Genesis 9
9
CAB. IX
1As vannee Jee Noah as e vec; as dooyrt eh roo, Bee-jee messoil, as jean-jee bishaghey, as jean-jee yn seihll y aa-lhieeney. 2As bee yn aggle as yn arrym reueish er ooilley beiyn y thallooin, as er ooilley eeanlee yn aer, er ooilley ny ta gleashagh er y thalloo, as ooilley eeastyn ny marrey: fo yn laue euish t’ad er nyn goyrt. 3Bee dy chooilley chretoor ta bioys ayn son beaghey diu; eer myr glassyragh y vagher ta mee er choyrt diu dy chooilley nhee: 4Agh feill lesh y vioys t’ayn, ta shen, yn uill, cha jean shiu gee. 5As dy shickyr, son fuill nyn mioys shir-yms cooilleeney: jeh dy chooilley vaagh hir-yms eh; as veih laue dooinney, veih laue braar dagh dooinney; neem’s bioys dooinney y hirrey. 6Quoi-erbee ta deayrtey fuill dooinney liorish dooinney bee yn uill echeysyn er ny gheayrtey; son ayns caslys Yee hie dooinney er croo. 7As shiuish, bee-jee messoil, as jean-jee bishaghey; as coamree-jee yn seihll dy palchey, as jean-jee bishaghey ayn.
8As loayr Jee rish Noah, as rish e vec mârish, gra, 9As mish, cur-my-ner, ta mish niartaghey my chonaant riuish, as nyn sluight nyn yeï; 10As rish dagh cretoor bio ta mêriu, jeh ny eeanlee, jeh yn ollagh, as jeh ooilley beiyn y thallooin mêriu, veih ooilley ny ta goll magh ass yn arg, gys ooilley beiyn y thallooin. 11As neem’s my chonaant y niartaghey riuish: chamoo vees dy chooilley eill er ny ghiarey jeh arragh liorish ushtaghyn y thooilley: chamoo vees thooilley arragh ayn dy stroie yn seihll. 12As dooyrt Jee, Shoh cowrey yn chonaant ta mee dy yannoo eddyr mish, as shiuish, as dagh cretoor bio ta mêriu, son sheelogheyn foddey beayn: 13Ta mee soiaghey my gholl-twoaie ayns y vodjal, as bee eh son cowrey jeh yn chonaant ta eddyr mish as y seihll. 14As hig eh gy-kione, tra ver-ym lhiam bodjal harrish y thalloo, dy bee yn goll-twoaie ry-akin ’sy vodjal. 15As cooin-yms er my chonaant, ta eddyr mish as shiuish, as dy chooilley chretoor bio, jeh dy chooilley eill; as cha jig ny ushtaghyn arragh, dy ve ny hooilley dy stroie dy chooilley eill. 16As bee yn goll-twoaie ayns y vodjal; as jeeagh-ym er, dy voddym cooinaghtyn er y chonaant dy bragh farraghtyn, ta eddyr Jee as dy chooilley chretoor bio, jeh dy chooilley eill t’er y thalloo. 17As dooyrt Jee rish Noah, Shoh cowrey yn chonaant ta mee er hickyraghey eddyr mish as dy chooilley eill t’er y thalloo.
18As mec Noah, hie magh ass yn arg, v’ad Shem, as Ham, as Japheth: as Ham va ayr Chanaan. 19Ad shoh nyn droor mec Noah: as lioroosyn va’n slane seihll jeant magh lesh cummaltee. 20As ghow Noah toshiaght dy obbraghey yn thalloo: as ren eh garey-feeyney y hoiaghey. 21As diu eh jeh’n feeyn, as v’eh er-meshtey, as v’eh rooisht ayns e chabbane. 22As honnick Ham ayr Chanaan nearey e ayrey, as dinsh eh shoh da e ghaa vraar v’er cheu-mooie jeh’n chabbane. 23As ghow Shem as Japheth garmad, as hug ad eh er nyn gheayltyn, as hie ad gour nyn drommey, as choodee ad nearey nyn ayrey: as va nyn eddinyn chyndaït, as cha vaik ad yn nearey echey. 24As ghooisht Noah lurg y feeyn, as hooar eh fys cre va e vac saa er n’yannoo rish. 25As dooyrt eh, Cursit vees Canaan; sharvaant dy harvaantyn vees eh da e vraaraghyn. 26As dooyrt eh, Bannit dy row Chiarn Jee Shem, as bee Canaan e harvaant. 27As ver Jee reill da Japheth, (harrish mooarane cheeraghyn) as nee eh cummal ayns cabbaneyn Shem, as bee Canaan e harvaant.
28As va Noah bio lurg y thooilley, three cheead as jeih bleeaney as da-eed. 29As va slane eash Noah nuy cheead bleïn as jeih as da-eed: as hooar eh baase.
© British and Foreign Bible Society 1819, 2019