Luka 4
4
Sadanimi Yesu la andisaya ei
(Madiu 4:1-11; Maka 1:12-13)
1Gupuma Yesu mo Diodani ipa ree nane aoma wala ipisaya dinare Epe Yaakopi Sipiridimi Yesu para ora waru rumbilisaya. Go dinare gonde Sipiridimi Yesu wenaalinu na-ao-paluae weambi pi su kapulea lena karu paisaya. 2Gupuma naare ali ria laapopu go para pua ainyaloma Sadanimi ipuma Yesu para epa la andisaya. Go naarenare go remome Yesu para la andala-ainya Yesu nipumi enda na-nisayandare go einu perelenalomare gore Yesu nipu reame komisaya.
3Gupuma go remome Yesu para lalore, Neere ora Godena Naki alindare gore go suna wia kananu muma palawa waruma ma na, lisaya.
4Yesu nipumi Sadanina angele liala ara lalore, Godena angele wia bukame gurupa lea, lisaya.
Palawa komea nelemendare alimi endoaya ei
na-milimi, lea, lisaya.
Go eiri ora lea, alimi Godena angaa para
ipuaya angelenu komea pangoma endoaya ei
meapeya, lea, lisaya.
5Gupuma mo remome Yesu so mandaa karu opasioma mo suna ki rambuao-aya einu raayosi rana komea walisaya. 6Gupula ara Sadanimi Yesu para lalore, Mo leenu raayore ni para geapare nina konemere ali menda para adoandare ora ana pilia pange neme nipu para ora anana adoa, lisaya. Go einare go amo alenu raayo pange go ki rambuao-aya einu raayosi neme andambainya nee gula, lisaya. 7Go eina neeme rumu yaruaoma ni para panda pilindare gore mo olemolenu raayo nee para ora gula, lisaya.
8Go eina Yesumi mo remona angele yango liada ara lalore, Sadani nee pane pu, lisaya. Mo Godena angele wia bukame gurupa lea.
Nena Godena angele pangoma nipu para komea
panda punyaoma yainya pape, lea, lisaya.
9Wala Sadanimi Yesu mo Diurusaleme ree anda nane karu puma mo Gode repara alinau puaisimiya andaa anda kulu mandaa karu opasiaisaya. Gupuma mo remome Yesu para lalore, Neere Godena Naki dendare go lena aoma no suna pongola, lisaya. 10-11Akepeare ande Godena angele wia bukame gupi leanda lalo.
Godeme nipuna eindiolonu para nena angenu
koyapanayanda nimuna ki mandaa lopainyayanda
angele dape eina lalo lisaya.
12Go eina Yesumi mo eremona angele yango liada ara lalore, Godena angele wia bukamere go lea.
Neeme nena Reali Gode para
wala na-la andape, lea, lisaya.
13Sadanimi la andala einu one mone einu raayosi pumare pa ongepusi giaoma pu mone aya.
Yesumi mo Galili nane pape einu kini pisaya ei
(Madiu 4:12-17; Maka 1:14-15)
14Go aunu perelisayandare mo Epe Yaakopi Sipiridina purimi Yesu andambainyaloma Yesu mo Galili nane wala paisaya. Gupuma go su raayo para aisimiya wenaalimi Yesuna bi kende rupa winya, lisimiya. 15Go dinare nipumi mo Godena angele kuruaeme anda paranu puala puma wenaalinu raayo para angele waru wala eiri pamisayandare mo wenaalinu raayome nipuna bi ma-minyasiala pisimiya.
Nasarere ree anda wenaalinumi Yesu giaisimiya ei
(Madiu 13:53-58; Maka 6:1-6)
16Gupuma Yesu Nasarere nipu andalisaya ree anda para nipuna pala pisaya rupa Isaraelimi mandu rangala pae wenaalinuna koro piruae naarena Godena angele kuruaeme anda para paisaya. Yesu nipu pua konda pambomare nipu mo Godena angele wia buka yarepedoameyanda reka aisaya. 17Gore ali mendame mo Godena poropedi ali Aisaya nipumi wape pu wisaya ramayo Yesu para alisaya. Gore nipumi mo ramayo lomboma andae eiri puma angele menda lisaya ei andawisaya. Go angele wape pi eiri yarepeala ara lalore,
18-19Neme narali wenaali menda paranu
Reali nipuna epe angelenu lanoya ma-mayanda
Reali nipuna Sipiridi nipumiri
ni puri waru ma-palaya, lea, lisaya.
Realina Sipiridimi neme mo ale menda pape-nae
wenaalinu nimi one mone aunu paliminyayanda
nimi kepe rapape angele wia ei la ala eiri
pamuanoyanda ni raparipanda epawa, lea, lisaya.
Gupuma pange lee rumbu pi wenaalinu alimindare
nipumi nimuna leenu ma-kiyanoyanda ni raparipa,
lea, lisaya.
Gupuma pange nipumi go ipa kapu noaeme
wenaalinu para rambameanoyanda ni raparipa,
lea, lisaya.
Gupuma pange ande Realimi nipuna wenaalinu
rambameape naare ambala epandeae, lo la ala eiri
pamuanoyanda ni raparipande, lea, lisaya.
20Yesu nipumi mo ramayo yarepema pora pomare nipumi mo Godena angele kuruaeme andana andere-aisaya ali para wala aloma pirisaya. Gore mo Godena angele kuruaeme anda para pirisimiya wenaali raayosimi Yesu para andala ara yolo mealo pambisimiya. 21Gore Yesu nipumi nimu para angele lala ara lalore,
Go yarepe giawande Godena angele wia buka rupara angelere nimi repara pangala aliminya gole meande, lisaya.
22Nimu raayosi lee opoma pange kale ma-iyoma mo nipuna laya angelenumi rende payanda nipu para go angele lameya. Nipuri Diosepana naki diayapae, loma angaa misimiya.
23Gupi lisimiyanda Yesu nipumi nimu para lalore, Ora laloae, lisaya. Nimimi ni para ora pape angele gurupa demeae, lisaya. Dokeda alio, nee yainya aliandare nena gole nena do ma-epeape, deme, lisaya. Ni para gurupa demendare nimimi angele menda ni para wala lala ara lalore, Au menda menda mo Kapeneame ree anda nane ara paende aunuri naame ambala pangamale go nena ora ree anda para ara pange gonde paende rupa ora papeae, deme, lisaya.
24Go eina Yesu nipumi nimu para lala ara lalore, Pangalepape. Godena angele lao-aeme alinumi nipuna anda ruru repaa para angele wademendare nipuna repaame gole kou wademeae, lisaya. 25Pangalepa. Neme nimi para ora angele lalo, lisaya. Mo Ilaidia aisaya dinare waisa wenanu waru andapu mo Isaraeli andasu rupara aisimiya, lisaya. Go dinare kuni gipa repona sumba ki su mindipu yai ora na-ipuma andasu raayo para reame komala ei waru andapu ipisaya, loma lisaya. 26Gupisayapare Gode nipumi Ilaidia mo Isaraelimi mandu rangala pae wena o ali menda repara na-rapaisayapare nipumi Ilaidia mo Saidoni andasu rupara ae Sarepadi ree anda ae waisa wena komea repara rapaisaya, loma lisaya. 27Gupuma pange Godena poropedi ali Ilaisa aisaya dinare kindi yainya komoaisimiya wenaali waru andapu mo Isaraeli andasu para aisimiyapare Gode nipumi go wenaalinu na-ma-epeaisaya, lisaya. Go dinare Siria andasu ali menda komea nipuna bi Neamane Godeme ora ma-epeaisaya, lisaya.
28Mo Godena angele kuruaeme anda para pirisimiya wenaalinumi go angele lisaya ei pangoma rono andaai waru pangisimiya. 29Go ei pangoma wenaalinumi rekoma Yesu riminyuma mo ree anda gioma kama karu paisimiya. Mo nimuna ree andasuri su wili mandaa siayapare Yesu mo su wilina ainyaloma mo kana palea para waro lopaluameya karu paisimiya.
30Gupisimiyapare Yesu nipu ma-lopape ana na-pisayandare mo wenaali angalapuna wala giala paisaya.
Yesumi ali mendana koae remo ralu lisaya ei
(Maka 1:21-28)
31Gupuma Yesu nipuri mo Galili andasu para aisaya ree anda menda nipuna bi Kapeneame nane paisaya. Gupuma mo Isaraelimi mandu rangala pae wenaalinuna koro piruaeme naare mendana angele walisaya. 32Gupuma Yesu nipumi bi wi alinumi dame rupa angele walisaya naarenare mo wenaalinu raayosimi go angele pangoma rungula mealo pambisimiya. 33-34Mo Godena angele kuruaeme anda rupara koae remo piri ali menda aisaya. Go alimi Yesu andoma nipu para wi andapu loma lalore, Ae, Yesu Nasarere ree anda alio, naa para ake au pulame ipuma pilipae, lisaya. Nee epe eiri naa raayo ma-koyaluame ipuma paepae, lisaya. Nemere nee ora kone wiae, lisaya. Neere Godena Yaakopi Aliyanae, lisaya.
35Go eina Yesu nipumi mo koae remo para angele lala ara lalore, Neme lalole neere angele menda ora na-lape, lisaya. Go ali ora giaoma ambe ongeasi pupu, lisaya. Go angele lisaya ei pangoma mo koae remome mo wenaalina lee rona ma-rumbuma pawasi kama epayapare mo alina do menda na-ma-koyaisaya.
36Go ei andoma wenaali raayosimi rungula mealo pambala ara nimuna nimunale angele lalolo pula ara lalore, Go aliri mango angelenu dale ale noma dape, lisimiya. Go aliri bi wi ali mendame lee nono pi rupa mo koae remonu para go pa, go pa, danda kama ipulumi, lisimiya. 37Go einare wenaalinumi Yesu nipumi pisaya aunu andoma andasu menda menda paranu kende ria pamisimiya.
Yesumi wenaali andapu ma-epeaisaya ei
(Madiu 8:14-17; Maka 1:29-34)
38Yesu mo Godena angele kuruaeme anda minyapaloma Saimono nipuna anda para paisaya. Saimono nipuna werena angi riripu yainyame pururu ada ara waru komopa wisayanda mo anda para aisimiya wenaalinumi Yesu para mo wenana yainya aisaya rupa la alisimiya. 39Gore nipu puma mo wena komopa wisaya lena perali nane pua reka ara monde riripu yainya aisaya ei para angele lala ara lalore, Neme lalole, go wena minyapalaoma pu, lisaya. Gupi lisayandare mo yainyame mo wena giaoma randalapa popisayandare go gole mo wename rekoma ara mo alinu wamo pisaya.
40Naare ambala pambenalomare nimuna yangosinu menda one mone yainyanumi komopa siala pameyanda wenaali Yesu repara ma-epameyandare nipumi nipuna ki nimu mandaa siala pisayanda raayo ma-epeala pisaya. 41Gupumare koae remonu wenaali andapu rupara e dada pupula ara lalore, Neere Godena Naki, lisimiya. Keriso nipumi mo koae remonu para go au pipa, go au pipa, lo angele na-dapape lisayanda angele na-lisimiya. Akepeare nimu kone wisimiyapare nipuri ande Mesaya.
Yesu nipumi mo Godena angele kuruaeme andanu para angele walisaya ei
(Maka 1:35-39)
42Yapi pena kepelainya Yesu nipu go ree anda minyapalaoma wenaali na-aya andasu menda para nipuna kunuma paisaya. Gore mo wenaalinumi Yesu nipu pu mone aya ei waisa eiri pamu waisuma nipu aisaya para puma andawisimiya. Nimuna rana pi eiri Yesu nipu nimu naa na-giala pena kone suma sese pulame rapisimiya. 43Go au pisimiyapare Yesu nipumi nimu para lalore, Godeme ni rapaya eiri nipuna epe Ki Rambuao-aya Eina epe angele nimi para pange ree anda menda menda para arimiya wenaalinu para walanoya ni raparipa, lisaya.
44Go einare mo andasu raayo para Godena angele kuruaisimiya anda paranu pamulopala ara Godena angelenu walao-aisaya.
ಪ್ರಸ್ತುತ ಆಯ್ಕೆ ಮಾಡಲಾಗಿದೆ:
Luka 4: POLENT23
Highlight
ಶೇರ್
ಕಾಪಿ
Want to have your highlights saved across all your devices? Sign up or sign in
The New Testament in Pole Language of the Southern Highlands. Revised Edition 2023 © Bible Society of Papua New Guinea, 2023.
The New Testament in Pole Language of the Southern Highlands © Bible Society of Papua New Guinea, 1993.
