YOHANA 6

Yesu yalisia abasaatsa etsielefu tsirano

(Mat. 14:13-21; Mk. 6:30-44; Lk. 9:10-17)

1Inyuma we yako, Yesu yambukha okhutsia injelekha weinyanza ya Galilaya, (khandi elangwanga mbu inyanza ya Tiberia.) 2Omukanda omukhongo kwamulonda, sichila bali mbalutsi akamangalimwa aka yakhola okhuhonia abalwaye. 3Yesu niyanichila musikulu niyekhalayo nende abechi baabe. 4Inyinga ye Lisabo lie Pasaka yali neli ahembi. 5Yesu yachingula tsimoni tsitsie, nalola omukanda omukhongo nikwitsanga khuye, kho yareeba Filipu, “Khukula hena ebiokhulia ebihela okhuliisia abandu yaba bosi?” 6Yesu yaboola yako khulwa okhumuteema; okhuba omwene yamanya elia yetsa okhukhola.

7Filipu nakalusia, “Ebiokhulia ebihela etsidinari etsimia tsibili sibiakhahela abandu yaba tawe, kata nikakhaba siamulala yakhatoolakhwo akhatonye khati butswa.”

8Mulala khubechi baabe, olangwa Anderea, omwana wanga Simoni Petero, namubool'la, 9“Aliho hano omwana mulala, oli nemihayila chiemikaati chirano, nende tsisuche tsibili, nebutswa yitsio sichiakhabahela abandu abenji yaba tawe?”

10Yesu naboola, “Yikhasie abandu hasi.” (Naho hali musikuri.) Kho abandu bosi bekhala hasi; baliho abasaatsa etsielefu tsirano. 11Yesu nabukula emikaati yichio, ne nakhupa embwo khu Nyasaye, ma nakabula khubandu abali nibekhaye. Khandi yakhola mbwo khutsisuche, ne bosi balia singa obwa bali nibenyele. 12Nyinga bali nibekur're, Yesu yabool'la abechi baabe “Mubunjelesie ebitonye bisikaye, esindu sirakorakhwo tawe.” 13Kho babunjelesia ebitonye biosi nibetsusia ebitinyilo likhumi nabibili, ebitonye biemihayila chirano ebiasikala khu ebia bali mbaliiye.

14Nyinga abandu tsana balola esilolelo siamangalimwa esia Yesu yali nakhol'le nibaboola, “Siahene uyu nomuroobi owitsanga musibala!” 15Yesu yamanya mbu benyanga betse okhumubukula mbu bamukhole omuruchi netsingufu; kho, yaswekha natsia musikulu yenyene.

Yesu yachenda khumatsi

(Mat. 14:22-33; Mk. 6:45-52)

16Olwa mukolooba kwola, abechi baabe batsia khunyanza, 17nibaniina muliaro ma, nibambukha inyanza okhukalukha Kaperinaumu. Isi yali nemwamile, ne Yesu naba asili okhwitsa khubo. 18Ma inyanza nechiaka okhwerunda sichila omuyeka omukali kwali nikuhungutsanga. 19Abechi bali nibakhafuka eliaro, etsikilomita tsirano nohomba tsisasaba olwa balola Yesu nachendanga khumatsi, niyesundanga khuliaro, oburi nibubahamba. 20Naye yababool'la, “Muraria tawe. Nise.” 21Kho bali okhumuhuchil'la okhwinjila muliaro; ne nonoho eliaro ndiola khusibala habundu aha bali nibatsitsanga.

Abandu bakhaaba Yesu

22Litukhu elialondakhwo omukanda okwali nikusikaye khuluchelekha lundi olwe inyanza bamanya mbu eliaro elala lionyene lialiho. Bamanya mbu Yesu siyali okhwinjila muliaro halala nabechi baabe tawe, ngarali mbu abechi batsia bonyene. 23Amaaro akarula Tiberia nikola khuluchinga ahembi habundu tsana ahabali nibaliliiye emikati olwo Omwami yali niyakhupile embwo. 24Khe olwa abomukanda balola mbu Yesu sialiho tawe, nohomba kata abechi baabe, nabo khandi baniina muliaro nibatsia Kaperinaumu, okhuruna Yesu.

Yesu niye omukaati kwo bulamu

25Olwa abandu tsana banyoola Yesu injelekha weinyanza, bamureeba mbu, “Omwibaali, witsile nyinga sina yino?” 26Yesu nakalusia, “Mubool'langa tooto; simurunanga sichila mwaluutsi akokhuchenya tawe, nebutswa sichila mwaliiye khumukaati nimwikura. 27Murafulukhanila ebiliibwa ebihwetsanga tawe, nebutswa mufulukhanilenje ebiokhulia ebimenyanga mubulamu oburahwa. Yibi nibio ebiokhulia ebio Mwana wo Mundu alimuha, okhuba niye owa, Nyasaye Papa, yarakhwo esimanyilo esiokhuhuchil'lwa.”

28Nibamubool'la, “Khukhole sina kho khukhole aka Nyasaye yenyanga?”

29Yesu nabakalusia, “Aka Nyasaye yenyanga mukhole nokhusubila mu uyo owa yaruma.”

30Kho khandi nibamukalusia, “Ni silolelo sina esiokhola mbu, khulole ma khusubile? Olakhola sina? 31Abakuka befwe balia amana musitsiimi singa bwa Amahandiko kaboolanga, ‘Yahaana okhulia omukaati okhurula mwikulu.’ ”#Okhur. 16:4,15; Etsisa. 78:24

32Kho Yesu nababool'la, “Mubool'langa, tooto siyali Musa niye owamuhelesia omukaati kwatooto okhurula mwikulu tawe, nebutswa Papa wanje niye owamuhelesia omukaati kwatooto okhurula mwikulu. 33Okhuba omukaati kwa Nyasaye ahaananga ni uyo owekha okhurula mwikulu nahelesia abomusibala obulamu.” 34Nabo nibamubool'la, “Omwami, okhuheetsenje omukaati yikwo amatukhu kosi.” 35Yesu nababool'la, “Nise omukaati kwobulamu, uyo owitsanga khwise sialanyoola inzala tawe, uyo osubilanga kwise obuluho sibulamuhamba tawe. 36Nebutswa ndali okhumubool'la mbu, mwali okhundola, nebutswa simwaisubila tawe. 37Bosi aba Papa yambelesianga betsanga khwise, ne naye owitsa khwise sindimufuuba kata nahati tawe, 38sichila sindahikha okhurula mwikulu okhukhola obulalilo bwanje omwene tawe, nebutswa obulalilo obwe uyo owaruma. 39Ne obulalilo obwe uyo owaruma yenyanga mbwobuno, mbu bosi abayali okhumbelesia rakosiakhwo kata mulala khubo tawe, nebutswa mbasimukusie khwitukhu liesihesi. 40Ma yaka aka Papa yenyanga kali mbu siomundu omulola Omwana namusubila abe nende obulamu oburahwaho. Nase ndimusimukusia khwitukhu liokhumal'likha.”

41Abandu nibamumuchil'la khuye sichila ubooye “Nise omukaati okwekha okhurula mwikulu.” 42Nibaboola “Uyu siali Yesu, omwana wa Yosefu? Khwamanya samwana nende nyina. Kho aboolanga mbwena, yekha okhurula mwikulu?” 43Yesu nakalusia naboola, “Muramumuchil'la inywe abene tawe. 44Abulaho omundu onyala okhwitsa khwise Papa owaruma naramukhwesele okhunzitsila tawe, nase ndimusimukusia khwitukhu liokhumal'likha. 45Abaroobi bahandika mbu, ‘Nyasaye alibebaal'la abandu bosi.’ Omundu wosi ohulilanga Papa, niyeka okhurula khuye yetsanga khwise.#Isaya 54:13 46Yaka sikamanyianga mbu aliho owalola Papa tawe; ye owarula khu Nyasaye niye yenyene owalola Papa. 47Mubool'langa tooto, omundu osubilanga ali nobulamu oburahwa. 48Ise nise omukaati kwobulamu. 49Abakuka benywe balia amana musitsiimi, nebutswa bafwa. 50Yiku nikwo omukaati okwikhanga okhurula mwikulu, ne omundu wosi okuliakhwo siyakhafwa tawe. 51Ise nise omukaati kwobulamu okwekha okhurula mwikulu. Omundu wosi naba nalia khumukaati yikwo, yakhamenye inziaiyo. Omukaati okwa muhetsanga neinyama yomubili kwanje eyambananga kho esibala sibe nobulamu.”

52Yaka kalera obuhingani bwelirima mu Bayahudi. Nibareba “Omundu uyu yakhanyala mbwena okhukhuha inyama yomubili kukwe khulie?”

53“Yesu nababool'la mubool'langa tooto mbu, nimuba nimuraliakhwo inyama yomubili kwo Mwana wo Mundu nokhunywa amatsahi kaake simuli nobulamu mwinywe abene tawe. 54Uyo oliitsanga khumubili kwanje nanywa khu matsahi kanje, ali nende obulamu oburahwa ne nase ndimusimukusia mwitukhu liokhumal'likha. 55Okhuba inyama yomubili kwanje ebetsanga esiokhulia siatooto, ne amatsahi kanje kabetsanga esiokhunywa siatooto. 56Uyo olitsanga inyama yomubili kwanje nanywa amatsahi kanje, amenyanga mwise, nase menyanga muye. 57Papa oli mwoyo yaaruma ise, ne khulwa ye nase khandi menyanga. Munjila ndala yiyo, uyo olitsanga ise, aliba nobulamu khulwanje. 58Yiku nikwo omukaati okwekha okhurula mwikulu; sikuli singa omukaati okwabakuka benywe baliakhwo ma nibafwa tawe. Uyo olitsanga khumukati yiku alimenya emihika nemihika.” 59Yesu yaboola amang'ana yaka olwa yali niyebaalanga musinakoki ya Kaperinaumu.

Amang'ana akobulamu oburahwa

60Abenji khubalondi baabe bahulila yaka ma nibaboola, “Obwibaali yibu nobutinyu. Niwina onyala okhubumanyilisia?” 61Yesu namanya mumwoyo kukwe sila okhubool'lwakhwo mbu abechi bali nibamumuchil'langa khumang'ana yaka. Kho yababool'la mbu “Ling'ana yili lichilanga nimwenya okhufwa omwoyo noho? 62Ne khe kakhabe mbwena nimuba nimwakhalola Omwana wo Mundu naniinanga okhutsia owa yali okhurula? 63Omwoyo wa Nyasaye niye ohananga obulamu; obunyali bwomundu sibunyala esindu kata nahati tawe. Amang'ana aka ndali okhuboola khwinywe kaleranga Omwoyo wa Nyasaye ohananga obulamu. 64Ne baliho abalala khu inywe abarasubilanga tawe.” (Okhuba Yesu yali niyamanya okhurula olwokhuranga yabo abarasubila kata uyo olimusiemana.) 65Ma nameeta okhuboola, “Khusifune yisio ndali okhumubool'la mbu abulaho omundu onyala okhwitsa khwise, owa Papa aramunyaliye tawe.”

66Khulwa akene yaka, abenji khubalondi ba Yesu bamulekha, ne sibatsitsachil'la okhuchenda n'naye khandi tawe. 67Kho Yesu nareeba abechi likhumi nababili, “Nenywe khandi mwenya okhurula mutsie?”

68Simoni Petero namukalusia, “Omwami, khwakhatsia khuwina? Ibe oli namang'ana akahaananga obulamu oburahwa.#Mat. 16:16; Mk. 8:29; Lk. 9:20 69Nefwe khusubiye khandi khumanyile mbu niwe Omutsienukhu orul'le khu Nyasaye.”

70Yesu nabakalusia, “Sindaali okhumwela inywe abechi likhumi nababili? Nebutswa mulala khwinywe ali nes'sieno!” 71Yaka yali naralanga khu Yudasi wa Simoni Isikariote. Kata nikali Yudasi abetsanga mulala khubechi likhumi nababili niye owakhamusiemane.

ಪ್ರಸ್ತುತ ಆಯ್ಕೆ ಮಾಡಲಾಗಿದೆ:

YOHANA 6: EBAIBO

Highlight

ಶೇರ್

ಕಾಪಿ