Luka 4

Yesu aneesiwa ni Satana

(Mat 4.1-11; Mrk 1.12,13)

1Yesu aahokollowa ovenyera o Yordani addalliwe ni Munepa Waweella nave aakusiwa ahoollelliwa ni Munepooyo wi aye ochipululuni. 2Wenko aheesiwa ni Satana wa mallapo 40. Mallapo mattheenaayo Yesu khaachille ello, wawi ettalla yaamuvolla voomallihella viwa.

3Vano Satana aallota wi, “Nyu mwaarimi muri Mwaana a Mulluku lamulani mallukwaalla wi etthattuwe yoocha.”

4 # Deu 8.3 Koma Yesu ahaakhulla wi, “Mawu a Mulluku eni,

‘Athu khenakhalla ni okumi

ekaamba ya yoochave.’ ”

5Vano Satana aamukusa Yesu awellana vaddullu nave va enthawi yooyeva aamooniha moomwene mattheene a va ellapo yavatthimva. 6Satana aamulleella wi, “Kineerewuuvaha weyaano olamulellwiiwa muttheene ni ntitimiho niwa nene. Ddittheddenenndda ddaavahiwa wa miyaano nave kinaavaha ayo kinaatthoolleemi. 7Ddittheddenenndda ddinaakhalle ddaawo, wakikokhorella okillapella miyaano.”

8 # Deu 6.13 Yesu aamwaakhulla wi, “Mawu a Mulluku eni, ‘Waallapelleke Apwiya Mullukwaawo nave omurumeyelleke yooyove!’ ”

9Vano Satana aamukusella Yesu o Yerusalemu nave aamwiimesa otthoka va enyumba ya Mulluku nave allota wi, “Nyu mwaarimi muri Mwaana a Mulluku, ivokheni nyookha vatthi ovenyera vaava. 10#Mas 91.11,12Vawi mawu a Mulluku eni, ‘Mulluku aneerewaalamulella angelwaaye dda nyuwaano wi yuutetezeni.’ 11Ennallotattho wi, ‘Eneerewuukaphullani ni mattiiwa wi manyallwaanyu ehiphoreye vamallukuni.’ ”

12 # Deu 6.16 Koma Yesu ahaakhulla wi, “Mawu a Mulluku eni, ‘Ohiiweese Apwiya Mullukwaawo.’ ”

13Vano Satana amallihalleeye omweesa mutthemwene, aamuhiya enthawi vang'ono.

Yesu anaamba muttekwaaye o Galileya

(Mat 4.12-17; Mrk 1.14-15)

14Yesu aahokollweella o Galileya nave masiva a Munepa Waweella yaari ni olliye. Epillaaye yaavuwa mu echigawo mutthemwene. 15Aahuddiha mu enyumba ddamavekello* nave athu attheene yaamutitimiha.

Yesu anakhootiwa o Nazareti

(Mat 13.53-58; Mrk 6.1-6)

16Yesu aaya o Nazareti, nko allelliweeyewo nave va nllapo na Sabata aavollowa mu enyumba yamavekello moollikana ni mmo addollweellelleeye. Ahiimella eerenga mawu a Mulluku. 17Nave aavahiwa yoolembiwa ni namallotella Yesaya. Ayittaphurusalleeye aaphwanya valembiwe wi;

18 # Yes 61.1,2 “Munepa wa Apwiya ari va miyaano,

kaambiiwa yaakizoza miyaano

wi killalleye othenga waphaama wa oohoowa.

Aakirumiha wi killalleye wa oomakiwa wi ettaphulliwe,

ni wa athu oohoona wi yoonettho,

ni wa athu oohoosiwa wi kaavahe murendelle,

19nave killalleye wi muyakha wookwakhwana

oyo Apwiya eneeriiwa yoonihe echifundwiiwa.”

20Nave Yesu aakhuneella yoolembiweeyo, ayihokollosella wa muthu amwinnyallooyo nave aakeraatthi. Athu attheene yaari mu enyumba yamavekello yaamuwehesesa olliyooyo. 21Nave ahaamba waalleella wi, “Mawu a Mulluku muwiiwalleenyu keerengaka ollellwaalla aakwakhwanihiwa.”

22Athu attheene yaallota ddaphaama dda olliyooyo nave voottikhinani ni mawu oophara murima ayo aallotilleeye, yaallota wi, “Olla khe mwaana a Yosefe?”

23Nave Yesu aallota wi, “Kinnadduwella wi muneerokillotella miyaano mwambi wawi, ‘Mullupa murete we, ichirihe weekha’ nave weerilleewe mu Kaperenao weerettho wuno o etawoni yoowaninyweella.” 24#Yoh 4.44Nave Yesu aallota wi, “Ddawoona, kinimuulleellani wi anamallotella khenaakhelliwa mu etawoni yoowaniwa.

25 # 1 Mam 17.1 “Ddawoona, kinimuulleellani wi mwaakhalla anaamukhwelle anchichi mu Israele m'mallaponi a namallotella Eliya, waramilliiwa murimu wa miyakha miraru ni miyeri mitthanu ni mmodda nave waakhalla ettalla yuullupalli mu ellapo ettheeneeyo. 26#1 Mam 17.8-16Namallotella Eliya khaarumihiwe wa mmodda mu Israele koma wa naamukhwelle o etawoni ya Zarefati ellapo ya Sidoni. 27#2 Mam 5.1-14Mwaakhallattho athu amakate anchichi mu Israele m'mallaponi ayo Elisha aariiye namallotella, khaavo muthu eellihiwe ni olliye koma Namanive a o ellapo ya Siriya.”

28Athu attheene yaari mu enyumba yamavekello yiiwalliiwa ddenndda, yaasha murima. 29Vano yaavenya, emukhumihella Yesu otte wa etawoneeyo, eyaana otthoka va mwaango mvo yamakilliiwavo etawoniweeyo wi yamukakhelle vatthi ovenyera vaavo. 30Koma olliye aavira variyari viwa, avenyavo.

Muthu a munepa woonanara

(Mrk 1.21-28)

31Nave Yesu aaya o Kaperenao, etawoni ya mu Galileya, wenko ahaahuddiha athu va nllapo na Sabata. 32#Mat 7.28,29Athu attheene yaattikhina ni ehuddiherwaaye kaambiiwa allota ni olamulello. 33Vano mu enyumba yamavekellwiiwa mwaawa muthu ookhalla ni munepa woonanara. 34Nave aakhuwa moollipiha wi, “Aa! Nuullikalleni tini nyuwaano Yesu a o Nazareti? Munapaalla wi muniiphe hiyaano? Miyaano kohuudduwellani wi nyuwaano tti Aweella a Mulluku!”

35Nave Yesu aawusimwella munepa woonanarooyo wi, “Okhurumuwe nave okhumemo mwa muthooyo!” Vano munepa woonanarooyo waamukuha vatthi muthooyo vahoollo va athu attheene, okhumamo mwa muthooyo ohimuvoreyille.

36Athu attheene yaattikhina enallota wa mmodda ni mukhwaaye wi, “Mawu yaalla tti awiidde? Ni olamulello navettho masiva muthu yoolla annalamulella minepa ddoonanara nave ddinakhuma!” 37Nave epilli ya Yesu yaavuwa virive veko mu echigawommo.

Yesu anaachiriha athu anchichi

(Mat 8.14-17; Mrk 1.29-34)

38Yesu aavenyamo mu enyumba yamavekello aya mpa mwa Simoni. Amoottonaaye a Simonooyo yaamavoriiwa ooviha mwiilli wunchichi nave Yesu aavekiwa wi aachirihe. 39Aaya iimella vakhuviru ni mutthiyanooyo nave aalamula oviha mwiillinko wi omuhiye. Nave aachirihiwa. Enthawi yeeyo aavenya aamba waarumeyella ni ddoocha.

40Misikuwa nndduwa nivollowaka athu attheene yaarina akhwiiwa oovoriiwa ereta ddoohiyanahiyana yaawaana wa Yesu. Vano ahiiyaatthi mattaaye va attheenaayo, aachiriha. 41Minepa ddoonanarattho ddaakhuma mwa athu anchichi, ddikhuwaka wi, “Nyu tti Mwaana a Mulluku!”

Koma Yesu aaddisimwella minepa nnddo wi ddimaalle vawi ddaanamudduwella wi olliyooyo tti Mesiya* allotelliwe khalle.

Yesu anallalleya mu enyumba ddamavekello

(Mrk 1.35-39)

42Ohinase Yesu aavenya o etawoninko nave aya vanipuroni nayeekha. Athu yaamwaashaasha nave yamphwanyilliiwa, yaapaalla omutchinga wi ahaavenyerevottho. 43Koma aallota wi, “Tti ddookiphwanella wi killalleye othenga waphaama wa omwene wa Mulluku mu matawoni amoddaayottho kaambiiwa Mulluku akirumalle wi keere yeeyo.”

44Sika aallalleya mu enyumba ddamavekello dda mu echigawo ettheene ya Yudeya.

ಪ್ರಸ್ತುತ ಆಯ್ಕೆ ಮಾಡಲಾಗಿದೆ:

Luka 4: MW2019

Highlight

ಶೇರ್

ಕಾಪಿ