Juan 10
10
Qaÿaloqnaxana aso laÿi' ana qagueta
1Qaq ÿoqta 'eesa de'eda qami' sa'axatema, da ca sa ishit da tateu'a ca lasom aca laÿi' ana qaguetapi da huo'otaq inoxoneuo, chaqdata da tateu'a na laÿi, qachi camayi cachaxaic qataq huotaxanaxaic. 2Qaq cam tateu'a ca lasom, qachi nachica cam qagueta l'o mayi ilotague' ana qaguetapi. 3Nachi cam lasom l'o ÿauateguet camayi, da yaqto' pa'auo, qaq anam qaguetapi ÿauatton da lavilÿaxac camayi. Nachi camayi iÿaxaatau'a na l'enaxatpi ana qaguetapi, nachi nqateeguesop aca laÿi'. 4Qaq da ime da nqateec 'enauac ana lalopi qagueta, nachi camayi hua'auta. Qaq anam qaguetapi nca'ataxaatauo, cha'ayi anamayipi ÿauatton da lavilÿaxac camayi. 5Qaq anamayipi sa ishit da ca'ategue cam sa ishit da ÿauatton. Chaqdata da dataueguesop camayi, cha'ayi sa ishit da ÿauatton da lavilÿaxac cam ÿaqa'a.
6Qaq so Jesús i'ot de'eda laloqnaxanaxat, qalaxayi somayipi sa ishit da ÿaÿaten dam 'eetega somayi.
So Jesús nachiso so ÿoqta ÿaÿaten da ilo'ogue ana qagueta
7Nachi so Jesús qaltaq ÿi'iguelaxalec da da'aqtaxan, 'eeta':
–Ÿataqta 'eesa de'eda qami' sa'axatema, 'eeta': Aÿim mayi nachaÿim lasom mayi aÿim lligueuo ana qagueta. 8Qaq 'enauac nam n'au co'ollaq saxanaq ñanac, namayipi cachaxaicpi qataq huotaxanaxaicpi, qalaxayi anam qaguetapi sa ishit da ÿoqocha'a namayipi. 9Qaq aÿim mayi nachaÿim lasom. Qaq ca aÿim tateu'a, nachi camayi nca'aleec. Nachi camayi 'eeta'am aca qagueta da pa'auo qataq da npa'aueguesop aca laÿi', nachi ÿanata ca 'auaqpi.
10Ca cachaxaic da anac, qalaq chaqdata da huo'o ca decachiÿa qataq da huo'o ca ÿalauat qataq da huo'o ca nlaxajñi. Aÿim, qalaxayi ñanac, da yaqto' huo'o da lca'alaxa anamayipi, qataq da chochaq huañi de'eda lca'alaxa. 11Aÿim mayi nachaÿim no'on qagueta l'o. Ca no'on qagueta l'o, camayi ÿaalec da nachaalataxac ana qaguetapi. 12Qaq cam chochi do'onataxaatapeguelec aca lashiue, camayi da huo'otaq ila'aguet cam dequi'iÿapec, nachi camayi n'onaxatchigui aca qaguetapi da datauec, cha'ayi camayi sa ishit da ÿoqta l'o ana qagueta, qataq sa ishit da ÿoqta lalamaqtepi anamayi. Nachi cam dequi'iÿapec ishit da ÿaconeu'a ana qaguetapi qataq ilagaxatapec. 13Qaq se'eso shiÿaxaua datauec, cha'ayi somayi chochi do'onataxaatapeguelec aca lashiue, ÿoqo'oyi sa ishit da itena'a ana qagueta.
14-15Aÿim mayi nachaÿim no'on qagueta l'o. Qaq de'eda 'eetec da ñi ita'a aÿim ÿauattoota, qataq da aÿim sauatton ñimayi, qaq nachida da 'eetec da aÿim sauattoota ana ilo qaguetapi, qaq anamayipi nataq'en ÿataqta aÿim ÿauattoota. Qaq aÿim san da ñachaalataxac souaxat anamayipi. 16Qaq huo'o nataq'en anam ilo qaguetapi mayi sa ishit da ÿalectaigui anam netaigui añi laÿi' ana qaguetapi. Qaq anamayipi iuen nataq'en da ñauegueuo. Qaq anamayipi qome ÿataqta aÿim ÿalaxaguet, huaña, qa nachi ishit da 'oonole aca nhuataguishipi qagueta, qataq 'oonolec cam nhuataxaua.
17Ñi ita'a ÿataqta aÿim ÿauotec, cha'ayi aÿim san da ñachaalataxac. Qalaxayi qom ime da san, nachi qaltaq ñi'iguelaxajla't. 18Qaica ca ishit da deuotaxanec de'eda ñachaalataxac, qalaxayi maichi aÿim chigoqchigui da san damayi. Qaq aÿim huo'o da shinec da san damayi, qataq da ñi'iguelaxajla't. Qaq 'eda dam aÿim ÿamaxalec ñi ita'a.
19Nachi na judiopi co'ollaq hua'axaÿa de'eda l'aqtac somayi, nachi qaltaq ÿi'iguelaxalec da nÿodacachi da lhuennataxac. 20Nachi qalota somayipi na 'eeta':
–¿Tá'ainco' yi qaualaqaitapeeguet damayi, yi huo'o ñi l'ec leguemaxaic, qataq huo'o da aloic?
21Qalaxayi huo'o somayipi na 'eeta':
–Qaica ca shiÿaxaua da huo'otaq huo'o ca l'ec leguemaxaic da 'eetec de'eda da ltaxaÿaxac. Cha'ayi ¿ishito' peta'a da ca huo'o ca l'ec leguemaxaic da nauaañi naq'en ca qanamaic?
Na judiopi sa i'amaqten so Jesús
22Qaq mashi n'omaxa co'ollaq na netaña yi Jerusalén huo'o so laponaxac da qaiuennate so na'a'q mayi huetoigui co'ollaq qoÿanot ñi Dios aso n'onaxanaxaqui. 23Qaq so Jesús huetau'a aso n'onaxanaxaqui, hueta'a som qoÿinac nqasoxoc so Salomón. 24Nachi na judiopi laponeu'a somayi. Nachi qoÿiitega, qoÿiita':
–¿Chaq láguio', qaq ishit da ÿoqta qomi' 'an'axattalo? Da ÿoqta nachi'am nta'a nca'alaxaqui, qaq no'ónctaxa da ÿataqta qomi' 'au'aqtaxaatema, nachi a'ayi.
25Nachi so Jesús 'enapeco':
–Mashi ime mque' da qami' sa'aqtaxaatapeguema, qalaxayi sa ishit da aÿim qau'amaqchiñi. Nam so'ottacpi, namayi nachina na aÿim ÿamaxalecpi ñi ita'a, qaq nachina na 'eeta'am da qami' da'aqtaxanema. 26Qalaxayi sa ishit da qau'amqajnataxañi, cha'ayi sa ishit da nachiqami' anam selotague' qaguetapi. Qaq damayi sogote da qami' sa'axatema co'ollaxa. 27Cha'ayi anam qagueta mayi selotague', anamayi ÿauatton da ivilÿaxac, qataq aÿim sauatton anamayipi, qaq anamayi aÿim ca'attague'. 28Qaq aÿim sanem da lca'alaxa mayi chochaq tateec anamayipi. Huaña, nachi sa ishit da ileu, qataq sa ishit da huo'o ca ishit da nqateeguesop da iuaqÿaxac anamayipi. 29Qaq anamayipi aÿim ÿanem ñi ita'a ñi napacalec 'enauacna, qataq sa ishit da huo'o ca nqateeguesop da lhuaqÿaxac ñimayi anamayipi. 30Aÿim qataq ñi ita'a qomi' 'oonolec da qadataxac.
31Nachi na judiopi qaltaq ÿacona na coma' da qaÿasaq somayi. 32Nachi so Jesús 'enapeco':
–Aÿim ÿataqta qalota na so'ot ÿaÿamaqchiguiñi da qami' qauauañiichigui, chigoqchigui da l'añaxac ñi ita'a. Qaq ¿chaq négue't cam sasoilec namayipi da huo'o mshi qanshiitaique da aÿim qauasaqai?
33Nachi nam judiopi 'enapeco':
–Sa ishit da 'am sasaxasoq na coma' da souaxat cam ÿaÿamaqchiguiñi 'au'ottac. Mayi 'am sasaxasoq, souaxat naua 'ad'aqtaqa ÿataqta npa'agueneto ñi Dios. Qamaq 'am chochi 'am shiÿaxaua, qalaq qonetega da 'am Dios.
34Nachi so Jesús 'enapega somayipi, 'eeta':
–Na nqataxacpi mayi qami' qoÿanema co'ollaxa, nanettañi da l'aqtac ñi Dios mayi 'eeta': “Qami', qami' diospi.” 35Qaq qomi' saÿajnaq da naua nanettrañi l'aqtaqa ñi Dios naamayi sa ishit da qaÿoqolgue't, qataq da ñi Dios ÿamata'ac da diospi som shiÿaxauapi mayi ÿaconguet da l'aqtac. 36Qaq da huo'otaq ñim Dios aÿim iÿotauga co'ollaxa, nachi aÿim namaxa ana 'alhua, qaq ¿tá'ainco' qami' yi qoñiitega da npa'agueneto naua i'aqtaqa ñimayi, souaxat da shiitega da aÿim llalec ñimayi? 37Da huo'otaq sa ishit da so'ot dam l'onataxanaxac ñi Dios, nachi sa ishíttaxa da aÿim qau'amaqchiñi. 38Qalaxayi da huo'otaq so'ottac damayi, nachi nai'ctaxa da aÿim sa qau'amaqchiñi, qalaxayi qau'amaqchiñi nam so'otpi, yaqto' ishit da imauec da qauaÿajñi da ñi ita'a aÿim hueta'aguet, qataq aÿim soota'aguet ñimayi.
39Huaña, nachi qaltaq qanshitaique da qaÿaconeu'a da qaicoñi', qalaxayi so Jesús naneltaxan.
40Nachi so Jesús taigue dam pa'aigue da nala' lliguishiguem yim tala Jordán, yim 'alhua mayi hueta'a co'ollaq dachilaxanataxaatac so Juan. Nachi hueta'a yimayi. 41Nachi ÿataqta qalota na shiÿaxauapi na tauga ca hueta'a somayi. Nachi namayipi 'enapeco':
–Ÿoqta 'eesa co'ollaxa da so Juan sa ishit da huo'o ca i'ot n'anec mayi sa qaÿauanapega, qalaxayi 'enauac co'ollaxa na i'axat, can i'axatta'aguet ñi'iñi shiÿaxaua, ÿataqta ipacchigui.
42Nachi ÿataqta qalota na i'amaqten so Jesús co'ollaq huaña se'eso 'alhua.
Nuevo Testamento Toba Qom, Dios Nvita Na Shiỹaxauapi © Sociedades Bíblicas Unidas, 1981.
