JOHANA 5
5
Chi ne miani ne kimi tamboiyotab Betesda
1Kingobata tuguchu kobiit igorta ne bo Yahudik; ak kotogosta Jesu Jerusalem. 2Ak mitei Jerusalem tamboiyot, ne kainennyi ko Betesda eng’ kutitab Hebranik, ye negite ormarichetab kechirek; kitinyei keterusiek mut. 3Kiruitos eng’ oloto bik che chang’ che kimiandos, che koriotin, che ing’waldos, che meiyotin, [kogeni wasetab beek: 4amu kichorjingei malaikaiyat ne bo Kiptaiyat tamboiyot betusiek alak, kowendi kowasei beek: si kisoob chi age tugul ne sib kochutei ko kawasgei beek, eng’ miando age tugul ne kitinyei.] 5Ak kimi yoto chito age, ne kiga komian kenyisiek sosom ak sisiit. 6Ak ye kingogeer Jesu chichoto koruei, ak konai kole ki u noto eng’ betusiek che chang’, kolenji, Imache kisoobin? 7Kowolji chito ne miani kolenji, Kiptaiyandani, matinye chi, ne indea tamboiyot, ko kawasgei beek: amu ye ta anyone, kosib kochortagei age. 8Kolenji Jesu anyun, Ng’eet, ib itogung’ung’, ak iwe. 9Ak kisob chichoto ngunoto, ak koib itogunnyi ak kwo. Ak ki sabato betunoto. 10Kilenji anyun Yahudik inendet ne kagisoob, Betutab sabato nito, ma chamdaat eng’ ng’atutik iib itogung’ung’.
11Ago kiwolji ichek kolenji, Kamwawa inendet ne kagosooba, kolenja, Ib itogung’ung’, ak iwe. 12Koteebe anyun bichoto inendet kole, Ng’o chichoto kamwaun kole, Ib itogung’ung’ ak iwe? 13Ago kima nai inendet ne kagisoobi kole ka ng’o: amu kiga kwo Jesu, amu kimi bik che chang’ oloto. 14Kingobata noto konyorji Jesu inendet hekalut, ak kolenji, Keero, kagisoobin: amatata iyai tengek, si manyonjin kit age ne ya ne siirei ni. 15Kiwa anyun chichoto, ak komwachi Yahudik kole Jesu ne kagosoob inendet.
16Kius anyun Yahudik Jesu amu ng’olyondonito, amu kiyai tuguchu eng’ betutab sabato. 17Ak kiwolji Jesu kolenji, Boisiei Baba agoi kora, ak aboisiei agane.
18Kicheng’ anyun Yahudik mising’ kole kobar inendet amu nito, amu kima bistoe sabato kityo, ago mwaei kole Jehovah Kwandanyi, koyaegei kogergeit ak Jehovah.
Komwaei Jesu kole tiiegei inendet kwanda
19Kiwolji anyun Jesu ichek kolenji, Amwawok, iman, iman, ale, Mayaei kiy Werit inegei, ago ne keerei koyaei Kwanda: amu tuguk tugul che yaei inendet, koyaei choto agine Werit ko u noto. 20Amu chamei Kwanda Werit, ak koborjin tuguk tugul che yaei inendet: ak ta koborjin boisionik che eechen che siirei chu, si kobiit okwong’ie. 21Amu ko u ye ing’eeti Kwanda che kigobek ak kosoobi, isoobi Werit ko u noto agine che machei. 22Amu ma iruokyin Kwanda chi age tugul, ago kigogochi Werit kiruoget tugul; 23si kobiit koteech tugul Werit, ko u ye teechei Kwanda. Inendet ne mateechei Werit ko mateechei Kwanda ne kiiyok inendet.
24Amwawok, iman, iman, ale, Inendet ne kasei ng’olyondennyu, ak koyani inendet ne kiiyokwa, kotinyei sobondab koigeny, ama wendi ole mi kiruoget, ago kagomong’ eng’ meet komong’ji sobondo. 25Amwawok, iman, iman, ale, Nyonei sait, ak kagoit, ye kas che kigobek kutitab Weritab Jehovah; ak soptos icheget che kasei. 26Amu ko u ye tinyei Kwanda sobondo inegei, u noto kigogochi Werit kotepto sobondo: 27ak kiigochi kimnatet koyai kiruoget, amu Weritab chi inendet. 28Amokwong’e nito: amu nyonei sait, ne tun kasei kutinnyi tugul che mi kererisiek, 29ak komong’; ng’eetyin sobondo che kiyaei ne mie; ak kong’eetyi kiruoget icheget che kiyaei ne ya.
Baornatet ne kibaoriani agobo Jesu
30Mamuchi ayai kiy anege: aruochi ko u ye agase, ak bo iman kiruogennyu; amu macheng’e ayai magennyu, ago magetab inendet ne kiiyokwa. 31Ngabaorianjinige, ko ma bo iman baornatennyu. 32Mi age ne baorianjina; ak angen ale bo iman baornatet ne baorianjina. 33Kioyokyi ng’olyot Johana, ak kibaorianji imanda. 34Ago baornatet ne ataache ko mabunu chi: ago amwae tuguchu, si kobiit kesoruok. 35Ki tait inendet ne kilalei kokweng’sei: ak kiocham oboiboitune lapkeiyennyi eng’ betusiek che matia. 36Ago baornatet ne atinye ko o kosiir ne bo Johana: amu boisionik che kigona Kwanda ages, choto che ayae, ko che baorianjina, kole kiiyokwa Kwanda. 37Ak kibaorianja Kwanda inendet ne kiiyokwa. Tom ogas kutinnyi ole kinye kora, ak tom ogeer itondanyi. 38Ama tebyei eng’ okwek ng’olyondennyi: amu moyani inendet ne kiiyogu Jehovah. 39Cham osiachi eng’ sirutik, amu olen otinye sobondab koigeny eng’ choto; ago choto che baorianjina; 40ago mochame obwanja, si kobiit konyoru sobondo.
41Mataache kalosunet eng’ bik. 42Ago angenok ale motinye chamnyetab Jehovah eng’ oring’wong’. 43Kianyo eng’ kainetab Baba, ama otaacha: ngo nyo age eng’ kainennyi otaache inendet. 44Omuchi eng’ nee oyan, che otaagege kalosunet, amocheng’e kalosunet ne bunu Jehovah ne mi inegei? 45Molen ang’andook eng’ Kwanda: mitei age ne ng’andook, Musa noto, ne omang’u. 46Amu nda kigoyan Musa, toyana; amu kisir agobo ane. 47Ago ngo moyani sirutikyik, omuktoi ano oyan ng’alekyuk?
ಪ್ರಸ್ತುತ ಆಯ್ಕೆ ಮಾಡಲಾಗಿದೆ:
JOHANA 5: BUKUIT
Highlight
ಶೇರ್
ಕಾಪಿ
Want to have your highlights saved across all your devices? Sign up or sign in
God's word open for all
©Bible Society of Kenya, 2020
