LUKE 14
14
Sa vakabula e dua sa tauvi mate ko Jisu, a sa vakarota na yalomalumalumu; a sa tukuna ni sa vaka e dua na magiti levu na lotu, 1—24. E vinaka me yalomatua ko ira na tisaipeli i Jisu, 25—33; me ra vakatovolea talega me ra yaga, 34,35.
1Ia ni sa lako tu ko koya ki na nona vale e dua sa turaga vei ira na Farisi me kana e na dua na siga ni vakacecegu, era sa vakaraici koya. 2Ka raica, sa tu e tikina e dua na tamata sa tauva na buketevatu. 3A sa vosa ko Jisu, vei ira na vu-ni-vunau kei ira na Farisi, ka vaka, E tara me ia na veivakabulai e na siga ni vakacecegu, se segai? 4A ra sa galu ga. A sa tauri koya ko koya, ka vakabula, ka vakatala yani; 5a sa vosa vei ira, ka kaya, Ko cei vei kemudou, kevaka e lutu ki na dua na davuke na nona asa se nona pulumokau, ena sega ni yavia cake vakatotolo e na siga ni vakacecegu? 6A ra sa sega ni vosa rawa tale vua e na ka oqo.
7A sa tukuna e dua na vosa vakatautauvata vei ira era sureti, ni sa raici ira ni ra sa digitaka nai tikotiko vakaturaga; a sa kaya vei ira, 8Ni sa sureti iko e dua ki na magiti ni vakawati, kakua ni tiko sobu e nai tikotiko vakaturaga: de sa uasivi cake vei iko e dua tani sa sureti mai; 9ka qai lako mai ko koya sa sureti kemudrau, ka kaya vei iko, Solia na tikina oqo vei koya oqo; ko na qai madua ni ko laki tiko e na tikina kira sara. 10Ia ni ko sa sureti, lako ka tiko sobu e na tikina kira sara; me kaya vei iko ko koya sa sureti iko, ni sa lako mai, Na wekaqu, lako mada ki cake: ko na qai dokai e na matadra era sa tiko vata kei iko me kana. 11Ia ko koya yadua sa vakalevulevui koya, ena vakamalumalumutaki; ia ko koya yadua sa vakamalumalumutaki koya, ena vakalevulevui.
12Sa kaya talega ko koya vua sa sureti koya, Ni ko sa cakava na magiti ni vakasigalevu sei vakayakavi, kakua ni sureti ira na wekamu dina, se na tuakamu se tacimu, se na kai nomu, se na nomu lewe ni koro e vutuniyau; de ra sureti iko tale, ko na qai saumi. 13Ia ni ko sa caka magiti, sureti ira na dravudravua, na lokiloki, na gera, na mataboko: 14ko na qai kalougata kina: ni ra sa sega ni sauma rawa vei iko: ia ko na saumi ni ra na tu cake tale mai na mate ko ira na yalododonu.
15Ia ni sa rogoca na veika oqo e dua vei ira sa tiko kaya me kana, sa kaya vua, Sa kalougata ko koya ena kana madrai e na matanitu ni Kalou.
16Sa qai kaya vua ko koya, Sa dua na tamata sa cakava e dua na magiti levu ni vakayakavi, a sa sureti ira na lewe vuqa: 17ia ni sa yaco na gauna me ia kina nai vakayakavi, sa tala na nona tamata me kaya vei ira era sureti, Dou lako mai; sa vakarau tu na ka kecega. 18Ia ko ira yadua era lomavata me ra dui vakadredreti ira. Sa kaya vua e dua, Au sa volia e dua na tiki ni vanua, ka sa dodonu me’u laki raica; au masuti iko kina, me’u kakua ni lako yani. 19A sa kaya e dua tani, Au sa volia e tini na pulumokau, ia ka’u sa lako me’u vakatovolei ira: au masuti iko kina, me’u kakua ni lako yani. 20Sa kaya e dua tale, Au sa qai vakawati, o koya ka’u sa sega kina ni lako yani. 21Sa qai lako mai na tamata ko ya, ka tukuna vua na nona turaga na veika oqo. Sa qai cudru nai taukei ni vale, a sa kaya vua na nona tamata, Lako sara ki tuba ki na veisalatu kei na veisaqata ni koro, ka kauti ira mai na dravudravua, kei na gera, kei na lokiloki, kei na mataboko. 22A sa mai kaya na tamata, Kemuni na Turaga, sa caka ga me vaka na nomuni vosa, ia sa vo na vale. 23A sa kaya na turaga vua na tamata, Lako ki na veisalatu, kei na veisala sa viribaiti, ka cikevi ira me ra lako mai, me oso na noqu vale: 24ni’u sa kaya vei kemudou, Sa sega e dua vei ira na tamata sa sureti ena tovolea na noqui vakayakavi.
25A sa lewe vuqa sara era sa lako vata kaya: a sa vuki ko koya, ka kaya vei ira, 26Kevaka e dua sa lako mai vei au ka sega ni cata na tamana, kei na tinana, kei na watina, kei ira na luvena, kei ira na tuakana kei na tacina, kei ira na ganena kei na nona bula talega, ena sega ni rawa me noqu tisaipeli. 27Ia ko koya talega ena sega ni colata na nona kauveilatai, ka muri au, sa sega ni rawa me noqu tisaipeli.
28Ia ko cei vei kemudou, kevaka sa via tara vale, ena sega ni tiko sobu mada eliu, me wilika na kenai voli, se tu vua nai yau me vakaotia se segai? 29de viritaka ga ko koya na kena yavu, ka qai sega ni rawata me vakaotia, era na qai vakalialiai koya ko ira kecega era sa raica, 30ka kaya, A tamata oqo sa vakatekivu me tara vale, ia ka sega ni rawata me vakaotia.
31Se ko cei na tui, sa lako tu me rau veivala kaya e dua tani na tui, ka sega ni tiko sobu mada eliu, ka vakananuma, se sa rawata me veivala kaya sa le ruasagavulu na udolu na nei koya na meca, ni sa le tini ga na udolu na nona, se segai? 32se, ni sa yawa sara ko koya oqori, sa tala ko koya na mata, me vakamasuta me rau veisorosorovi. 33Sa vakakina, ko koya yadua vei kemudou sa sega ni biuta na nona ka kecega, sa sega ni rawa me noqu tisaipeli.
34A ka vinaka na masima: ia kevaka sa seavu mai na masima na kena tuituina, ena vakatuituinataki tale e na cava? 35Sa qai sega ni yaga ki na were, se ki nai binibini de-ni-manumanu; sa biu ga ki tautuba. O koya sa vakadaligana me rogoca, me mani rogoca sara.
ಪ್ರಸ್ತುತ ಆಯ್ಕೆ ಮಾಡಲಾಗಿದೆ:
LUKE 14: FOV
Highlight
ಶೇರ್
ಕಾಪಿ
Want to have your highlights saved across all your devices? Sign up or sign in
Vakavakadewa Makawa (Fijian Old Version) © Bible Society of the South Pacific
