پێدایش 33
33
آکوب و ایسّوئے دُچار کپگ
1نون آکوبا چمّ چست کرتنت و دیستی که ایسّو پێداک اِنت و چار سد مردی همراه اِنت. گڑا آکوبا لیاه و چُکّ یکّ ٹۆلیے کرتنت، راهیل و چُکّ یکّ ٹۆلیے و دوێن مۆلد گۆن چُکّان یکّ ٹۆلیے. 2مۆلد و مۆلِدانی چُکّی دێما کرتنت، چه آیان و رند لیاه و لیاهئے چُکّ و چه لیاه و چُکّان و رند، راهیل و ایسُّپ پُشت پُشتا. 3آکوبئے جند چه سجّهێنان دێما شت و هپت رندا په اَدب سَری جَهل کرت تانکه وتی براتئے نزّیکّا سر بوت.
4بله ایسّو په وتی براتئے گِندُکا تچان بوت. آکوبی گوَراَمباز کرت، دَستی آییئے گردنا دئور داتنت و چُکّتی. دوێنان گرێت. 5وهدے ایسّوا وتی چمّ چست کرتنت و جنێن و چُکّی دیستنت، گوَشتی: ”اے کئے اَنت که ترا گۆن اَنت؟“ آکوبا گوَشت: ”اے هما چُکّ اَنت که هُدایا چه وتی بَکشِندَهیا تئیی کسترارا داتگ‌اَنت.“ 6گڑا مۆلد و چُکّ نزّیکّا آتکنت و سرِش جَهل کرت. 7لیاه و چُکّ هم نزّیکّا آتکنت و سرِش جَهل کرت. گُڈسرا ایسُّپ و راهیل نزّیکّا آتکنت و سرِش جَهل کرت. 8ایسّوا جُست کرت: ”اے رمگ و گۆرُم که من ڈیکّ داتنت، اِشانی مکسد چے اِنت؟“ آکوبا گوَشت: ”مکسد اِش اِنت که تئو منی سرا مهربان ببئے، منی واجه!“ 9بله ایسّوا گوَشت: ”منی برات! منا چۆناها باز هست. هرچے ترا هست، گۆن وت بدارِش.“ 10آکوبا گوَشت: ”اِنّه، چه تئو دَزبندیَ کنان، اگن منی اِزّتا کنئے، منی سئوگاتان بزور که تئیی دیدار چۆ هُدائے دیدارا اِنت و تئو منا په مِهربانی کبول کرتگ. 11منی اے ٹێکیا بزور که په تئو آرگ بوتگ. چێا که هُدا په من مهربان بوتگ و منا هر چیزّی داتگ.“ آکوبا مِنَّت کرت و ایسّوا مَنِّت.
12گڑا ایسّوا گوَشت: ”سَر بگرێن و برئوێن. من پێسرَ بان.“ 13بله آکوبا گوَشت: ”منی واجه! تئو زانئے چُکّ کَسان و نازُرک اَنت و پَس و گۆک هم زاتَگ‌اَنت و شیری اَنت. اگن یکّ رۆچێا هم اِشان په ترُندی بَران بکنێن، سجّهێن دَلوَتَ مرنت. 14منی دَزبندی اِنت که منی واجه چه وتی کَسترا پێسر برئوت و من نرم نرما رمگ و گۆرُمان سَر دئیانَ کنان و چُکّانی گامان آیانَ بان، تانکه سَهیرئے سرڈگارا وتی واجهئے کِرّا سر ببان.“ 15ایسّوا گوَشت: ”گڑا من وتی لهتێن مردم تئیی همراهَ کنان.“ آکوبا گوَشت: ”چێا؟ په من همے بَسّ اِنت که منی واجه په من مِهربان اِنت.“
16گڑا ایسّو هما رۆچا دێم په سَهیرا پِر ترّت، 17بله آکوب سُکّوتا شت، همۆدا په وت لۆگ و په وتی دَلوَتان گْواشی#33:17 گْواش، بزان واڑ. بَست. پمێشکا آ جاگها سُکّوتَ#33:17 سُکّوتئے مانا اِنت: ”کاپار، پناه“. گوَشنت. 18آکوب که چه پَدّان‌اَراما پِر ترّگا اَت، شِکێمئے شهرا کَنهانئے سرڈگارا په سلامتی سر بوت و شهرئے نزّیکّا اُردی کرت.#33:18 اُرد کنگ، بزان په کَسانێن وهدێا جاگهێا گِدان بندگ و نِندگ. 19اے ڈگار که اۆدا آییا وتی گِدان مِکّ کرت، چه هَمۆرئے چُکّان په سد ٹُکّر نُگرها بهایی زرت. هَمۆر، شِکێمئے پت اَت. 20اۆدا کُربانجاهے اَڈّی کرت و آییئے نامی اێل‌اێلوهی‌اِسراییل#33:20 اێل‌اێلوهی‌اِسراییلئے مانا اِنت: ”هُدا، اِسراییلئے هُدا“. کرت.
© 2016-22 Wycliffe Bible Translators, Inc.
