Maka 16
16
Yesu komoma rekisaya ei
(Madiu 28:1-8; Luka 24:1-12; Dioni 20:1-10)
1Isaraelimi mandu rangala pae wenaalinuna koro piri naare perelisaya dinare Makedala ree anda wena Mearimi pange Dieimusi nipuna ama Meari pange Salome, Yesu rona kirala polame roropo waru pi wambala kambisimiya.
2Gupuma Sande naarena yapi kepea nane naare pena opala-ainya Yesu dapa paisimiya. 3-4Nimu pula ara nimuna nimunale lalore, Monde kana pondea para pora poaeme kanare apimi ma-minyasiaoma perereyaliapae la eiri paisimiya. (Mo kanare ora andaa kana wisaya.) Go eina monde pora poaisimiya kana anda monelisimiyapare monde kenda pi kana anda eiri mendame ambala perereyaoma lombo suma paisaya ei andisimiya. 5Mo kana pondea lombapa wia lena konda pambomare pena naki komea andisimiya. Nipuri kake pi aka andalu ei pambaoma nimuna popeke ki naneyame pirisaya. Go ei andoma mo wenanumi pururu waru komisimiya.
6Gupuma monde pena naki nipumi nimu para lalore, Pururumi na-komalepape, lisaya. Nimimi Yesu Nasarere ree anda ali mo ekeraisa wape pi repanana raminyekepao lu andiariminde ali aisa pimi kone sialo, lisaya. Go para na-pia. Ambala reka pua, lisaya. Nipu dapa pia lena komea gondae, lisaya. 7Pulupae, lisaya. Yesu nipuna kou nane raluaisimiya alinu, Pida pange Yesuri mo Galili andasu nane ririna ambala pua loma pua dapape, lisaya. Nipumi nimi ande lande rupa go para andeleme pua dapape, lisaya.
8Gupuma mo wenanu kama nane opolumbomare mo apenda minyapalaoma puru puru liala ara pange pururumi komala ara pongola paisimiya. Nimumi paalame komala ara wenaali menda para angele na-la alisimiya.
Mendane alinumiri Maka bukare go alena perelea leme. Go peapare mendane alinumi lalore angele mendapare pa wia leme. Go einare go para aa angele raliaminya pae lo mendame kone waru na-wia. Go pereyado ara wia angele laapore gurupa. Ririna eiri gurupa.
[Meari Makedala ree anda wename Yesu andisaya ei
(Madiu 28:9-10; Dioni 20:11-18)
9Gupuma Yesuri Sande naarena yapi kepeala-ainya wala reka mealome ririnare Meari Makedala ree anda wena para nipu walisaya. Ambala ririna, go wenana lo romba rupara koae remo warapu Yesumi ralu liisaya. 10Mo wenamere Yesu rapu ambala ririna ao-aisimiya wenaalimi ree lala-ainya mo wename nimu para pua la alisaya. 11Go angele lisayapare mo wenaalinumi Yesu wala rekoma aya, lisaya ei pangoma mo wename pange Neme andawae, lisaya ei pangomale, ora da, kone na-wisimiya.
Yesu nipuna kou nane raluaisipiya ali laapo para ipisaya ei
(Luka 24:13-35)
12Werepena ali laapo andasu menda nane polameya pula-ainya Yesumi mo ali laapome andenaya, nipu mendaa rupa walisaya. 13Go ali laapome pange wala perekeyao puma mo nipu rapu mendane wenaali ambala ao-aisimiya wenaali da paisipiyapare nipuna angele pange ora dape, kone na-wisimiya.
Yesu nipuna kou nane raluaisimiya alinu mendaa para mombelisimiya lena ipisaya ei
(Madiu 28:16-20; Luka 24:36-49; Dioni 20:19-23; Aposolo 1:6-8)
14Werepena monde ki laapo pereyaoma angena komeapu kou nane raluaisimiya alinu enda nala pirinya, Yesu ipisaya. Yesumi mo alinumi nipu wala rekisaya ei andisimiya wenaalina angele na-pangisimiya ei andoma pange nimumi nipu para kone na-rulaisimiya ei kone suma nipumi nimu para mana angele waru lisaya. 15Nipumi nimu para lalore, Su raayosi para pumare monde su rando rando wenaali raayo para monde ora epe angelenu wadapape, lisaya. 16Ali apimi ni para kone rulao-alianda pange nipumi baparaisi au miliandare go aliri endoma alia, lisaya. Gupiliapare ali apimi ni para kone na-rulao-aliandare Godeme nipu para koda piliandare go alimi angele menda lape-na-dea, lisaya. 17Ni para kone rulao-aeme wenaalinumi na-andoaeme einu Godeme pinya dea, lisaya. Na bina, wenaalinuna lo rupara piri koae remonu ralu dimiae, lisaya. Nimu na-pange anda angele menda menda epe rupa deme pi, Yesumi lisaya. 18Nimumi ali dia keronu pa ripinyilimindare go keronumi nimuna do nelemepare na-komeleme, lisaya. Romo neleme alinu pange na-komeleme, lisaya. Yainya wenaalinuna kaluna nimuna ki wilimindare nimuna yainya endeleme, lisaya.
Godeme Yesu Epeni ma-paisaya ei
(Luka 24:50-53; Aposolo 1:9-11)
19Go eina Reali Yesumi mo wenaali para angele loma perelisayandare Godeme Yesuri so Godena Aya Lena ma-paisaya. Gupuma Yesuri Gode nipuna popeke ki nane pua pirisaya. 20Go eina, Yesu nipuna kou nane raluaisimiya alinumi su kuni kuni raayo para Yesuna epe angele wala eiri pamisimiya. Ambala la wisayande rupa Yesu nimu rapu aisaya. Yesu nipuna kou nane raluaisimiya alinumi nipuna epe angele wala eiri pamuala-ainya nimu rupara Yesumi wele kongapu pi einu puma nipuna angelere ora ei loma walala pisaya.]
Wala werepe eiri gurupa.
[Go Maka wape pi eina pereyape angele menda go ei
9 Mo wenanu Pida pange nipuna repaa wenaali para puma nimu para mendame la ale angele pua la alisaya. 10 Go eina werepe nane Yesu nipunale nipuna kou nane raluaisimiya alinu para naare opala naneyame naare pambala nane monde yaakopi endoma ao-ape angelenu Yesumi nimu para dapape loma rapaisaya. Go epe angelenu wenaalinu raayome endoaya ei minyaya, lea.]
ಪ್ರಸ್ತುತ ಆಯ್ಕೆ ಮಾಡಲಾಗಿದೆ:
Maka 16: POLENT23
Highlight
ಶೇರ್
ಕಾಪಿ
Want to have your highlights saved across all your devices? Sign up or sign in
The New Testament in Pole Language of the Southern Highlands. Revised Edition 2023 © Bible Society of Papua New Guinea, 2023.
The New Testament in Pole Language of the Southern Highlands © Bible Society of Papua New Guinea, 1993.
