JOHANA 6
6
Kebaei bik elfusiek mut
1Kingobata tuguchu kwo Jesu bitet age ne bo araraitab Galili, noto ko araraitab Tiberia. 2Ak kiisub inendet tuiyet ne o, amu kigeer kaborunoik che kiyachi che miandos. 3Ak kitogosta Jesu tulwet, kwo koteb ng’ony eng’ oloto koboto alamalyennyi. 4Ak kiga rik paska, igorta ne bo Yahudik. 5Kingoyot met anyun Jesu, kogeer tuiyet ne o konyonjin inendet, kolenji Pilipu, Kiale ano makatinik si koam bichu? 6Kimwaei ni kotieme inendet: amu kiingen inendet kit ne machei koyai. 7Kowolji Pilipu inendet kolenji, Mayamei ichek makatinik che bo denarisiek bogol aeng’, si konyor age tugul kitigin. 8Kolenji inendet age ne bo alamalyennyi, Andrea, ng’etab kametab Simon Petero, 9Mi yu werit age, ne tinyei makatinik mut che bo sairi, ak njirenik aeng’: ago yamei nee anyun chuto eng’ bik che te chu? 10Kimwa Jesu kole, Ochob bik kobuur. Ak kimi suswek che chang’ oloto. Kiibuur anyun bik; ki olo bo elfusiek mut murenjoto. 11Kinam anyun Jesu makatinik; ak kingo kagogoito kongoi, koropchi icheget che kitebyei ng’ony; ak ko u noto agichek njirenik che te che machei. 12Ak ye kingobiyong’so, kolenji alamalyennyi, Oyum katuganik che kang’et, si mabet kiy. 13Koyum anyun katuganichato, ak konyiit kerebonik taman ak aeng’ katuganichato bo makatinik mut che bo sairi, che kang’etune icheget che kaamisiei. 14Ye kingogeer anyun bichoto kaborunet ne kayai, kole, Ni maotiot iman ne nyonjin ng’ony.
Kowendi Jesu taban inegei, kowendote beek barak
15Kingonai Jesu kole negit kobwa si konam inendet eng’ kimnatet, si koyai inendet koek laitoriat, kwo kogeny tulwet inegei.
16Ak ye kingoek lagat, kochortagei alamalyennyi koba araraita; 17ak kilany moingetab beek, kolandae araraita koba Kapernaum. Ak kiga koimenit, ak kitom koit Jesu ole mi ichek. 18Ak kiwasegei araraita amu kiusei usonet ne o. 19Ye kingo kagoba anyun eng’ araraita ole bo maelisiek somok anan ko somok ak kebeber, kogeer Jesu kowendoti eng’ araraita barak, ak korikyin moinget: ak kiiyweis. 20Ago kilenji ichek, Ane; amoiywei. 21Kocham anyun kotaach inendet eng’ moinget: ak kiit moinget ngunoto emet ole kibendi.
Kocheng’ei bik kaborunet
22Ki betut ne kiisubi noto kogeer tuiyet ne kitononi eng’ araraita bitonin, kole mami moinget age oloto, kobate agenge, ak kima lany Jesu moingonoto koboto alamalyennyi, ago kiba alamalyennyi ichegei 23(ago kibwa moingonik alage eng’ Tiberia ye negite koret ole kiame makatinik ye kingo kagogoito Kiptaiyat kongoi): 24Ye kingogeer tuiyet anyun kole mami Jesu oloto, anan alamalyennyi, kolany ichek moingonik, ak kobwa Kapernaum, kocheng’onu Jesu.
Makatiatab Sabon
25Ak ye kingonyor inendet eng’ bitet age ne bo araraita, kolenji, Rabbi, koinyone au oli? 26Kowolji Jesu ichek kolenji, Amwawok, iman, iman, ale, Ocheng’a, ma amu koogeer kaborunoik, ago amu kooam makatinik ak obiyong’se. 27Amoboisie agobo amitwogik che begu, ago oboisie agobo amitwogik che tebyei agoi sobondab koigeny, che konok Weritab chi: amu kigong’och inendet Kwanda, ne inendet ko Jehovah. 28Kilenji anyun ichek inendet, Kiyai nee, si kobiit keyai boisionik che bo Jehovah? 29Kowolji Jesu kolenji, Ni boisietab Jehovah, ale, oyan inendet ne kiiyogu Jehovah.
30Kilenji ichek inendet anyun, Nee kaborunet ne iyae, si kegeer, ak kiyanin? Iyae nee? 31Kiam kwanisiekyok mana eng’ ong’atet; ko u ye kigisir kele, Kiigochi ichek makatiat ne bunu kipsengwet koam.
32Kolenji anyun Jesu ichek, Amwawok, iman, iman, ale, Kima ko Musa ne kigonok makatiandanato kibunu kipsengwet; ago konok Baba makatiat ne bo iman ne bunu kipsengwet. 33Amu makatiat ne bo Jehovah ko noto chorugei eng’ kipsengwet, ak kogochi ng’ony sobondo. 34Kolenji anyun ichek inendet, Kiptaiyandani, konech makatiandanito koigeny. 35Kolenji Jesu ichek, A makatiat ne bo sobon: inendet ne nyonjina ko magasei rubet agoi, ak inendet ne iyana ko maamei melel agoi. 36Ago kaamwawok ale, koogeera, ama oyan. 37Bwanjina tugul che kona Kwanda; ak inendet ne nyonjina ko maone matiny. 38Amu kiachoruge eng’ kipsengwet, ma si ayai magennyu, ago magetab inendet ne kiiyokwa. 39Ak ni magetab inendet ne kiiyokwa, ale, eng’ tugul che kigona inendet, ko mabetena agot agenge, ago tatun ang’eeti eng’ betutab let. 40Amu ni magetab Baba, ale chi age tugul ne keerei Werit, ak koyan inendet, konyoru sobondab koigeny; ak ang’eeti inendet eng’ betutab let.
41Kiing’unyng’ung’so anyun Yahudik, agobo inendet, amu kimwa kole, A makatiat ne kichorgei eng’ kipsengwet. 42Ak kile, Tos ma Jesu nito, weritab Josep, ne kingen kwandanyi ak kamet? Lyon anyun si komwa kole, Kiachoruge eng’ kipsengwet? 43Kowolji Jesu anyun kolenji, Among’unyng’ung’se okwege eng’ okwege. 44Maimuchi chi konyonja, ama ichuut Kwanda ne kiiyokwa: ak ang’eeti inendet eng’ betutab let. 45Kigisir eng’ maotik, Ak kineti tugul eng’ Jehovah. Age tugul ne kagogas eng’ Kwanda, ak kagonetgei, konyonjina. 46Molen kigogeer chi age tugul Kwanda, kobate inendet ne kibunu Jehovah, kigogeer inendet Kwanda. 47Amwawok, iman, iman, ale, Inendet ne iyani, kotinyei sobondab koigeny. 48A makatiat ne bo sobon. 49Kiam kwanisiekwok mana eng’ ong’atet, ak kibek. 50Ni makatiat ne chorugei eng’ kipsengwet, ne ngo am chi, ko mameei. 51A makatiat ne sobei ne kichorgei eng’ kipsengwet: ngo am chi age tugul makatiandani, kosobei koigeny: ee, ak bortanyu makatiat ne agoitoi agobo sobondo ne bo ng’ony.
52Kiborio anyun Yahudik ichegei, kole, Imuktoi ano chichi kogonech bortanyi keam? 53Kolenji Jesu anyun ichek, Amwawok, iman, iman, ale, Ngot ko moam bortab Weritab chi ak oee korotikyik, ko motinye sobondo eng’ oring’wong’. 54Inendet ne amei bortanyu ak koeei korotikyuk kotinyei sobondab koigeny; ak ang’eeti inendet eng’ betutab let. 55Amu amdit iman bortanyu, ak korotikyuk ko che kieei iman. 56Inendet ne amei bortanyu ak koeei korotikyuk komenya, ak amenye inendet. 57Ko u ye kiiyokwa Kwanda ne sobei, ak asobe amu Kwanda; u noto inendet ne ama, sobei agine amu ane. 58Ni makatiandanato ne kichorgei eng’ kipsengwet: ma ko u ye kiam kwanisiek ak kobek: inendet ne amei makatiandani kosobei koigeny. 59Kimwa tuguchu eng’ sunagogit, kota konetisiei eng’ Kapernaum.
Alamalyet ne tinyei saget
60Ye kingogas ni che chang’ eng’ alamalyennyi, komwa kole, Uui ng’olyondoni: imuchi ng’o kogas? 61Ago kinai Jesu eng’ orinnyi kole, Ing’unyng’ung’jin alamalyennyi ng’olyondonito, kolenji ichek, Tos kagonachak nito? 62Teptoi ano anyun ngot ko tun ogeer Weritab chi kotogostoi ole kimi atkinye? 63Tamirmiriet ne igoitoi sobondo; matilei kiy borto: tamirmiriet ak sobondo ng’alek che kaamwawok. 64Ago mitei alak eng’ okwek che maiyani. Amu kinai Jesu koboch taunet icheget che maiyani, ak inendet ne kimachei kong’wekta inendet. 65Ak kile, Noto kamwawok, ale, magoi imuch chi konyonja, kobate ne igochin Kwanda.
Kong’anyei Petero kole Jesu ko Kristo
66Koboch yoto kochuchuigei che chang’ che bo alamalyennyi, amata kobendat ak inendet. 67Kilenji anyun Jesu choto taman ak aeng’, Obendi ak okwek? 68Kowolji anyun Simon Petero, kolenji, Kiptaiyandani, kibendi ole mi ng’o? Itinye ng’alek che bo sobondab koigeny. 69Ak kigiyan ak kingen kele i Ne Tilil ne bo Jehovah. 70Kowolji Jesu ichek kolenji, Kima alewenok taman ak aeng’, ak oindet age eng’ okwek? 71Kimwaei anyun agobo Judas ne bo gab Simon Iskariot, amu ine ne kimachei kong’wekta inendet, ne ki agenge eng’ taman ak aeng’.
ಪ್ರಸ್ತುತ ಆಯ್ಕೆ ಮಾಡಲಾಗಿದೆ:
JOHANA 6: BUKUIT
Highlight
ಶೇರ್
ಕಾಪಿ
Want to have your highlights saved across all your devices? Sign up or sign in
God's word open for all
©Bible Society of Kenya, 2020
