Yohana 6
6
1Inyima ya vindu yivi Yesu ya twula na a tsia engereka wenyanza ya Galilaya, nayo i veye inyanza ye Tiberia. 2Kiduma kinene kya mu londa, kigira va lola vilolekidzu vya ya kola kuvo avalwala. 3Kandi Yesu yanegira mu kigulu, ni yikala mu, halala navegidzwi veve. 4Lipasaka, lilia lya Vayuda, lya li himbi. 5Maku, Yesu ya ginga tsimoni tsitsye, na a lola kiduma kinene kidza kuye, ya volera Filipu, Ku la gula haliki ubukima, yava va duke kulagira? 6Navutswa ya vola yaga kumugeridza: kigira mwene ya manya ga a li kola. 7Filipu ya mu tivulira, Milango gye tsishilling tsimia tsiviri si bu duka sa mulala va vugula bukekeke. 8Mulala ku vegidzwi veve, Andreya, amwavo Simoni Petro, ya mu volera, 9A veye hano muyai a veye nemilango gyitanu gya shairi, netsisudzi tsiviri: navutswa yivi ni vindu ki vi duka vanyingi yava? 10Yesu ya vola, Mu lombe avandu vikale. Ha li nobunyasi bunyingi ha zana. Maku, vikala avandu avikula, livalidza lyavo lya duka tsielfu tsitanu. 11Yesu ya vugula milango; kandi lwa ya mala kusantidza, ya gavulira ava li vikaye; kandi tsisudzi ndiyo, kuduka kuli wa venya. 12Kandi lwa viguta, ya volera avegidzwi veve, Mu vungidze madonye aga tigaye, kindu ki ta gota mba. 13Ku, va vungidza ni vizulitsa vihinda likumi na viviri, amadonye ga twula ku milango gyitanu gya shairi, aga tigala ku va lagira. 14Kigira yaga avandu lwa va lola kilolekidzu kya ya kola, va vola, Ligali uyu niye muprofeti zana udza mu lirova.
15Yesu lwa ya manya venya kuudza kumugumira netsingulu va mu kole mwami, ya tsia kandi mu kigulu mwene yeng'ine. 16Kandi lwa gwa duka mgolova avegidzwi veve viika ni va tsia ku luginga lwenyanza; 17ni va nina mu bwato ni vambuka inyanza kutsia Kapernaume. Inyinga zana kya gwa kisundi, kandi Yesu ya kikiri kuduka kuvo. 18Kandi inya nza ya tanga kukola viguvuli kigira imbuudza inene ya huudza. 19Kigira yaga lwa va mala kugenda tsimaili tsivaka kinga tsine va lola Yesu na a genda ku inyanza, naye ya li himbi nobwato: ni va tia. 20Navutswa ya va volera, Ni inze; mu ta tia mba. 21Kigira yaga va yanza kumuvugula kumuvika mu bwato: nonoho bwato bwa duka ku kivala kya va tsitsa yo.
22Mugamba kiduma kinene kya singira hangereka henyanza, kya lola si ha veye nobwato bundi, navutswa bulala, kandi Yesu si yingira navegidzwi mu bwato, navutswa avegidzwi veve va tsia veng'ine 23(navutswa amato gandi ga twula Tiberia, gadza himbi na ha va lagirira ubukima inyima ya Mwami ya santidza): 24ku, kiduma lwa kya lola Yesu si a veye ho, kandi avegidzwi veve vingira avene mu mato, ni vadza Ka pernaume, kwenya Yesu. 25Lwa va mu nyola hangereka henyanza, va mu volera, Rabi, wadza inyinga ki hano? 26Yesu ya va tivulira na a vola, Ligali ligali, mmu volera, Si mu nyenyi kigira mwa lola vilolekidzu, navutswa kigira mwa lagira milango, ni mwiguta. 27Mu ta yinzira ku vugula vyokulia vyoneka, navutswa mu yinzire kuvugula vyokulia vi menya kuduka ku livamwoyo li ta hera mba, vyo Mwana wa Adamu a la mu ha: kigira Dada, Nyasaye, u mali kukupa kuye kyokulolera. 28Kigira yaga va mu volera, Ku la i kola ndi, ku duke kukola miyinzi gya Nyasaye? 29Yesu ya tivula na a va volera, Miyinzi gya Nyasaye ni yigyi, mwinye mu suuvire uyu wa ya tuma. 30Kigira yaga va mu volera, U kola lilolekidza ki, ku lole, kandi ku suuvire ive? Miyinzi ki gya u kola? 31Vaguga vetu va lagira mana mwigendanyama; kuli ga ng'o dwa, Ya va ha ubukima bwomigulu kulagira. 32Kigira yaga Yesu ya va volera, Ligali, ligali, mmu volera, Si ya li Musa wa mu ha ubukima bwomigulu; navutswa Dada wange a mu hedzanga ubukima bweligali bwo migulu. 33Kigira ubukima bwa Nyasaye ni yibwo bu twula migulu, kandi u hedzanga avomkivala liva mwoyo. 34Kunangwa va mu volera, Mwami, madiku gosi u ku he ubukima yibu. 35Yesu ya va vo lera, Inze nibwo ubukima bweliva mwoyo: uyu udza ku inze si a li lola inzala mba, kandi u suuvira inze si a li lola ubuluhu mihiga nemihiga. 36Navutswa nda mu volera, mu mali kundola navutswa si mu suuvira. 37Vyosi vya Dada a mbedza vi ladza ku inze; naye udza ku inze si nda mu kunga mba. 38Kigira si nda twula migulu kukola ubulaliri bwange, navutswa ubulaliri bwa uyu wa ntuma. 39Yibwo nibwo ubulaliri bwa uyu wa ntuma, ku vyosi vya ya mpa kindu kali kilala ki ta gota, navutswa nda ki simugukidza ku lidiku lyekiheri. 40Yibwo nibwo ubulaliri bwa Dada wange, ku vosi u lola Mwana kandi a mu suuvira, a ve nelivamwoyo li ta hera; na inze nda mu simugukidza ku lidiku lyekiheri.
41Ku Avayuda va mu monya, kigira ya vola, Inze nibwo ubukima bwa twula migulu. 42Kandi va vola, Uyu si a li Yesu mwana wa Yosefa, wa ku manya dada wewe na mama wewe? Kigira ki kalunu a vola, Ndula migulu? 43Yesu ya tivula na a va volera, Mwinye mu ta monya. 44Si ha veye nomundu u nyala kuudza ku inze vutswa, wa Dada wa ntuma a ta ng'usa: kandi inze nda mu simugukidza ku lidiku lyekiheri. 45Ga ng'odwa mu vi tabu vya vaprofeti, Vosi va legidzwa na Nyasaye. Sa mulala u hulira Dada wange, ni yega, yadza ku inze. 46Si ha veye nomundu wa lola Dada, navutswa uyu wa twula wa Nyasaye, uyu niye wa lola Dada. 47Ligali, ligali, mmu volera, Uyu u suuvira a veye nelivamwoyo li ta hera mba. 48Inze nibwo ubukima bwelivamwoyo. 49Avaguga venyu va lagira mana mwigendanyama kandi va kudza. 50Yibwo nibwo ubukima bu twula migulu, bwo mundu a nyala kulagira ku, a vule kukudza. 51Inze nibwo ubukima bwelivamwoyo bwa twula migulu: mundu na a lagira ku bukima yibu, a la va mwoyo mihiga nemihiga: yee kandi ubukima bwa ndi haanira livamwoyo lyavomukivala ni nyama yomubiri gwange.
52Kigira yaga Avayuda va hangalidzana, ni va vola, Mundu uyu a nyala ndi kukuha inyama yomubiri gwigwe ku lie? 53Kigira yaga Yesu ya va volera, Ligali, ligali, mmu volera he, Ni mu ta lia inyama yomubiri yo Mwana wa Adamu nokunwa masahi gege si mu veye nelivamwoyo mu mwinye. 54Uyu u lia inyama yomubiri gwange nokunwa masahi gange a veye nelivamwoyo li ta hera mba; kandi inze nda mu simugukidza ku lidiku lyekiheri. 55Kigira inyama yomubiri gwange nikyo kyokulia kyeligali, namasahi gange nilyo linwa lyeligali. 56Uyu u lia inyama yomubiri gwange nokunwa masahi gange a menya mu inze, kandi inze muye. 57Kuli Dada welivamwoyo ya ntuma, na inze mbeye mwoyo kigira Dada; kandi ndiyo uyu u ndia a la va mwoyo kigira inze. 58Yibwo ni'owo ubukima bwa twula migulu: si bu veye kuli vaguga va lagira, kandi va kudza; u lagira ubukima yibu a la va mwoyo mihiga nemihiga. 59Vindu yivi ya volera mu lisomero lwa ya li ni yegidza avandu mu Kapernaume.
60Kigira yaga vanyingi ku vegidzwi veve lwa va hulira, va vola, Yili ni livola lidinyu; ibwaha a nyala kulihulira? 61Navutswa Yesu ya manya mwene, avegidzwi veve va monya ku livola yili, na a va teva, Yili li mwikigitalidza? 62Ga li va ndi ni mu lola Mwana wa Adamu yanegira kutsia ha ya li lwambiri? 63Ni roho gu haana livamwoyo; inyama yomubiri si i konya kindu: amakuva ga mmu voleye ga veye roho, kandi livamwoyo. 64Navu tswa ha veye navalala ku mwinye ava ta suuvira. Kigira Yesu ya manya lwambiri nivaha ava ta suuvira, kandi ni bwaha u li mu zama. 65Kandi ya vola, Kigira yaga nda mu volera, Si ha veye nomundu u nyala kuudza ku inze, bugira Dada wange na a ta mu haani.
66Ku yaga avanyingi ku vegidzwi veve virana inyima, si va genda halala naye kandi. 67Kigira yaga Yesu ya volera ava li likumi na vaviri, Nkani mwinye kandi mwenya kutwula? 68Simoni Petro ya mu tivulira, Mwami, ku tsia ku bwaha? Ive u veye namakuva gelivamwoyo li ta hera mba. 69Kandi kwinye ku suuviye, na ku manyi, ive u veye Mutakatifu wa Nyasaye. 70Yesu ya va tivulira, Si nda tovola mwinye likumi na vaviri, na mulala ku mwinye ni setani? 71Uyu wa ya tala ni Yuda wa Simoni Iskarioti, kigira uyu niye u li mu zama, naye noku va li likumi na vaviri.
ಪ್ರಸ್ತುತ ಆಯ್ಕೆ ಮಾಡಲಾಗಿದೆ:
Yohana 6: MBE
Highlight
ಶೇರ್
ಕಾಪಿ
Want to have your highlights saved across all your devices? Sign up or sign in
©Bible Society of Kenya, 1967
