Luka 3

Ollalleya wa Yohane Oobatiza

(Mat 3.1-12; Mrk 1.1-8; Yoh 1.19-28)

1Waari muyakha wa khumi ni mitthanu wa olamulella wa Kaisara* Tiberiyo, o Roma. Enthawi yeeyo Pontio Pilato aari oolamulella a o echigawo ya Yudeya. Herode* aari oolamulella a o echigawo ya Galileya nave mwanamunne Filipo* aari oolamulella a o echigawo ya Itureya ni ya Trakoniti. Lusaniya aari oolamulella a o echigawo ya Abilene. 2Nave Anasi ni Kayafa yaari allupa mukutho uullupalli. Mallapo yaayo Mulluku aallota ni Yohane, mwaana aamullopwana a Zakariya, aariiye ochipululuni. 3Sika Yohane aaya o echigawo ettheene ya muhinje wa Yordani, allalleyaka wi, “Rukunuwani murima, mubatiziwe wi Mulluku uukhululukelleni machimwaanyu” 4#Yes 40.3-5Moollikana ni olemba wa namallotella Yesaya wi,

“Okhuwa wa muthu mmodda muchipululuni onallalleya wi,

‘Llimani musewu wa Apwiya,

okollani ettilla wi yeetemo.

5Nirive ntapo nivuhellelliwa,

orive mwaango ni mwanamwaango ddineerokumulliwa.

Misewu ddookhoromana ddineerewookolliwa,

nave ettilla ddookateyakateya ddineeromwaramwarelliwa.

6Athu attheene eneerewoona ovullusa wa Mulluku.’ ”

7 # Mat 12.34; 23.33 Athu anchichi yaawa wa Yohane wi aabatize. Nave aallota wi, “Nyu enowa! Ttaani uulleelleni wi muthawe ollaka wa Mulluku onawanko? 8#Yoh 8.33Mweereke ddeko ddawooniha wi moorukunuwa murima wonanko muteekho onimma ezipaso ddaphaama. Nave muhinallotaka weekhiinyu wi, ‘Abrahamu sika nikhollo nahu.’ Kinimuulleellani wi Mulluku ttuuwora otthattusa mallukwaalla okhalla edduullu dda Abrahamu. 9#Mat 7.19Kottokwa ari khalle vatthi va orive muteekho wi yuuhe woohimma ezipaso ddaphaama wi ovokhelliwe viikho.”

10Athwaayo yaamukoha wi, “Vano, neereke tini?”

11Ahaakhulla wi, “Muthu arina malaya meelli anaphwanella wi amuvahe amoddaayo mukhwaaye oyo ahinna nave muthu arina yoocha aakawellettho akhwaaye.”

12 # Luk 7.29 Ookhomiha musonkho yaawattho wi ebatiziwe nave yaamukoha wi, “Ahuddihi, neereke tini?”

13Olliye ahaakhulla wi, “Muhikhomiheke musonkho mwawaanjerera va nnddo mulamuliweenyu.”

14Akhoto amodda yaamukohattho wi, “Hi neereke tini?” Nave ahaakhulla wi, “Muhaakheke ddeko dda athu moowoopopiha apaalle moowootthera, mukwakhwanihiweke ni mallivellwaanyu.”

15Nave athu yaanamutiyera wi Mesiya* awe nave yahaamba ottikhina dda Yohanooyo wi apaalle ttuukhalla Mesiyooyo. 16Sika Yohane ahaalleella attheenaayo wi, “Kinuubatizani ni maaddi koma animawa mmodda muullupalli ookikhwaranya miyaano. Ngiphwanenlle naari ottaphulla mikwe dda esapato ddaye. Olliyooyo aneerewuubatizani ni Munepa Waweella ni munllo. 17Ookusa etthello m'mattani mwaye wi amuveethe tirigu. Aneeromuhella tirigwaaye mukhokweni mwaye; koma aneerowoosa mallullaayo vamunlloni woohithiima.”

18Yohane aallalleya othenga waphaama moohiyanahiyana waachenjeza athu. 19#Mat 14.3,4; Mrk 6.17,18Navettho aamuhumullulla Herode, oolamulella kaambiiwa aamutthella Herodiyasi, mwaara a mwanamunne ni weera ddeko ddimodda ddinchichi ddoonanara. 20Waanjererattho va ddoonanara eerilleeyennddo, aamuwallella Yohane mundende.

Obatiziwa wa Yesu

(Mat 3.13-17; Mrk 1.9-11)

21Athu attheene ebatiziwe, Yesu nayeenettho aabatiziwa. Avekelleeye, oddullu waahulleya. 22#Gen 22.2; Mas 2.7; Yes 42.1; Mat 3.17; Mrk 1.11; Luk 9.35Nave Munepa Waweella aakitthella va olliye, awooneya wonanko ekhunda. Vano mawu yahiiweya ovenyera oddullu wi, “We tti Mwanaka ookondiwa. Kinnahakallalla ni murimaaka muttheene ni weyaano.”

Makhollwaaye a Yesu

(Mat 1.1-17)

23Yesu aphiyalleeye miyakha 30 ahaamba muttekwaaye woohuddiha. Athu yaaganiza wi aari mwaana a Yosefe, oyo aari edduullu ya Eli, 24Matati, Levi, Meliki, Yanai, Yosefe, 25Matatiyasi, Amosi, Nahumu, Esili, Nagai, 26Maati, Matatiyasi, Semeini, Yoseki, Yoda, 27Yoanani, Resa, Zerubabele, Shalatiele, Neri, 28Meliki, Adi, edduullu ya Kosamu, Elimadamu, Ere, 29Yoswa, Eliezera, Yorimu, Matati, Levi, 30Simiyoni, Yuda, Yosefe, Yonamu, Eliyakimu 31Meleya, Mena, Matata, Natani, Davide, 32Yese, Obedi, Bowazi, Sala, Nashoni, 33Aminadabu, Adimini, Arini, Hezironi, Perezi, Yuda, 34Yakobo, Isaki, Abrahamu, Tera, edduullu ya Nahoro 35edduullu ya Serugi, edduullu ya Rewu, edduullu ya Pelegi, Ebere, edduullu ya Shela, 36Kainani, Arifakisadi, Shemu, Nowa, Lameki, 37Metusela, Enoki, Yaredi, Mahalaleeli, Kainani, 38Enoshi, Seti, Adamu, mwaana a Mulluku.

ಪ್ರಸ್ತುತ ಆಯ್ಕೆ ಮಾಡಲಾಗಿದೆ:

Luka 3: MW2019

Highlight

ಶೇರ್

ಕಾಪಿ