यूहन्ना 18

यीशु रा पकड़वाया जाणा

1जां यीशु प्रार्थना करी बैठ्ठे, तां से अपणे चेल्‍लेयां कने किद्रोन नाले रे पार इक्क बगीचे बिच चली गे। 2यहूदा भी जिनिये बाद बिच यीशु जो पकड़वाई दित्तेया थिया, से भी तिस जगाह् रे बारे बिच जाणदा थिया किजोकी यीशु अपणे चेल्‍लेयां कने तित्ते जांदे रैहन्दे थिये। 3इधेरे तांइ यहूदा रोमी सपाईयां रा इक्क झुन्ड़ अते बड्डे पुरोत्तां ते फरीसियां रे भेज्जे रे मणू, अते मन्दिर रे पैहरेदारां कने मशाल, दीये, अते हथियार लेई करी तित्ते आई गेया। 4फिरी यीशु जे सब किच्‍छ जाणदे थिये कि तिन्हा कने कै होणे वाला है, अग्गे आये अते तिन्हा जो बोल्लेया, तुसा कुस जो तोप्पेया करदे हिन? 5उन्हा ने यीशु जो जवाब दित्तेया, नासरत कस्बे रे यीशु ने तिन्हा जो बोल्लेया, से मैं है तित्ते तिन्हा जो पकड़वाणे वाला यहूदा भी तिन्हा कने खड़ितेरा थिया 6जिय्यां ही यीशु ने तिन्हा जो ए बोल्लेया से मैं है से पीच्छे हटी करी थल्ले पेई गे। 7तां यीशु ने तिन्हा का फिरी पूच्छेया, तुसा कुस जो तोप्पेया करदे हिन? तिन्हा बोल्लेया, नासरत कस्बे रे यीशु जो। 8यीशु ने जवाब दित्तेया, मैं तुसा जो बोल्लेया, से “मैं है” जे तुसा मेरे जो तोप्पेया करदे हिन तां इन्हा जो जाणा देयो। 9ए तिन्हा ने इधेरे तांइ बोल्लेया कि से वचन पूरा हो जे तिन्हा ने बोल्लेया थिया, मैं उन्हा बिच का कुसकी जो नी गुआया, जे तुसा मेरे हवाले कित्ते थिये। 10फिरी शमौन पतरस ने, जिस का तलवार थी, अपणी तलवार निकाली ते प्रधान पुरोत्त रे नौक्करां रा सीद्दा कान्न उड़ाई करी जख्मी करी दित्ता तिस नौक्कर रा नां मलखुश थिया। 11फिरी यीशु ने पतरस जो बोल्लेया, अपणी तलवार म्यान बिच रख्खी लै। कै मैं दुख रा से कटोरा नी पीयां जे परम पिता ने मेरे जो दित्तेया है?

हन्ना रे सामणे यीशु

12फिरी रोमी सपाईयां अते तिन्हेरे सुबेदारां, ते यहूदियां रे मन्दिर रे पैहरेदारां ने यीशु जो पकड़ी लेया।

13अते तिन्हा जो बन्नी करी पैल्ले हन्ना का लेई गे जे उस साल रे प्रधान पुरोत्त काईफा रा सौरा थिया 14ए काईफा सेह्ई मणू थिया जिनिए यहूदी मन्त्रियां जो सलाह दित्ती थी कि सब मणूआं तांइ इक्क रा मरणा खरा है।

पतरस रा मन्हा करणा

15शमौन पतरस अते इक्क दुआ चेल्ला यीशु रे पीच्छे चली पे। प्रधान पुरोत्त तिस दूए चेल्‍ले जो अच्छी तरह जाणदा थिया, इधेरे तांइ से यीशु कने बड्डे पुरोत्त रे अंगणा अन्दर चली गेया।

16पर पतरस बाहर दरवज्जे का ही रुकी गेया। फिरी प्रधान पुरोत्त री जाण-पछाण वाला चेल्ला बाहर गेया अते पैहरेदार जो बोल्ली करी पतरस जो अन्दर लेई आया। 17तिस पैहरेदारणी ने पतरस जो बोल्लेया, कुते तू भी इस मणू रे चेल्‍लेयां बिच का इक्क तां नी? पतरस ने जवाब दित्तेया, ना, मैं नी है। 18किजोकी ठंड बड़ी थी नौक्कर अते मन्दिर रे पैहरेदार आग्ग बाली करी तित्ते खड़े आग्ग तप्पेया करदे थिये, पतरस भी तिन्हा कने खड़ा थिया अते आग्ग तप्पेया करदा थिया।

बड्डे पुरोत्त रा यीशु कने पुछताछ करणा

19फिरी प्रधान पुरोत्त ने यीशु का तिन्हेरी उपदेस अते चेल्‍लेयां रे बारे पूच्छेया।

20यीशु ने तिसजो जवाब दित्तेया, मैं हमेसा लोक्कां रे सामणे खुली करी गल्ल कित्ती, मैं हमेसा सभास्थल बिच अते मन्दिर बिच, जित्ते सारे यहूदी इकट्ठा हुन्दे उपदेस दित्ती है मैं किच्‍छ भी लुकाई करी नी बोल्लेया 21फिरी तू मेरे का किजो पूच्छेया करदा है? मैं कै बोल्लेया है उन्हा का पुच्छ जिन्हा मेरे जो सूणेया मैं कै बोल्लेया, तिन्हा जो पता है 22जां यीशु ने ए बोल्लेया तां मन्दिर रे इक्क पैहरेदार ने जे तित्ते ही खड़ा थिया, यीशु जो इक्क चांड मारी करी बोल्लेया, तू प्रधान पुरोत्त कने इय्यां गल्ल करणे री हिम्मत किय्यां कित्ती? 23यीशु ने तिसजो जवाब दित्तेया, जे अगर मैं कोई बुरी गल्ल कित्ती तां तिसजो साबित कर अते दस्स कि उस बिच बुरा कै थिया, अते जे मैं ठीक है बोलदा तां तू मेरे जो मारदा किजो है? 24फिरी हन्ना ने तिन्हा जो बन्ने होए रे ही प्रधान पुरोत्त काईफा का भेज्जी दित्तेया।

पतरस रा दोबारा मन्हा करणा

25जां शमौन पतरस खड़ी करी आग्ग तप्पेया करदा थिया तां तिसका पूच्छेया, कुदखी तू भी इसेरे चेल्‍लेयां बिच का तां नी है? तिनिए इस गल्ल का मन्हा कित्तेया तिन्ने बोल्लेया ना मैं नी है 26प्रधान पुरोत्त रे नौक्करां बिच का इक्क सेवक ने जे उस मणू रा रिस्तेदार थिया जिसेरा पतरस ने कान्न उड़ाया थिया, पूच्छेया, दस्स कै मैं तिज्जो यीशु कने बगीचे बिच नी दिख्खेया थिया? 27पतरस फिरी मुकरी गेया, अते तिस्सी बेल्ले मुर्गे ने बांग देई दित्ती।

पिलातुस रे सामणे यीशु

28फिरी से यीशु जो काईफा रे किले का रोमी राजपाल रे किला लेई गे। भ्याग रा बेल्ला थिया यहूदी मणू राजपाल रे किला बिच अप्पु नी जाणा चाह्‍ंदे थिये कि कुदखी से भिठ्ठे नी होई जाओ, अते फसह री रोट्टी नी खाई सको।

29तां पिलातुस उन्हा का बाहर आया अते बोल्लेया, तुसा इस मणू पर कै इल्जाम लगाया करदे हिन? 30जवाब बिच तिन्हा ने तिसजो बोल्लेया, जे ए बेकसूर हुन्दा तां असी इसजो तुसा रे हवाले किजो करणा थिया? 31पिलातुस ने तिन्हा जो बोल्लेया, तुसा इसजो लेई जाओ अते अपणे नियम रे कानून रे हिसाब कने इसेरा हिसाब-किताब करो। यहूदी अधिकारियां ने तिसजो बोल्लेया, असा जो कुसकी जो मौत री सजा दैणे रा हक नी है। 32ए इधेरे तांइ होया कि यीशु री गल्ल पूरी होई जाओ जे तिन्हा ने अपणे मरणे रे बारे बोल्ली थी, कि तिन्हेरी मौत कुस तरिक्के कने होणी। 33तां पिलातुस अपणे किले बिच वापिस चली गेया अते यीशु जो सदवाई करी तिन्हा का पूच्छेया, कै तू यहूदियां रा राजा है? 34यीशु ने जवाब दित्तेया, कै तू ए गल्ल अपणे पास्से का बोल्लेया करदा है या मेरे बारे अन्दर होरनियाँ ने तिज्जो दस्सी हिन? 35पिलातुस ने जवाब दित्तेया, कै तू सोचदा कि मैं यहूदी है? तेरे मणूआं ने अते बड्डे पुरोत्तां ने तिज्जो मेरे हवाले कित्तेया है। तैं कै है कित्ते रा? 36यीशु ने जवाब दित्तेया, मेरा राज इत्ते रा नी है जे मेरा राज इत्ते रा हुन्दा तां मेरे पीच्छे चलणे वाले ते मेरी शिक्षा पर चलणे वालेयां ने मेरे जो यहूदियां रे हवाले दैणे का बचाणे तांइ लड़ाई करणी थी पर असलियत बिच मेरा राज इत्ते रा नी है। 37पिलातुस ने तिन्हा जो बोल्लेया, तां तू राज्जा है? यीशु ने जवाब दित्तेया, तू बोलदा कि मैं राज्जा है मैं इधेरे तांइ पैदा होया ताकि सच्चाई री गवाई देयां हर इक्क से मणू जे सच्चाई रे पास्से है, से मेरी गल्लां सूणदा। 38पिलातुस ने यीशु जो बोल्लेया, सच कै है?

मौत री सजा रा हुकम

ए बोल्ली करी से फिरी यहूदी अधिकारियां का गेया अते उन्हा जो बोल्लेया, मेरे जो तां इस मणू अन्दर कोई गल्ती नी मिल्ली। 39अते तुसा रा ए रीवाज है कि फसह रे त्याहार रे मौके बिच मैं तुसा रे तांइ कुसकी इक्क जो छड्डी देयां।

तां कै तुसा चाह्‍ंदे कि मैं इस यहूदियां रे राज्जे जो तुसा रे तांइ छड्डी देयां? 40पर से चिन्डा मारी करी बोल्णा लगे, इसजो नी, बल्कि असा तांइ बरअब्बा जो छड्डी देयो (बरअब्बा इक्क डाक्कू थिया।)

ಪ್ರಸ್ತುತ ಆಯ್ಕೆ ಮಾಡಲಾಗಿದೆ:

यूहन्ना 18: CDHNT

Highlight

ಶೇರ್

ಕಾಪಿ