Pi zi tiki 3
3
EPIƊ-ƊAI Alaw a birga Adam gaiɗi Eva edi war zardeŋ par
1Wala meefeŋ a na fu yel gara a suwa wazagai n'edi buza n'EPIƊ-ƊAI Alaw a rgaŋ paŋ, a zilbiti muni a muɗa: A jre ɓa Alaw a midiki buri ki simi alini luwuŋ na war zardeŋ paŋ kai ɗa ɗi? 2Muni te wiyini seŋ wiini wala meefeŋ: Tiyi mi kiɗi mi simi alini luwaŋai na war zardeŋ paŋ, 3amma alini luwuŋ n'a na amlai arbani zardeŋ tiɓ, Alaw a muɗa: Tiki aga ki simiŋ kai, ki titimiŋ kaalai, ɵa kai ɗa aga ki mri. 4Wala meefeŋ a miɗiɗi wiiɗi muni: Zaw kai, tiki aga ki mri kai. 5Amma Alaw a sɗa ɓa mefeŋ na ki simiŋ li ɗa, arki aga a mala edi, aga ki bindi maini Alaw nɵa. 6Muni te tala alini luwuŋ ɗa a pɗem burini simi, a tala juf gara, a pɗem buri te nava yel gaini. Alini luwuŋ ɗa, te rawasi ktai te lumaŋ, te sini wiini mofaɗi n'a na gaiɗi ɗa, ni a lumaŋ lai. 7War hlai ni nagai sulu arɗi a mala edi, e siɗi siɗi ganala, e hi ɵimani luwuŋ Fige aŋ sapa kapai e rgiŋ piɗi. 8Nɵa e ɵini wulani EPIƊ-ƊAI, war hlai n'a na paya warni zardeŋ arbani smer na siɗi pɵiɗi futi na koskoi, ɗif gaiɗi muni e ŋûyi siɗi wuzani EPIƊ-ƊAI Alaw arbani luwaŋai na war zardeŋ. 9EPIƊ-ƊAI Alaw a yika ɗif a miɗini k'aŋ wata ɗa? 10A waya seŋ a muɗa: Mu ɵina wulaku warni zardeŋ, mu huna buri mu na ganala, mu ŋoya cok. 11A zilbaŋ a muɗa: N'a suŋkuku buri k'aŋ ganala ɗa asiya ɗa? Ku suma ali luwuŋ na mu guduku gaini buri ku sumaŋ kai ɗi ɗi? 12Ɗif a wiyini seŋ: Muni na ku sitiŋa, na te saŋa ali luwuŋ, ta mu sumaŋ. 13EPIƊ-ƊAI Alaw a zilbiti muni: Na ku za ɵa ɗa a maɗa? Muni te wiyini seŋ: A duulaŋa ɗa a wala meefeŋ kapai mu sumaŋ.
14EPIƊ-ƊAI Alaw a miɗini wiini wala meefeŋ: Buri ku za hanɗa, arbani wazagai n'aha gaini n'edi buza paŋ, tusa aŋ muduku, tuku aga ku hala gaini warku, aga ku suma alogodo war mefeŋku paŋ. 15Aga mu hina gaw arbaku gaiɗi muni,
arbani pinzibaku gaini pinzibaɗi,
pinzibaɗi aga a kirpa muduku azumai,
tuku aga ku luma digini digini n'ezini.
16A miɗiɗi wiiɗi muni: Aga mu bunda ziyiku gir gara, aga ku pûkûɗi aliku gaini gir, suunaku a huguku sini mofaku, ni aga a ŋa muduku lai.
17A miɗini wiini ɗif: Ku ɵina a miɗi muniku, ku suma alini luwuŋ na mu muɗuku ɓa, ku sumaŋ kai ɗa. Buri nɵa afti aga a tusa buriku, mefeŋ paŋ ɗa aga ku nava simiku gaini gir haa sini dibiku.
18Afti aga a diya hedek gaini duvuɗvuɗ buriku,
aga ku suma evek n'a diya edi war basga.
19Aga ku nava walaku zi simi gaini arcuk haa ku waya azumai arni afti buri tuku ku yimasi edi arni par, tuku k'alogodo, aga ku waya azumai arni alogodo pra.
20Adam a siɗi yiki wiiɗi muni ɓa: Eva, a dara a muɗa: Na karɗi, buri te bunda te emiɗi ɗai paŋ. 21EPIƊ-ƊAI Alaw a za sapa z'amur wiini Adam gaiɗi Eva, a wiŋɗi siɗi. 22EPIƊ-ƊAI Alaw a muɗa: Tiyana ɗif a bunda maimu nɵa, a sɗa wala na pɗem gaini na meefeŋ, mu hunuŋmu a wa tini aŋ rawa alini luwuŋ zi suŋfa aŋ sumaŋ kapai a mra kai ɗa kir kai. 23EPIƊ-ƊAI Alaw a birgaŋsi edi war vowai Eden par, kapai a hirma afti n'a yimasi edi arni par. 24Won hlai n'a birga ɗif ɗa edi li, a miliɗi Kerubimkai war gal na piɗi futi na dawai par gaini kaɵkar war tiɗi buri e giɗimiti futi na te ka sini luwuŋ zi suŋfa ɗa.
La Bible en Musgum © Alliance Biblique du Cameroun 2012 © Nouveau Testament, Alliance Biblique du Cameroun 1964 © American Bible Society New York, 1964
