यूहन्ना 19

1“तां पिलातुस ने यीशु जो पकड़वाई करी कोड़े मारणे रा हुकम दित्ता। 2सिपाईयाँ ने कंडेया री डाली जो मोड़ी करी इक्क मुकुट बणाया अते तिन्हेरे सिर पर रख्खी दित्तेया, अते तिन्हा जो बैगणी रांग रे कपड़े पुआये, 3अते तिन्हा का आई करी बोलणा लगे, ओ यहूदियां रे राज्जे, नमस्कार!” ते तिन्हा जो चपेड़ां मारी। 4पिलातुस इक्क वरी फिरी बाहर आया अते मणूआं जो बोल्लेया, दिख्खो, मैं तिसजो तुसा का फिरी बाहर लेई आन्दा ताकि तुसा जाणी सकण कि मैं तिस बिच कोई गलती नी मिल्ली। 5“तां से यीशु जो बाहर लेई आये अते तिन्हा ने कंडेया रा मुकुट अते बैगणी रांग रा चोग्गा पाये रे थिया; अते पिलातुस ने तिन्हा जो बोल्लेया, इस मणू जो दिख्खो!” 6जां तिन्हा ने दिख्खेया तां बड्डे पुरोत्तां अते मन्दिर रे पैहरेदारां ने चिन्डा मारी करी बोलणा लग्गे, इसजो सुली पर चढ़ाओ! इसजो सुली पर चढ़ाई देयो! पिलातुस ने तिन्हा जो बोल्लेया, तुसा ही इसजो लेई जाओ अते सुली पर चढ़ाई देयो, किजोकी मेरे जो इस बिच कोई गलती नी मिल्ली। 7यहूदी अधिकारियां ने तिसजो जवाब दित्तेया, असा रे नियम हिन जे बोलदे हिन, इसजो मरणा पैणा किजोकी इसने अप्पु जो परमेश्वर रा पुत्तर दस्सेया है। 8अवे जां पिलातुस ने ए गल्लां सूणी, तां से बड़ा डरी गेया। 9अते फिरी राजपाल रे किले अन्दर जाई करी यीशु जो बोल्लेया, तू कुते का आया? पर यीशु ने तिसजो कोई जवाब नी दित्तेया। 10फिरी पिलातुस ने तिसजो बोल्लेया, मेरे कने किजो नी है बोलदा? कै तू मेरे कने गल्ल नी करणा चाह्‍ंदा? कै तू नी जाणदा अते तिज्जो सुली पर चढ़ाणे ते छडणे रा भी हक्क मेरे जो है। 11यीशु ने जवाब दित्तेया, जे अगर तिज्जो परम परमेश्वर का ए हक्क नी मिलदा, तां तेरा मेरे पर कोई हक नी हुन्दा। इधेरे तांइ मेरे जो तेरे हत्थां पकड़वाए रा है, से तेरे का भी बड्डा पापी है।#19:11 इत्ते यीशु मसीह बड्डे पुरोत्तां रे बारे बिच बोल्लेया करदे थिये जिन्हा ने तिन्हा जो पकड़वाया थिया। 12ए सुणी करी पिलातुस यीशु जो छड्डणे री कोसीस करणा लग्गेया, पर यहूदी चिंडा मारी-मारी करी बोलणा लग्गे, जे तुसा इसजो छड्डी दिन्गे, तां तुसा सम्राट रे दोस्त नी हिन, कोई भी जे अप्पु जो राज्जा बोलणे रा दावा करदा, से रोम रे सम्राट रे खिलाफ है। 13ए गल्लां सुणी करी पिलातुस यीशु जो बाहर उस जगाह् लेई गेया, जिस जो कि पत्थर रा चबूतरा बोल्लेया जांदा थिया, अते इब्रानी भाषा बिच गब्बता अते तित्ते हिसाब-किताब री गद्दी पर बेई गेया। 14फसह रे त्याहार रे बेल्ले, विश्राम दिन री तयारी रे दिन रे कोई बारा बजे रे लगभग#19:14 यहूदी समय सारणी रे हिसाब कने छठमे घंटे रे लगभग।, पिलातुस ने यहूदी लोक्कां जो बोल्लेया, ए रेया तुसा रा राज्जा। 15पर से फिरी चिंडा मारणा लग्गे, इसजो मारी देयो! इसजो मारी देयो! इसजो सुली पर चढ़ा़ओ! पिलातुस ने तिन्हा जो बोल्लेया, कै तुसा चाह्‍ंदे कि मैं तुसा रे राज्जे जो सुली पर चढ़ाऊँ? बड्डे पुरोत्तां ने जवाब दित्तेया, सम्राट जो छड्डी असा रा होर कोई राज्जा नी है। 16फिरी पिलातुस ने यीशु जो सुली चढ़ाणे तांइ उन्हेरे हवाले करी दित्ता।

सुली पर चढ़ा़या जाणा

17तां सिपाई यीशु जो लेई गे, अते यीशु अपणी सुली चुक्की करी यरुशलेम सहर का बार, तिस जगाह् जो लेई गे जिस जो कि खोपड़ी री जगाह् बोल्लेया जांदा थिया, अते इब्रानी भाषा बिच गुलगुता।

18तित्ते तिन्हा ने यीशु जो दो होर जणेया कने सुली पर चढ़ाया, इक्क जो सीद्दे हत्थ पास्से, अते दूये जो पुठ्ठे हत्थ पास्से ते मझाटे यीशु जो 19पिलातुस ने इक्क तख्ती पर लिखी करी सुली पर लगाई दित्तेया, अते तिस बिच ए लिख्खे रा थिया, नासरत रे यीशु, यहूदियां रा राजा। 20ए तख्ती बड़े जणे यहूदियां ने पढ़ेया, किजोकी से जगाह् जित्ते यीशु जो सुली पर चढ़ाया गेया थिया, यरुशलेम कने ही थी अते से तख्ती इब्रानी, लतीनी, ते यूनानी भाषा बिच लिखी गई थी। 21तां यहूदियां रे बड्डे पुरोत्तां ने पिलातुस जो बोल्लेया, यहूदियां का राजा मत लिख्खो पर ए कि तिसने बोल्लेया, मैं यहूदियां रा राजा है, 22पिलातुस ने जवाब दित्तेया, मैं जे लिख्खी दित्तेया, से लिख्खी दित्तेया। 23जां सिपाई यीशु जो सुली पर चढ़ाई बैठ्ठे, तां तिन्हा ने यीशु रे कपड़े चार हिस्से बिच बंड्डी करी अप्पु मिते लेई लित्ते, तिन्हेरे चोग्गे बिच कोई सिलाई नी थी पर से उप्पर का थल्ले तिकर पूरा बुणे रा थिया, 24इधेरे तांइ तिन्हा ने अप्पु-मिते बोल्लेया, इसजो फाड़ो मत बल्कि इस तांइ पर्ची पांदे कि कुन्ने लैणा, ए इधेरे तांइ होया ताकि पवित्रशास्त्र बिच लिख्खे रा ए वचन पूरा हो,

“तिन्हा ने मेरे कपड़े अप्पु-मिते बंड्डी लेह् ते मेरे कपड़े तांइ पर्ची पाई।”

इधेरे तांइ सपाईयां इय्यां कित्तेया। 25यीशु री सुली रे नेड़े तिन्हेरी मां, अते तिन्हरी मां री भैण, क्लोपास री लाड़ी मरियम ते मगदला सहर री मरियम खड़ितेरी थी। 26जां यीशु ने अपणी मां ते तिस चेल्‍ले जो जिस कने से प्यार करदे थिये, नेड़े खड़ितेरा दिख्खेया तां अपणी मां जो बोल्लेया, ओ मां, दिख, ए तेरा पुत्तर है। 27फिरी यीशु ने तिस चेल्‍ले जे तिन्हेरा नेड़े खड़ित्ते रा थिया, तिसजो बोल्लेया, अज्ज का ए तेरी मां है, अते तिस्सी बेल्ले से चेल्ला मरियम जो अपणे घरे लेई गेया।

यीशु रा मरणा

28यीशु जाणदे थिये कि तिन्हा ने अपणा मकसद पूरा करी लित्ते रा है, ते इधेरे तांइ कि पवित्रशास्त्र बिच लिख्खे री गल्ल पूरी हो तिन्हा ने ए बोल्लेया, “मैं प्यासा है।”

29तित्ते सिरके कने भरितेरा इक्क भांडा रख्खे रा थिया, अते कुसकी ने इक्क पनसोख्ता#19:29 पनसोख्ता=स्पंज जो सिरके बिच पूरा डूबाई करी जूफे री डाली पर रख्खी करी, तिन्हेरे मुँह कने लगाया। 30जां यीशु ने से सिरके जो चख्खेया, तां बोल्लेया, पूरा होया, तां तिन्हा ने अपणा सिर झुकाई करी अपणे प्राण छड्डी दित्ते।

भाल्ले कने बेधेया जाणा

31से फसह री तयारी रा रोज अते विश्राम दिन भी थिया, ते तिस दिन लास सुली पर लटकी ना रेयो (किजोकी से विश्राम दिन बड़ा खास दिन थिया), इधेरे तांइ यहूदी लोक्कां ने पिलातुस जो बोल्लेया कि से हुकम देंन कि इन्हेरी लत्ता भन्नी दित्ती जाण अते तिन्हेरी लास तित्ते का हटाई दित्ती जाण।

32अते सिपाईयाँ ने आई करी पैल्ले, पैल्ले वाले री अते फिरी दूज्जे वाले री जे यीशु कने सुली पर चढ़ाये थिये, लत्ता भन्नी 33पर जां यीशु का आई करी दिख्खेया कि से मरी गेरे हिन, तां तिन्हेरी लता नी भन्नी 34पर तिन्हा बिच का इक्क सिपाई ने यीशु री बख्खी पर बरछा मारी दित्तेया, अते तिस्सी बेल्ले तिस बिच का बिच का खून अते पाणी निकलेया। 35जिनिये ए दिख्खेया थिया, तिसेरी गवाई सच्ची है अते से जाणदा है कि से सच बोल्लेया करदा है, ताकि तुसा भी विश्वास करो। 36ए गल्लां इधेरे तांइ होई कि पवित्रशास्त्र बिच लिख्खे रा वचन पूरा हो,

“तिसेरी कोई हड्डी तोड़ी नी जाणी।”

37फिर पवित्रशास्त्र री इक्क होर हिस्से बिच लिख्खे रा है, जिस जो तिन्हा ने बरछे कने बेधेया, तिन्हा तिसजो तकणा।

यीशु रा दब्बेया जाणा

38इन्हा गल्लां रे बाद अरिमतिया ग्रां रे यूसुफ ने जे यीशु रा चेल्ला थिया, पर यहूदी अधिकारियां रे डर मारे इस गल्ल जो छुपाई रखदा थिया, तिसने पिलातुस का यीशु री लास लेई जाणे तांइ बिनती कित्ती अते पिलातुस ने तिसेरी अर्जी सूणी, अते से आई करी तिन्हेरी लास लेई गेया।

39अते नीकुदेमुस भी, जे पैल्ले यीशु का राती आया थिया, लगभग से तेत्ती किलो इत्र#19:39 लगभग पंजाह् सेर इत्र वाला तेल अते एलवा रा घोल लियाया। 40तां तिन्हा ने यीशु रे सरीर जो लेया अते यहूदी समाज रे दब्बणे रे रीवाज रे हिसाब कने, तिस छैल मुस्क वाली चीज कने (टलू बिच) कपड़े बिच लपेटेया। 41तिस जगाह् रे नेड़े जित्ते यीशु जो सुली पर चढ़ाया गेया थिया, इक्क बगीच्चा थिया, अते तिस बगीच्चे बिच इक्क नौई कब्र थी, जिस बिच हल्ले तांइ कुसकी जो भी नी रख्खे रा थिया। 42किजोकी से यहूदी लोक्कां रे विश्राम दिन रे तयारी रा दिन थिया, अते से कब्र बड़े नेड़े थी, इधेरे तांइ तिन्हा ने यीशु जो उस्सी बिच ही रख्खी दित्तेया।

ಪ್ರಸ್ತುತ ಆಯ್ಕೆ ಮಾಡಲಾಗಿದೆ:

यूहन्ना 19: CDHNT

Highlight

ಶೇರ್

ಕಾಪಿ