Mateo 6
6
Kpakpapeemi he nitsɔɔmi
1“Nyɛɛ hyɛ nɛ hi nɛ nyɛ ko pee nyɛ dami nihi ngɛ ma hɛ mi, ke nyɛ pee ɔ, lɔ ɔ lɛɛ, nyɛ be hiɔwo ko ngɛ nyɛ tsɛ nɛ ngɛ hiɔwe ɔ ngɔ.
2“Lɔ ɔ he ɔ ke o ngɛ kpakpa pee ɔ, ko kpa titimati ngɛ o hlami, kaa bɔ nɛ osatotsɛmɛ ɔmɛ peɔ ngɛ kpe hehi kɛ magbɛ ɔmɛ a nɔ konɛ nihi nɛ je a yi ɔ. I ngɛ nyɛ dee anɔkuale mi ke: A nine su a hiɔwo nɔ mo. 3Se mo o lɛɛ, ke o ngɛ kpakpa pee ɔ, ko ha o muɔ nine nɛ le nɔ nɛ o hiɛ ɔ nine peɔ. 4O kpakpa peemi ɔ nɛ hi laami mi, nɛ o tsɛ nɛ naa laami mi nihi ɔ nitse maa wo mo hiɔ.”
Pɛɛkpami he nitsɔɔmi
(Luka 11.2-4)
5“Nɛ ke nyɛ ngɛ sɔlee ɔ, nyɛ ko pee kaa osatotsɛmɛ ɔmɛ, se a suɔ kaa a da kpe he ɔmɛ kɛ gbɛjegbɛ ɔmɛ a kɔ nyahi kɛ sɔle konɛ nihi nɛ na mɛ. Niinɛ, i ngɛ nyɛ dee ke: A nine su a hiɔwo nɔ mo. 6Se ke o ngɛ sɔlee ɔ, sɛ o se tsu mi, nɛ po nga sinya a nɛ o sɔle ngɔ ha o tsɛ ngɛ laami mi, nɛ o tsɛ nɛ naa laami mi nihi ɔ maa wo mo hiɔ.
7“Ke nyɛ ngɛ sɔlee ɔ nyɛ ko tu munyu fuu kaa wɔ jali ɔmɛ; se a susuu kaa a munyu fuu ɔ he a maa bu mɛ tue. 8Nyɛ ko pee kaa mɛ; se nyɛ tsɛ ɔ le nihi nɛ hiaa nyɛ loko nyɛ biɔ lɛ. 9Lɔ ɔ he ɔ nyɛɛ sɔle kikɛ:
‘Wa tsɛ nɛ ngɛ hiɔwe,
O biɛ ɔ he nɛ tsɔ;
10O matsɛ yemi ɔ nɛ ba;
A pee nɔ nɛ o suɔ ngɛ zugba a nɔ
kaa a peɔ ngɛ hiɔwe ɔ.
11Ha wɔ mwɔnɛ wa daa ngma;
12Nɛ o kɛ wa hiɔ ɔmɛ nɛ ke wɔ
Kaa bɔ nɛ wɔ hu waa kɛ kee ninɛmɛ
nɛ hɛɛ wɔ hiɔ ɔ.
13Nɛ o kɛ wɔ ko ya kami mi
se je wɔ kɛ je nɔ yayami ɔ dɛ mi.’
14Nɛ ke nyɛɛ kɛ nihi a tɔmihi pa mɛ ɔ, nyɛ tsɛ nɛ ngɛ hiɔwe ɔ kɛ maa pa nyɛ hulɔ. 15Se ke nyɛɛ kɛ nihi a tɔmihi pɛ́ mɛ ɔ, nyɛ tsɛ ɔ hu kɛ nyɛ tɔmi ɔmɛ be nyɛ pae.”
Hwɔhami he nitsɔɔmi
16“Se ke nyɛ ngɛ hwɔ hae ɔ, nyɛ ko pee nyɛ hɛ mi nɔbɔmɔbɔ kaa osatotsɛmɛ ɔmɛ; a peɔ a hɛ mi nyanyaanya konɛ nimli nɛ na kaa a ngɛ hwɔ hae. Niinɛ, i ngɛ nyɛ dee ke: A nine su a hiɔwo nɔ mo? 17Se mo lɛɛ ke o ngɛ hwɔ hae ɔ kpa o yi mi nu nɛ o fɔ o hɛ mi; 18konɛ ni kpahi ko na kaa o ngɛ hwɔ hae, ja o tsɛ nɛ ngɛ laami mi ɔ; nɛ o tsɛ nɛ naa laami mi ni ɔ maa wo mo hiɔ.”
Hiɔwe juetli
(Luka 12.33-34)
19“Nyɛ ko to juetli ha nyɛ he ngɛ zugba nɛ ɔ nɔ, he nɛ wɔyewɔye kɛ kana puɛɔ nihi nɛ juli guu kɛ sɛɛ mi ya juɔ ngɛ ɔ. 20Se nyɛɛ to juetli ha nyɛ he ngɛ hiɔwe he nɛ wɔyewɔye kɛ kana puɛ we nihi nɛ juli gui kɛ sɛ we mi yajui ngɛ ɔ. 21Ejakaa he nɛ o juetli ngɛ ɔ, lejɛ ɔ o tsui maa hi.”
Nɔmlɔ tso ɔ la
(Luka 11.34-36)
22“Nɔmlɔ tso ɔ la ji hɛngmɛ. Lɔ ɔ he ɔ ke o hɛngme nɔ tsɔ ɔ, o nɔmlɔ tso mluku ɔ tsuo ma hyi kɛ la; 23se ke o hɛngmɛ nɔ tsɔ we ɔ, o nɔmlɔ tso mluku ɔ tsuo maa wo diblii. Lɔ ɔ he ɔ ke la nɛ ngɛ o mi ɔ ji diblii ɔ, kɛ jamɛ a diblii ɔ mi ma ti kɛɛ!”
Mawu kɛ ninami
(Luka 16.13; 12.22-31)
24“Nɔ ko be nyɔmtsɛmɛ enyɔ nyɛe ma sɔmɔ; ejakaa eko ɔ e maa nyɛ nɔ kake nɛ e maa suɔ nɔ kpa a; aloo e maa pɛtɛ nɔ kake he, nɛ e maa gbe nɔ kpa a he guɛ. Nyɛ be Mawu kɛ mamona (ni nami) nyɛe ma sɔmɔ.
25“Lɔ ɔ he ɔ, i ngɛ nyɛ dee ke: Nyɛ ko hao ngɛ nyɛ wami he, nɔ nɛ nyɛ maa ye kɛ nɔ nɛ nyɛ maa nu, aloo nɔ nɛ nyɛ maa wo ngɛ nyɛ nɔmlɔ tso ɔ he. Anɛ wami pa we ngma, nɛ nɔmlɔ tso pa we tade lo? 26Nyɛɛ hyɛ hiɔwe lohwe pɛlitsɛmɛ ɔmɛ; a du we ni nɛ jeha nɛ ɔ hu a kpɔ we, pohu a bua we nya ngɔ wui ngma gba mi; se nyɛ tsɛ nɛ ngɛ hiɔwe ɔ lɛɛ mɛ kɛ̃. Anɛ nyɛ he jua wɛ́ hluu pi mɛ lo? 27Se nyɛ ti mɛnɔ kɛ yeyeeye peemi ma nyɛ tsa e kami nya nine kpɔ mi kami kake?
28“Nɛ mɛ he je nɛ nyɛ peɔ yeyeeye ngɛ tade he? Nyɛ susu nga nɔ mɔmɔ ɔmɛ a he, bɔ nɛ a puɛɛ ɔ: atsu we ni, jeha nɔ hu a tsɛ̃ we kpa. 29Se i ngɛ nyɛ dee ke: Salmo kɛ e nyami ɔ tsuo tete mia we kaa enɛ ɔmɛ a kpɛti kake. 30Jeha nɛ ɔ ke nga nɔ hu nɛ mwɔnɛ e ngɛ nɛ hwɔ nɛ a kɛ woɔ abolo tsu mi nɛ Mawu miaa lɛ kikɛ ɔ, anɛ e be nɔ́ nɛ pe enɛ pee ha nyɛ nɛ nyɛ hemi kɛ yemi pi ɔ lo? 31Lɔ ɔ he ɔ nyɛ ko hao nyɛ he nɛ nyɛ de ke: ‘Mɛni wa maa ye, aloo mɛni wa maa nu, mɛni hu wa ma ngɔ ha wa he?’ 32(Ejakaa ni nɛ ɔmɛ tsuo a se majemajeli a bimɛ ɔmɛ dii.) Nyɛ tsɛ nɛ ngɛ hiɔwe ɔ le kaa ni nɛ ɔmɛ tsuo a he ngɛ nyɛ hiae. 33Nyɛ hla Mɛwu matsɛ yemi ɔ kɛ e dami kekle, nɛ akɛ ni nɛ ɔmɛ tsuo maa piɛ he ngɔ ha nyɛ. 34Lɔ ɔ he ɔ nyɛ ko hao nyɛ he ngɔ to hwɔɔ; ejakaa hwɔɔ nitse maa hao ngɛ lɛ nitse e he. Ligbi tsuaa ligbi nɔ yayami ɔ hiɛ ha lɛ.”
Dangme New Testament © United Bible Societies, 1977.
