Luka 3
3
Dioni Baparaisi alina angele waloaisaya ei
(Madiu 3:1-12; Maka 1:1-8; Dioni 1:19-28)
1Rana menda Sisa Daipiriasi nipuri kalu ali ara nipumi andasu raayo andere-ainyaloma Gode nipumi Sakaraya nipuna naki Dioni para angele lisaya. Sisa nipuna andere-aisaya ei kuni gipa ki laapo pereyoma angena malapu pereyoma go angena supu kuni gipa meala-ainyaloma go aunu pisaya. Go dinare ali menda nipuna bi Pondiasi Pailadi nipuri Sisa Daipiriasi nipuna kou nane ara mo Diudia andasu andere-aisaya. Go naarena Erodi pange nipu Sisa nipuna kou nane ara Galili andasu wenaalinu andere-aisaya. Gupuma Pilipi pange Sisa nipuna kou nane ara mo nipumi Iduria pange Darakenaidisi andasu laapo andere-aisaya. Pilipi nipuri Erodi nipuna ame aisaya. Go dinare Laisiniasi nipumi Sisa nipuna kou nane ara mo Apiliani andasu wenaalinu para andere-aisaya. 2Go dinare Anasi pange Kayapasi niipu laapore Gode repara alinau puaisimiya alinuna kalu ali laapo aisipiya. Go dinare ande Dioniri mo wenaalinu na-ae weambi pi su kapulea lena epa ainyare Gode nipumi Dioni para angele la alisaya. 3Go einare Dioni nipumi mo Diodani ipa ree nane ari paisaya andasu raayo para Godena angele la eiri pamuala ara lalore, Wenaalinuo, nimi raayome nimina ambalana ao-paluaeme rupa pange nimina konenu perekeyo suma baparaisi au pipape, lisaya. Go aunu ora pilimindare gore Godeme nimina pa aunu raayosi Gode nipumi kone na-wilia, lisaya. 4Go eiri Dioni nipumi ambala ririna Godena poropedi ali nipuna biri Aisaya nipumi ramayona wape pisaya ei yarepema la alalo ara lalore, gupi lisaya.
Mendame wenaalinu na-ao-palia lena ara
gurupa wi lisaya. Realina pora epealepape, da,
lea, lisaya.
Nipu epe rupa epenayanda nipuna pora wamo puma
ma-rendepoyao epealepape,
loma wi da, lea, lisaya.
5Gupumare su palunu raayosi su pamboma
ma-rumbialepape, da, lea, lisaya.
Mo su rundunu wakilia einu pange mo andaa kana
rumunu wakima raida wia einu raayosi awo
ao-rumbiaoma mendaapu rumbenadapape,
da, lea, lisaya.
Gupula ara mo poranu koi koi pea einu pange
ora epe rupa rendepona ma-epeada ara
mo kananumi porana wakilia einu pange
ora epe rupa wamo puma ma-epealepape,
da, lea, lisaya.
6Go einare wenaalinu raayome Godena
rambamea ei andeleme, da, loma lea, lisaya.
7Go dinare wenaalinu waru andapu Dioni nipumi nimu para baparaisi au painyaya nimu raayosi ipisimiya. Gupisimiyanda Dioni nipumi go wenaali para lala ara lalore, Nimiri koae keronu, nimiri Godeme repara rapaluame pia rendaa pia eiri mandana wanduaoma pongola peleme piri apimi la giapae, lisaya. 8Go einare nimina koae aunu ora gialimindare gore nimina ambala aunu ora giaoma aeme alinu alepape, lisaya. Gupuma nimimi lalore, Eparame nipuri naana kasua aya, loaemepare Gode nipuna rendaa pula pea ei nimi para epeleandare nimi go angele loaeme eimi pongola pelema kone na-sialepape, lisaya. Pangalepa. Godeme go kananu muma Eparame nipuna mandu rangala pae wenaalinu mandana waruapeya, lisaya. 9Go einare Godeme mo gapi muma repananu nimuna pida para poainyayanda ambala aya. Mo repana menda para rindi luma epe kili na-edeandare gapimi runguluma repana lengaa para kidia, lisaya.
10Go angelenu pangoma mo wenaalinumi Dioni para angaa meala ara lalore, Gore naamere ake au pilimayapae, lisimiya.
11Dioni nipumi nimuna angele yango liada ara lalore, Ali mendame nipuna aka laapo wiliandare gore mendare mo aka diale narali ali para alape, lisaya. Gupuma pange enda nape ei wiliandare gore enda diale narali wenaalinu go para alimindare neeme nena endanu rali puma alape, lisaya.
12Go dina mo dakisi muni muaisimiya alinu mendapare Dioni nipumi nimu baparaisi au painya, kone suma ipisimiya. Nimumi Dioni para epa angele angaa meala ara lalore, Waloae alio, naamere ake au pumonoyapae, loma angaa misimiya.
13Go einare Dioni nipumi mo alinu para lalore, Nimimi mo wenaalinuna dakisi muni milimindare gore rombo wi rupa wanduaoma na-mipape, lisaya.
14Go angelenu ambala loma ainya mo yanda puae alinu menda parame epa angele angaa meala ara lalore, Naame pange ake au ora pumonoyapae, lisimiya. Go einare Dioni nipumi mo yanda puae alinu para lalore, Menda repara muni pa ralu lopaoma na-mipape. Gupuma pange wenaalimi na-pi aunu ma-ria ria puma yaya angele pangoma muni na-mu pipape, lisaya. Gupumare nimimi pupudengi nademenda gidame yangiri anana gidame kone sialepape, lisaya.
15Mo wenaalimi go lisaya ei pangomare nimuna pu para ayale rekisaya eimiri nimumi kone yaya siala arare Dioni nipuri ande Mesayayapae, kone wisimiya. 16Go eina Dionimi nimuna angele yango liada ara lalore, Neme nimiri ipame baparaisi au pao-ayopare ali menda werepe ipula aliri ora puri waru paleapare niri dia. Niri nipu rapu manda meape-na-ya. Gupuma nipuna ange anda ridipea kope ambuna neme kepeape ana na-pea. Nipumiri nimiri Yaakopi Sipiridi para ralae repana laapome baparaisi au palia, lisaya. 17Ande e mapu puae alimi kuniga nape mealo ara li rumbuaya rupa mandare nipumi wenaali raayo koae wenaali angalapuna epe wenaali rumada ara rali pilia. Enda suae anda para kuniganu mandu wi da rupa mandare epe wenaaliri epeni andasu para epe rupa karu alia. Gupuma ande kuniga linu muma repana para kida rupa mandare koae wenaalinuri repana roae para muma kidia.
18Gupula ara Dionimi mo wenaalinu nimuna pu konenu lekeyada aunu pinyaya Godena epe angelenu ora epe rupa lala eiri pamuala ara wenaali para rando rando lo kongeya eiri pamisaya. 19Go peapare Dionimi Erodi gapamani ali repara la yokala ara lalore, Neere koae aunu pele ae, loaisaya. Akepeare nipuna amena were Erodiasi wala nipuna lamu pange nipumi repana ree waru yoka eiri pamuala ara mendana alenu pa ralu lopao mea eiri pamisaya. 20Go einare Erodi nipumi Dioni dipula ma-lopaisaya eimiri mo Erodi nipuna ambala pisaya koae aunu raayosi go eimi lu angulaisaya.
Dionimi Yesu baparaisi au paisaya ei
(Madiu 3:13-17; Maka 1:9-11)
21-22Gupuma Dioni nipumi wenaalinu raayosi baparaisi au paomare werepe nane Dioni nipumi Yesu pange baparaisi au paisaya. Gupuma Yesumi yainya pula-ainyaloma so Gode nipuna aya naneyame wapeminyamboma mo Yaakopi Sipiridiri yaa malipu manda kolopenyaoma Yesuna dona epa kolopelisaya. Go dina Gode nipumi so yaa mandaa nane ara angele lainyada ara lalore, Neere ora nina raname ora waru komea Naki ae, lisaya. Gupuma nina pumi nee para raname waru komaloae, lisaya.
Yesuna aya kasuanuna binu go ei
(Madiu 1:1-17)
23Yesu nipuna kuni gipare pa marea, ali ria komea pereyoma ki laapopu misayandare angele kini pu wala eiri pamuaisaya pange one mone aunu pisaya. Nipuri ande nakiyandare Diosepana ae kone wisimiya. Diosepa nipuri Keli nipuna naki aisaya. 24Keli nipuri Madiadi nipuna naki aisaya. Madiadi nipuri Lipai nipuna naki aisaya. Lipai nipuri Meleki nipuna naki aisaya. Meleki nipuri Dianai nipuna naki aisaya. Dianai nipuri Diosepa nipuna naki aisaya. 25Diosepa nipuri Madadayasi nipuna naki aisaya. Madadayasi nipuri Emosi nipuna naki aisaya. Emosi nipuri Nakume nipuna naki aisaya. Nakume nipuri Eseli nipuna naki aisaya. Eseli nipuri Nakai nipuna naki aisaya. 26Nakai nipuri Makada nipuna naki aisaya. Makada nipuri Madadayasi nipuna naki aisaya. Madadayasi nipuri Semeini nipuna naki aisaya. Semeini nipuri Dioseke nipuna naki aisaya. Dioseke nipuri Dioda nipuna naki aisaya. 27Dioda nipuri Dionani nipuna naki aisaya. Dionani nipuri Resa nipuna naki aisaya. Resa nipuri Serapapele nipuna naki aisaya. Serapapele nipuri Sielediele nipuna naki aisaya. Sielediele nipuri Neri nipuna naki aisaya. 28Neri nipuri Meleki nipuna naki aisaya. Meleki nipuri Adi nipuna naki aisaya. Adi nipuri Kosame nipuna naki aisaya. Kosame nipuri Elemadame nipuna naki aisaya. Elemadame nipuri Era nipuna naki aisaya. 29Era nipuri Diosua nipuna naki aisaya. Diosua nipuri Eliesa nipuna naki aisaya. Eliesa nipuri Diorime nipuna naki aisaya. Diorime nipuri Madiadi nipuna naki aisaya. Madiadi nipuri Lipai nipuna naki aisaya. 30Lipai nipuri Simioni nipuna naki aisaya. Simioni nipuri Diuda nipuna naki aisaya. Diuda nipuri Diosepa nipuna naki aisaya. Diosepa nipuri Dioname nipuna naki aisaya. Dioname nipuri Elayakeme nipuna naki aisaya. 31Elayakeme nipuri Melea nipuna naki aisaya. Melea nipuri Menea nipuna naki aisaya. Menea nipuri Madadia nipuna naki aisaya. Madadia nipuri Nadani nipuna naki aisaya. Nadani nipuri Deipidi nipuna naki aisaya. Deipidi nipuri Diesi nipuna naki aisaya. 32Diesi nipuri Opede nipuna naki aisaya. Opede nipuri Boasi nipuna naki aisaya. Boasi nipuri Salamono nipuna naki aisaya. Salamono nipuri Nasoni nipuna naki aisaya. 33Nasoni nipuri Aminadapa nipuna naki aisaya. Aminadapa nipuri Adamina nipuna naki aisaya. Adamina nipuri Ani nipuna naki aisaya. Ani nipuri Kesaroni nipuna naki aisaya. Kesaroni nipuri Peresi nipuna naki aisaya. Peresi nipuri Diuda nipuna naki aisaya. 34Diuda nipuri Dieikopo nipuna naki aisaya. Dieikopo nipuri Aisake nipuna naki aisaya. Aisake nipuri Eparame nipuna naki aisaya. Eparame nipuri Rera nipuna naki aisaya. Rera nipuri Nako nipuna naki aisaya. 35Nako nipuri Serake nipuna naki aisaya. Serake nipuri Riyu nipuna naki aisaya. Riyu nipuri Peleke nipuna naki aisaya. Peleke nipuri Epera nipuna naki aisaya. Epera nipuri Sila nipuna naki aisaya. 36Sila nipuri Kaenani nipuna naki aisaya. Kaenani nipuri Apakisadi nipuna naki aisaya. Apakisadi nipuri Seme nipuna naki aisaya. Seme nipuri Noa nipuna naki aisaya. Noa nipuri Lameke nipuna naki aisaya. 37Lameke nipuri Mediusela nipuna naki aisaya. Mediusela nipuri Inoko nipuna naki aisaya. Inoko nipuri Diaredi nipuna naki aisaya. Diaredi nipuri Makalalele nipuna naki aisaya. Makalalele nipuri Kenane nipuna naki aisaya. 38Kenane nipuri Inosi nipuna naki aisaya. Inosi nipuri Sede nipuna naki aisaya. Sede nipuri Edeme nipuna naki aisaya. Edeme nipuri Gode nipuna naki aisaya.
ಪ್ರಸ್ತುತ ಆಯ್ಕೆ ಮಾಡಲಾಗಿದೆ:
Luka 3: POLENT23
Highlight
ಶೇರ್
ಕಾಪಿ
Want to have your highlights saved across all your devices? Sign up or sign in
The New Testament in Pole Language of the Southern Highlands. Revised Edition 2023 © Bible Society of Papua New Guinea, 2023.
The New Testament in Pole Language of the Southern Highlands © Bible Society of Papua New Guinea, 1993.
