Lukas 13
13
Batobatlah!
13:1-5
1Wayah Sidin bacaramah, ada urang-urang nang mamadahakan amun Hupnor Pilatus mambunuh urang wayah bubuhannya malaksanaakan kurban. Lalu, darah urang nang dibunuhnya tu tacampur lawan darah hewan-hewan kurban tu. 2Mandangar habar nang itu, lalu Sidin mamadahakan, “Lantaran bubuhannya dibunuh lawan cara nang kaya itu, ikam mangira dusa-dusa urang nang dibunuh tu labih banyak daripada dusa-dusa urang Galilea nang lain? 3Kada!" ujar Sidin, “Dangarakan nah! Amun bubuhan ikam tu kada batobat wan kada maumpati jalan Allah, bubuhan ikam gin, amun mati, dimasukakan ka naraka!
4Nah, ada lagi sabuting kisah. Ada sabuah manara di Siloam nang runtuh wan ada dalapan balas urang mati nang tatindih. Bubuhan ikam mangira dosa-dosa bubuhannya labih banyaklah daripada dosa-dosa urang lain nang ada di kuta Yarusalem? 5Kada kaya itu pang sabujurannya! Dangarakan! Amun bubuhan ikam kada batobat, lalu amun mati, dimasukakan ka naraka!”
Allah mahukum urang nang kada babuat baik.
13:6-9
6“Ada satu kisah” ujar Nabi Isa, “Ada urang nang mananam puhun ara di kabunnya. Lawas banar mahadangi buahnya. Tagal kada sing buahan jua. 7Lalu inya baucap ka tukang haragu kabunnya, ‘Tahulah ikam? Sudah maniga tahun aku handak maambil buah puhun nang ini tagal sabigi-bigi kada suah talihat buahnya. Tabang haja gin puhun nang itu! Kadada gunanya jua diharagu!’
8‘Tuan', ujar tukang haragu ‘maraha ulun maharagunya satuhan lagi! Kaina tanahnya ulun gamburakan wan ulun bari pupuk. 9Kalu ai tahun dudi babuah. Amun kada babuah jua, kaina ulun nang manabangnya.’”#13:9 manabangnya: Cara urang manilai puhun buah (Luk. 13:9) adalah sama lawan cara Allah manilai kahidupan saikung urang (Luk. 13:5). Jaka urang tu kada batobat wan kada maasi parintah Allah, urang tu kadada nilainya. Lalu inya dimusnahakan. ujar tukang haragu manyahut.
Nabi Isa mawagasakan saikung bibinian nang bungkuk wayah hari Sabat.
13:10-17
10Wayah hari Sabat nang itu, Nabi Isa lagi bacaramah di sabuah rumah ibadah. 11Sidin malihat ada saikung babinian nang bungkuk. Sudah lapan balas tahun lawasnya urang tu maarit bungkuknya, kada kawa mancagatakan balakang lantaran ulahan ruh jahat.
12Lalu dikiau Sidin wan baucap, “Panyakit pian sudah kadada lagi!”
13Diandak Sidin tangan Sidin di atas bahu babinian nang itu. Lalu langsung wagas ai wan kawa badiri cagat.
“Sukur Alhamdulilah,” ujar babinian tu, “Ulun kawa badiri cagat pulang. Lapan balas tahun ulun kada kawa badiri! Allah bujur-bujur ada lawan Pian.”
14Lalu kapala rumah ibadah baucap ka urang banyak tu, “Ada anam hari haja gasan bagawi! Datang pang di hari-hari nang itu amun handak diwagasakan. Jangan di hari Sabat!”
15“Bubuhan ikam urang-urang nang munapik!” ujar Nabi Isa manyahuti kapala rumah ibadah.
“Urang malapas sapi atawa kaladai matan kandangnya wan mambawanya ka wadah panginuman di Hari Sabat. 16Tagal, wayahini ada saikung babinian juriat Nabi Ibrahim nang sudah lapan balas tahun dipasung ulih Iblis. Maulah inya kada bulih diwagasakan di hari Sabat?” ujar Nabi Isa baucap ka urang banyak nang ada di situ.
17Lantaran Nabi Isa baucap nang kaya itu, musuh-musuh Sidin tasupani banar. Tagal samunyaan urang nang lain himung banar malihat mujijat Sidin tadi.
Dua ibarat nang manggambarakan kakuasaan Allah ka urang nang manaatiNya.
13:18-21
18“Ganalnya kuasa Allah dalam kahidupan manusia tu nang kaya apalah?” ujar Nabi Isa lawan urang-urang nang ada di situ.
19“Nang kaya ini nah. Kakuasaan Allah ka urang nang manaatiNya, kuibaratakan nang kaya bigi sawi nang halus banar,#13:19 bigi sawi nang halus banar Tanaman sawi (atawa sasawi) nang tumbuh di banua Timur Tangah lain kaya sawi nang dikanal di Indonesia. Sawi di Indonesia kada bisa “tumbuh jadi puhun” lalu burung-burung kada bisa jua “ maulah sarang di cikang-cikangnya.” Nang panting dalam kisah nang ini adalah bahwa sasuatu nang dimulai dari kaadaan nang halus banar bisa tumbuh manjadi ganal banar. Kajadian itulah nang diibaratakan lawan karajaan Allah. lalu dihamburakan urang di kabunnya. Bigi nang itu tumbuh manjadi puhun nang ganal. Burung-burung gin kawa maulah sarang di cikang-cikangnya.
20Ada pulang Kuibaratakan kakuasaan Allah ka urang nang manaatiNya,” ujar Nabi Isa baucap pulang.
21“Nah, dangarakanlah. Kakuasaan Allah ka urang nang manaatiNya tu kuibaratakan sadikit ragi nang diambil babinian, diadunnya lawan galapung nang banyak banar#13:21 banyak banar: Jumlah galapung nang ini, baratnya tiga puluh kilo. sampai manjadi kamir. Biar raginya sadikit wan galapungnya nang banyak, tagal adonan galapung nang banyak tu kawa kamir sampai diulah manjadi roti.”
Masuk ja malalui lawang nang kipit!
13:21-30
22Nabi Isa bajalan tarus ampah ka Yarusalem malalui babarapa kuta. Sidin bacaramah di kuta-kuta nang dilaluiNya. 23Wayah itu, ada saikung urang mandatangi Sidin wan baucap,
“Junjungan, parmisi, ulun umpat batakunlah. Sadikit hajalah urang nang disalamatakan kaina?”
24Lalu Nabi Isa manyahut, “Bausaha ja nang cangkal sakira bubuhan ikam kawa masuk ka dalam karajaan Allah malalui lawang nang kipit. Sabujurannya banyak urang nang bausaha masuk, tagal kada kawa. 25Kainanya, nang ampun rumah— yaitu Aku, cagar mangantup lawang rumah tu. Lalu kadada kasampatan lagi urang masuk karajaan Allah tu.
“Samuaan urang nang badiri di muka lawang tu cagar mangiau sambil baucap, ‘Tuan, Tuan, tolongi pang buka lawang gasan kami.’
“Tagal kaina Kusahuti, ‘Aku kada patuh lawan bubuhan ikam.’
26“Lalu, ikam cagar baucap pulang, ‘Tapi kami sudah makan wan nginum basama Pian. Kami sudah mandangar caramah Pian di jalan-jalan kuta kami!’
27“Lalu Aku cagar baucap pulang lawan ikam, ‘Aku bujur-bujur kada patuh lawan bubuhan ikam. Ei bubuhan ikam lawan samuaan palaku kajahatan, bajauhan matan sini!’
28“Di luar sana, ikam cagar manangis wan mandarita banar #13:28 mandarita banar: Sacara harfiah, “kertak gigi.” wayah ikam malihat Nabi Ibrahim, Nabi Ishak, Nabi Yakub, wan jua samuaan nabi nang lagi manikmati hidup nang kakal di dalam karajaan Allah, sadangkan ikam saurang ditangati masuk.
29Kaina, pacangan datang banyak urang juriat Nabi Ibrahim matan sagala panjuru. Lalu bubuhannya cagar masuk wan bararamian di dalam karajaan Allah.
30“Dangarakan nah, urang-urang nang bakadudukan randah wayahini, kaina mandapat kadudukan nang tinggi. Urang-urang nang bakadudukan wayahini tinggi, kaina mandapat kadudukan nang randah.”
Nabi Isa mamadahakan Sidin musti mati di kuta Yarusalem.
13:31-35
31Wayah itu, ada pamuka-pamuka agama matan aliran Parisi mandatangi Nabi Isa lalu baucap,
“Ikam bajauh haja matan sini! Sualnya Raja Hirudis handak mamatiꞌi Ikam!”
32Nabi Isa manyahuti, “Padahakan ja lawan hadupan hutan tu,#13:32 hadupan hutan: Binatang ini dalam kabudayaan juriat Nabi Ibrahim manggambarakan urang nang culas, jahat, lawan kada baguna. ‘Hari ini wan isuk, Aku manyuruh ruh-ruh jahat bajauh. Aku mawagasakan urang lalu pada hari nang katiga aku manuntungakan tugasKu.’ 33Biar nang kaya itu, hari ini, isuk, wan isuknya, Aku musti manarusakan sampai ka kuta Yarusalem. Sualnya kadada saurang nabi nang dimatiꞌi di luar kuta Yarusalim. Nang kaya itu jua Aku, Aku musti tulak ka sana sakira kamatianKu di kuta Yarusalem.”
34Lalu Nabi Isa baucap pulang, “Ui warga kuta Yarusalem. Bubuhan ikam nang mamatiꞌi nabi-nabi bahari wan manawaki utusan-utusan Allah sampai mati! Aku rancak manyurung kadua tanganKu gasan malindungi ikam— nang kaya parinduan hayam malukupi anaknya lawan halarnya. Tagal ikam kada hakun.
35Nah, dangarakan! Kuta nang ini cagar ditinggalakan Allah. Parcaya ja, mulai wayahini, ikam pacang kada malihat Aku lagi sampai kaina wayah ikam baucap, “Dibarakahi Raja kita nang datang mawakili Allah.’”
© Pioneer Bible Translators
