Marcos 4
4
Kan møg mandø kwaligwan trunun Jesús kemesra wamindig
(Mt 13.1-9; Lc 8.4-8)
1Jesús katø nu pisu menda kusrenanøb mendøben, nø wainug misag truba nu tulundzunøben, treekkurri Jesúsbe pisuyu kan barcoyu kebya wamisren, maya misaabe tru pisu mendatø kørrømisrøbelø køn. 2Inchen nøbe nømun ‘øyeeg lataitøwein køn’ chib wamindiiløtøga chineh kemesra, kusrenanøbig køn. 3Inchabe nui kusrenanigube trenchibig køn:
—Iigwan møray cha. Kan kwallibiima tsurøb kwallchab webyan cha. 4Incha tsurøb ibene, kanbalø yellbe mayu kørrøben, illimera amrrua, man cha. 5Inchen katøganbaløbe srug trøldø pirau pirø tre chiganug kørrøben, pirø palatiig kua, tru yellbe kal-lappe, petø kal-labendø, 6pørr webarrua, mergurangaruben, srøl tre chigaig kua, mul-laptindan cha. 7Katøganbalø yellbe kal shau utu kørrøben, kalmera nørrørab mendappe, chab kasrøb tsibishiben, truibe chigucha misrmøn cha. 8Inchen katøganbalø tab pirau kørrabiibe sí, kal-lawa, tabig nørrørawa, truba nu nigan cha. Møiløbe kan yellgurrindø mamig trulzheelø treinta niguen, møiløbe sesenta niguen, møiløbe cien nigan— chibig køn.
9Incha trenchibig køn:
—¡Møramig kalu pønsraibe, mør!— cha.
Mandøgurri Jesús ‘iigwan øyeeg lataig køn’ cha, kemesra wamindig
(Mt 13.10-17; Lc 8.9-10)
10Jesús yandø nøtø kørrømisren, tru doce kusrenanøb pera uniiløba kanbalatø Jesúsweim pulu pønrrabeløbe trenchibelø køn:
—¿Tru ‘øyeeg lataitøwein køn’ chib kemesra wamindiiløbe chi chibig køh?— cha.
11Inchen nøbe trenchibig køn:
—Tiusbe nø ashib karub wainug mu asiimíig tøgagúilan ñimune ashchai tranan cha. Inchendø misaamera nøøreelø truyuilø kømeelane ‘øyeeg lataitøwein køn’ chib kemesragøba wamindiiløtøga wamindig køn cha,
12nømbe ashippe ashendø, ashmøwa lataig kørrømisrøb;
mørøppe mørendø, chi tainguen mørmøwa lataig kørrømisrøb inchain cha.
Incha isua møra Tiusweimay lliramøwei, nømui kaig mariilan Tius ulø payamigwan pesannamø,
ulø payamig kønrrain kuig køn— cha.
Tru kwaliibe ‘øyeeg lataig køn’ cha, kemesra wamindigwan Jesús øyeeg køn cha eshkab
(Mt 13.18-23; Lc 8.11-15)
13Incha katø trenchibig køn:
—Ñimgan ‘øyeeg lataitøwein køn’ cha, tru kemesra wamincha pasrigwane ¿chigúi wetøgørrøtirru? cha. Katøgan ‘øyeeg lataitøwein køn’ cha, kemesra tru wamindiilangucha kerriguba ¿chincha wetøgørrønrrague? cha. 14Tiuswei wamwan waminchibiibe yellwan tsurøbig lataig køn cha. 15Inchen tru mayu kørrab yellmerabe iilø latailø køn cha. Nømbe Tiuswei wamwan møren latatø, Satanásbe arrub, tru tab wamwan nømuinug ellmarigwane kerran cha. 16Inchen tru srug trøldø pirau pirø tre chiganug tsuri yellmera latailøbe iilø køn cha: Tiuswei wamwan møra, tru urastøbe truba tab kui utøbendø, 17nømasiitø srøl tre umbu keetiimeelø kua, maya yanaguen amøñimøn cha. Incha tru Tiuswei wamgurrindø chigøben puben, katø chigøben kaig nebub arruben, nømbe møi møin elachiptindan cha. 18Inchen katøganeløbe tsuren, tru kal shau utu kørrab yell latailø køn cha. 19Tiuswei wamwam mørøppe mørendø, i pirau chine købigwan menrra isubiibah, nømui chine palømø tøgagúilø purø tabig lataig asønaikkurrimba, trugurri chine tøgagømmørø chull inchib isuiløbatø Tiuswei wamwan mørigwane kerrigu truitø kasrøben, chigucha nømbe ellmarig misrmøn cha. 20Inchen tru tab pirau tsuriiløbe tru Tiuswei wamwam møra, ellmarig misrøbelø, truilø køn: kan trulzhikkurrindø treinta, kabe sesenta, kabe kan trulzhikkurrindø cien nigabelø latailøgue.—
Lámparan kemesra wamindig
(Lc 8.16-18)
21Katø Jesúsbe trenchibig køn:
—¿Kabe kan lámparanma køtsø umbu pasrtrab, kabe cama umbu pasrtrab srua kerrubelø kuitarru? cha. Treeg kømøtø, ¿tør kønrraimbe, pala pasramig kømuitarru? cha. 22Chigøben sørig pasrabiibe søriitø pasrømøtø, kenamaramig kønrrun cha. Katø chinchaguen asamgaig kasra pasrigwane ashchai tøryu wesraig kønrrun cha. 23Møikkøben møramig kalu pønsraig kuabe, mør— cha.
24Incha katø trenchibig køn:
—Ñim chi mørigwane tab isua kuy cha. Ñim kanelan maig unaasha traniibe, ñimungucha treetøwei unaasha trana, ñimune nemariibaguen tranrrun cha. 25Kaguende tøgaigwane masken tranen, trune chigaigwane nui lamøtiig tøgagúigwanguen kerranrrun— cha.
Yell nurab lataitøwein køn cha, kemesra wamindig
26Jesúsbe katø trenchibig køn:
—Tius nø ashib karub pasraibe kan møg pirau yellwan tsuri lataig køn cha. 27Incha kib tsui lata, kurra uni lata, yem kui lata, kwaløm kui lata, yellbe kal-lawa nuran cha, møøbe mandø indinguen ashmøwatø. 28Kaguende pirøbe nøasiitø mamig niguingarubig køn cha. Srøsrøbe ishiimerrig kal-laben, trugurrimbe urø weetøben, urøyube trulmera netsan cha. 29Inchen yandø trul srønøben latatø, usestøga paran cha, kaguende yandø param kwaløm puin køben.—
Iibe murtasa yell lataitøwein køn cha, kemesra wamindig
(Mt 13.31-32; Lc 13.18-19)
30Katø Jesúsbe trenchibig køn:
—¿Tius nø ashib karub pasraibe chi lataig asøna cha, kabe chiwan kemesra, ‘øyeeg lataitøwein køn’ chinrrab køh? cha. 31Kan murtasa yell lataig køn cha. Tsurøb uras truibe yu pirau maya yellmerai utu purø lamøzhig købendø, 32tsurinukkurrimbe shush mamig tusrmerai utu katøguchinguen palaig nu tusr-unø srarmerabaig nuraben, illimera pala amøñibeløguen truyu le martrun— cha.
Jesús ‘iibe øyeeg latailø køn’ cha, kemesra wamindig
(Mt 13.34-35)
33Jesúsbe Tiuswei wamwan øyamay kusrennøbig køn, ‘øyeeg lataitøwein køn’ chib, truba yambalø kemesra eshkab. Møi eshkaig latailø, nøm mayangatig chigúi nebua mørtrapteelø køben, treetøh marøbig køn. 34‘Øyeeg lataitøwein køn’ chib kemesrømøbe, waminchimíig køn. Inchendø nui kusrenanøb pera uniilane nømundø nøørø kerrigu tør marøb eshkabig køn.
Isig ichibigwanba, pi welar kurrabigwanba Jesús pasramisringarub
35Incha tru kwalømdøwei yandø pilliraben, nui kusrenanøb pera uniilan trenchibig køn:
—Pisu ambøgatøsrømay larraamun— cha.
36Inchen nømbe misagwan ‘ungwa’ cha, Jesúswan tru nø waig barcoyutøwei pera amben, katøgan barcomeragucha lincha ambubelø køn. 37Inchen truba mur isig ichibig webarruben, pi welarmerabe barcoyu keguchen, yandø ke pitø netsab arruben, 38Jesúsbe wendau kan labzhigu ne kib waben, nømbe kasrønanabe trenchibelø køn:
—¡Au, Kusrennøbig! ¿nam asentanrreenchib melamne, ñigan isubguengaig watirru?— cha,
39Inchen Jesúsbe kurra, isigwan kønømønrrai kandø wama, piwane trenchibig køn:
—¡Wanrrømø, møi møi wasrørau!— cha.
Inchene isiibe pasramisren, yandø kerrigu wasrønzhig kørrømisrøbig køn. 40Inchen Jesúsbe nui kusrenanøb pera uniilan:
—¿Chindimbarre kørig køta? chibig køn. ¿Ñimui isubigwan nainuutø pasra kømeelø kø chindah?— cha.
41Inchen nømbe truba kwaariilø kørrømisra, kangurrin kangurri trenchibelø køn:
—¿Iibe mu kerah cha, isig ichibig lata, mar lata, nun mørtrappe?—
© 2010, Wycliffe Bible Translators, Inc. All rights reserved.
