LUKE 13
13
Sa vunautaka na veivutuni ko Jisu, 1—5. Sa tukuna na lolo sa sega ni vua, 6—9. Sa vakabula e dua na yalewa, 10—17. Sa tukuna na sore ni musita kei na leveni talega, 18—21. Sa vakarota vei ira na nona tamata me ra gumatua; a sa vunauci Eroti, kei Jerusalemi, 22—35.
1Ia sa tadu e na gauna ko ya eso era sa tukuni ira na kai Kalili vua, ni sa vakadavea vata ko Pailato na kedra dra kei na nodra veisoro. 2A sa vosa ko Jisu, ka kaya vei ira, Dou sa vakasama beka ni ra sa uasivi vei ira kecega na kai Kalili e nai valavala ca ko ira na kai Kalili oqori, ni sa yaco vei ira na veika vakaoqo? 3Au sa kaya vei kemudou, E segai; ia kevaka dou sa sega ni veivutuni, dou na mate kece vaka talega kina. 4Se ko ira na le tinikawalu, sa baleti ira na vale cecere mai Sailoama, ka vakamatei ira, dou sa vakasama beka ni ra sa uasivi e na cala vei ira kecega na tamata era sa tiko mai Jerusalemi? 5Au sa kaya vei kemudou, E segai; ia kevaka dou sa sega ni veivutuni, dou na mate kece vaka talega kina.
6Sa tukuna talega ko koya na vosa vakatautauvata oqo: Sa dua na tamata sa tei e na nona were-ni-vaini e dua na lolo; a sa lako mai me vakasaqara kina na vuana, ka sega ni kunea. 7Sa qai kaya ko koya vua nai vakatau-ni-vaini, Raica, sa qai yabaki tolu ka’u sa lako mai ka vakasaqara na vuana e na lolo oqo, ka sega ni’u kunea: taya sobu; sa vakacacana walega na vanua e na vuku ni cava? 8Sa qai vosa ko koya, ka kaya vua, Kemuni na Turaga, laiva mada ga me tei kena yabaki talega oqo, me’u cukiraka vakavolivolita mada, ka biuta kina na de-ni-manumanu; 9ia de qai vua; ia kevaka e sega, ko ni na qai mai taya sobu.
10A sa vakavuvuli tiko ko koya e na dua na vale ni lotu e na siga ni vakacecegu:
11Ka raica, sa dua na yalewa sa curumi koya e dua na yalo sa malumalumu kina ka yabaki tinikawalu, a sa vakalairoro tikoga, ka sega sara ni tu donu rawa. 12Ia ni sa raici koya ko Jisu, sa kaciva, ka kaya vua, Yalewa, ko sa sereki mai na nomu malumalumu. 13A sa tabaka e na ligana; a sa vakatudonutaki vakasauri kina, a sa vakarokorokotaka na Kalou.
14Sa qai vosa vakacudrucudru na turaga ni vale ni lotu, ni sa ia na veivakabulai ko Jisu e na siga ni vakacecegu, ka kaya vei ira na tamata, E ono na siga e dodonu me ia kina na cakacaka: oqori dou lako mai kina mo dou vakabulai, ia me kakua ga e na siga ni vakacecegu. 15A sa vosa vei koya na Turaga, ka kaya, Na dauveivakaisini, dou sa sega li ni dui sereka, koi kemudou yadua, na nona pulumokau kei na nona asa e na siga ni vakacecegu mai na nona tikina, ka kauta me vagunuva? 16ia na yalewa oqo, na luve i Eparaama, sa vesuka ko Setani, raica, e tinikawalu na yabaki, sa sega beka ni dodonu me sereki mai nai vesu oqo e na siga ni vakacecegu?
17Ia ni sa kaya na vosa oqo ko koya, era sa madua kecega na nona meca, a ra sa reki kece na lewe vuqa e na vuku ni ka vakaidina kecega sa kitaka ko koya.
18Sa qai kaya ko koya, Ena vakatauvatani beka kei na cava na matanitu ni Kalou? se cava me’u vakatauvatana kina? 19Sa tautauvata kei na dua na sore ni musita, sa kauta e dua na tamata, ka biuta ki na nona were; a sa tubu cake, ka sa yaco me kau levu; a ra sa mai ro e na tabana na manumanu vuka.
20A sa kaya tale ko koya, Me’u vakatauvatana kei na cava na matanitu ni Kalou? 21Sa tautauvata kei na leveni, sa kauta e dua na yalewa ka vunia e loma ni madrai droka e tolu nai vakarau, me vakalevenitaki taucoko kina.
22A sa lako voli ko koya e na veikoro kei na veikoro lalai, ka vakavuvuli tiko kina, ka lako tu vaka ki Jerusalemi.
23Sa qai kaya vei koya e dua, Kemuni na Turaga, era sa lewe lailai ena bula? A sa kaya vei ira ko koya, 24Dou gumatua sara mo dou curu ki na matamata-ni-koro qiqo; ni’u sa kaya vei kemudou, era lewe vuqa ena vakatovolea me curuma, a ra na sega ni rawata: 25ni na tu cake nai taukei ni vale, ka sogota na katuba, ia dou sa tu etautuba, ka tukituki ki na katuba, ka kaya Kemuni na Turaga, Kemuni na Turaga, ni dolavi keimami: ena qai vosa ko koya, ka kaya vei kemudou Au sa sega ni kila se dou lako maivei: 26Dou na qai kaya, Keimami a kana ka gunu e matamuni, ko ni sa dauvakatavuvuli talega e na neimami veisalatu. 27Ena qai kaya ko koya, Au sa kaya vei kemudou, Au sa sega ni kila se dou lako maivei; dou lako tani vei au, koi kemudou kecega sa daukitaka nai valavala ca. 28Dou na qai dautagi ka vakasequruquru bati, ni dou na raici Eparaama, kei Aisake, kei Jekope, kei ira kecega na parofita, e na matanitu ni Kalou, ia koi kemudou dou sa vakasevi ki tautuba. 29Ia era na lako mai na tu i cake, mai ra talega, mai na mata ni tokalau talega, kei na mata ni ceva, a ra na tiko sobu e na matanitu ni Kalou. 30Ka raica, eso sa muri era na qai liu; eso talega era sa liu era na qai muri.
31E na siga ko ya sa lako mai eso na Farisi, ka kaya vua, Mo lako ki taudaku, ka lako tani eke; ni sa via vakamatei iko ko Eroti. 32A sa kaya vei ira ko koya, Dou laki tukuna vua na fokise ko ya, Raica, au sa vakasevi ira na tevoro, ka ia na veivakabulai edaidai kei na sabogibogi, au na qai vakaotia ga e nai katolu ni siga. 33Ia sa kilikili ga me’u lako voli edaidai, kei na sabogibogi, kei na bogi rua: ni sa dredre me mate e dua na parofita e na koro tani, mai Jerusalemi ga. 34Isa! Jerusalemi, Isa! Jerusalemi, ko iko sa vakamatei ira na parofita, ka vakaviriki ira e na vatu era sa talai vei iko! e vuqa na siga ka’u a via vakasoqoni ira vata na luvemu, me vaka sa vakasoqona na luvena na toa yalewa e ruku ni tabana, ia dou sa sega ni vinakata! 35Raica, sa qai biu tu vei kemudou na nomudou vale ka sa laladidi: ia ka’u sa kaya vakaidina vei kemudou. Dou na sega ni raici au tale, ka malua me yaco mada na siga dou na kaya kina, Sa kalougata ko koya sa lako mai e na yaca ni Turaga.
ಪ್ರಸ್ತುತ ಆಯ್ಕೆ ಮಾಡಲಾಗಿದೆ:
LUKE 13: FOV
Highlight
ಶೇರ್
ಕಾಪಿ
Want to have your highlights saved across all your devices? Sign up or sign in
Vakavakadewa Makawa (Fijian Old Version) © Bible Society of the South Pacific
