Mateo 7
7
Kojomi
(Luka 6.37-38; 6.41-42)
1“Nyɛ ko kojo konɛ a ko kojo nyɛ? 2Ejakaa kojomi nɛ nyɛɛ kɛ kojoɔ ɔ, a kɛ maa kojo nyɛ, nɛ susumi nɔ nɛ nyɛɛ kɛ susuu ɔ, a kɛ ma susu ha nyɛ. 3Se mɛni he je o naa ngu nyafii nɛ ngɛ o nyɛmi hɛngmɛ nɔ ɔ, nɛ mo nitse o hɛngmɛ nɔ plai ɔ lɛɛ o nɛ ɔ? 4Aloo kɛ maa pee kɛ nɛ o ma de o nyɛmi ke: ‘Ha ma je ngu nyafii ɔ ngɛ o hɛngmɛ nɔ,’ be mi nɛ plai ngɛ mo nitse o hɛngmɛ nɔ ɔ? 5Osatotsɛ, je plai ɔ ngɛ mo nitse o hɛngmɛ nɔ kekle, nɛ lɔ ɔ loko o maa hyɛ nɔ paa nɛ o ma je ngu nyafii ɔ ngɛ o nyɛmi ɔ hɛngmɛ nɔ.
6“Nyɛ ko ngɔ nɔ́ nɛ ji klɔuklɔu ɔ ngɔ ha gbehi; jeha nɛ ɔ hu nyɛ ko sake nyɛ juinehi ngɔ pue kpotoohi a hɛ mi nɛ a ba naa nɔ ngɛ a nane si, nɛ a plɛ a hɛ mi nɛ a ba tsɔtskɔɔ nyɛ mi.”
Nyɛ bi, nyɛ hla, nyɛ si
(Luka 11.9-13)
7“Nyɛ bi, nɛ a ma ha nyɛ; nyɛ hla nɛ nyɛ maa na; nyɛ si, nɛ a ma bli ha nyɛ. 8Ejakaa nɔ tsuaa nɔ nɛ biɔ ɔ, e nine suu nɔ; nɛ nɔ nɛ hlaa a, e naa; nɛ nɔ nɛ siɔ ɔ, a bliɔ haa lɛ. 9Nyɛ ti mɛnɔ nɛ ke e bi bi lɛ abolo nɛ e ma ha lɛ tɛ? 10Aloo ke e bi lɛ wo mi lo, nɛ e ma ha lɛ sinɔ? 11Lɛɛ ke nyɛ nɛ nyɛ ji nimli yayamihi ɔ nyɛ le bɔ nɛ nyɛ peɔ ngɔɔ ni kpakpahi ngɔ haa nyɛ bimɛ ɔ, enyɛmɛ nɔuu nɛ nyɛ tsɛ nɛ ngɛ hiɔwe ɔ be ni kpakpahi ngɔe kɛ ha nihi nɛ biɔ lɛ ɔ?
12“Lɔ ɔ he ɔ, nɔ́ tsuaa nɔ́ nɛ nyɛ hlaa kaa nihi nɛ pee ngɔ ha nyɛ ɔ, nyɛ hu nyɛɛ pee ja nɔuu ngɔ ha mɛ, ejakaa enɛ ɔ ji mlaa a kɛ gbali ɔmɛ.”
Agbo tokofii ɔ
(Luka 13.24)
13“Nyɛɛ sɛ agbo tokofii ɔ mi! Ejakaa agbo nɛ bli kɛ blɔ gbajaa ji nɔ nɛ kɛ nɔ yaa hemi kpatami mi ɔ nɛ, nɛ nihi babauu lɛ sɛɛ mi.
14Se agbo tokofii kɛ blɔ nɛ hɛ ji nɔ nɛ kɛ nɔ yaa wami mi ɔ nɛ, nɛ nihi bɔɔ ji nihi nɛ naa kɔlɔ ɔ.”
Tso kɛ e yiblii
(Luka 6.43-44)
15“Nyɛɛ hyɛ saminya ngɛ osato gbali ɔmɛ a he, ejakaa a ngɔɔ to he womi ngɔ haa a he kɛ baa nyɛ ngɔ, se a mi mi je ɔ ogbetee ni hali ji mɛ. 16A yiblii ɔmɛ nyɛ ma kɛ le mɛ. Anɛ a tsɔɔ wai yiblii ngɛ mio tsohi a nɔ, aloo a tsɔɔ ngmɔkɔ ngɛ sezlehi anɔ? 17Ja nɔuu tso tsuaa tso nɛ ji tso kpakpa a woɔ yiblii kpakpahi; se tso yaya woɔ yiblii yayahi. 18Tso kpakpa be yiblii yaya nyɛe maa wo nɛ jeha nɛ ɔ hu tso yaya be yiblii kpakpahi nyɛe maa wo. 19Tso tsuaa tso nɛ wui yiblii kpakpahi ɔ, a maa hɛ nɛ a maa ngɔ ngɔ wo la mi? 20Lɔ ɔ he ɔ a yiblii ɔmɛ nyɛɛ kɛ maa le mɛ.”
I li nyɛ kulaa
(Luka 13.25-27)
21“Pi nɔ tsuaa nɔ nɛ deɔ mi ke: ‘Nyɔmtsɛ, Nyɔmtsɛ’ ɔ nɛ maa sɛ hiɔwe matsɛ yemi ɔ mi; se mohu nɔ nɛ peɔ Tsaatsɛ nɛ ngɛ hiɔwe ɔ suɔmi nya ni ɔ. 22Nihi fuu ma de mi ngɛ jamɛ a ligbi ɔ nɔ ke: ‘Nyɔmtsɛ, Nyɔmtsɛ, anɛ pi mo o biɛ ɔ mi nɛ wa gba ngɛ, nɛ o biɛ ɔ mi wa hia numi yayamihi ngɛ, nɛ o biɛ ɔ mi wa pee he wami nihi fuu ngɛ lo?’ 23Nɛ lɔ ɔ lɛɛ ma gba mi ma de me ke: ‘I li nyɛ kulaa, nyɛɛ je ye nɔ, nyɛ nihi nɛ nyɛ tsuɔ nihi nɛ dɛ blɔ!’ ”
Tsumali enyɔ ɔ
(Luka 6.47-49)
24“Lɔ ɔ he ɔ, nɔ tsuaa nɔ nɛ nuɔ ye munyu nɛ ɔmɛ nɛ e yeɔ nɔ ɔ, ma ngɔ lɛ ngɔ to ga lelɔ nɛ ma e tsu ngɛ tɛ sa nɔ ɔ he. 25Nɛ hiɔmi nɛ, nɛ pahi hia, nɛ kɔɔhiɔ fia, nɛ a si tsu ɔ, se e hule we ejakaa a to sisi ngɛ tɛ sa nɔ. 26Nɛ nɔ tsuaa nɔ nɛ nuɔ ye munyu nɛ ɔmɛ nɛ e yi nɔ ɔ, a maa ngɔ lɛ ngɔ to nyumu kuasia nɛ ma e tsu ngɛ zia nɔ ɔ he. 27Nɛ hiɔmi nɛ, nɛ pahi hia, nɛ kɔɔhiɔ fia, nɛ a si tsuɔ ɔ, nɛ e hule, nɛ e hulemi ɔ kle.”
He blɔ nɛ Yesu ngɛ
28Nɛ e ba mi kaa benɛ Yesu gbe munyu nɛ ɔmɛ a nya a, ni ɔmɛ a he nya si mɛ ngɛ e ni tsɔɔmi ɔ he; 29ejakaa e tsɔɔ mɛ ni kaa nɔ ko nɛ ngɛ he blɔ, se pi kaa a mlaa tsɔɔli ɔmɛ.
Dangme New Testament © United Bible Societies, 1977.
