Yôhan 13
13
Lĕ nau Brah Yêsu nti nglĕ dŭt
(13:1 – 17:26)
Brah Yêsu rao jâng ma phung oh mon
1Êlor rƀŭn Nau Găn, Brah Yêsu gĭt tât jêh mông ăn Păng du luh bơh neh ntu aơ gay plơ̆ sĭt ta Mbơ̆. Păng rŏng ma phung bunuyh jêng phung Păng nơm tâm neh ntu jêh ri rŏng ma khân păng tât lôch.
2Dôl mông sa kêng măng, brah mhĭk hŏ srih nau mĭn tâm rlăng ma Păng tâm nuih n'hâm Y-Yuđas Iskariôt, kon Y-Simôn. 3Brah Yêsu gĭt jêh Mbơ̆ ăn lĕ rngôch ndơ tâm ti Păng, jêh ri Păng văch tă bơh Brah Ndu, jêh ri bơi plơ̆ sĭt đŏng ma Brah Ndu, 4yor ri Păng dâk tă bơh sưng sông, doh ao padih, sŏk bok kât ta bŭt Păng, 5jêh nây Păng nkhŭt dak ta ngan grưng, jêh ri ntơm rao jâng ma phung oh mon. Păng sŏk bok kât ta bŭt gay jut jâng khân păng. 6Nôk Brah Yêsu văch ta Y-Simôn Pêtrôs, păng lah: “Hơi Kôranh Brah, mâm Kôranh Brah ŭch rao jâng gâp?” 7Brah Yêsu lah: “Aƀaơ, may ê hŏ gĭt rbăng ôh nau Gâp ƀư, ƀiălah nar kăndơ̆ may mra gĭt rbăng.” 8Y-Pêtrôs ơh: “Gâp mâu janh ăn Kôranh rao jâng gâp ôh!” Brah Yêsu lah: “Lah Gâp mâu rao jâng may, may mâu geh du kô̆ tâm Gâp ôh.” 9Y-Pêtrôs lah: “Hơi Kôranh Brah, lơi rao knŏng jâng dơm, ƀiălah rao ti nđâp ma bôk gâp đŏng.” 10Brah Yêsu lah: “Bunuyh hŏ ŭm jêh, knŏng rao jâng păng dơm ri mơ kloh lĕ rngôch. Khân may hŏ kloh jêh, ƀiălah mâu geh lĕ rngôch ôh.” 11Yorlah Păng gĭt jêh mbu nơm mra rlăng ma Păng, yor ri Brah Yêsu lah: “Mâu di lĕ rngôch khân may jêng kloh da dê ôh.”
12Jêh Brah Yêsu rao jâng phung oh mon, Păng nsoh ao, gŭ tay ta sưng nây jêh ri lah: “Khân may gĭt rbăng lĕ mâm nau Gâp ƀư jêh ma khân may?#Luk 22:27. 13Khân may kuăl Gâp jêng Nơm Nti, jêng Kôranh Brah. Khân may lah di ngăn, yorlah nanê̆ ngăn Gâp jêng tâm ban pônây. 14Ƀiălah, lah Gâp jêng Nơm Nti, jêng Kôranh Brah, hŏ rao jêh jâng khân may, pôri khân may tâm ban lĕ hăn rao hom jâng ndrăng khân may nơm. 15Yorlah Gâp hŏ ƀư leo trong jêh ma khân may, gay khân may ƀư tĭng nâm Gâp ƀư jêh ma khân may nây. 16Nanê̆, Gâp lah ngăn ma khân may: Oh mon mâu toyh lơn ma kôranh ôh, phung mbơh mâu lĕ toyh lơn ma nơm njuăl păng nơm.#Mat 10:24; Luk 6:40; Yôh 15:20. 17Lah khân may gĭt lĕ nau nây jêh ri ƀư tĭng nau nây, khân may geh nau ueh maak ngăn. 18Gâp mâu ngơi ma lĕ rngôch khân may ôh, Gâp gĭt năl đơ phung Gâp săch jêh. Ƀiălah nau ngơi tâm Nau Brah Ndu Ngơi aơ tât di ngăn: ‘Nơm sa ƀănh bơh Gâp, yơk jêh ndơl jâng tâm rdâng đah Gâp.’#Mprơ Ơm 41:9. 19Aƀaơ aơ, Gâp mbơh nau nây ma khân may êlor ma tât, gay ma nôk nau nây tât ngăn, khân may chroh ma Gâp jêng Nơm N'ho Ro. 20Nanê̆, Gâp lah ngăn ma khân may, mbu nơm rom bunuyh Gâp njuăl, jêng păng rom Gâp tâm ban lĕ; jêh ri mbu nơm rom Gâp, nâm bu ntĭt rom Nơm hŏ njuăl Gâp văch.”#Mat 10:40; Mark 9:37; Luk 9:48; 10:16.
Brah Yêsu mbơh lor ma nau Yuđa ƀư rlăng
(Mathiơ 26:20-25; Markôs 14:17-21; Luka 22:21-23)
21Jêh Brah Yêsu lah nau nây, Păng geh nau rngot tâm huêng jêh ri mbơh nau nây: “Nanê̆, Gâp lah ngăn ma khân may, du huê tâm phung khân may mra ƀư rlăng đah Gâp.” 22Phung oh mon tâm uănh ndrăng nơm, mâu gĭt ôh ma mbu nơm Păng lah nây. 23Ta nây geh du huê oh mon, jêng nơm Brah Yêsu rŏng, bôk nsing ta ntang ntơh Brah Yêsu. 24Y-Simôn Pêtrôs nchŏng ma ti ma oh mon nây gay ôp ma Brah Yêsu mbu nơm Păng ŭch lah nây. 25Oh mon nây bôk nsing ta ntang ntơh Brah Yêsu jêh ri ôp: “Hơi Kôranh, mbu moh nây mih?” 26Brah Yêsu plơ̆ lah: “Nây jêng nơm Gâp mra ăn piăng let Gâp dăch mbŭk aơ.” Jêh nây Păng mbŭk du mlâm piăng let jêh ri ăn ma Y-Yuđas Iskariôt, kon Y-Simôn. 27Jêh Y-Yuđas dơn piăng let nây, Satan lăp tâm păng ro. Brah Yêsu đă ma Y-Yuđas: “Moh nau may ƀư, ƀư gơnh hom.” 28Ƀiălah mâu geh du huê gŭ ta sưng sa nây gĭt rbăng ôh mâm Păng lah đah nơm nây. 29Ƀaƀă nđôn lah, yor Y-Yuđas djôt dŭng prăk, Brah Yêsu ŭch đă păng hăn rvăt ndơ ma phung he dŏng tâm năng rƀŭn, mâu lah Păng đă hăn pă ndơ ma phung o ach. 30Nôk Y-Yuđas hŏ dơn piăng let nây, păng luh du ro. Nôk nây hŏ măng jêh.
Nau vay ntăm mhe
31Jêh Y-Yuđas luh du, Brah Yêsu lah: “Aƀaơ Kon Bunuyh geh nau tâm rnê, jêh ri Brah Ndu geh nau tâm rnê tâm Kon Bunuyh. 32Lah Brah Ndu geh nau tâm rnê ta Kon Bunuyh, Brah ndu mra tâm rnê đŏng Kon Bunuyh tâm Păng nơm, jêh ri mra tâm rnê ro. 33Hơi phung kon jê̆, Gâp mâu hôm gŭ ndrel ma khân may jŏ jong ôh. Khân may mra joi Gâp, jêh ri tâm ban Gâp lah jêh ma phung Yuđa: ‘Ta ntŭk Gâp hăn khân may mâu dơi hăn ôh,’ pôri aƀaơ Gâp lah ma khân may tâm ban lĕ.#Yôh 7:34. 34Gâp ăn nau vay mhe ntăm ma khân may, ăn khân may tâm rŏng ndrăng khân may nơm. Tâm ban ma Gâp rŏng jêh ma khân may, ăn khân may tâm rŏng ndrăng khân may nơm tâm ban lĕ.#Yôh 15:12,17; I Yôh 3:23; II Yôh 5. 35Lah khân may tâm rŏng ndrăng khân may nơm, yor ri, lĕ rngôch bunuyh mra gĭt khân may jêng oh mon Gâp.”
36Y-Simôn Pêtrôs ơh: “Ơ Kôranh Brah, ntŭk May hăn?” Brah Yêsu plơ̆ lah: “Ta ntŭk Gâp hăn, aƀaơ may mâu dơi tĭng gâp ôh, ƀiălah nar kăndơ̆ may mra tĭng.” 37Y-Pêtrôs ơh: “Ơ Kôranh Brah, mâm ƀư gâp mâu dơi tĭng may aƀaơ? Gâp mra nhhơr ăn nau rêh gâp nơm ma May.” 38Brah Yêsu plơ̆ lah: “May mra nhhơr ăn nau rêh may nơm ma Gâp hĕ? Nanê̆, Gâp lah ngăn ma may: Êlor iăr ndrau, may mra dun Gâp pe tơ̆!”
ಪ್ರಸ್ತುತ ಆಯ್ಕೆ ಮಾಡಲಾಗಿದೆ:
Yôhan 13: CMO2023
Highlight
ಶೇರ್
ಕಾಪಿ
Want to have your highlights saved across all your devices? Sign up or sign in
© 2023 United Bible Societies. All rights reserved.
