Marcos 5
5
Gerasasriig kwaimandzig tøga møg
(Mt 8.28-34; Lc 8.26-39)
1Pisu ambøgatømaysrø larraamba, Gerasa pirausrø puben, 2Jesús barcoyugurri webiben latatø, kan møg trømbøig maringarub kwaimandzig tøgaig sørin trabmerayugurri webarrua, Jesúswan kemallibig køn. 3Tru møøbe sørin tulyutø tsubig, muguen lusrtrab kaimaig købig køn, ni cadenastøgaguen. 4Kanmaybe srøbmeran tasiimeran cadenastøga køben, katø chitøga køben lusrendø, lusrimørig pitischig marøb lurren, muguen kaimabelø køn. 5Incha yem kwaløm chu uragucha tunmerasrø, sørin tulmerasrø trashib, sruutøga nøasiitø kørriinchib uñibig køn. 6Incha Jesúswane yabgurrindø asha, lula, nui merrab tømbønsra, 7trenchib trashibig køn:
—¿Ñibe nane chi martrab inchigu? cha, Jesús, Tius Mayeelaim Pala Pasrabigwei Nusrkai. Purø trømbøig møra megamig kømønrrai Tiuswei munchiyu ka købash cha, chib miarrumøn— cha.
8Pøs øyeeg chippe, kaguende Jesúsbe:
—¡Ñi, trømbøig maringarub kwaimandzig, i møweinukkurri webinrrø!— chib pasrøben, trendaig køn.
9Inchene Jesúsbe nun trencha payibig køn:
—¿Chi munchi kugu?— cha
Inchen nøbe:
—Legión munchi kur, chibig køn. Kaguende nambe purø nu ker— cha.
10Inchabe tru piraugurri nøørø peesrømay ørmørrunrrig chib, Jesúswan truba truba rugabig køn. 11Inchen tru tun puluwan kuchimera lawa mab truba nu amøñibelø køn. 12Inchen tru kwaimandziimerabe rugab trenchibelø køn:
—Kuchimeraimay ambingarurra cha, nam truilainug kebamrrab— cha.
13Inchen Jesúsbe ka kebambashen, trømbøig maringarub kwaimandziimerabe møweinukkurri webamba, kuchimerayu kebambene, truyu kuchimerabe pa milburab warabeløbe truba trømbø lendeyu lula, chab pinøgørraptincha, larrø nu pisuyu kegørra, pi keesra, chab kwabelø køn.
14Inchene kuchi ashibeløbe kwaariilø lula, puebloyu køben, wambig nøørøwansrøn køben eshkab ambubelø køn. Inchen misaamerabe chi purayaigwan ashchab amrrubelø køn. 15Incha Jesús waisrø pubene, tru kwaimandzig tøgaig købiibe møimbe køsaatiig kømø, keweig, tabig wai ashabe, truiløbe kørig kui inchibelø køn. 16Inchen tru kwaimandzig tøgaig købigwanba, kuchimeranba maig purayaigwan ashibeløbe nømun eshkaben, 17nømbe Jesúswan nømuim piraugurri ‘irra’ chib truba rugabelø køn.
18Inchen Jesús barcoyu kebibene, tru kwaimandzig tøgaig købiibe:
—¿Ñui mendig arruah?— cha, truba inchen,
19Jesúsbe arrubashmøtø, trenchibig køn:
—Ñui yamay inrrø cha, ñui yau misaameraimay Señor ñun yeeg nørriig mara, mandø lastima asigwan nømun eshkanrrab.—
20Inchen tru møøbe ya, Decápolis pueblosrø Jesús nun yeeg nørriig marigwan truba eshkab mendøbene, mayeeløba kwaara ashibelø køn.
Jesús kan ishuwan kwanrrøwan tamarøb
(Mt 9.18-26; Lc 8.40-56)
21Jesús barcoyu katø pisu ambøgatømay larraibene, nuim pøtøgatan misag truba truba nu tulundzunøben, nøbe pisu mendatø kørrømisrøbig køn. 22Inchen judíosmera tulundzuni yau ashib karubig, Jairo taig, puabe, Jesúswan ashippe, nui srøb pulu tømbønsra, 23arrubsrumugu chib truba inchib, trenchibig køn:
—Nai nimbasr-unø kwanrrab inchib tsun cha. Kwanrrø tammisren, katø øsig uñchai ñui tasigwan nuim pala estsartrab attra— cha.
24Inchen Jesúsbe nøba iben, menrra misag mendig ambuptø nun trag maren, 25tru misag utube kan ishug doce años ørøba ani ib kwanrrø tøgaig kua, 26chu uraskucha purø trømbøig kui uña, mø marøbelai yam tasku pureb megawa, nui chi tøgagúigwan kerrigu patsøgøben, chiweingucha puraimø, kwanrrøbe masken inchib iben, 27Jesúswan wamindi mørøppe, tru ishuube misag utu wendaugurri Jesúsweim pulu kemallippa, nø kewagúigwan katørabig køn. 28Kaguende nøbe treeg isubig køn: “Kewagúilandøguen katøraitø, tammisrig kørrømisramønrrun” cha. 29Inchen tru ani ibiibe møi møi pasramisrøptinchen, asru nui kwanrrøbe yandø purayai møren, 30Jesúsbe nø mun køsrøn nui maramburab mariitøga tamarøbrain kui mørabe, nu misag søtøwan keeshabe, payibig køn:
—¿Na kewagúigwane mu katørah?— cha.
31Inchene nui kusrenanøb pera uniiløbe trenchibelø køn:
—Misag søtø yeeg trag mari ashatø, ñibe: “¿Mu katørah?” taibe— cha.
32Inchen Jesúsbe mu katøraitashchab ambumay, imay ashene, 33tru ishuube kørig købiitø itønab, nun maig purayaigwan møra, ya, Jesúswei merrab tømbønsrøb srala, isømø, kerriguwan eshkaben, 34Jesúsbe trenchibig køn:
—Nimbasr, ñui isubigwan nainuutø pasra tøgagúikkurri tamarig kørrømisran cha. Chi isumø, inrrø cha. Ñui kwanrrøbe yandø purayaig køn— cha.
Jesús Jairoi nimbasrwan øsiiranøb
35Trune Jesús waminchib pasramnetø, tru judíosmera tulundzuni yau ashib karubigwei yaugurri møiløgøsrøn amrruppe, unai møskawane trenchibelø køn:
—Ñui nimbasrbe kwabguen indan cha. ¿Kusrennøbigwan mas chinrrabrre øyeeg chigu?— cha.
36Inchen nøm trenchib kuingucha Jesúsbe trunun mørøb pasrømøtø, tru tulundzuni yau ashibigwane trenchibig køn:
—Chi kørig kui inchimøtø, køreptø køreu— cha.
37Incha mas mungucha amrrubashmøwa, Pedronbah, Jacobonbah, Jacoboi nuneg Juanwanbatø amrrungarubig køn. 38Incha tru judíosmera tulundzuni yau ashibigwei yau puabe, ke chindi asamgaig misaabe kishib, miirab, trashib inchib kui ashabe, 39Jesúsbe kebya, trenchibig køn:
—¿Chindimbarre øyeeg inchib, kishib køh? cha. Unøbe kwaig kømøtø, ka kiptø tsun— cha.
40Inchen misaamerabe Jesúswane ka indzatø mørøbelø køn. Inchen Jesúsbe mayeelan møi møi webambingarua, møskawanbah, usranbah, tru nøba ambubelanbatø pera ya, tru ishug-unø tsuinug kebya, 41tasigu kemørabe, trenchibig køn:
—Talita, cumi— cha. (Trenchippe: “Ishug-unø, ñun kurrø char” chib.)
42Inchene tru doce años tøga ishug-unøbe møi møi kurrappa, llirab mendøben, misaamerabe truba truba kwaara asha kørrømisrøbelø køn. 43Inchen Jesúsbe mun køben eshkab kønrrab kømø cha, unan mamig srøttrai karubig køn.
© 2010, Wycliffe Bible Translators, Inc. All rights reserved.
