Pi zi tiki 2
2
1Alaw a vada rgini hlai n'amai gaiɗi yai gaini wazagai na warni paŋ lai maini hanɗa nɵa.
2War mefeŋ n'ag'aŋ muguzak ɗa Alaw a vada sdani n'a zaŋ ɗa paŋ woni, a ɗiya sdani n'a na zaŋ paŋ war mefeŋ n'ag'aŋ muguzak ɗa.
3Alaw a ɓaka mefeŋ n'ag'aŋ muguzak, a varaŋ edi aŋ wiini, buri a ɗiya sda na Ni dama a zaŋ ɗa woni, a hina sini amla.
4hlai n'amai gaiɗi yai, war pi zi tiki a zasi maini nɵa:
Pi zi tiki na wiiɗi ɗai
War mefeŋ n'EPIƊ-ƊAI Alaw a ziti yai gaini hlai n'amai ɗa,
5koo luwuŋ n'agwi tekeɗeɗi edi tiɓ war vowai aŋ kai, evek n'edi war vowai ktai maa a diya kai, EPIƊ-ƊAI Alaw a hina faŋ aŋ ɵa midiɗi yai kai ba, pra buri ɗif na kapai a hirma afti aŋ kaalai.
6Amma yem ktai a liiwasi azumai arni afti par, a kikina midini afti paŋ;
7Nɵa EPIƊ-ƊAI Alaw a rga ɗif gaini alogodo n'amlaŋsi azumai arni afti par, a yiba smer na sa suŋfa war merfeŋni, kapai ɗif a bunda aŋ wala na karni.
8EPIƊ-ƊAI Alaw a pa luwaŋai war zardeŋ Eden, piɗi futi na dawai par, a tika ɗif n'a rgaŋ ɗa warni.
9EPIƊ-ƊAI Alaw a hina luwaŋai n'a tala juf gara, gaini n'a suma pɗem lai a diya amai midini afti. A hina luwuŋ zi suŋfa gaini luwuŋ zi siɗi wala na pɗem gaini na meefeŋ lai a ɗiya amlai arbani zardeŋ.
10Ra ktai a ɓasasi edi warni Eden par, a ka pini luwaŋai, miɗini n'edi sek ɗa a ɓurwa puɗu. 11Na ktai yikini: Pison, a ni n'a guna hlai na Havila na or aŋ warni azumai ɗa. 12Or na war hlaini par a na gaini futini ɗa, luwaŋai n'a luguza pɗem gaini ali-fuŋ onikse aŋ war hlai ni lai. 13N'ag'aŋ sulu e yikiŋ ɓa: Gihon, a ni n'a guna afti na wiini Kus azumai ɗa. 14N'ag'aŋ hu e yikiŋ ɓa: Tigre, a ni n'a ka tiɗi Asur piɗi futi na dawai par sek. N'ag'aŋ puɗu ɗa yikini Öfrata.
15EPIƊ-ƊAI Alaw a yimasi ɗif a tikaŋ war zardeŋ Eden kapai a hirmaŋ lai, a giɗimaŋ lai. 16EPIƊ-ƊAI Alaw a sini gadai wiini ɗif a miɗini: Ku kiɗa ku suma luwuŋ na war zardeŋ hanɗa paŋ, 17amma luwuŋ n'a sa siɗi miɗini pɗem gaini meefeŋ ku sumaŋ kai, buri mefeŋ na ku sumaŋ li ɗa aga ku mra jre jre.
18EPIƊ-ƊAI Alaw a muɗa: Ɗif a sumna kiini ɗa pɗem kai, aga mu zitini zinai na te kata mini. 19EPIƊ-ƊAI Alaw a rga wazagai n'edi buza paŋ, gaini wazagai zi ɗufli n'arbani hlai n'amai paŋ gaini afti. A kaŋsi sini ɗif kapai a tala maɵa ɗa aga a sini yiki, kapai wazagai na karni paŋ a nafa yiki na ɗif aga a siŋni. 20Ɗif a sini yiki wiini farai n'aha paŋ, wiini wala zi ɗufli n'arbani hlai n'amai ɗa paŋ, wiini wazagai n'edi buza paŋ lai. Amma burini Ni dama a niviti zinai na te kata mini gaini futini kai. 21Nɵa EPIƊ-ƊAI Alaw a hina weseŋ n'abai a yima ɗif, a tikiti heruwiini ktai edi, a dogo neŋ war balamni duk. 22EPIƊ-ƊAI Alaw a binditi heruwi n'a tikitisi sini ɗif par aŋ muni, a kitinisi lai. 23Ɗif a ɗuula a muɗa: Haai, daaba, tiyana ɗif na maya ta ɵa a na kiɗi,
te keɵke na sa mal, te neŋ sa mal lai,
aga e yikiti ɓa “muni”, buri te yimasi edi sini wus par.
24Buri nɵa ɗif aga a hina epini gaiɗi emini edi, a tapa gaiɗi munini, aga e bindi aŋ neŋ-si ktai.
25Ɗif gaiɗi munini e ɗi fu gaini sulogoiɗi paŋ ganala, e zi siyer wuzaɗi marɗi kai.
La Bible en Musgum © Alliance Biblique du Cameroun 2012 © Nouveau Testament, Alliance Biblique du Cameroun 1964 © American Bible Society New York, 1964
