LUKE 12
12
Sa vakavulici ira na nona tisaipeli ko Jisu, 1—48. Sa tukuna ni na tubu na veicati e na vukuna, 49—53. Sa vakavulici ira na lewe vuqa me ra yalomatua ka veilomani, 54—59.
1E na gauna ko ya, ni ra sa udolu vakavuqa na tamata sa soqoni vata mai, a ra sa veibutuqaqi ga, sa qai kaya mada eliu vei ira na nona tisaipeli ko koya, Dou qarauni kemudou mai na nodra leveni na Farisi, oqori na dauveivakaisini. 2Ia sa sega na ka sa vuni, me kakua ni vakarairaitaki; se tabogo, me kakua ni kilai. 3Ia na ka dou sa tukuna e na butobuto ena rogo votu; ia na ka dou sa tukuna e daligadra e na veitikina vuni, ena kacivaki mai na dela ni vale.
4Ia ka’u sa kaya vei kemudou, na wekaqu, Dou kakua ni rerevaki ira era sa vakamatea na yago ga, ia emuri sa sega tale na ka era cakava rawa. 5Ia ka’u sa tukuna vei kemudou se ko cei mo dou rerevaka: Dou rerevaki koya sa rawata me vakamatea, ka oti sa rawata talega me biuta ki eli; io, au sa kaya vei kemudou, Dou rerevaki koya. 6Sa sega li ni volitaki na separo e lima e na facigi e rua? ia ka sega e dua vei iratou sa guileca e na mata ni Kalou. 7Ia sa wili kecega na drau ni ulumudou. O koya oqo mo dou kakua ni rere: dou sa uasivi cake vei ira na separo e vuqa.
8Au sa kaya talega vei kemudou, O koya yadua ena vakatusai au e na matadra na tamata, ena vakatusai koya talega na Luve ni tamata e na matadra na agilose ni Kalou; 9ia ko koya ena cakitaki au e na matadra na tamata, ena cakitaki e na matadra na agilose ni Kalou.
10Ia ko koya yadua ena vosavakacacataka na Luve ni tamata, ena rawa me kakua ni cudruvi kina; ia ko koya ena vosavakacacataka na Yalo Tabu, ena sega sara ni rawa me kakua ni cudruvi.
11Ia ni dou sa kau ki na veivale ni lotu, vei ira na dauveilewai kei ira na turaga, dou kakua ni lomaocaoca, se vakaevei mo dou kaya, se cava mo dou tukuna: 12ni na vakavulici kemudou na Yalo Tabu e na tiki-ni-siga ko ya e na ka e dodonu mo dou kaya.
13A sa dua vei ira na lewe vuqa sa vosa mai vei koya, Vakavuvuli, kaya mada vua na tuakaqu me solia vei au na noqui votavota e nai yau nei koya na tama i keirau. 14A sa kaya vua ko koya, Ko iko, ko cei sa lesi au me’u turaga ni lewa se dauveivota vei kemudou? 15Sa kaya talega vei ira ko koya, Dou raici kemudou vinaka, ka tarovi kemudou mai na daukocokoco; ni sa sega ni kalougata na tamata e na vuku ni sa levu na ka sa tu vua.
16A sa tukuna ko koya e dua na vosa vakatautauvata vei ira, ka kaya, Sa dua na tamata vutuniyau sa vakalewe vinaka sara na nona vanua: 17a sa qai vakananuma e lomana, ka kaya, A cava me’u kitaka, ni sa sega na noqu lololo me’u binia kina na noqu lewe ni veiwere? 18Sa qai kaya, Oqo ga ka’u na kitaka; au na basuka na noqu lololo, ka tara tale eso e lelevu; au na qai binia kecega kina na noqu lewe ni veiwere kei na noqui yau: 19au na qai kaya ki na yaloqu, Yaloqu, sa levu na nomui yau sa bini tu ena rauta na yabaki e vuqa; mo vakacegu mada, mo kana, mo gunu, mo marau tiko. 20Ia sa kaya vei koya na Kalou, Ko iko na lialia! e na bogi ga oqo ena tarogi tale vei iko na yalomu: ena qai nei cei na veika ko sa vakarautaka? 21Sa vakakina ko koya sa daubinia nai yau me nona, a sa sega ni vutuniyau e na ka ni Kalou.
22Sa qai kaya ko koya vei ira na nona tisaipeli, O koya oqo ka’u sa kaya kina vei kemudou, Mo dou kakua ni lomaocaoca e na vuku ni nomudou bula, e na ka mo dou kania; se na vuku ni yagomudou, e na ka mo dou vakaisulu kina. 23Sa ka levu na bula, a ka lailai na kakana; ia sa ka levu na yago, a ka lailai nai sulu. 24Dou vakananuma na reveni: era sa sega ni kabukaburaki, se tatamusuki; sa sega na nodra vale ni yau se nodra lololo; ia sa vakani ira na Kalou: sa dina dou sa yaga vakalevu cake vei ira na manumanu! 25Ia ko cei vei kemudou kevaka sa lomaocaoca sa rawata me vakuria vakalailai ga na siga ni nona bula? 26Ia kevaka dou sa sega ni cakava rawa na ka lailai walega oqo, dou sa lomaocaoca e na ka sa vo e na vuku ni cava? 27Dou vakananuma na viavia, era sa tubu vakaevei: era sa sega ni daucakacaka, se dautalitali; ia ka’u sa kaya vei kemudou, Ko Solomoni e na nonai ukuuku kecega sa sega ni vakaisulu me vaka e dua vei ira oqo. 28Ia kevaka sa vakasuluma vakaoqo na Kalou na co sa tu edaidai e na veiwere, a sa biu ki na lovo e na sabogibogi: ena sega li ni vinakata vakalevu cake me vakasulumi kemudou, koi kemudou sa lailai na nomudou vakabauta?
29Ia dou kakua ni dauvakasaqara na ka mo dou kania, se na ka mo dou gunuva: me kakua talega ni veidreyaki na lomamudou. 30Ni ra sa dauvakasaqara na ka kecega oqo ko ira na lewe ni veivanua kecega e vuravura; ka sa kila na Tamamudou ni sa yaga vei kemudou na veika oqo. 31Ia mo dou dauvakasaqara ga na nona matanitu: ia ena soli me kenai kuri vei kemudou na ka kecega oqo.
32Kakua ni rere, na qele-ni-sipi lailai; ni sa vinakata sara na Tamamudou me solia vei kemudou na matanitu. 33Dou volitaka na ka sa tu vei kemudou, ka solia nai loloma; vakarautaka vei kemudou na taga-ni-lavo ena sega ni madra, ai yau mai lomalagi ena sega ni oti rawa, sa sega na daubutako sa torova, se na sarasara sa kania. 34Ni na tiko na yalomudou e na yasana sa tiko kina na nomudoui yau. 35Me vauci tikoga na tolomudou; me caudre talega na nomudou cina; 36ia mo dou vaka na tamata era waraka na nodra turaga, me na lako tale mai na magiti ni vakawati; me ra dolavi koya vakatotolo sara, ni sa lako mai ka tukituki ko koya. 37Sa kalougata ko ira na tamata oqori, ena kunei ira na turaga ni ra sa vakatawa tiko, ni sa lako mai ko koya: au sa kaya vakaidina vei kemudou, ena vauca na nonai sulu, ka kaya me ra tiko sobu, ka na lako mai ko koya ka qaravi ira. 38Ia kevaka ena lako mai ko koya e nai karua ni wase-ni-bogi, se na lako mai e nai katolu, ka kunei ira ni ra sa yadra tiko, era sa kalougata na tamata oqori. 39Ia dou kila ga oqo, kevaka e kila nai taukei ni vale na tiki-ni-bogi e lako mai kina na daubutako, sa vakatawa ga, ka sega ni laiva na nona vale me ravabasuki. 40Ia dou vakarau tu vakakina koi kemudou talega: ni sa lako mai na Luve ni tamata e na tiki-ni-siga dou sa sega ni nanuma kina.
41Sa qai kaya vua ko Pita, Kemuni na Turaga, ko ni sa tukuna beka na vosa vakatautauvata oqo vei keitou ga, se vei ira kecega? 42Sa kaya na Turaga, Ko cei beka na tamata yalododonu ka vuku, ena lesia na turaga me lewai ira na nona lewe-ni-vale, me solia na kedrai votavota e na gauna dodonu? 43Sa kalougata na tamata ko ya, ko koya ena kunea na nona turaga ni sa kitaka vakakina, ni sa lako mai ko koya. 44Au sa kaya vakaidina vei kemudou, Ena lesi koya me lewa na nona ka kecega. 45Ia kevaka ena kaya e lomana na tamata ko ya, Sa vakaberaberataka na nona lako tale mai na noqu turaga: a sa vakatekivu kina me yaviti ira na lewe-ni-vale na tagane kei na vada, me daukana talega ka daugunu, ka daumateni; 46ena lako mai na turaga ni tamata ko ya e na siga sa sega ni nanuma kina, kei na tiki-ni-siga e sega ni kila kina; ena qai varomusuka rua, ka lesi koya me votai vata kei ira sa sega ni vakabauta. 47Ia na tamata ko ya, sa kila na loma ni nona turaga, ka sega ni vakarau kina, se cakava me vaka na lomana, ena yaviti vakalevu. 48Ia ko koya sa sega ni kila, ka kitaka na ka e dodonu me yaviti kina; ena yaviti vakalailai ga. Ni na tarogi vakalevu mai vua sa soli vakalevu vua; ia ena taroga vakalevu ko ira na tamata mai vua era sa solia vakalevu vua.
49Au sa lako mai me’u biuta na bukawaqa ki vuravura; ia ka cava tale me’u gadreva, kevaka sa waqa tu? 50Ia sa dua na noqu papitaiso me’u papitaisotaki kina; a sa rarawa vakalevu na lomaqu me oti mada oqo! 51Dou sa vakasama beka ni’u sa lako mai me’u vakayacora na veivinakati ki vuravura? au sa kaya vei kemudou, E segai; a veisei ga: 52sa tekivu ena gauna oqo me lewe lima e na dua na vale eratou na veimecaki, na lewe tolu kei rau na lewe rua, na lewe rua talega kei iratou na lewe tolu. 53Era na veimecaki na veitamani-tagane; kei na veitinani-yalewa; kei na veivugoni yalewa.
54Sa kaya talega vei ira na lewe vuqa, Ni dou sa raica sa tubu mai ra na o, dou sa kaya sara, Sa dua na uca sa lako mai; a sa vakakina. 55Ia ni sa liwa na ceva, dou sa kaya, Ena dua na katakata levu: a sa yaco. 56Na dauveivakaisini! dou sa kila rawa na mata i vuravura kei lomalagi: ia ka vakaevei ni dou sa sega ni kila na gauna oqo?
57Ia ka vakaevei ni dou sa sega ni lewa vakai kemudou na ka e dodonu? 58Ni drau sa lako vata kaya sa beitaki iko ki na turaga-ni-lewa, mo gumatua e gau-ni-sala me oti mada na nona beitaki iko, de kauti iko vua na turaga-ni-lewa, ka soli iko na turaga-ni-lewa vua na ovisa, ka biuti iko na ovisa ki na vale ni veivesu. 59Au sa kaya vei iko, Ko na sega sara ni sereki maikina, ko na sauma kece mada nai lavo.
ಪ್ರಸ್ತುತ ಆಯ್ಕೆ ಮಾಡಲಾಗಿದೆ:
LUKE 12: FOV
Highlight
ಶೇರ್
ಕಾಪಿ
Want to have your highlights saved across all your devices? Sign up or sign in
Vakavakadewa Makawa (Fijian Old Version) © Bible Society of the South Pacific
