Yôhan 12
12
Brah Yêsu dơn nau tŏ dak ƀâu kah ta ƀon Bêthani
(Mathiơ 26:6-13; Markôs 14:3-9)
1Prao nar êlor ma rƀŭn Nau Găn, Brah Yêsu hăn ta ƀon Bêthani jêng ntŭk Y-Lasar gŭ, bunuyh Păng hŏ ƀư ăn dâk rêh tay tă bơh nau khĭt. 2Khân păng nkra ndơ sông sa ma Brah Yêsu ta nây. H'Mathê pah kan, Y-Lasar jêng du huê tâm phung bunuyh gŭ sông sa ndrel ma Păng. 3H'Mari sŏk du kilô#12:3 Du njing Rôm jâk klăp lah 326gram. dak ƀâu kah mâu geh rlŭk khlay ngăn tŏ ta jâng Brah Yêsu, jêh nây păng jut jâng Brah Yêsu ma sŏk Păng. N'hôl dak ƀâu kah lam lĕ rngôch ngih nây.#Luk 7:37-38. 4Ƀiălah du huê tâm phung oh mon Brah Yêsu jêng Y-Yuđas Iskariôt, nơm pakơi aơ ƀư rlăng ma Păng, lah pô aơ: 5“Mpa mâu tăch dak ƀâu kah nây, sŏk pe rhiăng đơniê jêh ri tâm pă ma phung o ach?” 6Y-Yuđas lah kơt nây mâu di yor păng yô̆ ma phung o ach ôh, ƀiălah yor păng jêng du huê nơm ntŭng, păng djôt dŭng prăk, rĭ dĭng păng vay mơng sŏk ntŭng prăk bu nklăch tâm nây. 7Ƀiălah Brah Yêsu lah: “Lơi dĭng rkhŭk păng, yorlah păng hŏ nkrem dak ƀâu kah aơ ma nar bu tâp Gâp. 8Khân may geh bunuyh o ach gŭ ndrel ma khân may ƀaƀơ, Ƀiălah khân may mâu hôm geh Gâp ƀaƀơ ôh.”#Nkah 15:11.
9Âk phung Yuđa gĭt Brah Yêsu gŭ ta nây, khân păng hăn ta Păng, mâu knŏng ŭch uănh Păng ôh, ƀiălah ŭch uănh Y-Lasar, jêng nơm Păng ăn dâk rêh tay tă bơh nau khĭt. 10Pôri phung kôranh ƀư brah toyh tâm chră ŭch nkhĭt Y-Lasar đŏng, 11yor tă Y-Lasar, âk phung Yuđa chalơi khân păng jêh ri chroh ma Brah Yêsu.
Brah Yêsu lăp ƀon Yêrusalem
(Mathiơ 21:1-11; Markôs 11:1-11; Luka 19:28-40)
12Kah nar ôi taơ, geh âk ngăn bunuyh râng nau rƀŭn. Nôk khân păng tăng bu lah geh Brah Yêsu hăn tât ta ƀon Yêrusalem 13pôri khân păng sŏk n'gĭng tơm jŏk, hăn vơt Brah Yêsu jêh ri nter lah: “Hôsana! Ueh maak ngăn ma Nơm văch ma amoh Kôranh Brah, jêng Hađăch phung Israel.”#Mprơ Ơm 118:26. 14Brah Yêsu mâp du mlâm kon seh bri jêh ri păng ncho ta klơ, tĭng nâm nau bu hŏ nchih jêh:
15“Hơi kon bu ur ƀon Siôn, lơi klach ôh!
Ri, uănh hađăch ay văch, Păng ncho kon seh bri!”#Sak 9:9.
16Bơh ntơm saơm dơh, phung oh mon mâu gĭt rbăng ôh nau nây, ƀiălah jêh Brah Yêsu hŏ dơn nau tâm rnê, nôk nây khân păng kah gĭt tay lĕ nau bu nchih ma Păng jêh ri nau bu hŏ ƀư ma Păng. 17Phung ƀon lan gŭ ndrel ma Brah Yêsu dôl Păng kuăl Y-Lasar luh bơh môch, jêh ri ƀư ma păng dâk rêh tay tă bơh nau khĭt, khân păng mbơh nkoch ma Brah Yêsu da dê. 18Yor nĕ phung ƀon lan hăn chuă vơt Brah Yêsu, yorlah khân păng tăng Păng ƀư nau mbên khlay nây. 19Yor nây, phung Pharisi tâm lah ndrăng khân păng: “Khân may saơ ƀơh, khân may mâu dơi ƀư du ntil nau. Uănh hom, lĕ rngôch phung ƀon lan tĭng păng da dê.”
Phung Grek hăn joi Brah Yêsu
20Nôk nây, tâm phung hăn yơk mbah tâm nar rƀŭn, geh ƀaƀă phung Grek. 21Khân păng hăn ta Y-Philip, bunuyh gŭ ta ƀon Ƀêtsaiđa tâm n'gor Galilê, khân păng lah: “Hơi Kôranh, hên ŭch mâp Brah Yêsu.” 22Y-Philip hăn mbơh ma Y-Andrê; jêh nây Y-Andrê n'hanh Y-Philip lah ma Brah Yêsu. 23Brah Yêsu lah: “Mông lĕ tât jêh, Kon Bunuyh mra geh nau tâm rnê. 24Nanê̆, Gâp lah ngăn ma khân may: Lah du ntil găr ba ƀlê srih ta neh mâu khĭt, păng hôm e du găr nây lĕ; ƀiălah lah păng khĭt, păng geh play âk ngăn. 25Mbu nơm rŏng nau rêh păng nơm mra roh, jêh ri mbu nơm tâm rmot nau rêh păng nơm tâm rnôk aơ mra prăp tay păng ma nau rêh n'ho ro.#Mat 10:39; 16:25; Mark 8:35; Luk 9:24; 17:33. 26Tơlah mbu nơm pah kan ma Gâp păng tĭng Gâp; jêh ri ta ntŭk Gâp gŭ, bunuyh pah kan ma Gâp ăt mra gŭ ta nây lĕ. Tơlah mbu nơm pah kan ma Gâp, Mbơ̆ Gâp mra yơk ma păng.
27Huêng Gâp aƀaơ geh nau uh ah ngăn. Mâm Gâp mra lah? ‘Ơ Mbơ̆, mông aơ dăn may rklaih Gâp! Ƀiălah yor tâm mông aơ Gâp hŏ văch. 28Ơ Mbơ̆, tâm rnê hom ma amoh May.’” Nôk nĕ geh bâr ngơi tă bơh trôk lah: “Gâp hŏ geh nau mât ton jêh, Gâp mra geh tay nau tâm rnê đŏng!” 29Phung gŭ dăch ta nây tăng nau ngơi nây, khân păng lah: “Ri jêng nteh n'gôr nglaih”. Ƀaƀă đŏng lah: “Nây jêng du tông mpăr ngơi đah Păng.” 30Brah Yêsu lah: “Mâu di yor Gâp ôh Păng ăn tăng bâr nteh aơ, ƀiălah yor ăn ma khân may. 31Aƀaơ aơ jêng nôk phat dôih neh ntu, jêh ri bu mra nsot lơi kôranh chiă uănh neh ntu aơ. 32Bi ma Gâp, lah bu yông Gâp klơ neh aơ, Gâp mra leo lĕ rngôch bunuyh văch ta Gâp da dê.” 33Brah Yêsu lah nau aơ ŭch tâm mpơl mâm nau Păng mra khĭt. 34Phung âk nây lah: “Hên hŏ tăng jêh tâm nau vay lah ma Brah Krist hôm gŭ ƀaƀơ n'ho ro. Mâm ƀư May lah, bu mra yông Kon Bunuyh ta klơ? Lah ndrĭ mbu nơm Kon Bunuyh nây?”#Mprơ Ơm 110:4; Êsai 9:6; Êsê 37:25; Dan 7:14. 35Brah Yêsu lah: “Nau ang hôm gŭ ndrel khân may ƀât lât dơm. Hăn hom dôl khân may hôm geh nau ang, klach nau ngo ƀât lât nkŭm khân may. Mbu nơm hăn tâm nau ngo păng mâu gĭt ôh mbah ntŭk păng hăn. 36Dôl hôm geh nau ang, chroh hom ma nau ang nây, gay khân may mra jêng kon nau ang.”
Jêh Brah Yêsu lah nau nây, Păng hăn du krap bơh khân păng.
Nau phung Yuđa mâu chroh
37Nđâp tơlah Brah Yêsu hŏ ƀư âk nau khlay tanăp khân păng kđôi lĕ, ƀiălah khân păng ăt mâu chroh lĕ ma Brah Yêsu, 38gay nau nơm mbơh lor Y-Êsai hŏ lah dơi tât di ngăn jêh:
“Ơ Kôranh Brah, mbu chroh jêh nau hên mbơh nkoch,
Jêh ri ti Kôranh Brah mpơl ma mbu nơm?” #Êsai 53:1.
39Yor ri, khân păng mâu dơi chroh, yorlah Y-Êsai hŏ lah đŏng:
40“Brah Yêsu ƀư ăn măt khân păng chieh,
Nuih n'hâm khân păng dăng,
Klach lah măt khân păng dơi saơ,
Nuih n'hâm khân păng gĭt rbăng jêh ri rmal nau tih,
Gay ma Gâp ƀư bah khân păng.”#Êsai 6:10.
41Y-Êsai lah nau aơ, yorlah hŏ saơ nau chrêk rmah Brah Yêsu jêh ri lah ma Păng. 42Nđâp lah kơt nĕ, geh âk bunuyh tâm phung kôranh chiă uănh chroh ma Brah Yêsu, ƀiălah yor phung Pharisi, khân păng mâu nănh mbơh dơn ma Brah Yêsu ôh, yor klach bu mprơh khân păng luh bơh ngih rƀŭn. 43Yorlah khân păng ŭch nau chrêk rmah kon bunuyh rlau lơn nau chrêk rmah Brah Ndu.
44Brah Yêsu mbơh pô aơ: “Mbu nơm chroh ma Gâp, mâu geh lah păng chroh ma Gâp ôh, ƀiălah păng chroh ma Nơm tơm hŏ njuăl Gâp văch. 45Mbu nơm saơ Gâp, păng mra saơ Nơm tơm hŏ njuăl Gâp jêh. 46Gâp jêng nau ang hŏ văch jêh ta neh ntu, gay mbu nơm chroh ma Gâp mâu gŭ tâm nau ngo đŏng ôh. 47Tơlah mbu nơm tăng nau Gâp nti lah, ƀiălah mâu djôt prăp ôh, mâu di Gâp ôh phat dôih păng. Yorlah Gâp văch mâu gay phat dôih neh ntu ôh, ƀiălah gay tâm rklaih neh ntu. 48Mbu nơm dun Gâp, mâu sŏk dơn ôh nau Gâp nti lah, hŏ geh jêh Nơm phat dôih păng; nau Gâp nti lah mra phat dôih păng ta nar nglĕ dŭt. 49Gâp mâu ngơi tĭng nau gâp nơm ŭch ôh, ƀiălah Mbơ̆ Gâp jêng Nơm tơm njuăl Gâp văch ntăm jêh ma Gâp moh nau Gâp mra lah jêh ri mbơh. 50Gâp gĭt jêh nau Mbơ̆ ntăm nây jêng nau rêh ƀaƀơ n'ho ro. Pôri lĕ nau Gâp lah, Gâp lah tĭng nau Mbơ̆ hŏ ntăm jêh.”
ಪ್ರಸ್ತುತ ಆಯ್ಕೆ ಮಾಡಲಾಗಿದೆ:
Yôhan 12: CMO2023
Highlight
ಶೇರ್
ಕಾಪಿ
Want to have your highlights saved across all your devices? Sign up or sign in
© 2023 United Bible Societies. All rights reserved.
