Yohana 5
5
1Inyima ya vindu yivi lya li ho lilia lya Vayuda; kandi Yesu yanegira na a tsia Yerusalemi. 2Mu Yerusalemi lidavalia li veye ho himbi nekiribwa kyamagondi, li langwa mu Luhebraina, Bethesda, li veye netsisimbu tsitanu. 3Va gona mutsyo kiduma kinene kyavalwaye, avaboku, avaleema, avafwogoya. Va lindanga lidivula lya amadzi. 4Kigira ku tsinyinga, ingelosi yika ku lidivalia ku duvula amadzi, na uyu wingira kutanga lwa amadzi ga duvulwa, ya hona kubulwaye bwosi bwa mu nyola. 5Ya li ho mundu mulala wa li mu budekeranu bwibwe mihiga amakumi gavaka nemihiga gyitanu negyivaka. 6Yesu lwa ya mu lola a gona na a manya ya li ndiyo madiku manyingi, ya mu volera, Wenya u kolwe mulamu? 7Mulwaye ya mu tivulira, Mwami, si mbeye nomundu wokumbika mu lidavalia inyinga amadzi ga duvuka: navutswa inyinga ntsitsanga wundi vingira imbiri wange. 8Yesu ya mu volera, Singira, u vugule kitali kikyo, u gende. 9Kandi nonoho mundu ya kolwa mulamu, na a vugula kitali na a genda.
Lidiku yilyo lya li lisabato. 10Kunangwa Avayuda va volera uyu wa honnywa, Li veye lisabato, si bu li bulahi ive u ginge kitali kikyo. 11Navutswa ya va tivulira, Wa li Lu nkola mulamu niye u mboleye, Ginga kitali kikyo u gende. 12Ni va mu teva, Ni bwaha mundu u ku voleye, Ginga kitali, u gende? 13Navutswa uyu wa honnywa si ya manya ibwaha wa mu honnya; kigira Yesu ya twula ho, kiduma kya li ho. 14Inyima ya yaga Yesu ya mu nyola mu litempeli, na a mu volera, Henza, u koleywi mulamu: u ta kola ubwoni kandi gase kindu kidamano kuvita ki la ku gwira. 15Mundu uyo ya tsia na a volera Vayuda ni Yesu wa mu honnya. 16Kigira yaga Vayuda va dambidza Yesu, kigira ya kola vindu yivi ku lisabato. 17Navutswa Yesu ya va tivulira, Dada wange kali kuduka kalunu a kola miyinzi, na inze nkola miyinzi. 18Kigira yaga Vayuda va kira kwenya kumwiita, kigira si yononnya lisabato lyeng'ine navutswa kandi ya langa Nyasaye Dada wewe, ni yekola mwene a leng'ane na Nyasaye.
19Kigira yaga Yesu ya tivula na a va volera, Ligali, ligali, mmu volera, Mwana si a nyala kukola kindu mwene, navutswa vya a lola Dada a kolanga: kigira ku vindu vyosi vya a kola, yivi kandi Mwana a kola ndiyo. 20Kigira Dada a yanza Mwana na a mannya vindu vyosi vya a kolanga mwene: kandi a la mu mannya miyinzi gyi vita yigyi, mwinye mu duke kugenya. 21Kigira kuli Dada a simugukidzanga avakudzi na a va ha liva mwoyo, kandi ndiyo Mwana a hedza vosi va a tovola, liva mwoyo. 22Kigira Dada si a kalagira mundu, navutswa u mali kuha Mwana likalaga lyosi; 23vosi va duke kukuminya Mwana, kuli va kuminya Dada. Uyu a vula kukuminya Mwana kandi si a kuminya Dada wa mu tuma. 24Ligali, ligali, mmu volera, U hulira likuva lyange, na a suuvire wa ntuma, a veye nelivamwoyo li ta hera mba, kandi si a li nyala kwingira mu likalagirwa, navutswa u mali kutwula mu likudza kuduka mu livamwoyo. 25Ligali, ligali, mmu volera, Isaa yidza, nayo i mali kuduka yavakudzi va la hulira mwoyo gwo Mwana wa Nyasaye, kandi ava hulira va la duka kuva mwoyo. 26Kigira kuli Dada a veye neliva mwoyo muye mwene, kandi ndiyo ya ha Mwana a ve neliva mwoyo muye mwene: 27kandi ya mu ha tsingulu kukola likalaga, kigira a veye Mwana wa Adamu. 28Mu ta genya ku yaga: kigira isaa yidza ya yavo vosi va veye mu vilindwa va la hulira mwoyo gwigwe, 29ma va twule mu, yavo va kola bulahi va duke ku lisimuguka lyelivamwoyo; navo ava kola ubudamano va duke ku lisimuguka lyelikalagirwa.
30Si nyala kukola kindu inze mwene: kuli mbuliranga nkalaga ndiyo; kandi likalaga lyange li veye lilungi; kigira si nyenya ubulaliri bwange, navutswa ubulaliri bwa uyu wa ntuma. 31Ni mba nzelolekidzira, lilolekidza lyange si li veye lyeligali. 32Wundi a veyo u ndolekidzira; kandi inze mmanya lilolekidza lilye lya a ndolekidzira ni lyeligali. 33Mwinye mwa tuma avatumwa ku Yohana, kandi ya lolekidza ageligali. 34Navutswa lilolekidza lya mbugula si li veye lyomundu: navutswa mbola vindu yivi mwinye mu duke kuhonnywa. 35Uyo ya li itaya yokwaaduka nokung'ereng'ana; mwinye mwa yanza kusangala mu bulavu bwibwe inyinga inkekeke. 36Navutswa lilolekidza lya mbeye nalyo li vita lya Yohana; kigira miyinzi gya Dada ya mpa kumaliridza, miyinzi zana gya nkola, gyi ndolekidza, he, Dada ya ntuma. 37Kandi niye Dada wa ntuma u mali kundolekidza. Mwinye mu kikiri kuhulira mwoyo gwigwe kandi mu kikiri kulola ligondo lilye. 38Kandi si mu veye nelikuva lilye li menya mu mwinye: kigira mwinye si mu suuvira uyu wa ya tuma. 39Mwinye mwenya mu mang'oda, kigira mu vola mu la nyola mu, livamwoyo li ta hera mba; kandi yaga nigo ga lolekidza ku inze; 40kandi mwinye si mu yanza kuudza ku inze mu nyole livamwoyo. 41Si mbugula ubukumi ku vandu. 42Navutswa mmanya mwinye si mu veye nobuyanzi bwa Nyasaye mu mwinye avene. 43Inze ndadza ku lieta lya Dada wange, na mwinye si mu mbugirira mba: wundi na a va na a li duka ku lieta lilye mwene, mu la mu bugirira. 44Mu nyala ndi kusuuvira mwinye ava hereridzana ubukumi, mu vula kwenya ubukumi bu twula wa Nyasaye u veye yeng'ine? 45Mu ta vola, inze nda mu yala wa Dada: mulala a veyo u mu yala, kali Musa, wa mu suuvira. 46Kigira mwinye mu va mu suuvira Musa, nkano mu suuvira inze; kigira ya ng'oda ku inze. 47Navutswa ni mba ni mu ta suuvira mang'oda gege, mu la suuvira ndi amakuva gange?
ಪ್ರಸ್ತುತ ಆಯ್ಕೆ ಮಾಡಲಾಗಿದೆ:
Yohana 5: MBE
Highlight
ಶೇರ್
ಕಾಪಿ
Want to have your highlights saved across all your devices? Sign up or sign in
©Bible Society of Kenya, 1967
