Luka 2
2
Mearimi Yesu mandisaya ei
(Madiu 1:18-25)
1Go naarena Sisa Okasadasi nipumi rudule angele gurupa la sialore, Wenaali raayosi nimina bi wia lena puma nimina bi pua sialepape, lisaya. 2Go dina Sairiniasi nipu Siria andasuna gapamani kalu ali ainyaloma go para ririna bi raayo misimiya. 3Go einare wenaali raayo nimuna ree andasu rando rando para bi siala pinyaya paisimiya.
4Diosepa nipuri kini Deipidina anda repaa ali aisayandare Galili andasu rupara ree andare nipuna bi Nasarere minyapalaoma Diudia andasu rupara Bedeleeme ree anda nane paisaya. Monde ree andare kini Deipidi nipu mandisaya ree anda. 5-6Diosepa nipuna wena Meari rapu bi mulameya nipu raida paisipiya. Meariri Naki panda pirinyaloma paisipiyapare mo Bedeleeme anda para pua ainya Meariri Naki kou nisaya. 7Gore nipuna mupa Naki mandumare akanumi rongaomare kimisu wenaalinumi kambaoaisimiya anda kerepema paliape anda marisayandare gawa menana anda para ara gawa menana enda aloaisimiya kopo para mo Naki mandu palebeaisaya.
Eindiolo nimumi sipisipi menanu andere-aisimiya alinu para angele lisimiya ei
8Go dina sipisipi menanu menda para andere-aisimiya alinumiri nimuna anda minyapalaoma mo para le puma nimuna sipisipi menanu andere-aluame rimbale para paisimiya. 9-10Nimu go para pua ainya Realina eindiolo komea nimu para ipisaya. Gupuma mo Reali nipuna paa pi eimi nimu mandaa paa pisaya. Go au pisayanda mo alinumi paalame waru komisimiyapare mo eindiolo nipumi nimu para lalore, Paalame na-komalepape, lomare nimi para epe angelenu doameya epawa, lisaya. Go angelere wenaali raayome pangoma raname komeleme, lisaya. 11Ambia go rimbalare monde Deipidi nipuna anda reparare nimi ma-endala pea ali ambala maida, lisaya. Nipuri Reali Kerisoae, lisaya. 12Nimi para neme lalo eiri ora angele lalole andola pulupape, loma lisaya. Mo Nakiri gawa menanumi enda noaeme kopo para akame koraoma go paliae wiale andola pulupape, lisaya.
13-14Go gole so yaa nane aisimiya eindiolo waru andapumi monde eindiolo rapu epa ara yaisa lada eimi Godena bi minyasiada ara yaisa loma lalore,
So yaa mandaa aya Godena bi minyasialepape,
lomare Gode nipuna angele pangoma puaeme
su wenaali nimu para nipuna pu lopainyaoma
kuma pi eiri Gode nipumi nimu para
epena lea, lisimiya.
15Monde eindiolonu wala lekeya yaa nane paisimiyandare mo sipisipi menanu andere-aisimiya alinumi nimuna nimunale angele loma lalore, Mo Realimi naa para la giande ei andaminya. Mo Bedeleeme anda nane pea ei andaminya balepa, lisimiya.
16Go angele loma wangepu pumare Meari Diosepa laapo andasuma ande gawa menanuna enda noaisimiya kopo para monde Nakisi paliae winya andisimiya. 17Mo sipisipi mena andere-aisimiya alinumi mo Nakisi andala ara ande eindiolo nipumi mo Nakimi pula pea einu nimu para la alisaya einuri mo lena mombeaisimiya wenaalinu para la alisimiya. 18Mo sipisipi mena andere-aisimiya alinumi lisimiya angele pangisimiya wenaali raayome pangomare lee opaminyambepe pisimiya.
19Go eina Mearimi ande angelenu raayo para kone na-rungulae nipuna pu para ma-manduma kone siala ara kone waru siala puaisaya. 20Go pisayandare monde sipisipi menanu andere-aisimiya alinumi wala perekeya pula arare mo eindiolonu nimumi lisimiya rupa go au raayo andomare yaisa lala ara Godena bi ma-minyasiaoma nipuna angele la eiri paisimiya.
Monde Nakisina biri Yesu, lisipiya ei
21Warapu naare komea perelisayandare mo Nakisi para yongale runguli au paomare nipuna biri Yesu, lisipiya. Mo Nakisi panda ambe na-piri ainya ande eindiolo nipumi la alisaya bi lisipiya.
Simioni Ana laapome Gode para alinau puaisimiya andaa anda rupara Yesu andisipiya ei
22Ande Mosesimi mo Rudule Angele Wi Einuna wape pea rupa mo angiaya epe ala pea naare ipisayandare mo Nakisi Reali para adoameya Diosepa Meari laapome mo Nakisi ma-manduma mo Diurusaleme anda nane paisipiya. 23Realimi Rudule Angele Wi Einuri gurupa wape puma wia. Mupa maidia Naki raayore Reali para ma-ainyalape loma wape pea.
24Gupuma pange mo Realimi Rudule Angele Wi Einu wape pea rupa ropa malipu laapo o enge yaasi menda laapo luma alape lama wape pea rupa niipu laapome mo ropa laapo Reali para luma alinau puma adoame paisipiya.
25Go naare naini mo Diurusaleme ree anda para ali komea Simioni aisaya. Go alimiri Gode para raname komala ara epe au pula ara pange mo Isaraeli wenaalinuna ma-endala pea naare epenayanda andere-ao-aisaya. 26Go eimi Epe Yaakopi Sipiridi nipu para angele la siala ara lalore, Neere ambe na-kome pa ainyaloma mo Godena Keriso angele la wia ali ririna epelea. Mo aliri Keriso andele loma mo Epe Yaakopi Sipiridimi go angele la wisaya. 27Mo Sipiridimi Simioni mo Gode repara alinau puaisimiya andaa anda para karu paisaya. Gupuma monde Mosesimi Rudule Angele Wi Ei pulameya Diosepa Meari laapome mo Gode para alinau puaisimiya andaa anda para monde Nakisi Yesu ma-paisipiya. 28-29Gupisipiyapare Simioni nipumi mo Nakisi kupi muma siamba ara Gode para ranae angele lala ara lalore,
Realio, nena angele la wi eiri ora paende.
Go eina nena pupudengi nado ali ni pawa
kuma pi rupa komanolae.
30Go einaya lawae.
Wenaali raayo rambamula pea Aliri
ambiare na leeme andaloae, lisaya.
31Go auri wenaali raayome andenaya
penameyao piliae, lisaya.
32Nipuri paa pi eiye. Go paa pi eimi
Isaraelimi na-mandu rangala pae wenaali para
nena rana pi ei penameyao wadea pange Isaraeli
wenaalina bi ma-andayainyayanda
ma-epelea, lisaya.
33Mo Simioni nipumi mo Naki para lisaya angele pangomare ara angi laapome rungula mealo pambisipiya. 34Simioni nipumi niipu laapo para Godena epe au epenaya angele loma Meari, go Nakisina ama para wala lalore, Pangae. Go Nakisiri Godeme mea. Isaraeli wenaali menda para ma-koyaluame pange menda para rambaminyaya go Nakisi Godeme mea, lisaya. Godeme nipunale penameyao wadoame go Nakisi raparipapare wenaali menda parame gipia loma nipu para angeleme yanda pilimi, lisaya. 35Go eimiri nimuna kundiripu kone wi einu penameyao wademe pange kendame komape eimi neae dolome awelea ei mandana nena pu para awelea, lisaya.
36Go naare naare wena menda Godena poropedi wena nipuna bi Ana, Panyuele nipuna wane, Asana anda repaa wena aisaya. Nipuri ora wenangae aisayapare nipu pena wena ainyare nipuna ali rapu kuni gipa warapu komea aisipiya. 37Kuni gipa ali ria malapu pereyoma mendane ki malapu rupara waisa wenangae ao-aisaya. Nipumiri naare raayo mo Gode repara alinau puaisimiya andaa anda na-minyapalala pisaya. Naarena pange rimbala nipumi Gode para yainya pulame enda na-ne pa ara yainya pala pisaya.
38Go dina Ana mo wenaali pamboaisimiya lena ipuma Gode para ranae angele loma mo Nakisimi pula pisaya ei angele la alisaya. Mo Diurusaleme ree anda Godeme wala mula pea ei andere-aisimiya wenaalinu para go angele la alisaya.
Diosepa Meari laapo Nasarere ree anda nane wala perekeya paisipiya ei
39Gore mo Nakisina apa ama laapome Realimi Rudule Angelenu raayo pisipiyandare lekeya pupuma Galili su nane wi ree anda nipuna anda Nasarere nane popisipiya. 40Monde Naki andayoma puri waru palisaya. Nipuna epe kone rekele pu suaisaya ei pange Godena yakili ada einu nipu para wisaya.
Yesu pena Naki ara Gode para alinau puaisimiya andaa anda para paisaya ei
41Yesu nipuna ama apa laapo kuni gipa raayome mo Pasopa enda pamboaisimiya ei andolameya Diurusaleme ree anda nane puala pisipiya. 42Yesu nipu kuni gipa ki laapo pereyoma angena laapo rupa perelisayandare mo puaisimiya rupa Pasopa enda pambisimiya ei andolame nipuna apa ama rapu paisimiya. 43Monde Pasopa enda pambisimiya ei perelisayandare niipu laapona andasu nane wala lekeya paisipiyapare mo naki Yesu nipuri mo Diurusaleme ree anda para pa aisaya. Go ei nipuna apa ama laapome kone na-wisipiya. 44Niipu laapona konemere, Yesu wenaali menda rapu ambala puana, kone suma naare komeana nipuna komea paisipiya. Gore nimu repaa wenaali para lora pua eiri pamuala ara aisa pisipiya. 45Niipu laapome mo Naki ora na-andasuma Diurusaleme ree anda nane wala aisa pula paisipiya. 46Aisa pula-ainya yapi di repopu perelisayapare mo Naki mo Gode repara alinau puaisimiya andaa anda para wala andawisipiya. Isaraelimi mandu rangala pae alinuna waloae alinu rapu piri nimumi lisimiya einu pangoma lora pala pula pirinya apa ama laapome pua andawisipiya. 47Yesuna lisaya angele pangisimiya alinumi nimuna angele yango liaisaya ei epe rupa lisayanda nimumi lee opaminyambepe pisimiya.
48Nipuna apa ama laapome mo Naki pirisaya ei pua andala ara lee opo andisipiya. Nipuna amame nipu para lalore, Na Nakio, neeme saa repara go auri akepeanda paepae, lisaya. Nena apa ama saame kendame waru komala ara nee aisa papa, lisaya.
49Nipumi nipuna angele yango liada ara lalore, Akepeanda niipimi ni pamu aisa papepae. Niipimi niri na Apana anda para pidia kone na-siapepae, lisaya. 50Go lisayapare niipu laapome nipumi lisaya eina ree angele kone na-wisipiya.
51Gupuma Yesu nipuna apa ama rapu wala perekeya Nasarere ree anda nane paisimiya. Gupuma nipuna ama apa laapome lala pisipiya angele pangoma puaisaya. Nipuna amamere go lisaya angelenu raayo pangoma kone siala pula ara nipuna pu para ma-maidala pisaya. 52Yesu nipuna do andayoma pange nipuna epe kone rekele pu suaisaya einu ora epelisaya. Godeme pange wenaali raayome Yesu andoma Nipuri ora epe Naki ae, lala pisimiya.
ಪ್ರಸ್ತುತ ಆಯ್ಕೆ ಮಾಡಲಾಗಿದೆ:
Luka 2: POLENT23
Highlight
ಶೇರ್
ಕಾಪಿ
Want to have your highlights saved across all your devices? Sign up or sign in
The New Testament in Pole Language of the Southern Highlands. Revised Edition 2023 © Bible Society of Papua New Guinea, 2023.
The New Testament in Pole Language of the Southern Highlands © Bible Society of Papua New Guinea, 1993.
