohuchaaka 17
17
Ohuhebwa koti ahalolero h'endagaano
1Abburamu niyoosa emyaaka amahumi kataanu-na-kane neende kitaanu-na-kine eky'obuhuluundu, Omwaami yamubonehera yamuboolera ati, “Niise Nasaae w'Obunyala. Mbulire mani obe omuluungifu. 2Njia ohuhola endagaano yaange naawe, haandi njia ohwiingiya abeechuhulu bao.” 3Abburamu yeenama aasi, obweeni bwegeeng'a hu buloba, Nasaae yaamuboolera ati, 4“Bona, mbao hola endagaano naawe, ochia ohuba laatang'ene enjia nyiingi muno. 5#Rom 4:17.Bulaanu, soochia hulaangangwa Abburamu, nae ochia ohulaangwa Abburahamu. Olwohuba huholere ohuba laatang'ene enjia nyiingi. 6Njia ohuhuberesa abeechuhulu baangi muno, mani njia ohuhutusamo ebyaalo biingi, haandi abatuki bachia ohuhutulamo. 7#Luk 1:55.Njia ohutaao endagaano akatikaati waange naawe, neende abeechuhulu bao neende enjibulo chaabwe choosi. Njia ohuba Nasaae wao haandi Nasaae w'abeechuhulu bao boosi. Olwohuba endagaano yino, y'emyaaka kyoosi. 8#Biho 7:5.Njia ohuhuberesa, ewe neende abeechuhulu bao boosi eloba lya Kanani lyoosi libe elyeeng'we lyeene emyaaka kyoosi haandi njia ohuba Nasaae waabwe.”
9Nasaae haandi n'aboolera Abburahamu ati, “Nae ewe hulwao, oli neende ohuliinda endagaano yaange, ewe neende abeechuhulu bao, olwiibulo lwaabwe lwoosi. 10#Biho 7:8; Rom 4:11.Yino niyo endagaano yaange yi ndi ohuhola akatikaati waange naawe, y'ohoyere ohuliinda, ewe neende abeechuhulu bao boosi. Buli mwaana musyaani yeesi yi mwiibula ali ow'ohuhebwa. 11Muchia ohuhebwaanga mani sino sibe esilolero sy'endagaano akatikaati waange naang'we. 12Ohutula buti ohwemeeda mu moni, buli mwaana musyaani w'ohuhebwaanga n'amalire endaalo chitaanu-na-chidatu. Kata ayahaba naali omwaana w'omuwaambe otaali ow'oluya lwao. 13Abaana boosi abeebulanwa bao, neende abawaambe bachia ohuhebwaanga. Mani endagaano yaange yitaakama yibe hu mibiri kyeeng'we. 14Buli mwaana musyaani otahebwa achia ohutusibwa hu baandu baange olwohuba achia ohuba afunaake endagaano yaange.”
15Nasaae haandi yaboolera Abburahamu ati, “Nae omuhasi wao Sarai haba soochia ohumulaangaanga oti Sarai, nae achia ohulaangwa Saara. 16Njia ohumuberesa ehabi, haandi ochia ohumwiibulamo omwaana musyaani. Njia ohumuberesa ehabi, haandi achia ohuba ng'ina enjia nyiingi, haandi abatuki b'abaandu bachia ohumutulamo.” 17Abburahamu mani yeenama aasi, obweeni bwegeeng'a hu buloba, nae yachaaka ohucheheerera n'abaasa ati, “Omuundu anyala ohunyoola omwaana naali neende emyaaka emia ndala (100)? Nae Saara anyala ohunyoola amabaanga hu myaaka kyae amahumi kataanu-na-kane.” 18Abburahamu yateeba Nasaae ati, “Lwasiina haba sooleha Yisimaeli yaaba sa omusiha waange?” 19Nae Nasaae yaboola ati, “Haba daawe, omuhasi wao Saara achia sa ohuhwiibulira omwaana musyaani mani omukulihe Yisaka. Njia ohuhola endagaano yaange yitaakama akatikaati waange nae haandi akatikaati waange neende abeechuhulu bae. 20Nae Yisimaeli, yesi njia ohumuberesa ehabi mani nyingiye olwiibulo lwae koti lu wundiriire. Achia ohuba laatang'ene abaana batuki basyaani ehumi neende babiri, haandi njia ohuhola mu beechuhulu bae esyaalo sihoongo. 21Haandi njia ohutaao endagaano yaange neende Yisaka, yi Saara achia ohuhwiibulira ebiha koti bino omwaaka kwiicha.”
22Nasaae niyamala ohulomaloma neende Abburahamu, yatula eyiri Abburahamu. 23Hu ludaalo lweene olwo, Abburahamu yaheba omwaana wae Yisimaeli, neende abaana basyaani baandi abeebulirwa mu daala lyae, alala neende abawaambe beebulirwa mu daala lyae neende abo ba yali naakulire. 24Abburahamu yawulira Nasaae mani yaaheba omwaana wae Yisimaeli naali neende emyaaka amahumi kataanu-na-kane neende kitaanu-na-kine eky'obuhuluundu. 25Nae omwaana wae Yisimaeli yahebwa naali neende emyaaka ehumi neende kidatu eky'obuhuluundu. 26Abburahamu neende omwaana wae Yisimaeli bahebwa hu ludaalo nasilala olwo, 27alala neende abasaacha bawaambe boosi ba yali niyakula.
©Bible Society of Kenya, 2019
©Bible Society of Uganda, 2019
