Debtere ba'ad waa ba'ad voo nɔ 2
2
Yaalı̵́ yigid Tayɨɨ woo nɔ
1Zá̧ga̧ páŋ́tékóstalı̵́ máa, nán sú̵ggı̵́ 'waapád vu̵ sú̵g ya dágá, 2ma hȩn tóó nam zu̵u̵ be"ı̵́ kɔ́ ı̵́ sápéém gbo̧o̧ tóó wɔgɔ, ya hi̧' lig vu̵n mbaa wu̵lı̵́ peelı̵́. 3Vu̵ ho̧ hȩn tóó vúd maa vu̵ wu̵lı̵́ kɔ́ ı̵́ vee nɔ́ɔ́ wɔgɔ. Aga vu̵ pə́gə́n zu̵u̵, vu̵ há'ay daa yúú nán yȩ voolı̵́ dágá dágá. 4Ma yigid Tayɨɨ woo dɔ́ hi̧' voolı̵́ 'waapád, vu̵ bé' ya̧g tóó vu̵ moolȩ́ kɔ́ ı̵́ yigid Tayɨɨ woo ka tú'ud vu̵ u̵u̵ moo o̧ máa wɔgɔ.
5Sey woolı̵́ nán Yúúda tóó kú̵u̵ dɨ Yerúsalemmé máa, vu̵ duu moo Tayɨɨ, vu̵ yaa ya 'waapád hág tóó vu̵lı̵́ á̧ḿ. 6Nán yȩ vu̵ ki hȩn ka nam yȩ, ma vu̵ sú̵g ya ɗug ɓu̵u̵lı̵́ na'a. Hȩn yȩ kɔ́ vu̵ la ɓá', moo kóó nɔ́nná ki waa duulí Yesu woo vu̵ moo ya̧g dáń woo. 7La' vu̵ la fid, to̧o̧d vu̵ á̧ḿ, vu̵ o̧: “Nán ku̵u̵ moo moo yȩ vu̵ nán Gálilée vu̵ yu̵ 'waapád pɛ́láa? 8Kɔ́ née ku̵u̵ moo moo ma, kóó nɔ́nná ka ki ya̧g dáń woo voolı̵́ ya̧gá̧ yȩlá? 9Sa̧a̧m baa vílí yɛlı̵́ máa, nán tóó vu̵ yaa hág Pártəlı̵́, tóó vu̵ yaa hág Madyáŋŋı̵́ kan Elám kan Mezopotamíi kan hág Yúúda kan Kapadós kan hág Pó̧ŋŋı̵́ kan hág Aazíilí á̧ḿ, 10kan hág Firizíi kan Pa̧mfilíi kan hág Mísira kan ka' tóó hág Libíilí á̧ḿ, bə́' kan Siirɛ́n, nán tóó vu̵ yaa kaa gbaŋ Rómalȩ́. 11Tóó vu̵ nán Yúúda vu̵ yu̵, a̧máa tóó vu̵ tii voo nán Yúúda tiilíi; tóó vu̵ nán Kerɛ́d vu̵, tóó nán Aráb vu̵. Kóó ı̵́ yo̧go̧ si̧', ba ki ví vu̵ moo moo yúú hȩn gbo̧o̧ Tayɨɨ ka kɔ́ máa ya̧g baa vílí kə́dkə́d máalá̧!”
12Hȩn woo la' vu̵ la fid ya voo 'waapád, vu̵ gaan sı̵́ hȩn tóó u̵u̵ o̧n né, ma vu̵ ó̧ń ya voolı̵́: “Hȩn yȩ tú' ȩná?”
13A̧máa nán tóó vu̵ kɔ́d vu̵ ba̧a̧m, vu̵ o̧: “Doo wu̵ kíí vu̵.”
Moo Piɛ́r ka o̧ má nɔ
14A̧máa Piɛ́r vu̵ lúú dɔg kan waa duulí ı̵́ tóó wa̧nɓó' zu̵u̵ dágá pee vu̵, ma o̧d dúú vu̵ dɔg moo yúba, o̧: “Ɨ́ víí, nán Yúúda vu̵, kan nán kíí waa Yerúsalemmé yɛ ví 'waapád, i ho̧ du̵u̵lı̵́ na'a, i ki pȩ́ń! 15Doo wu̵ kíin nán yɛ vu̵ kɔ́ ı̵́ kíí taan yȩ wɔgɔ né, moo zá̧ga̧ née ná na'a né. 16A̧máa 'ya̧'a̧ yɛ moo anábi Zowɛ́l ká o̧ máa dɔ́ sı̵́ sé' woolı̵́ ú̵.
17Tayɨɨ o̧: ‘Sey hág 'wáané a kéé waaná' tée,
míń pú̵ nán vu̵ 'waapád yigid míí ú̧.
Wayée waa kan wakȩ́ȩ́ waa víí vú̵ń o̧d nán vu̵ moo Tayɨɨ.
Náásaa waa víí vú̵ń ho̧ hȩn ho̧lȩ́ vu̵.
Ɨ́ gbo̧o̧naa víí vú̵ń gaa moo yȩ́ń Tayɨɨ woo yúú nəəgı̵́.
18Sey woo míń ba' yigid míí pú̵ nán ba'ad míí,
wayée voolı̵́ kan wakȩ́ȩ́ voolı̵́ á̧ḿ,
vú̵ń o̧d nán vu̵ moo Tayɨɨ.
19Míń kɔ́ hȩn zálı̵́ vu̵ be"ı̵́ pi kə́dkə́d
kan hágá yɛlı̵́ á̧ḿ.
Víń ho̧ mɛm kan vee, kan nim gbo̧o̧.
20Zá̧ga̧ wú̵ń tún ní,
sȩȩ wú̵ń tii yȩ́ȩ́ná kɔ́ ı̵́ mɛm wɔgɔ pȩ́ń,
zá̧ga̧ gbo̧o̧ ı̵́ 'yɛ́lı̵́ woo wú̵ń yaa kan na"ȩ́ woo.
21Tée nán ı̵́ ku̵u̵ duu ı̵́ 'yɛ́lı̵́ máa vú̵ń sə́d 'waapád.’
22“Nán Izraɛ́l vu̵, i ki ú! Ví gaa á̧ḿ, Tayɨɨ pú̵ Yesu nán Naazaréd yȩ néélȩ́ hȩn zálı̵́ vu̵ kɔ́lı̵́ kan hȩn sa̧ga̧ vu̵ víílí sa̧a̧mé, hȩn woo wu̵ tú' ba yaa dɨ Tayɨɨ woolı̵́. 23Ɨ́ víí máa, ví ma"o̧, ví pú̵ nán gaa Tayɨɨ sá vu̵, vu̵ ga"u̵ nɔɔ la' vbagadı̵́. A̧máa hȩn kíí kɔ́ yȩ, Tayɨɨ ká dəŋ mbɔ́g moo woo ɗii sú̵'ú̵. 24A̧máa Tayɨɨ səddu̵ ya hȩn ndɔ́gɔné nɔmmé, nimmɔ nɔmmé, moo nɔm kan néélȩ́ tínní woo pɛ́lı̵́, 25moo Daavíd ká moo moo yúú woolı̵́ o̧:
‘Mí baa tə́g ı̵́ 'yɛ́lı̵́ míí zá̧ga̧ 'waapád,
moo mbaa dɨ dáŋ́ míílí̧, moo a̧n ki dú̵ú̵ sá.
26Moo woo nɔ ma mí dȩ' zó̧ó̧, moo moolȩ́ míí maa zó̧ó̧ dȩ"ȩ́ mɛ́ń.
Kóó fó̧ó̧ míí yɛ a mbaa tɛ́lá si̧', mí 'yɛ́ zó̧ó̧ yúú móólȩ́.
27Moo mí gaa, mɔ́ gbɔn mí kaa nɔmmé né,
mí 'yɛ́ zó̧ó̧ míí móólȩ́, mɔ́ń gbɔn mí moo a̧n bugun bɛ́ɛ́gı̵́ né.
28Mɔ́ tú'un sı̵́ hi̧naa laalı̵́ vágád káákáálı̵́ ú̵.
Mɔ́ń kɔ́ míń dȩ' zó̧ó̧ tíŋ́ móólȩ́ mba hȩn.’
29“Nán míí vu̵, mí hí̧í̧ bi o̧d ví la moo ha̧d yúú a ba ví yée Daavíd woolı̵́. Ká nɔɔ, vu̵ dɔddu̵, bɛ́ɛ́g woo dɨ baa vílí yɛlı̵́ á̧ḿ. 30A̧máa Daavíd anábiɨ, gaa Tayɨɨ ba tad bi ya̧g, ban pú̵ zig bii tóó gbaŋ waalı̵́ bii ú. 31Daavíd ká ho̧, ma moo moo yúú nímní ı̵́ nán sənné yȩ woo nɔmmé á̧ḿ, o̧:
‘Ká vu̵ gbɔnnɔ kaa nɔmmé né,
fó̧ó̧ woo bugun woo né á̧ḿ.’
32“Yesu káń o̧ moo woo yɛ, Tayɨɨ nimmɔ sı̵́ nɔmmé ú̵. Ya vóó 'waapád, vɔ́ nán ya̧g du̵lı̵́ vu̵ yu̵. 33Tayɨɨ ka ɓɛ dɔgɔnɔ nag nán woolı̵́ sú̵'ú̵ máa, nuŋ yigid Tayɨɨ ka ta ya̧g yúú woolı̵́ pee sú̵'ú̵, ma pú̵ vɔ́ daa yɔ. Ví ki, ví ho̧ kan nɔ́ɔ́ víí á̧ḿ. 34Daavíd ká ɗáan dɔg woo be"ı̵́ né, a̧máa o̧:
‘Tayɨɨ ı̵́ 'yɛ́lı̵́ o̧d ı̵́ 'yɛ́lı̵́ míí:
A̧m ya mbaa nag nán míílí̧,
35há̧á̧ mí 'yɛ́ ı̵́ maag móó vu̵ u̵u̵ mbaa
hȩn doo 'ná'ané móó pȩ́ń.’
36“Moo woo nɔ ma zig Izraɛ́l 'waapád a gaa du̵u̵lı̵́ na'a: Yesu kíí ga"u̵ la' vbagadı̵́ pee, Tayɨɨ 'yɛ́ wu̵ yu̵ ı̵́ 'yɛ́lı̵́ baa ví, wu̵ ı̵́ nán sənné baa ví á̧ḿ.”
37Sey nán Yúúda ku̵u̵ ki moo yȩ máa, vu̵ mbaa yəbəə. Vu̵ vi Piɛ́r vu̵ kan waa ba'ad tóó vu̵, vu̵ o̧: “Nán vóó vu̵, yee tée vɔ́ń kɔ́ vóó nɛ́nná?”
38Piɛ́r hí̧i̧d vu̵: “I gbɔ mbaalı̵́ see víí vu̵ ú̵! Kóó nɔ́nná a woo mam Tayɨɨ woo kan yɛ́g Yesu Krístu woo, moo Tayɨɨ a kéé hȩn ɓı̵́d woo gbɔ ú̵. Tée víń nuŋ hȩn pú̵lı̵́ Tayɨɨ woo, wu̵ yigid woo nɔ. 39Tayɨɨ ká tad víw ya̧g yɛ kan waa víí vu̵. Nán ı̵́ ku̵u̵ mbaa ya ɗiilílí ma, ı̵́ 'yɛ́lı̵́ baa ví Tayɨɨ ka bee vu̵ yɛ, tad vu̵ ya̧g 'waapád á̧ḿ.”
40Piɛ́r duu ha'ad vu̵ moo zó̧ó̧ ziginí tóó vu̵ ɓu̵u̵lı̵́ na'a, baa o̧d vu̵: “I gbɔ Tayɨɨ a səd ví sa̧a̧m nán ku̵u̵ kɔ́ hȩn kə̧ə̧g yȩ voolı̵́ ú̵.”
41Dúú ɓu̵u̵lı̵́ na'a ku̵u̵ ki moo Piɛ́r woo yȩ máa, vu̵ fȩȩ, ma waa duulí Yesu woo vu̵ woo vu̵ mam Tayɨɨ. Zá̧ga̧ woo fó̧ó̧ uzinɛɛre ta̧a̧nɔ́ vu̵u̵ há'ay nán sú̵ggı̵́ voolı̵́. 42Nán sú̵ggı̵́ vu̵ baa ki moo tú"í waa ba'ad voo, vu̵ fȩȩ 'yɛ́ zó̧ó̧lȩ́ á̧ḿ, vu̵ baa yȩ'ȩn hȩn voo vu̵, vu̵ baa lá hȩn Tayɨɨ, vu̵ baa o̧d Tayɨɨ moo á̧ḿ.
Mbaalı̵́ sa̧a̧m nán ku̵u̵ 'yɛ́ zó̧ó̧ Tayɨɨ woolı̵́ máa voolı̵́
43Nán 'waapád vu̵ ki dú̵ú̵, moo waa ba'ad vu̵ baa kɔ́ hȩn zálı̵́ kan hȩn sa̧ga̧ vu̵ ɓu̵u̵lı̵́ na'a. 44Nán sú̵ggı̵́ vu̵ 'waapád vu̵ sú̵g mbaan du̵u̵lı̵́ na'a, vu̵ 'yɛ́ hȩn voo vu̵ zo'ná. 45Vu̵ baa gí hȩn dáń voo vu̵, vu̵ ɓɛ sɨɨde ku̵u̵ nuŋ wu̵lı̵́ yȩ, vu̵ yȩ' nán ı̵́ ku̵u̵ maa hȩn pú̵lı̵́ máa vu̵. 46Zá̧ga̧ 'waapád vu̵ baa sú̵g mbaa na'am gbo̧o̧ lig hȩn ha"ı̵́lı̵́, vu̵ baa sú̵g lá hȩn kíi voo vu̵lı̵́, vu̵ lá hȩn kan zó̧ó̧ dȩ"ȩ́, vu̵ mbaan kan zó̧ó̧ to̧o̧. 47Vu̵ na' Tayɨɨ. Nán 'waapád hí̧í̧ vu̵. Ɨ́ 'yɛ́lı̵́ Yesu baa ha'ad vu̵ nán ı̵́ ka səd vu̵ máa zá̧ga̧ 'waapád.
Nouveau Testament en Dii © Bible Society of Cameroon, 2001.
