YOHANA 7

Yesu nende abaana babwe

1Olwe inyuma we yaka Yesu yali nachendanga musibala sia Galilaya; siyayenyanga okhuchenda mu Bayahudi tawe, sichila abakhongo ba Bayahudi bali nibenyanga okhumwira. 2Olwene yilwo Lisabo Liamahindu liali nilili ahembi.#Abal. 23:34; Okhuka. 16:13 3Kho abaana babwe nibamubool'la, “Rula hano, otsie Ebuyahudi, abalondi baabo balole emilimo chichio echiokholanga. 4Okhuba abulaho omundu okholanga emilimo chichie masilisi, ne omwene niyakhenya amanyikhe. Noba nokholanga yichi webisule khubo musibala.” 5Okhuba kata abaana babwe sibamusubila tawe. 6Kho Yesu nababool'la. “Inyinga yanje esili okhwola, nebutswa eyenywe eliho amatukhu kosi. 7Abomusibala sibanyala okhumubihil'lwa inywe tawe, nebutswa ise bambihil'lwanga, sichila ribulanga emilimo chiabwe emibi. 8Inywe mutsie Mwisabo. Ise sinanzie Mwisabo yilio tawe sichila inyinga yanje esili okhwola.” 9Niyakhaboolanga yaka, yatsilil'la okhumenya Galilaya.

Yesu atsia Mwisabo Liamahindu

10Olwa abaana babwe bali nibatsiye Mwisabo, Yesu naye yatsiamwo, nebutswa siyatsia kol'lani tawe, ngarali yatsia masilisi. 11Abakhongo ba Bayahudi bali nibamurunanga Mwisabo yilio nibareebana, “Ali hena?” 12Okhumonyana okhwinji khwaliho mumukanda kwabandu khukaake. Abandu bandi nibaboola mbu “Nomundu omulahi.” Ne abandi nabo, “Tawe akosianga abandu.” 13Nebutswa yabulaho owaboola khukaake habulafu tawe, sichila baria abakhongo ba Bayahudi.

14Lisabo liali niliakhola hakari kho lihwe olwa Yesu yatsia mu Hekalu ma nachiaka okhwibaala. 15Abakhongo ba Bayahudi nibahuka okhusila ma nibaboola, “Omundu uno yamanya mbwena amang'ana yaka kosi nasili okhunyoolakhwo ameko kosi?” 16Yesu nakalusia nababool'la, “Akanzibaalanga sikali akanje khubwanje tawe, nebutswa karulanga khu Nyasaye. 17Omundu wosi naba niyakharakhwo omwoyo okhukhola aka Nyasaye yenya, yakhamanya nikali mbu akanzibaalanga karulanga khu Nyasaye, nohomba nimba nimboolanga khubunyali bwanje. 18Omundu oboolanga khubuubwe yerun'nanga oluyali lulwe omwene; nebutswa omundu orunanga oluyali lwe uyo owamuruma, omwene uyo niye owatooto, kata obusiamu sibuli muye tawe. 19Siaali Musa owamuha amalako? Ne kata mulala khu inywe siakholanga akamalako? Busina murunanga okhunzira?” 20Abandu nibamukalusia, “Wasienwa niwina orunanga okhukhwira?”

21Yesu nabakalusia nababool'la, “Ndakhola esilolelo esia mangalimwa silala, ne inywe mwesi mwali okhuchenya tawe. 22Musa yamuha esiimo siokhusebwa (ne sisiarula khu Musa nebutswa siarula khubapapa benywe), musebanga omwana mwitukhu lie Sabato.#Okhuch. 17:10; Abal. 12:3 23Omwana naba nasebwa mu Sabato kho Amalako ka Musa kalekhe okhufunakwa, busina nimusinyikhila sichila mbonisie omundu okhuba omulamu khwitukhu lia Sabato?#Yoh. 5:9 24Mulekhe okhukhalachila abandu khulwa okhulolekha khwesioba butswa, ngarali mukhalake mubwatooto.”

Abandi bareba nikali Yesu niye Masihi?

25Abalala khubandu bomu Yerusalemu nibareeba, “Uyo siali niye owabakhongo barunanga okhwira? 26Lole, al'lomanga habulafu, ne sibamufukula ling'ana kata elala tawe. Mbula abakhongo bakhaba mbamanyilekhwo siahene omwene uyo niye Masihi noho? 27Nebutswa khumanyile omundu uno hayarula, nyinga Masihi alitsa omundu sialimanya aharul'le tawe.”

28Kho Yesu yalanjisia mu Hekalu niyebaala naboola, “Inywe mwaimanya ise khandi mwamanya ahandarula. Sindaitsa khubwanje tawe, nebutswa uyo owaruma nowatooto. Inywe simum'manyile tawe, 29ise ndamumanya sichila ndarula khuye, khandi niye owaruma.”

30Ne nibenya okhumufumila nebutswa abulaho owamutilakhwo, sichila esaa yiye yali nesili okhwola. 31Nebutswa abandu abenji basubila khuye, nibaboola, “Nyinga Masihi yakhetse mbula alikhola akamangalimwa amenji okhuyomba yako ake uyu akhol'le noho?”

Abasikari barumwa okhufumila Yesu

32Abafarisayi nibahul'la omukanda kwabandu nikumumuchil'langa khulwaye. Kho abesaalisi abakhongo nende Abafarisayi nibaruma abalindi okhutsia okhumufumila. 33Kho Yesu nababool'la, “Sili n'nenywe oluhono lutititi butswa ma kho nanzie khu uyu owaaruma. 34Muliiruna ne simwakhanyoole tawe, ne owandiba nindi inywe simulinyala okhwitsayo tawe.”

35Kho Abayahudi nibabool'lana abene, mbu “Nihena aha omundu uyu natsie aha ifwe khuranyala okhumunyoola yiyi? Akhenyanga okhutsia khu Basalanibwa mu Bayunani nabebaal'la noho? 36Ning'ana sina eliabooye yilio? Mbu, ‘Muliruna, ne simwakhanyoole tawe,’ khandi mbu ‘Ahandiba, inywe simunyala okhwitsaho tawe?’ ”

Emichela chiamaatsi akobulamu

37Khwitukhu liesihesi, litukhu likhongo lielisabo, Yesu yasinjila nalanjisia, naboola, “Omundu oba nali nobuluho, yetse khu ise anywe.#Abal. 23:36 38Osubilanga khwise, singa obwa kahandikwa, muusi mumwoyo kukwe chilirulamwo emichela chiamaatsi kobulamu.”#Esek. 47:1; Sak. 14:8 39Akene yako yali naboolanga ako Mwoyo owa bakhahebwe yabo abasubilanga khuye. Olwene yilwo Omwoyo yali nasili okhuhanwa, sichila Yesu yali nasili okhufumibwa.

Obwabukhani mubandu

40Khe abalala mubomukanda nyinga bahulila amang'ana yaka, baboola, “Siahene uyu niye omuroobi watsana.” 41Ne abandi nibaboola, “Ye ni Masihi!” Nebutswa abandi nibaboola “Mbula Masihi yakharula Galilaya noho? 42Amahandiko Amatsienukhu sikaboola Masihi yakharul'le mulwibulo lwa Daudi, ne yakhebulilwe Betselehemu, mwitaala aha Daudi yamenya?”#2 Sam. 7:12; Mika 5:2 43Abandu nibachiaka okhuhangalana khululwe. 44Abandi khubo nibenya okhumufumila, nebutswa siyaliho omundu mulala owamutilakhwo tawe.

Abakhongo ba Bayahudi babula obusubili

45Olwa Abalindi yabo bakalukha khubesaalisi abakhongo nende Abafarisayi, babareeba, “Busina sim'muler're tawe?” 46Abalindi yabo nibakalusia mbu, “Abulaho omundu ol'lomangakhwo singa omundu uyo tawe!” 47Ne Abafarisayi nibareeba, “Nenywe amuyingoyisie? 48Aliho khubakhongo owali okhusubila khuye nohomba khu Bafarisayi? 49Nebutswa omukanda kuno sikwamanya Amalako ka Musa tawe kho kwalamwa.”

50Nikodemu ula owali niyatsiakhwo okhulola Yesu olundi, yali mulala khu Bafarisayi. Yabool'la abasie,#Yoh. 3:1-2 51“Amalako kefwe sikakhalachilanga omundu esiina nasili okhuhulilwa omwene, khandi nikhusili okhumanyilisia akakhol'le tawe.” 52Nibakalusia nibamureeba mbu, “Nawe khandi orulanga Galilaya? Weke okhurula mu Mahandiko mbu omuroobi siyakharula Galilaya tawe.”

Omukhasi owanyoolwa mubuheyi

[ 53Ma siomundu natsia ingo we,

ಪ್ರಸ್ತುತ ಆಯ್ಕೆ ಮಾಡಲಾಗಿದೆ:

YOHANA 7: EBAIBO

Highlight

ಶೇರ್

ಕಾಪಿ