Luka 1
1
Diopilasi para wape pisaya ei
1Andaa ali Diopilasio, alenda alenda raayo Godeme naa para paisaya ei, naa rapu aeme alinu menda parame kone waru rendepoyao siala ara go pisaya ei wape pisimiya. 2Gupisaya ei pula-ainya andisimiya alinu menda parame go ei andoma angele waloaisimiya pange naa para la gisimiya. Go la gisimiya angele naana alinu menda parame wape pisimiya. 3Go peapare bi wi alio, monde angele waloaisimiya einu pange Godeme naa para paisaya einu neme ririna ree kini pa epe rupa kone waru siala ara nee para wape pula kone sialo. 4Go eina go angelenuri nee para mendame ambala walande ora lea lama kone siainyayanda neme go ei wape pi.
Eindiolo nipumi Sakaraya para Nena wename Dioni maidia, lisaya ei
5Mo Diudia andasu nane ande kini ali Erodi aisaya dinare Gode repara alinau puaisaya ali komea Sakaraya pange aisaya. Nipuri mo Gode repara alinau puaisaya ali Apaidia nipuna anda repaa ali. Nipuna wena Ilisapede pange monde Gode repara alinau puaisaya ali Eronina nipumi mandu rangala pae wena.
6Mo repaayare Gode nipuna lee wilina ara epe rupa ao-aisipiya. Niipu laapomere Realimi Rudule Angelenu raayo walisaya ei pange angele raayo pangoma puaisipiya. 7Gupisipiyapare Ilisapedeme naki nongo maidape ana na-pula ara naki menda na-mandisaya. Gupumare nipuri ora wenangae yomokai laapo aisipiya.
8Naare mendanare Sakaraya nipuna Gode para yainya pape naarele ipisaya. Nipuna anda repaa alinu nimuna Gode repara pupudengi nao-aisimiya yapi di ipisayanda pisaya. 9Mo Gode repara alinau puaisimiya alinumi puaisimiya rupa, nimumiri wala Sakaraya misimiya. Sakaraya nipumi monde roropo pi ale mo Gode repara alinau puaisimiya lena kiraluame Reali para alinau puaisimiya andaa anda rupara konda pambaisaya. 10Go dina monde roropo pi ale kirape naarele ipisayanda Sakaraya nipumi puma pua repanana kirisaya. Nipumi go au pula-ainyare wenaali raayome kama nane ara yainya pisimiya. 11Monde roropo pi ale kiraoma ainyare Realina eindiolo komea nipu para ipisaya. Ipumare monde roropo pi ale wisaya lena popeke ki nane epa aisaya. 12Gupisayapare Sakaraya nipumi mo eindiolo andomare rungula mealo pamboma paalame komisaya. 13Gupuma mo eindiolo nipumi nipu para lalore, Sakarayao, paalame na-komape, lisaya. Godeme nena yainya puale ei pangomare nena wena Ilisapede nipumi nena naki mandina dea. Mo naki maidiandare nipuna biri Dioni lape, lisaya. 14Gupilia dina neeme epe rupa ara raname waru komele pange wenaali menda parame pange mo pena naki maidi ei andala ara raname waru komeleme, lisaya. 15Realimi nipu andaa bi wia ali ainya dea. Gupiliandare nipumiri waini ipanu pange bia ipanu pange na-nena dea. Nipuri nipuna amame pena maidia dinare Epe Yaakopi Sipiridi ora waru rumbiainya dea.
16Werepe go maidia naki nipuri ali aliandare nipumi Isaraeli wenaali andapu nimuna Reali Gode para wala karu epelea. 17Gore nipuri monde Godena poropedi ali Ilaidia nipuna puaisaya au pange wele kongapu mandana muma alia. Nipuri ambala ririna penaloma Realiri kou naneyame epelea. Nongo nakinumi aranu gioma rando randopu alimindare nipumi komea para raname ma-komaoma wala raminyekepaoma ma-alia. Godena angele gipia deme wenaaliri nipumi nimuna kone ma-perekeyaoma epe konenu wi wenaalinu mandana epe konenu ma-sialia. Nimumi Reali minyaya nipumi nimuna konenu ma-rendepoyaoma wadea.
18Go eina Sakaraya nipumi mo eindiolo para lalore, Go angelere ora eiyapae, lomare akipu kone sianoyapae, lisaya. Ni pange na wena saa laapo raida ambala go goaelepae, lisaya.
19Monde eindiolo nipumi nipuna angele yango liada ara lalore, Na biri Geperiele. Ni Godena lee wilina ao-ayo. Gupuma Godemere nee para go epe angele lanoya ni raparipa, lisaya. 20Godeme ni raparipapare neeme na angele walawa eiri ora pula pea ei walawapare neeme na angele na-pangoma na-meae, lisaya. Go eina neere angele na-le, angaa rambuli ali mandana ali ae, lisaya. Neemere ora angele na-le aoma neme lawande au raayo piliandare go dina neeme angele lombo de, lisaya.
21Go angele lala aisipiyapare mo wenaalimi Gode repara alinau puaisimiya andaa anda kama nane ara Sakaraya epenaya andere-aisimiyapare ambe na-ipisayandare wenaalimi kone rando rando wisimiya. 22Gupuma Sakaraya kama nane opalumboma ipisayapare mo aisimiya wenaalinu para angele menda lape-na-lisaya. Go eina wenaalimi kone sialore, Nipumi mo Gode repara alinau puaisimiya andaa anda panda rupara ara alenda menda andalo pae, kone wisimiya. Sakaraya nipumi angele lape-na-yoma wenaali para nipuna ki komea wangeada ara kimi komea walisaya.
23Sakaraya nipumi monde Gode para alinau puaisimiya andaa anda panda para pupudengi nea ei perelisayandare nipuna anda wala paisaya. 24Go eina werepe nanere nipuna were Ilisapede nipumi naki panda pirisaya. Sumba supumi nipuna anda para pa ao-aisaya. 25Ilisapede nipumi lalore, Ni naki na-mandi yalame komoma ao-aripupare ambia Realimi ni repara yarae kone suma ni para naki ma-piradanda wenaali para yalame komawa eiri nipumi yokoma rumbaripa, lisaya.
Eindiolo nipumi Meari para Yesu neeme mandi, lisaya.
26Naare mendanare Ilisapedeme naki panda pirisaya eiri sumba su mindipu pirisaya dina, Godeme mendaa ande eindiolo Geperiele mo Galili andasu nane Nasarere ree anda para rapaisaya. 27Monde kini ali Deipidina anda repaa ali Diosepa nipuna yapa wisaya nongo para angele lada penaya, Godeme rapaisaya. Mo nongona biri Meari. 28Monde eindiolo nipumi nipu para pua lalore, Na ainyao, Realina epe aunu mele nongo ae. Realiri nee rapu ao-ayae, lisaya.
29Mearimi mo eindiolo nipumi lisaya angele pangomare kendame komala ara Ake au pula pea eina dapae, kone suma nipuna koneme mo angelena ree waru aisa pisaya. 30Monde eindiolo nipumi nipu para lalore, Meario, paalame na-komape. Godeme nee para kone waru wia, lisaya. 31Go loma lalore, Waru pangalepae. Godeme nena lo para Naki ma-piralia ei werepe nane maidindare neemere nipuna biri Yesu lape, lisaya. 32Nipuri andaa ali alia, lisaya. Wenaalinumi nipuri ora so yaa mandaa puri waru pale ora ririna Gode nipuna Naki alia, deme, lisaya. Reali Godeme nipuna ambala ririna kini ali Deipidi nipumi andere-ao-aripa rupa nena maidi Nakiri Godeme gurupa Kini ali ma-alia, lisaya. 33Nipuri Isaraelimi mandu rangala pae wenaali raayona Kini ali pa ao-alia, lisaya. Gupuma nipuna Ki Rambuao-aya Ei ora na-peredea, pa ao-alia, lisaya.
34Go lisayapare Mearimi mo eindiolo para lalore, Go au pula pea eiri akipuma piliapae. Niri na alina anda ambe na-pe pange ali naki mendame ni pake na-noaeme, lisaya.
35Monde eindiolo nipumi Meari nipuna angele yango liada ara lalore, Mo Epe Yaakopi Sipiridi nena dona epa pidia. Gupiliaparare Godena puri waru pale eimi nena dona epa andalainyalia. Gupili eimiri monde neeme maida pele Nakiri Yaakopi Naki maidi. Nipuri na ora Naki aya, Godeme dea, lisaya. 36Waru pangale. Nena anda repaa wena Ilisapede para kone siae. Nipuri naki na-mandi wena loarimipare ambiare nipuri wenangaesi ayapare nipuna naki panda pia ei sumba su mindipu ambala pereya, lisaya. 37Go eina Godeme alenda alenda raayo ma-aoma naare raayo anana papeya, lisaya.
38Go lisayanda Mearimi lalore, Niri Realina pupudengi nao-ayo nongo ae. Neeme la giale rupare ora pinyae, lisaya. Go ei pangomare mo eindiolo nipuri mo nongo minyapalaoma paisaya.
Mearimi Ilisapede andolame paisaya ei
39Go dina Meari nipu wangepu rekoma kana rumu menda angulaoma Diudia andasu nane ae ree anda para paisaya. 40Nipu Sakaraya nipuna anda para pua konda pambaoma Ilisapede para lalore, Akio, neere epeleapae, lisaya. 41Ilisapedeme Mearimi lisaya angele pangala-ainya nipuna romba para piri naki rekoma lewa lewa pisaya. Gore Ilisapede para Epe Yaakopi Sipiridimi waru rumbiaiasaya. 42Gupisayanda Ilisapedeme angele wi loma lalore, Wenanu mendame Godena epe einu meamendepare neeme mele eiri mo wenanumi meamende eiri nena eimi ora angulaya, lisaya. Nena maidi Nakimi pange Godena epe yakili ada andaai milia, lisaya. 43Ni ake pawanda na Realina amame ni andola epapae. Go andaa auri neme akepeanda mealopae, lisaya. 44Pangale. Neme nena angele pangawanda go gole na romba para piri naki raname komala ara rekalumba, lisaya. 45Realimi nee para la giande angele ora pilia, kone suma raname komape ei muale, Ilisapedeme gurupa lisaya.
Mearimi lisaya ei
46Mearimi lalore,
Na pu romba raayome
Realina bi minyasiada, lisaya.
47Godeme ni rambamuayanda
na koneme Gode para raname komala, lisaya.
48Nemere nipuna pupudengi nao-ayopare
na bi na-wia.
Go peapare ni repara yarame waru komoaya.
Ambia aeme wenaali pange werepe nane
ala peme wenaalimi pange lalore,
Godeme raname komoaya ei raayo ni para gea,
deme, lisaya.
49Puri ora waru pale Godeme
ni para andaa au menda paripa.
Nipuna biri yaakopi bi pa sualia, lisaya.
50Nipuna yarame kome ei nipu repara
panda punyao-aeme wenaali para walea.
Go peandare nimumi mandu rangala pae wenaalinu
para pange walea, lisaya.
51Gode nipuna kimi puri palea pupudengi nisaya
pange ako luaeme alinumiri go au pilima
loaeme einuri Godeme ma-bembolaoma
ralu luaya, lisaya.
52Gode nipumi puri palea kini alinu
ma-minyambaoma nipumi bi na-wia alinu rupa
ma-aripa pange bi na-wia alinuna biri
ma-minyasiaripa, lisaya.
53Nipumi reame komame wenaalinuri
nimuna lo romba para epe enda ma-rumbiaripapare
amo arimi wenaaliri alenda alendanu na-ale
pa raparipa, lisaya.
54Naana apa kasuanu para Gode nipuna la wisaya
angele na-runguli, pa pisaya pange
nipuna pupudengi nao-aisimiya Isaraeli
wenaali para rambamulame ipisaya.
55Nipumi Eparame pange nipumi mandu rangala pae
wenaali para nipuna yarame kome ei
naare raayo walea, lisaya.
56Go lisayandare Meari nipu sumba repo Ilisapede rapu aoma wala nipuna anda nane lekeya paisaya.
Ilisapede nipumi Dioni Baparaisi ali mandisaya ei
57Ilisapede nipuna naki maidape naarele ipisaya dinare naki mandisaya. 58Nipuna anda repaa wenaali pange nipu aisaya lena aisimiya wenaali raayome pange Realimi Ilisapede para yarame komala ara epe au menda alisaya ei pangoma nipu rapu ara raname waru komisimiya.
59-60Monde naki warapu naare komea mandu siambaoma nimumi yongale runguli au paluame ipisimiya. Gupuma nimumi nipuna apana bi Sakaraya doameya ipisimiyapare nipuna amame lalore, Dia, nipuna apana bi na-laminyapare nipuna biri Dioni laminya, lisaya.
61Nimumi Ilisapede para lalore, Nena anda repaa wenaalina bi menda gurupa dia, lisimiya. 62Go loma mo nakina apa para mo nakina biri apiyapae, nimumi angele loma angaa meala ara kimi manda meaoma wangeaisimiya.
63Sakaraya nipumi wape papele menda muma wape pula ara lalore, Nipuna biri Dioni, wape pisaya. Go wape pisaya ei andoma mo wenaali raayosi rungula mealo pambisimiya. 64Go gole Sakaraya nipuna anga lomboma angele wala lape nono pisayanda Godena bi ma-minyasiada ara ranae angele lisaya. 65Go eina nipu aisaya lena aisimiya wenaalimi paalame komisimiya pange mo pisaya eina mo Diudia andasu nane ae su rundu nani aisimiya wenaali para angele kende ruma paisimiya. 66Go angele pangisimiya wenaali raayome kone suma angaa meala ara lalore, Werepe go nakiri akipu aliapae, lisimiya. Realina puri go naki para sianae, kone suma lisimiya.
Sakaraya nipumi Godena walisaya angele lisaya ei
67-68Dioni nipuna apa Sakaraya nipuri Epe Yaakopi Sipiridimi rumbiala ara nipumi Godena walisaya angele gurupa lala ara lalore,
Naame Reali, Isaraeli wenaalina Godena bi
minyasiaminya.
Nipumi nipuna wenaali rambamulame ipisaya pange
nimu rongaisaya einu kepealuame ipisaya.
69Godena pupudengi nao-aisaya ali Deipidimi
mandu rangala pisaya naki naa para gisaya.
Nipuri naa rambameape ali
puri waru pale ali ma-aya, lisaya.
70Ambaisenande Godeme nipuna yaakopi ali
Godena poropedi alimi gurupa lisaya.
71Nipumi la wi angele lama lalore,
Neme nimina yanda runguli alinu duandare
nimi rambamula pange nimi para rono pangeleme
alinu sese pula ara nimi rambamula, lisaya.
72Nipumi naana aya kasuanu para lalore,
Na la sialo angelenu kone na-rungulalua pange
na yarame kome ei pange na epe einu pange
penameyao wadoa, lisaya.
73Nipumi naana apa kasua Eparame para
ora la wi angele lisaya pange ambia nipumi
naa para go au ora paya.
74Naana yanda runguli alinu naa duame
epelemendare Realimi lalore,
Neme nimi rambamula, lama la alisaya.
Go la alisaya eiri rungulape-na-ya angele lisaya.
Go lea eina kone siala ara naame nipuna pupudengi
paalame na-komea ara napeya, lisaya.
75Naa suna pa aema dina naare raayosi
Realimi andala-ainya nipuna pupudengi nada ara
rendepole ei pula ara pange ora yaakopi ei pange
ora pilima, lisaya.
76Na nakio, neere so yaa mandaa puri waru pale
ora ririna Godena ali Godena poropedi ali
deme, lisaya.
Neere ambala ririna Realina pora ma-epealuame
pele, lisaya.
77Realina wenaalina koae aunu nipumi rambuaoma
wala milia angele neeme nimu para la ade, lisaya.
78Naana Godere naa para ora
yarame waru kome Gode.
Naare Opala Ei rupa nipuna rambameape ei gurupa
naa para opelea.
79Komolame rimbalea ei rupara aeme wenaali para
Gode nipumi nipuna aya para naare mandana
nimu repara ma-ralia.
Nipumi naana pora pelema ei kuma pi eiri
pora mandana nipumi wadea.
80Monde naki andayala ara nipuna do pange kone mendaa dina epe rupa andalisaya. Nipuri wenaali na-ao-palia lena ao-aisayapare nipuna do walape naarele ipisayandare Isaraeli wenaalinumi andenayanda nipuna lee angaa wadoame ipisaya.
ಪ್ರಸ್ತುತ ಆಯ್ಕೆ ಮಾಡಲಾಗಿದೆ:
Luka 1: POLENT23
Highlight
ಶೇರ್
ಕಾಪಿ
Want to have your highlights saved across all your devices? Sign up or sign in
The New Testament in Pole Language of the Southern Highlands. Revised Edition 2023 © Bible Society of Papua New Guinea, 2023.
The New Testament in Pole Language of the Southern Highlands © Bible Society of Papua New Guinea, 1993.
